Ngaahi Naunau Fakafeʻiloakí

Ko e Ako ʻi he Laumālié

“ʻI he Mālohi ʻo e Laumālie Māʻoniʻoní”

ʻI he kotoa ʻo e Tohi ʻa Molomoná, naʻe fakamamafaʻi ʻe he kau palōfitá ʻa e fatongia mahuʻinga ʻo e Laumālie Māʻoniʻoní. ʻOku finangalo ʻa e Tamai Hēvaní mo Sīsū Kalaisi ke ke ʻiloʻi Kinaua pea ke ako ʻa e moʻoní “ʻi he mālohi ʻo e Laumālie Māʻoniʻoní” (Molonai 10:5). ʻE lava ke tokoni atu ʻa e lēsoni ko ʻení ke ke ʻiloʻi ʻa e ngaahi fatongia mahuʻinga ʻo e Laumālie Māʻoniʻoní, ʻa ia ʻoku mahuʻinga ki hoʻo tupulaki mo e fakalakalaka fakalaumālié.

Fetuʻutaki fakalaumālié

Fakakaukau ki he ngaahi meʻangāue kehekehe ʻo e fetuʻutakí ʻoku ʻi he māmaní pea mo e founga te nau malava ke uesia ai hoʻo moʻuí. Ko e taha ʻo e ngaahi meʻangāue mahuʻinga kuó ne fakaleleiʻi lahi ʻa e fetuʻutakí fakaemāmani lahí ko e telefoni toʻotoʻó.

• Ko e hā ha fatongia ʻo e telefoni toʻotoʻó ʻi hono tokoniʻi e kakaí ke nau kei fetuʻutakí?

• ʻE tokoni fēfē ia ki ha taha ke ne maʻu ha ʻilo mo ha mahino lahi ange ki he māmaní?

Naʻe ʻafioʻi lelei ʻe he Tamai Hēvaní ʻa e mahuʻinga ʻo e fetuʻutaki fakalaumālié kiate kitautolu lolotonga ʻetau fononga ʻi he matelié, ʻo laka ange ʻi ha toe faʻahinga founga fetuʻutaki fakatuʻasino. Kuó Ne ʻomi ʻa e Laumālie Māʻoniʻoní ke tokoniʻi koe ke ke kei fetuʻutaki maʻu pē mo Ia pea mahino kiate koe ʻa e meʻa kotoa pē ʻoku fiemaʻu ki he fiefiá he taimí ni pea mo ho fakamoʻuí ʻamui ange.

Fakakaukau ki ha ngaahi mōmeniti ʻi hoʻo moʻuí kuó ke aʻusia ai ʻa e ivi tākiekina ʻo e Laumālie Māʻoniʻoní pea mo e founga kuo faitāpuekina ai ʻe Hono ivi tākiekiná hoʻo moʻuí. Mahalo te ke fifili pe kuo akoʻi koe ʻe he Laumālie Māʻoniʻoní pe ongoʻi Hono ivi takiekiná. ʻI hoʻo ako mo ʻiloʻi ʻa e ngaahi fatongia mahuʻinga ʻo e Laumālie Māʻoniʻoní, fakakaukauʻi e founga ʻe lava ke faitāpuekina ai ʻe Hono ivi tākiekiná hoʻo moʻuí, pea fakalaulauloto ki he ngaahi fehuʻi ko ʻení:

• ‘Oku fēfē nai ‘eku mahino ki he ngaahi fatongia ʻo e Laumālie Māʻoniʻoní?

• Ko e hā ha founga ke u fakaafeʻi lelei ange ai e ngaahi tāpuaki ʻo e Laumālie Māʻoniʻoní ki heʻeku moʻuí?

• Kuó u ongoʻi mo fakatokangaʻi fēfē ʻa e Laumālie Māʻoniʻoní ʻi heʻeku moʻuí?

Fatongia ‘e ua ʻo e Laumālie Māʻoniʻoní

ʻOku fakahoko ʻe he Laumālie Māʻoniʻoní ha ngaahi taumuʻa lahi mo ʻi ai hano ngaahi fatongia kehekehe. Lau e ngaahi potufolofola ko ʻení, ʻo kumi ha ongo fatongia mahuʻinga ʻe ua ʻo e Laumālie Māʻoniʻoní.

• Fatongia 1: 2 Nīfai 26:12–13; 3 Nīfai 28:11

• Fatongia 2: 1 Nīfai 10:19; Molonai 10:4–5

• Ko e hā naʻá ke maʻú?

Lau ʻa e fakamatala ko ʻeni ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e Laumālie Māʻoniʻoní ko e tokotaha fakahā mo e fakamoʻoni ia ki he moʻoni kotoa, tautautefito ka fekauʻaki mo e Fakamoʻuí. Ka ʻikai e Laumālie Māʻoniʻoní, he ʻikai ke tau lava ʻo ʻiloʻi moʻoni ko Sīsū ʻa e Kalaisí. Ko hono fatongia mahuʻingá ke fakamoʻoni ki he Tamaí mo e ʻAló mo Hona tuʻungá mo Hona nāunaú. (Quentin L. Cook, “Ko e Tāpuaki ʻo e Hokohoko e Maʻu Fakahā [ʻa e Kau Palōfitá] mo e Fakahā Fakafoʻituitui ke Tataki ʻEtau Moʻuí,” Liahona, Mē 2020, 98)

• Ko e hā ha ngaahi moʻoni ʻe lava ke maʻu mei he ngaahi fakamoʻoni fakafolofola naʻá ke akó mo e fakamatala ʻa ‘Eletā Kukí?

Ko e moʻoni mahuʻinga ʻe taha mahalo kuó ke ʻiloʻí ko hono akoʻi ʻe he Laumālie Māʻoniʻoní ʻa e moʻoní mo fakamoʻoniʻi ʻa e Tamai Hēvaní mo Sīsū Kalaisí.

ʻE lava ke ke hiki e ngaahi moʻoni ko ʻení pe ko ha ngaahi moʻoni tatau ʻi hoʻo folofolá pe tohinoa akó. ʻE lava ʻe hono lekooti maʻu pē ʻo e ngaahi moʻoní ʻo fakamālohia hoʻo manatu fakalaumālié mo fakaʻatā ʻa e Laumālie Māʻoniʻoní ke fakamanatu atu ʻi he taimi ʻoku fiemaʻu aí (vakai, Sione 14:26).

• ʻE lava fēfē ke ʻaonga ki hoʻo moʻuí ʻa e mahino e fatongia ‘e ua ko ʻeni ʻo e Laumālie Māʻoniʻoní?

Fakalaulauloto fakalongolongo ki ha faʻahinga aʻusia kuó ke maʻu ʻi he Laumālie Māʻoniʻoní mo e founga kuó ke fakatokangaʻi ai e ngāue ʻa e Laumālie Māʻoniʻoní ʻi hoʻo moʻuí.

• Kuo tokoniʻi fēfē koe ʻe he Laumālie Māʻoniʻoní ke ke ongoʻi ofi ange ki he Tamai Hēvaní mo Sīsū Kalaisí?

• Ko e fē ha taimi kuó ke ongoʻi ai hono fakamoʻoniʻi atu ʻe he Laumālie Māʻoniʻoní ʻa e moʻoní?

• Ko e hā ʻoku totonu ke ke fai kapau ʻoku ʻikai ke ke ongoʻi kuó ke maʻu ha aʻusia mo e Laumālie Māʻoniʻoní?

Ko hono ongoʻi mo fakaafeʻi ʻo e Laumālie Māʻoniʻoní

‘Oku malava ke fetuʻutaki ʻa e Laumālie Māʻoniʻoní mo kitautolu ‘i ha ngaahi founga lahi. ʻE lava ke fakamaama ʻe he Laumālié ho ʻatamaí, tokoni ke ke aʻusia ʻa e nongá mo e fiefiá, pea tataki koe ke ke fai ʻa e meʻa ʻoku totonú (vakai, Tokāteline mo e Ngaahi Fuakava 11:12–13; Kalētia 5:22–23). ʻOku faʻa fakamatalaʻi ʻe he folofolá Hono ivi takiekiná ko ha “kihiʻi leʻo-siʻi” ʻoku tau “ongoʻi” (vakai, 1 Nīfai 17:45).

Naʻe vahevahe ʻe ‘Eletā Lainolo A. Lasipeni ʻo e Kōlomu ʻo e Kau ʻAposetolo ʻe Toko Hongofulu Mā Uá ha niʻihi ʻo e ngaahi founga ʻe lava ke fetuʻutaki ai ʻa e Laumālie Māʻoniʻoní mo kitautolú:

ʻOku ou ʻiloʻi ko e fetuʻutaki ʻa e Laumālié ʻoku faʻa hoko mai ia ko ha ongo. ʻOkú ke ongoʻi ia ʻi ha ngaahi lea ʻokú ke angamaheni ki ai, ʻoku mahino kiate koe, mo ne ueʻi koe. …

… ʻOku lea ʻaki ʻe he Laumālié ha ngaahi lea ʻoku tau ongoʻi. Ko e ngaahi ongo ko ʻení ʻoku angavaivai, ko ha ueʻi ke tau ngāue, ke fai ha meʻa, pe lea, ke tali ʻi ha founga pau. Kapau ʻoku tau fakavaʻivaʻinga pe moihū fakafiefiemālie, ʻo taʻe tokanga mo tuku hotau lotó ki he ngaahi meʻa ʻo e māmaní, ʻe holo leva ʻetau malava ke ongoʻí. (Ronald A. Rasband, “Tuku ke Taki ʻa e Laumālie Māʻoniʻoní,” Liahona, Mē 2017, 94)

 

Feeling the Holy Ghost

Feelings of the Holy Spirit can be likened to hope, joy and peace in your heart and mind.

• Ko e hā ha ngaahi founga ke ongoʻi ai ʻa e tākiekina ʻa e Laumālie Māʻoniʻoní?

• ʻE lava fēfē ke hoko hoʻo ʻiloʻi ʻa e taimi ʻokú ke ongoʻi ai ʻa e Laumālie Māʻoniʻoní ko ha tāpuaki ʻi hoʻo moʻuí?

ʻOku ʻi he folofolá ha ngaahi sīpinga lahi ʻo ha niʻihi fakafoʻituitui naʻa nau fekumi faivelenga ki he ivi tākiekina ʻo e Laumālie Māʻoniʻoní. Ko e niʻihi ʻo kinautolu ko Nīfai mo e ngaahi foha ʻo Mōsaiá ʻi he Tohi ʻa Molomoná.

Lau ʻa e 1 Nīfai 2:16–17 mo e ʻAlamā 17:2–3, ʻo kumi ki he ngaahi ngāue māʻoniʻoni naʻá ne fakaafeʻi ʻa e Laumālie Māʻoniʻoní.

• Makatuʻunga ʻi he ngaahi veesi ko ʻení mo hoʻo ngaahi fakakaukau pē ʻaʻaú, ko e hā ha ngaahi founga te tau lava ai ʻo fakaafeʻi mai e Laumālie Māʻoniʻoní ki heʻetau moʻuí?

1. Fakakakato e ngaahi meʻa ko ʻení:

   Faʻu ha palani ke fakaafeʻi mo ako lelei ange ai mei he Laumālie Māʻoniʻoní ʻi hoʻo ako ʻa e ongoongoleleí ʻi he seminelí, ʻi ʻapi, pea ʻi he Siasí. Fakakau e ngaahi founga pau te ke lava ʻo fakaafeʻi mai ai e Laumālie Māʻoniʻoní ki hoʻo moʻuí mo e meʻa te ke lava ʻo fai ke fakatokangaʻi ai e ivi tākiekina ʻo e Laumālié ʻi hoʻo moʻuí.

   Fakakaukau ke ke vahevahe hoʻo palaní mo ha mēmipa falalaʻanga ʻo e fāmilí pe kaungāmeʻa, pea aleaʻi maʻu pē hoʻo fakalakalaká mo ia.

Fili: Fie Ako Lahi Ange?

Te u teuteu fēfē ke maʻu mo muimui ki he fakahinohino ʻa e Laumālie Māʻoniʻoní?

Naʻe akoʻi ʻe ʻEletā Kuenitini L. Kuki ‘o e Kōlomu ʻo e Kau ʻAposetolo ʻe Toko Hongofulu Mā Uá ha ngaahi founga te tau lava ai ʻo teuteu ke maʻu ha fakahā fakataautaha ʻo fakafou ʻi he Laumālie Māʻoniʻoní. Mamataʻi ‘a e vitiō “Ko e Tāpuaki ʻo e Hokohoko e Maʻu Fakahaá [ki he Kau Palōfitá] mo e Fakahā Fakafoʻituituí ke Tataki ʻEtau Moʻuí” (14:10) mei he taimi kouti 10:08 ki he 11:42.

Ko e Tāpuaki ʻo e Hokohoko e Maʻu Fakahaá mo e Fakahā Fakafoʻituituí ke Tataki ʻEtau Moʻuí

ʻOku akoʻi ʻe ʻEletā Kuki ʻoku hojkohoko atu e maʻu fakahā ʻa e kau palōfitá ke tataki ʻa e Siasí pea te tau lava ke maʻu fakahā ke tataki ʻetau moʻuí.

ʻOku akoʻi ʻe ʻEletā Kuki ʻoku hokohoko atu e maʻu fakahā ʻa e kau palōfitá ke tataki ʻa e Siasí pea te tau lava ʻo maʻu fakahā ke tataki ʻetau moʻuí.

Te u lava fēfē ʻo tala ʻoku ou ongoʻi ʻa e Laumālié pe maʻu pē ha ngaahi fakakaukau mo e ngaahi ongo kehe?

Ako meia ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá mo Sisitā Sūsana Petinā ʻi heʻena fakamatalaʻi ʻa e founga ke ongoʻi mo fakatokangaʻi ai ʻa e Laumālie Māʻoniʻoní.  

Elder and Sister Bednar- Recognizing the Spirit

Elder and Sister Bednar talk about learning how to recognize the Holy Ghost.

Fēfē kapau he ʻikai ke u maʻu ha loto-falala te u lava ʻo ako mei he Laumālie Māʻoniʻoní?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

To Acquire Spiritual Guidance

By careful practice, through the application of correct principles, and by being sensitive to the feelings that come, you will gain spiritual guidance.

Ko e ngāue ko ia ʻe hā ngali fakapipiko he kamataʻangá, ʻe ʻalu pē taimí mo ʻene toe faingofua angé ʻi hoʻo feinga maʻu pē ke ʻiloʻi mo muimui ki he ngaahi ueʻi ʻa e Laumālié. Ko hoʻo falala ko ia ki he fakahinohino ʻokú ke maʻu mei he Laumālie Māʻoniʻoní, ʻe ʻalu pē ke toe mālohi ange. ʻOku ou fakamoʻoni atu ko hoʻo aʻusia ko ia mo ola lelei hono tākiekina koe ʻe he Laumālié, ʻe toe pau ange ʻa e ngaahi ongo ʻokú ke maʻú, ʻi hoʻo fakafalala ki he meʻa ʻokú ke mamata mo fanongo pē ki aí. (Richard G. Scott, “Ke Maʻu Ha Tataki Fakalaumālie,” Liahona, Nōvema 2009, 7)

ʻE toe lava fēfē nai ke tokoniʻi au ʻe he Laumālie Māʻoniʻoní?

Naʻe akoʻi ʻe Palesiteni ʻEselā Tafu Penisoni (1899–1994):

Lotu ki he Tamai Hēvaní ke tāpuakiʻi ʻaki koe Hono Laumālié ʻi he taimi kotoa pē. ʻOku tau faʻa ui ʻa e Laumālié) ko e Laumālie Māʻoniʻoni. Ko e Laumālie Māʻoniʻoní ko ha meʻafoaki foki ia mei he Tamai Hēvaní. ʻOku tokoni atu ʻa e Laumālie Māʻoniʻoní ke ke fili ʻa e totonú. ʻE maluʻi koe ʻe he Laumālie Māʻoniʻoní mei he koví. ʻOkú ne fanafana atu kiate koe ʻi ha kihiʻi leʻo vanavanaiki ke ke fai lelei. Ko e taimi ʻokú ke fai lelei aí, ʻokú ke ongoʻi lelei, pea ko e Laumālie Māʻoniʻoní ia ʻoku lea atu kiate koé. Ko e Laumālie Māʻoniʻoní ko ha takaua lelei. ʻOkú ne ʻi ai maʻu pē ke tokoni atu. (Ezra Taft Benson, “To the Children of the Church,” Liahona, May 1989, 82)