“1 Nīfai 3: ʻOku Teuteu ʻe he ʻOtuá ha Hala,’” Tohi ʻa Molomoná - Tohi Lēsoni ʻa e Tokotaha Akó (2024)
“1 Nīfai 3: ʻOku Teuteu ʻe he ʻOtuá ha Hala,’” Tohi ʻa Molomoná - Tohi Lēsoni ʻa e Tokotaha Akó
1 Nīfai 3
ʻOku Teuteu ʻe he ʻOtuá ha Hala
Hili ʻenau fononga ʻi ha ngaahi ʻaho ʻi he feituʻu maomaonganoá, naʻe fehangahangai ʻa Nīfai mo hono ngaahi tokouá mo ha sivi ʻo ʻenau talangofua mo e tui ki he ʻOtuá ʻi he taimi naʻe fekauʻi ai kinautolu ke nau foki ki Selusalema ke ʻomai ʻa e ʻū lauʻi peleti palasá meia Lēpaní. ʻI he taimi ʻe niʻihi, ʻe kole atu foki ʻe he ʻEikí ke ke fai ha ngaahi meʻa faingataʻa. ʻE lava ke tokoniʻi koe ʻe he lēsoni ko ʻení ke ke ngāue ʻaki ʻa e tui ki he ʻOtuá ke fakahoko ʻa e meʻa ʻokú Ne kole atu ke ke faí.
Ngaahi fekau faingataʻá
-
Ko e fē ʻa e ngaahi fekau, tuʻunga moʻui, pe ngaahi fakaafe fakaepalōfita kehe ʻoku faingataʻa taha ke talangofua ki ai e toʻutupú he ʻaho ní? Ko e hā ʻokú ne ʻai ke faingataʻa ange ai e ngaahi meʻá ni ʻi he ngaahi meʻa kehé?
-
Ko e hā te ke talaange ki ha taha ʻokú ne ongoʻi ʻoku fuʻu faingataʻa ke tauhi ha fekau pe tuʻunga moʻui pau?
Kapau ʻoku ʻi ai ha fekau kuo faingataʻa maʻu pē ke ke talangofua ki ai, manatuʻi ia ʻi hoʻo ako ʻa e 1 Nīfai 3. Feinga ke ke ako mei he ngaahi sīpinga ʻokú ke akó, pea fakalaulauloto ki he founga ʻe lava ke tākiekina ai ʻe hoʻo ngaahi filí ho vā fetuʻutaki mo e ʻEikí.
Ko e ʻoange ʻe he ʻEikí ha fekau ki he ngaahi foha ʻo Līhaí
Lau ʻa e 1 Nīfai 3:1–6, ʻo kumi e meʻa naʻe fekauʻi e ngaahi foha ʻo Līhaí ke nau faí.
-
ʻOkú ke pehē ko e hā naʻe tonu ai hono ui ʻe he ongo taʻokete ʻo Nīfaí ʻa e fekau ko ʻení ko ha “meʻa faingataʻá”? (veesi 5).
Fakakaukauloto angé ki he ongo naʻe maʻu ʻe he ngaahi foha ʻo Līhaí ʻi heʻenau mavahe mei honau ʻapí ʻo fononga ʻi ha maile ʻe laungeau ʻi ha fonua pakukā ki he toafá, hili ko iá pea toe kole ange ke nau foki ki Selusalema hili ha taimi nounou mei ai ke ʻomi e ʻū lauʻi peletí meia Lēpani.
Lau ‘a e 1 Nīfai 3:7–8 pea feinga ke ‘iloʻi ‘a e ‘uhinga naʻe fakahā ai ‘e Nīfai ‘ene loto fiemālie ke fakahoko e fekau ‘a e ‘Eikí.
Ko e 1 Nīfai 3:7 ko ha potufolofola fakataukei fakatokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.
-
Ko e hā naʻe mahino kia Nīfai naʻe ʻikai mahino ki hono ongo taʻoketé?
Ko e meʻa ʻe taha ʻoku tau ako mei he veesi 7 ʻoku teuteuʻi ʻe he ʻOtuá ha founga ke tau lavaʻi ai ha meʻa pē ʻokú Ne kole mai ke tau fai.
Fakakaukau ki he founga ʻoku fekauʻaki ai e foʻi moʻoni ko ʻení mo e ngaahi fekau ʻe ala faingataʻa kiate koé.
Neongo ʻe tokoniʻi koe ʻe he ʻOtuá ke ke lavaʻi e meʻa ʻokú Ne kole maí, ka kuo teʻeki ke Ne talaʻofa mai ʻe faingofua pe ʻe ola lelei hoʻo fuofua feingá.
Naʻe fakamatala ʻa Palesiteni Tieta F. ʻUkitofa, ʻi heʻene hoko kimuʻa ko e mēmipa ʻo e Kau Palesitenisī ʻUluakí ʻo pehē:
He ʻikai hanga ʻe he muimui ia ki he Fakamoʻuí ʻo toʻo atu ho ngaahi faingataʻá kotoa. Ka te ne toʻo atu e meʻa ʻokú ne fakafeʻatungiaʻi e tokoni ko ia ʻoku finangalo e Tamai Hēvaní ke ke maʻú. Te ke feʻao mo e ʻOtuá. (Dieter F. Uchtdorf, “Ko ha Fakaʻānaua ki ʻApi,” Liahona, Nōvema 2017, 22)
-
Ko e hā ʻoku tokoni atu e ngaahi fakamatalá ni ke mahino kiate koe fekauʻaki mo e Tamai Hēvaní mo Sīsū Kalaisí?
Fakakaukau ki he ngaahi fekau, tuʻunga moʻui, pe ngaahi fakaafe fakaepalōfita kehe ne mou ʻosi maʻu kimuʻa ʻi he lēsoní ʻe faingataʻa taha ia ke talangofua ki ai e toʻutupú.
-
Ko e hā ha ngaahi tūkiaʻanga te ne lava ʻo ʻai ke faingataʻa ai hoʻo talangofua ki he ngaahi fekau ko ʻení?
-
Ko e hā ha founga ʻe lava ai ʻe he ʻEikí ʻo “teuteu ha hala” ke tokoniʻi e toʻutupú ke nau talangofua ki he ngaahi fekau ko ʻení?
Ko e feinga ʻa Nīfai mo hono ngaahi tokouá ke maʻu e ʻū lauʻi peletí
Ako e ngaahi fakamatala ko ʻeni ʻo e ongo ʻuluaki feinga ke maʻu ʻa e ʻū lauʻi peleti palasá. Kumi e tali ʻa e kau tautehiná ki he feinga takitaha. (Fakatokangaʻi ange: ʻI he lēsoni “1 Nīfai 4–5” te mou ako ai ki he founga ne faifai pea ʻomi ai ʻe he ʻEikí ha founga ke nau lavameʻa aí.)
ʻUluaki feingá: Lau ʻa e 1 Nīfai 3:10–15 pe mamata ʻi he “ʻOku Tataki ʻe he Laumālié ʻa Nīfai ke Maʻu e ʻŪ Peleti Palasá” mei he taimi 4:43 ki he 8:18. ʻOku maʻu e vitioó ni ʻi he ChurchofJesusChrist.org. (Mahalo ʻe tokoni ke ʻiloʻi ko e talotaló ko ha founga ia ʻo hono fili tavale pē ha meʻa ʻe taha mei ha ngaahi meʻa lahi.)
ʻOku Tataki ʻe he Laumālié ʻa Nīfai ke Maʻu e ʻŪ Peleti Palasá |1 Nīfai 3–5
‘Oku ’ave ‘e Līhai hono ngaahi fohá ki Selusalema ke ’omai ‘a e ngaahi lekooti toputapú. Naʻe fakaofo ʻenau lavaʻí neongo e ngaahi faingataʻá mo ʻenau fetōkehekeheʻakí.
Feinga hono uá: Lau ʻa e 1 Nīfai 3:22–31; 4:1, pe mamata ʻi he “ʻOku Tataki ʻe he Laumālié ʻa Nīfai ke Maʻu e ʻŪ Peleti Palasá” mei he taimi 8:18 ki he 15:10.
ʻOku Tataki ʻe he Laumālié ʻa Nīfai ke Maʻu e ʻŪ Peleti Palasá |1 Nīfai 3–5
‘Oku ’ave ‘e Līhai hono ngaahi fohá ki Selusalema ke ’omai ‘a e ngaahi lekooti toputapú. Naʻe fakaofo ʻenau lavaʻí neongo e ngaahi faingataʻá mo ʻenau fetōkehekeheʻakí.
-
Tali e ngaahi fehuʻi ko ʻení ʻi hoʻo tohinoa akó:
-
Ko e hā naʻe mei ako ʻe he kau tautehina ko ʻení fekauʻaki mo kinautolu mei he ngaahi faingataʻa naʻa nau fehangahangai mo ia lolotonga ʻenau feinga ke talangofua ki he fekau ʻa e ʻOtuá?
-
ʻOkú ke pehē ko e hā ʻe fakaʻatā ai kitautolu ʻe hotau ʻOtua ʻofá ke tau faingataʻaʻia ʻi ha kiʻi taimi kimuʻa peá Ne ʻomi ha founga ke fakahoko ai Hono finangaló?
-
ʻOkú ke pehē naʻe tākiekina fēfē ʻe he ngaahi fakafeangai kehekehe ʻa e kau tautehiná ki he meʻa naʻe hokó ʻa ʻenau tui mo e vā fetuʻutaki mo Sīsū Kalaisí? Ko e hā hono ʻuhingá?
-
Ko hono fakaʻaongaʻi ʻo e fakamatala ko ʻení ʻi hoʻo moʻuí
ʻE lava ke tokoniʻi koe ʻe he Fakamoʻuí ke ke ikunaʻi e ngaahi tūkiaʻanga ʻokú ne ʻai ke faingataʻa ange hoʻo talangofua ki Heʻene ngaahi fekaú mo muimui ki he faleʻi ʻa ʻEne kau palōfitá. Tali ʻa e ngaahi fehuʻi ko ʻení ʻi hoʻo tohinoa akó ke tokoni atu ke ke fakaʻaongaʻi ʻeni ʻi hoʻo moʻuí.
-
Fakakaukauloto pē ʻoku ʻoatu ʻe Nīfai ha faleʻi kiate koe fekauʻaki mo ha fekau pe faleʻi ʻa e palōfitá ʻa ia ʻoku faingataʻa ke ke talangofua ki ai. ʻOkú ke pehē ko e hā te ne talaatú?
-
Ko e hā ha ngaahi ngāue pau te ke fai ke talangofua kakato ange ai ki ha taha ʻo e ngaahi fekau ʻa e ʻEikí pe ngaahi faleʻi ʻa e palōfitá?
-
Ko e hā kuó ke mamata pe aʻusia ʻokú ne ʻoatu ha loto-falala ʻe teuteu ʻe he ʻEikí ha founga maʻau ke ke talangofua ai ki Heʻene ngaahi fekaú mo muimui ki Heʻene palōfitá?