“Atamai i Aoaoga Faavae: 1 Nifae 3:7: ‘O Le a Ou Alu ma Fai Mea ua Poloaiina e le Alii,’” Tusi Lesona a Tagata o le Vasega o le Tusi a Mamona (2024)

“Atamai i Aoaoga Faavae: 1 Nifae 3:7: ‘O Le a Ou Alu ma Fai Mea ua Poloaiina e le Alii,’” Tusi Lesona a Tagata o le Vasega o le Tusi a Mamona

Atamai i Aoaoga Faavae: 1 Nifae 3: 7

“O Le A Ou Alu Ma Fai Mea ua Poloaiina e le Alii.”

I se lesona talu ai, sa e aoao ai e saunia pea lava e le Alii se ala mo i tatou e faataunuu ai mea ua Ia poloaiina i tatou e fai. O lenei lesona o le a fesoasoani ia te oe e tauloto ai mau faasino ma le fasifuaitau autu o le mau mo le 1 Nifae 3:7, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani faale-soifuaga.

Faamatala ma tauloto

O se tasi o faamoemoega o le atamai i aoaoga faavae o le faataga lea o oe e faataitai le faamatalaina o upumoni o le talalelei a Iesu Keriso i au lava upu. E anoanoai auala e mafai ona e faamanuia ai olaga o i latou o siomia oe a o e malamalama atili ma faataitai le faamatalaina o aoaoga faavae a le Faaola o loo maua i Ana tusitusiga paia.

Faitau le 1 Nifae 3:7 ma aotele mea o loo aoao mai ai i au lava upu.

Taumafai e mafaufau i se tulaga e mafai ai e upumoni o loo aoao mai i lenei fuaiupu ona fesoasoani i se tasi. Ona tali lea o fesili nei:

O a upumoni mai lenei fuaiupu o le a e faasoa atu i se tasi i le tulaga na e mafaufau i ai? Aisea?
O a ni auala eseese e ono saunia ai e le Atua se ala mo i tatou e faataunuu ai mea ua Ia poloai mai ai?
O a ni aafiaga e mafai ona e faasoa atu e faapupula ai le upumoni faapea e saunia e le Atua se ala mo i tatou e faataunuu ai soo se mea e finagalo o Ia tatou te faia?

Faaaoga ni nai minute e tauloto ai le mau faasino ma le fuaitau autu o le mau mo le 1 Nifae 3:7: “O le a ou alu ma fai mea ua poloaiina e le Alii.” O se tasi o auala e faia ai lenei mea o le mafaufau lea i poloaiga eseese ua tuuina mai e le Alii ma toe fai i lou mafaufau le fasifuaitau autu o le mau pe a uma.

Faataitai o le faaaogaina

O le a tatou feagai uma ma tulaga faigata ma talosagaina e le Atua e faia mea faigata i o tatou olaga. O le faaaogaina o mataupu faavae o le mauaina o le malamalama faaleagaga e mafai ona fesoasoani e faamalosia ai lou faatuatua ia Iesu Keriso a o e taulimaina nei tulaga.

Faitau i tala faataitai nei ma filifili se tasi e te manao e taulai i ai mo le isi gaoioiga e sosoo ai.

E alofa Sara i le Alii ma e manao e auauna atu i Lana Ekalesia. Peitai, sa ia mauaina talu ai nei se tofiga o le Ekalesia na te lagonaina le le agavaa e faataunuuina. Sa ia taliaina le tofiga ae ua musu e agai i luma.
Ua lagona e Rosa le faanoanoa ia te ia lava ona o loo tauivi o ia e tausia se poloaiga patino. Sa usitai o ia i le poloaiga i nisi taimi ae na te lei faia pea lava pea.

Faatino i le faatuatua

Faitau parakalafa 5–7 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022).

Tali fesili nei:

E mafai faapefea e le saunoaga a Elder Holland i le parakalafa 6 ona fesoasoani ia Sara po o Rosa?
Afai e le mafai e Sara po o Rosa ona vave faataunuuina le mea ua poloai mai ai le Atua, e mafai faapefea e upumoni e uiga i le Tama Faalelagi i le parakalafa 7 ona fesoasoani?
Afai na i ai ni ou manatu e talitutusa ma manatu o Sara po o Rosa, o le a se mea na fesoasoani pe mafai foi ona fesoasoani ia te oe e agai ai i luma ma le faatuatua ia Iesu Keriso?

Iloilo manatu faavae ma fesili faatasi ma se vaaiga e faavavau

Faitau le palakalafa 8 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae. Mafaufau e maka ia le itiiti ifo ma le lua ni fasifuaitau po o ni manatu e te manatu e mafai ona fesoasoani ia Sara po o Rosa.

Tali fesili nei:

E mafai faapefea e fasifuaitau taitasi na e filifilia ona fesoasoani ia Sara po o Rosa?
O le a se mea ua e iloa e uiga i le Tama Faalelagi ma le ala Na te taulimaina ai Ana fanau e mafai ona fesoasoani?
E mafai faapefea e le maimoaina o le tulaga i le matalalaga o le fuafuaga o le faaolataga ona fesoasoani?

Saili le malamalama atili e ala i punavai mamana ua atofaina

Faitau le palakalafa 11 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

Tali fesili nei:

O fea e te fautuaina ai Sara po o Rosa e vaavaai mo upumoni e mafai ona fesoasoani ia te ia?

Faaaoga ni nai minute e saili ai punavai paia ua atofaina mo upumoni e te lagona e faatatau i le tulaga. O se tasi o punavai e mafai ona e filifilia o le lisi o fuaitau o le atamai i aoaoga faavae o loo maua i le faaiuga o le Pepa Autu o le Atamai i Aoaoga Faavae. Mafaufau e faitau fasifuaitau autu o mau o fuaitau o le Tusi a Mamona, ma vaavaai mo fuaitau e mafai ona fesoasoani. Ia mautinoa e aofia ai le 1 Nifae 3:7 o se tasi o au punavai.

O le a se mea na e mauaina e ono mafai ona e faasoa atu?
Na faapefea ona faia e upumoni na e mauaina se eseesega i lou olaga?

Fuaitau ma Fasifuaitau Autu Muamua e 12 o le Atamai i Aoaoga Faavae

Tusi Lesona a le Faiaoga o le Tusi a Mamona (2024)

Mau Faasino	Fasifuaitau Autu o le Mau
Mau Faasino 1 Nifae 3:7	Fasifuaitau Autu o le Mau “O le a ou alu ma fai mea ua poloaiina e le Alii.”
Mau Faasino 2 Nifae 2:25	Fasifuaitau Autu o le Mau “Na pa’ū Atamu ina ia i ai tagata; ma ua i ai tagata, ina ia latou maua le olioli.”
Mau Faasino 2 Nifae 2:27	Fasifuaitau Autu o le Mau “Ua latou saoloto e filifili le saolotoga ma le ola e faavavau … pe … [o] le faatagataotauaina ma le oti.”
Mau Faasino 2 Nifae 26:33	Fasifuaitau Autu o le Mau “Ua tutusa tagata uma i le Atua.”
Mau Faasino 2 Nifae 28:30	Fasifuaitau Autu o le Mau O le Atua e “tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu.”
Mau Faasino 2 Nifae 32:3	Fasifuaitau Autu o le Mau “Ia taumamafa fiafia i afioga a Keriso; aua faauta, o afioga a Keriso o le a taʼu mai ai ia te outou mea uma e tatau ona outou faia.”
Mau Faasino 2 Nifae 32:8–9	Fasifuaitau Autu o le Mau “E ao ina outou tatalo e le aunoa.”
Mau Faasino Mosaea 2:17	Fasifuaitau Autu o le Mau “Pe a outou auauna atu i o outou uso a tagata, ua nao lo outou auauna atu lava lea i lo outou Atua.”
Mau Faasino Mosaea 2:41	Fasifuaitau Autu o le Mau “O i latou o e e tausi i poloaiga a le Atua … e faamanuiaina i latou i mea uma.”
Mau Faasino Mosaea 3:19	Fasifuaitau Autu o le Mau “[Tuu] ese le tagata natura ma [avea] ma tagata paia e ala i le togiola a Keriso le Alii.”
Mau Faasino Mosaea 4:9	Fasifuaitau Autu o le Mau “Ia talitonu i le Atua; … ia talitonu ua ia te ia le poto uma.”
Mau Faasino Mosaea 18:8–10	Fasifuaitau Autu o le Mau Ia “papatisoina i le suafa o le Alii, o se molimau … ua outou ulu atu i se feagaiga faatasi ma ia.”