2 Nephi 2:17–26

“Natubos gikan sa Pagkapukan”

Pagbiya sa Tanaman sa Eden

Naghunahuna ka ba sukad kon sa unsang paagi ang mga pagpili nga gihimo ni Adan ug Eva liboan ka tuig na ang milabay mahimong makaapekto gihapon kanimo? Gitudloan ni Lehi ang iyang mga anak mahitungod sa mga epekto sa Pagkapukan ni Adan ug Eva ug nga uban sa Manluluwas atong mabuntog ang tanang mga hagit sa mortalidad. Kini nga leksiyon makatabang kanimo nga mas makadayeg sa Manluluwas ug sa Iyang Pag-ula samtang imong masabtan ang Pagkapukan ni Adan ug Eva.

Mga Posibleng Kalihokan sa Pagkat-on

Ang pagsabot mosangpot sa pagdayeg

Pamalandongi ang mosunod nga mga pangutana:

• Sa sukdanan nga 1 hangtod sa 10 (ang 1 kay “wala gayod” ug ang 10 kay “nasabtan kaayo”), unsa ka dako ang imong pagbati nga imong nasabtan ug gidayeg ang Manluluwas nga si Jesukristo ug ang Iyang pagsakripisyo alang kanimo? Ngano man?

• Kon adunay mangutana nimo kon unsay iyang buhaton aron masabtan ug madayeg ang Pag-ula ni Jesukristo, unsay imong isulti?

Si Elder Jeffrey R. Holland a Korum sa Napulog Duha ka Apostoles mipunto og usa ka gikinahanglan nga lakang aron mas masabtan ang Pag-ula sa Manluluwas. Mahimo nimong tan-awon ang bidyo “Asa ang Hustisya, Gugma, ug Kaluoy Mag-abot” gikan sa time code 6:51 hangtod sa 7:26 o basaha ang mosunod nga pamahayag:

Elder Jeffrey R. Holland

Ang yanong kamatuoran mao nga kita dili hingpit nga makasabot sa Pag-ula ug Pagkabanhaw ni Jesukristo ug dili nato igong masabtan ang talagsaong katuyoan sa Iyang pagkatawo o sa Iyang kamatayon … kon dili masabtan nga adunay tinuod nga Adan ug Eva nga napukan gikan sa Eden lakip na ang tanang sangpotanan niana nga pagkapukan. (Jeffrey R. Holland, “Asa ang Hustisya, Gugma, ug Kaluoy Mag-abot,” Liahona, Mayo 2015, 105)

Aron matabangan ka sa pagtimbang-timbang kon unsa na ka daghan ang imong nahibaloan bahin sa Pagkapukan ni Adan ug Eva, hunahunaa ang mosunod nga mga pangutana:

• Unsa ang Pagkapukan ni Adan ug ni Eva?

• Unsay mga epekto sa Pagkapukan nganha sa kalibotan? nganha kanimo?

• Sa unsang paagi nga ang Pagkapukan mihaum sa plano sa Langitnong Amahan sa kaluwasan?

• Sa unsang paagi ang Pagkapukan nagtabang kanimo nga masabtan ug madayeg si Jesukristo ug ang Iyang pagsakripisyo alang kanimo?

Samtang magtuon ka, pangita og mga tubag niini nga mga pangutana ug pamalandongi kon sa unsang paagi ang pagsabot niini makatabang kanimo.

Ang mga epekto sa Pagkapukan ni Adan ug ni Eva

Dihang nangandam na si Lehi nga mamatay, nakig-istorya kini pag-ayo sa iyang anak nga si Jacob mahitungod sa Pagkapukan ni Adan ug Eva. Si Adan, Eva, ug ang tanang matang sa kinabuhi sa yuta nabuhi sa imortal nga kahimtang, wala pa mapaubos sa kamatayon, ug anaa sa presensiya sa Dios. Nianang kahimtanga, dili sila mahimong masakit o mamatay, ug ang tanaman mihatag og pagkaon alang kanila nga dili na sila kinahanglang maghago aron sa pagpatubo niini. Dili usab sila makabaton og pamilya. Ang Ginoo mipahimangno kanila nga kon sila mokaon sa bunga sa kahoy sa kahibalo sa maayo ug dautan, sila sa kataposan mamatay (tan-awa ang Moises 3:16–17; Abraham 5:12–13). Ang desisyon ni Adan ug Eva sa pagkaon niana nga bunga ug ang mga sangpotanan alang kanila ug sa tibuok kalibotan nailhan nga Pagkapukan.

Basaha ang 2 Nephi 2:19–23 ug ang Alma 42:6–9, nga mangita sa mga sangpotanan sa Pagkapukan. Ikonsiderar ang pagmarka sa unsay imong mapalgan.

icon, rekord

1. Kompletoha ang mosunod diha sa imong journal sa pagtuon:

   Paghimo og lista sa mga sangpotanan sa Pagkapukan.

   Mahimong makatabang nga ang mga estudyante magtinabangay diha sa gagmay nga mga grupo o magsulat og lista diha sa pisara isip usa ka klase.

• Unsay inyong bation kon kamo sila si Adan ug Eva nga nagsinati niini nga mga sangpotanan?

• Sa imong hunahuna kini ba nga mga epekto maayo, dili maayo, o pareho? Ngano man?

Basaha ang 2 Nephi 2:24–25, ug hunahunaa kon unsaon nimo pagpamubo [summarize] niini nga mga bersikulo sa imong kaugalingong mga pulong.

Ang 2 Nephi 2:25 usa ka tudling sa doktrinal nga kahanas.  Ikonsiderar ang pagmarka sa mga tudling sa doktrinal nga kahanas sa lahi nga paagi aron dali nimo kining mapangita. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

Usa ka kamatuoran nga gitudlo ni Lehi mao nga ang Pagkapukan usa ka mahinungdanong bahin sa plano sa kalipay sa Langitnong Amahan.

Paggahin og panahon sa pagpamalandong kon nganong ang Pagkapukan usa ka mahinungdanong bahin sa plano sa Langitnong Amahan samtang imong basahon kining pamahayag ni Elder Jeffrey R. Holland sa Korum sa Napulog Duha ka Apostoles:

Elder Jeffrey R. Holland

Ang Pagkapukan usa ka importanting bahin sa balaan nga plano sa Langitnong Amahan. Kon wala pa kini walay mortal nga mga anak ang natawo unta ngadto ni Adan ug Eva, ug wala untay tawhanong pamilya nga mosinati sa oposisyon ug pagtubo, moral nga kabubut-on, ug sa hingpit nga kalipay sa pagkabanhaw, katubsanan, ug kinabuhing dayon [tan-awa sa 2 Nephi 2:22–27; Moises 5:11]. (Jeffrey R. Holland, “Ang Pag-ula ni Jesukristo,” Liahona, Mar. 2008, 34–35)

• Ngano nga ang Pagkapukan usa ka mahinungdanon nga bahin sa plano sa Langitnong Amahan?

Nagkinahanglan pa kita og tabang

Bisan og ang mga sangpotanan sa Pagkapukan kabahin sa plano sa atong Langitnong Amahan ug gituyo aron sa pagtabang kanato nga mouswag, dili kita makabati og tinuod nga kalipay kon walay balaanong tabang.

Basaha pag-ayo ang 2 Nephi 2:26, nga mangita kon sa unsang paagi mahimong posible nga mabuntog ang mga epekto sa Pagkapukan ug mobati og kalipay. Dayon basaha ang Moises 5:10–11, nga pagamatikdan kon unsa nga mga kamatuoran ang midala kang Adan ug Eva sa pagmaya.

• Unsay imong nakat-onan?

• Ngano sa imong hunahuna si Adan ug Eva nagmaya human makakat-on mahitungod sa Pagkapukan ug sa Pag-ula ni Jesukristo?

icon, rekord

2. Kompletoha ang mosunod:

   Hunahunaa nga sa usa ka panaghisgotan uban sa usa ka higala, imong namatikdan nga wala siya makadayeg sa Manluluwas o sa Iyang Pag-ula.

   • Unsa nga kahibalo mahitungod sa Pagkapukan ni Adan ug Eva ang makatabang kaniya sa pagdayeg sa Manluluwas ug sa Iyang Pag-ula?

Opsiyonal: Gustong Makakat-on pa og Dugang?

Unsay angay natong bation bahin kang Eva nga mikaon sa bunga?

Si Presidente Dallin H. Oaks sa Unang Kapangulohan mipahayag:

Presidente Dallin H. Oaks

Ang ubang mga Kristiyanos mihimaraot ni Eva sa iyang gihimo, mihukom nga siya ug ang iyang mga anak nga babaye sa bisan unsa pa man mahuyang bahin niini. Apan dili ang mga Santos sa Ulahing mga Adlaw! Napahibalo pinaagi sa pagpadayag, atong gikalipay ang gihimo ni Eva ug gitahod ang iyang kaalam ug kaisog nianang talagsaong yugto nga gitawag og Pagkapukan. (Dallin H. Oaks, “The Great Plan of Happiness,” Ensign, Nob. 1993, 73)

Unsaon nato pagkaplag og hingpit nga kalipay sa gubot nga kalibotan?

Si Presidente M. Russell Ballard sa Korum sa Napulog Duha ka Apostoles mipahayag:

Presidente M. Russell Ballard

Si propeta Lehi mitudlo [nga ang], “Mga lalaki [ug mga babaye] [naingon],nga unta sila makabaton og hingpit nga kalipay” [2 Nephi 2:25]. Adunay daghang mga katarungan kon nganong ang kalinaw, hingpit nga kalipay, ug pagmaya mahimong moikyas kanato niini nga kinabuhi, lakip ang kakabus, gubat, kinaiyanhong mga katalagman, ug wala damha nga mga kapakyasan sa panarbaho, panglawas, ug mga relasyon sa pamilya.

Apan bisan pa og dili kita makapugong sa daghan niadtong mga kusog nga naghampak sa atong mga kinabuhi dinhi sa yuta, samtang kita naningkamot nga mahimong matinud-anong mga disipulo ni Ginoong Jesukristo, makakaplag kita og kalinaw, hingpit nga kalipay, ug pagmaya bisan pa sa kalibutanong mga kasamok nga naglibot kanato. …

… Mga kaigsoonan, buhata ang labing maayo nga inyong mahimo sa matag adlaw, ug sa dili pa ninyo [kini] mahibaloan, makaamgo kamo nga ang inyong Langitnong Amahan nakaila kaninyo ug nga Siya nahigugma kaninyo. Ug kon mahibaloan ninyo kana—[kanang] tinuoray [nga] nahibalo gayod niini—ang inyong kinabuhi adunay tinuod nga katuyoan ug kahulugan ug kamo mapuno sa hingpit nga kalipay ug kalinaw. (M. Russell Ballard, “Ang Tinuod, Lunsay, ug Yano nga Ebanghelyo ni Jesukristo,” Liahona, Mayo 2019, 28)

Si Presidente Russell M. Nelson mipahayag:

Presidente Russell M. Nelson

Mga kaigsoonan, ang kalipay nga atong gibati dili kaayo konektado sa mga sirkumstansya sa atong kinabuhi apan konektado kaayo sa gitutokan sa atong kinabuhi.

Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi. Ang kalipay moabot gikan ug tungod Kaniya. Siya ang tinubdan sa tanang kalipay. Mobati kita niini sa panahon sa Pasko sa dihang manganta kita og, “Kalipay sa kalibotan, ang Ginoo miabot na” [“Kalipay sa Kalibotan,” Mga Himno, nu. 120]. Ug ato kining mabati sa tibuok tuig. Alang sa mga Santos sa Ulahing mga Adlaw, si Jesukristo mao ang hingpit nga kalipay! (Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 82)