2 Nephi 4

Ang Salmo ni Nephi

Nephi Nag-ampo

Ang matag usa moatubang og tintasyon ug mobati og kaguol o pagkadismaya usahay. Si propeta Nephi mibati usab niini nga paagi. Human makasinati sa kamatayon sa iyang amahan, si Lehi, ug sa pag-atubang sa iyang nasuko nga mga igsoon, si Nephi misulat mahitungod sa pipila sa iyang lawom nga mga pagbati. Iyang gipahayag ang iyang kalipay ingon man ang iyang kasubo. Ang iyang ehemplo nagpakita kanato kon sa unsang paagi kita modangop sa Ginoo kon makasinati kita sa mga hagit sa mortalidad. Kini nga leksiyon makatabang kanimo nga matinud-anon nga mosanong sa tintasyon ug kawalay kadasig pinaagi sa pagdangop ngadto sa Ginoo.

Mga Posibleng Kalihokan sa Pagkat-on

Mga hagit sa mortalidad

Kitang tanan matintal, magguol, o mawad-an og kadasig usahay. Paghunahuna og piho nga mga tintasyon o mga problema nga imong giatubang nga mahimong makapaguol kanimo.

• Ngano sa imong hunahuna nga ang matag usa matintal ug mobati og kawalay kadasig usahay?

• Sa sukod nga 1 ngadto sa 10, unsa ka kamaayo sa imong gibati sa pagdumala niining mga kalisdanan?

• Sa unsang paagi mapanalanginan ang imong kinabuhi kon mas makahimo ka sa pagbuntog sa tintasyon ug pagkawalay kadasig?

Ang salmo ni Nephi

Basaha ang 2 Nephi 4:12–13, 18, nga mangita sa pipila ka mga hagit nga giatubang ni Nephi.

• Unsa sa imong hunahuna ang pagbati nga gimugna niini nga mga hagit ngadto kang Nephi?

Ang mga bersikulo sa 2 Nephi 4:16–35 kasagaran nga gitawag og salmo ni Nephi. Ang salmo “[usa ka] madasigon nga balak o himno” (Giya ngadto sa mga Kasulatan, “Salmo,” scriptures.ChurchofJesusChrist.org). Niini nga mga bersikulo si Nephi misulat mahitungod sa pipila sa iyang pinakalawom nga mga pagbati. Gipaambit niya ang iyang mga hagit ug kon giunsa niya pagsanong ang tintasyon ug ang kawalay kadasig. Samtang magtuon ka niini nga mga bersikulo, tinguhaa ang inspirasyon pinaagi sa Espiritu Santo aron makahibalo kon unsay imong mahimo sa piho nga mga hagit nga imong giatubang.

Mahimo nimong hinumduman ang upat ka mga lakang aron matabangan ka nga mapahisama ang mga kasulatan sa imong kinabuhi:

1. Pangitag importanteng mga detalye.

2. Paghimo og mga pagtandi sa imong kinabuhi.

3. Pagkaplag og bililhong mga leksiyon.

4. Tinoa ang personal nga paggamit.

icon, record

1. Basaha ang mga bersikulo ug tubaga ang mga pangutana diha sa mosunod nga tsart diha sa imong kaugalingon nga journal sa pagtuon.

Ang Salmo ni Nephi ug Ako (2 Nephi 4:16–35)

Manwal sa Magtutudlo sa Basahon ni Mormon (2024)—“2 Nephi 4: Salmo ni Nephi”

	Ang Kasinatian ni Nephi	Akong Kasinatian
2 Nephi 4:16	Ang Kasinatian ni Nephi Unsa ang gibati ni Nephi?	Akong Kasinatian Kanus-a man ako adunay susama nga mga pagbati?
2 Nephi 4:17–19	Ang Kasinatian ni Nephi Unsa ang gibati ni Nephi?	Akong Kasinatian Kanus-a man ako adunay susama nga mga pagbati?
2 Nephi 4:20–25	Ang Kasinatian ni Nephi Unsa nga mga kasinatian diha sa Dios ang nakatabang ni Nephi sa pagsanong nga matinud-anon sa iyang mga pagtintal ug pagkawalay kadasig?	Akong Kasinatian Unsa ang pipila ka espirituwal nga mga kasinatian nga mahimo nakong mahinumduman kon ako gitintal o nawad-an og kadasig?
2 Nephi 4:26–29	Ang Kasinatian ni Nephi Unsa nga mga matang sa mga hunahuna ang nakatabang ni Nephi nga magmalig-on kon mobati og pagtintal o kawalay kadasig?	Akong Kasinatian Unsa nga mga matang sa mga hunahuna ang makatabang kanako nga mahimong magmalig-on kon mobati og pagtintal o kawalay kadasig?
2 Nephi 4:30–35	Ang Kasinatian ni Nephi Unsa ang nakapadayeg kanako sa pag-ampo ni Nephi?	Akong Kasinatian Unsaon nako paggamit ang ehemplo ni Nephi sa akong kaugalingong mga pag-ampo?

icon, rekord

2. Tubaga ang bisan tulo lang sa mosunod nga mga pangutana:

• Unsa nga mga bersikulo o hugpong sa mga pulong sa 2 Nephi 4 ang mipatigbabaw diha kanimo? Ngano man?

• Unsa ang imong nakat-onan mahitungod sa Manluluwas diha sa 2 Nephi 4?

• Sa unsang paagi nga ang pagpahisama sa mga kasulatan ngadto sa imong kinabuhi nakaimpluwensiya sa imong pagtuon sa 2 Nephi 4?

• Unsa ang pipila ka mga baroganan ang imong naila?

• Sa unsang paagi sa imong hunahuna kini nga mga baroganan makatabang kanimo sa pagdangop ngadto sa Ginoo kon ikaw gitintal o nawad-an sa kadasig?

Ang akong plano sa pagbuntog sa tintasyon ug kawalay kadasig

Sunda ang ehemplo ni Nephi ug isulat ang imong kaugalingon nga salmo. Ang pipila sa mosunod nga mga pangutana makatabang:

• Unsa nga baroganan, pagtudlo, o (mga) bersikulo gikan sa 2 Nephi 4 ang imong magamit sa imong kinabuhi?

• Unsaon nimo kini paggamit sa imong kinabuhi?

• Sa unsang paagi sa imong hunahuna ang pagbuhat niini makatabang kanimo sa pagdangop ngadto sa Manluluwas?

• Kon ang kinabuhi magkalisod, unsaon man nimo pagsanong nga may hugot nga pagtuo diha sa Manluluwas?

Opsiyonal: Gustong Makakat-on pa og Dugang?

Sa unsang paagi makatabang kanako ang paghinumdom sa nangaging espirituhanong mga kasinatian?

Si Elder Neil L. Andersen sa Korum sa Napulog Duha ka Apostoles mitudlo:

Elder Neil L. Andersen

Kauban sa malinawong direksiyon nga atong nadawat gikan sa Espiritu Santo, sa matag karon ug unya, ang Dios sa impluwensyal ug sa personal kaayo nga paagi miseguro sa matag usa kanato nga Siya nakaila ug nahigugma kanato ug Siya nanalangin kanato sa piho ug sa dayag nga paagi. Dayon, sa atong mga kalisdanan, kining mga kasinatian ibalik sa Manluluwas diha sa atong hunahuna. …

Tingali maghunahuna kamo sa inyong mga espirituhanong panumduman niini nga paagi. Pinaagi sa kanunay nga pag-ampo, determinasyon sa pagtuman sa atong mga pakigsaad, ug sa gasa sa Espiritu Santo, gidumala nato ang atong dalan sa kinabuhi. Kon ang personal nga kalisdanan, pagduhaduha, o pagkaluya mopangitngit sa atong dalan, o kon ang mga kahimtang sa kalibotan nga lapas sa atong pagkontrolar mopahunahuna kanato sa umaabot, ang espirituhanong panumduman nga angay hinumduman gikan sa libro sa atong kinabuhi mahisama sa sanag nga mga bato nga modan-ag sa unahan, nagsiguro kanato nga ang Dios nakaila ug nahigugma kanato, ug mipadala sa Iyang Anak, si Jesukristo, sa pagtabang kanato nga makabalik sa panimalay. (Neil L. Andersen, “Mga Espirituhanong Panumduman nga Angay Hinumduman,” Liahona, Mayo 2020, 19, 21)

Si Elder Ronald A. Rasband sa Korum sa Napulog Duha ka Apostoles mitudlo:

Elder Ronald A. Rasband

Akong pag-awhag kaninyo karon, nga hinumduman, ilabi na gayod sa panahon sa kalisod, ang panahon nga inyong nabati ang Espiritu ug ang inyong pagpamatuod lig-on; hinumdumi ang espirituhanon nga mga pundasyon nga inyong natukod. (Ronald A. Rasband, “Kay Tingali Lamang Unya Mahakalimot Ka,” Liahona, Nob. 2016, 114)

Unsaon nako pagbuntog ang tintasyon ug kawalay kadasig?

Si Elder Jeffrey R. Holland sa Korum sa Napulog Duha ka Apostoles mitudlo:

Elder Jeffrey R. Holland

Kon mag-atubang man kita … og mga tintasyon sa atong panahon, kinahanglang mopahayag kita, sama sa gibuhat sa batan-ong Nephi, “[Ako] dili na mohatag og luna sa kaaway sa akong kalag” [2 Nephi 4:28]. Mahimo natong isalikway ang dautan. Kon gustuhon gayod nato ug sa tinud-anay gayod, kana nga kaaway mahimo nga mabadlong pinaagi sa matubsanong gahom ni Ginoong Jesukristo. (Jeffrey R. Holland, “Walay Luna alang sa Kaaway sa Akong Kalag,” Liahona, Mayo 2010, 46)

Si Elder Allen D. Haynie sa Seventy mitudlo:

Elder Allen D. Haynie

Mga kaigsoonan, kon nawad-an kamo og kadasig o naghunahuna kon mapasaylo pa ba kaha mo sa tanan ninyong mga sala, palihog hinumdumi kon kinsa ang nagbarog “taliwala [kanato] ug sa kaangayan,” kinsa “napuno sa kapuangod ngadto sa mga katawhan,” ug kinsa midala diha sa Iyang kaugalingon sa atong mga kadautan ug mga kalapasan ug “nakatagbaw sa mga gipangayo sa kaangayan” [Mosiah 15:9]. Sa laing pagkasulti, sama sa gibuhat ni Nephi sa panahon sa iyang pagduha-duha, yanong mahinumdom kon “kang kinsa [kamo] mosalig,” [2 Nephi 4:19], nga mao si Jesukristo, ug dayon maghinulsol ug makasinati pag-usab og “usa ka hingpit nga kahayag sa paglaom” [2 Nephi 31:20]. (Allen D. Haynie, “Paghinumdom kang Kinsa Kita Mosalig,” Liahona, Nob. 2015, 123)