2 Nephi 12–15

“Mahinabo nga sa Kataposan nga mga Adlaw”

bukid ug usa ka haligi sa kalayo

Nabantayan ba nimo nga ang pipila ka mga propeta nagsulti, nagtudlo, o nagsulat sa paagi nga nakatandog sa imong kalag? Alang kang Nephi, kini mao si Isaias. “Kay ang akong kalag nahimuot sa iyang mga pulong,” si Nephi misulat (2 Nephi 11:2). Mahimo usab nga mahimuot ka sa gipadayag sa Ginoo bahin sa kataposang mga adlaw pinaagi ni Isaias. Kini nga leksiyon makatabang kanimo nga makasabot sa simbolikong mga panagna ni Isaias ug mamalandong kon sa unsang paagi kini makatabang kanimo sa imong kinabuhi.

Mga Posibleng Kalihokan sa Pagkat-on

Ang labing maayo ug ang labing bati

icon, record

1. Humna ang mosunod nga mga pamahayag sa imong kaugalingon diha sa imong journal sa pagtuon:

• Ang labing maayong mga butang bahin sa pagkabuhi sa kataposang mga adlaw mao—

• Ang labing bati nga mga butang bahin sa pagkabuhi sa kataposang mga adlaw mao—

Ang Ginoo mipadayag sa mga panalangin ug mga pasidaan mahitungod sa pagpuyo sa kataposang mga adlaw ngadto sa daghang karaan nga mga propeta. Usa niadto nga mga propeta mao ang propeta sa Daang Tugon nga si Isaias, kinsa mipuyo sa Jerusalem sobra sa 100 ka tuig sa wala pa si Lehi ug ang iyang pamilya. Si Nephi nasayod nga si Isaias usa ka espesyal nga saksi ni Jesukristo (tan-awa sa 2 Nephi 11:2) ug nahimuot pag-ayo sa iyang mga pulong nga migahin siya og panahon sa paglakip sa daghan sa mga panagna ni Isaias diha sa iyang kaugalingong mga rekord.

Pamalandongi ang mosunod nga mga pangutana. Mobalik ka niini nga mga pangutana pag-usab sa kataposan sa leksiyon.

• Ngano kaha nga ang Ginoo nagpadayag og mga panalangin ug mga pasidaan bahin sa kataposang mga adlaw ngari kanato?

• Unsa ang gitudlo niana kanimo mahitungod Kaniya?

• Sa unsang paagi nga ang pagkahibalo niini nga mga butang makatabang kanimo?

Tinguhaa ang giya sa Espiritu Santo aron sa pagtabang kanimo sa pagtubag niini nga mga pangutana sa tibuok niini nga leksiyon.

Mga hagit sa atong adlaw

Gipasidan-an kita ni Isaias sa piho nga mga pamatasan ug mga kinaiya sa kataposang mga adlaw. Basaha ang mosunod nga mga hugpong sa mga bersikulo, nga mangita kon unsay gipanagna ni Isaias.

• 2 Nephi 12:7–11 (Pagkahambog nagpasabot sa garbo ug ang kadaotan nagpasabot sa kakuwang sa dignidad o pagka ubos nga tawo.)

• 2 Nephi 13:5, 9, 15–17 (Ang Sodoma maoy usa ka dapit sa pagkadaotan ug imoralidad. Madanihon nagpasabot nga maibogon.)

• 2 Nephi 15:20–23

• Unsay mipatigbabaw alang kanimo?

• Unsa ang pipila ka mga ehemplo niini nga mga butang sa kalibotan karon?

• Ngano nga usa man ka panalangin nga ang Ginoo misulti kanato nga magbantay niini nga mga butang?

Samtang magpadayon ka sa imong pagtuon, pangitaa ang mga panalangin nga gihatag sa Ginoo sa kataposang mga adlaw. Pagpamalandong kon sa unsang paagi kini nga mga panalangin makatabang kanato samtang kita nag-atubang sa mga hagit nga nakita nang daan ni Isaias.

Ang bungtod diin ang balay sa Ginoo

Si Isaias migamit og daghang simbolo sa iyang mga panagna. Ang pagpamalandong kon unsay girepresentar niini nga mga simbolo makatabang nimo sa pag-abli sa personal nga kahulugan gikan sa mga kasulatan.

Basaha ang 2 Nephi 12:1–3, nga mangita sa nag-unang simbolo nga gigamit ni Isaias sa pagtudlo unsa ang “mahinabo … sa kataposan nga mga adlaw” (2 Nephi 12:2).

• Unsa sa imong hunahuna ang gipasabot sa “ang bungtod diin ang balay sa Ginoo”? Ngano man?

Mahimong mapuslanon ang pagpamalandong kon ang usa ka simbolo, niini nga kaso usa ka bungtod, nahimong mahinungdanon sa ubang mga kasulatan. Pananglitan, si Moises ug ang ubang mga propeta miadto sa usa ka bungtod aron makaila sa Ginoo ug makadawat og instruksiyon gikan Kaniya (tan-awa sa Exodo 3; 20). Usahay, ang mga bukid adunay katuyoan nga susama sa mga templo.

• Sa unsang paagi nga ang bukid mahisama sa templo?

Uban sa simbolo nga nailhan, basaha pag-usab kini nga mga bersikulo ug pangitaa kon unsay gibuhat sa Ginoo alang kanato sa Iyang balay.

icon, rekord

2. Tubaga ang mosunod nga mga pangutana:

• Sa unsang paagi nga ang pagsimba diha sa templo (o pag-andam sa pagsulod sa templo) nakatabang nimo nga makat-on sa mga paagi sa Ginoo o maglakaw sa Iyang mga dalan?

• Sa unsang paagi ang mga templo makatabang kanato samtang nag-atubang kita sa mga hagit sa kataposang mga adlaw?

Usa ka panganod ug kalayo

Si Isaias naghatag og laing panagna. Basaha ang 2 Nephi 14:5–6, nga mangita sa unsay buhaton sa Ginoo alang sa Iyang katawhan. Ang mosunod nga impormasyon mahimong mapuslanon alang kanimo:

•  Ang pinuy-anan usa ka panimalay.

• Ang mga katigoman sa Bukid sa Zion mao ang dapit diin magtagbo ang katawhan sa Ginoo, sama sa mga branch, ward, ug stake.

• Ang tabernakulo sa panahon sa Daang Tugon piho nga nagpasabot sa madaladala nga tolda nga nagsilbing templo sa mga Israelita sulod sa gatosan ka tuig. Kini mahimong magrepresentar sa templo o usa ka dapit sa pagsimba karon.

• Ang tagoanan maoy usa ka dapit nga katagoan o kapuy-an.

• Unsa sa imong hunahuna ang gisimbolo sa panganod sa adlaw ug sa nagdilaab nga kalayo sa gabii?

• Sa unsang paagi nga ang panganod ug kalayo importante kang Moises ug sa mga anak sa Israel? (tan-awa sa Exodo 13:21).

• Sa ingon niana nga pagsabot, unsa sa imong hunahuna ang gisaad sa Ginoo nga Iyang buhaton alang sa Iyang katawhan diha sa 2 Nephi 14:5–6?

Si Elder Ronald A. Rasband sa Korum sa Napulog Duha ka mga Apostoles mihatag og susama nga saad:

Elder Ronald A. Rasband

Ang atong mga pagpamatuod sa ebanghelyo ni Jesukristo, ang atong mga panimalay, ang atong mga pamilya, ug ang atong pagkamiyembro sa Ang Simbahan ni Jesukristo sa mga Santos sa Ulahing mga Adlaw mahimong atong personal nga mga kuta sa pagpanalipod nga nagpalibot kanato ug nanalipod kanato batok sa gahom sa dautan.(Ronald A. Rasband, “Magtukod og Kuta sa Pagkaespirituhanon ug Proteksiyon,” Liahona, Mayo 2019, 110)

icon, rekord

3. Tubaga ang mosunod nga mga pangutana:

• Sa unsang paagi nga ang imong panimalay, ward, o branch o ang templo nahimong dapit sa espirituhanong proteksiyon ug dangpanan alang kanimo?

• Sa unsang paagi kini nga mga saad makatabang kanato samtang nag-atubang kita sa mga hagit sa kataposang mga adlaw?

Ang mga pulong ni Isaias sa imong kinabuhi

Paggahin og panahon sa pagtubag sa tulo ka mga pangutana nga imong gipamalandong sa sinugdanan sa leksiyon. Ikonsiderar ang pagsulat diha sa imong journal sa pagtuon kon unsay imong nakat-onan mahitungod sa Ginoo ug sa unsang paagi kini nga mga panagna makatabang kanimo. Mahimo nimong iapil ang batasan o mga kinaiya nga gusto nimong likayan, ingon man ang mga paagi nga mahimo kang mangayo og espirituhanong tabang gikan sa Ginoo sa imong panimalay, ward, o branch o sa templo.

Opsiyonal: Gustong Makakat-on pa og Dugang?

Sa unsang paagi nga ang mga panagna ni Isaias natuman karon?

Si Presidente Gordon B. Hinckley (1910–2008) mitudlo:

Presidente Gordon B. Hinckley

Sukad mapahinungod ang Templo sa Salt Lake, atong gihubad kana nga kasulatan sa Isaias, gisubli pag-usab sa Miqueas (tan-awa sa Miqueas 4:1–2), alang niining sagrado nga balay sa Ginoo. Ug bahin niining dapita, sukad sa adlaw sa pagpahinungod niini, ang nagkadugang nga gidaghanon gikan sa laing dapit sa kalibotan miingon, “Umari kamo, ug mangadto kita sa bukid sa Ginoo, ngadto sa balay sa Dios ni Jacob; ug Siya magatudlo kanato sa Iyang mga dalan, ug kita magalakaw sa Iyang mga alagianan.”

Ako nagtuo ug mopamatuod nga misyon niini nga simbahan nga mobarog isip usa ka bandila ngadto sa mga nasod ug usa ka kahayag ngadto sa kalibotan. Gihatag ngari kanato ang usa ka dako, malukpanon nga mando diin dili kita makaatras ni makalikay.Atong gidawat kana nga mando ug determinado sa pagtuman niini, ug uban sa tabang sa Dios kita mobuhat niini.” (Gordon B. Hinckley, “Usa ka Bandila ngadto sa mga Nasod, usa ka Kahayag ngadto sa Kalibutan,” Liahona, Nob. 2003, 82–83)