2 Nīfai 16

“ʻOku Māʻoniʻoni, ʻOku Māʻoniʻoni, ʻOku Māʻoniʻoni, ʻa e ʻEikí”

Kuó ke aʻusia nai ha meʻa naʻe faingataʻa ia ke fakamatalaʻi? Mahalo naʻe moʻoni ia kia ʻĪsaia ʻi he taimi naʻá ne tohi ai fekauʻaki mo e mamata ki he ʻEikí ʻi Hono nāunaú kotoa. Ke tokoni ke fakamatalaʻi e aʻusia ko ʻení, naʻe fakaʻaongaʻi ʻe ʻĪsaia ha ngaahi lea fakatātā ke fakamatalaʻi ʻaki e mālohi mo e māʻoniʻoni ʻa e ʻEikí pea mo e ngaahi ongoʻi taʻefeʻunga ʻa ʻĪsaiá. Naʻe fakamaʻa ia ʻe he ʻEikí mei heʻene ngaahi angahalá pea ui ia ke hoko ko ha palōfita. ʻE lava ke tokoni e lēsoni ko ʻení ke ke fakatokangaʻi ʻa e malava ʻe he ʻEikí ke fakamolemoleʻi mo fakamaʻa koé.

Ngaahi ʻEkitivitī Ako ʻOku Ala Fakahokó

Ko e lāngilangi mo e nāunau ʻo Sīsū Kalaisí

Kuo maʻu ʻe ha kau palōfita mo ha niʻihi kehe ʻa e faingamālie ke mamata kia Sīsū Kalaisi ʻi Hono nāunau maʻongoʻongá kotoa.

• Ko e hā ha ngaahi ʻuhinga kuo ʻaʻahi ai e ʻEikí ki ha kakai kehekehe ʻi he hisitōlia ʻo e māmaní?

Fakaʻaongaʻi ha kiʻi taimi ke vakai ai ki he ngaahi ʻīmisi ko ʻení pea fakakaukau pe ko e aʻusia fē naʻá ke mei saiʻia taha ke ʻi aí.

Ko e Liliú, tā fakatātaaʻi ʻe Carl Bloch

Ko Kalaisi ʻi he Fonua ko Mahú, tā fakatātaaʻi ʻe Simon Dewey

ʻUluaki Mata Meʻa-Hā-Maí, tā fakatātaaʻi ʻe Walter Rane

Ko e Hā ʻa Sīsū Kalaisi ki he Palōfita ko Siosefa Sāmitá mo ʻŌliva Kautele, tā fakatātaaʻi ʻe Walter Rane

• Ko e hā ha ngaahi fakakaukau pe ongo te ke ala aʻusia ʻi he ʻao ʻo e ʻEikí?

Naʻe mamata ʻa ʻĪsaia ki he ʻEikí ʻi Hono nāunaú kotoa ʻi he taimi naʻe ui ai ia ko ha palōfitá. Naʻá ne lekooti ʻa e aʻusia ko ʻení pea fakakau ia ʻe Nīfai ʻi heʻene ngaahi tohí. (Vakai, ʻĪsaia 6 mo e 2 Nīfai 16.)

Lau ʻa e 2 Nīfai 16:1–4, ʻo kumi e founga naʻe fakamatalaʻi ʻaki ʻe ʻĪsaia ʻa e meʻa naʻá ne mamata ki aí. Koeʻuhí naʻe fakaʻaongaʻi ʻe ʻĪsaia ha ngaahi lea fakatātā ke fakamatalaʻi ʻaki ʻene aʻusiá, ʻe ala tokoni ʻa e ngaahi fakamatala ko ʻení:

• Pulupulu: Ko e konga ki lalo ʻo e pulupulu ʻo e ʻEikí, ʻa ia te ne lava ʻo fakataipe ʻEne māʻoniʻoní, mālohí, mo e maʻá. ʻOku mahuʻinga ʻa e mamata ʻa ʻĪsaia naʻe “fakafonu ʻe hono pulupulú ʻa e temipalé” (2 Nīfai 16:1).

• Selafimi: Ko e kau ʻāngelo ʻoku ngāue ʻi he ngaahi fakamaauʻanga ʻo e ʻOtuá. Ko e ongo kapakau ʻo e selafimí ko ha fakataipe ia ʻo honau mālohi ke ngāué (vakai, Tokāteline mo e Ngaahi Fuakava 77:4).

• Kohu pe ʻAo: ʻOku faʻa hoko ia ko ha fakaʻilonga ʻo e ʻi ai ʻa e ʻOtuá (vakai, ʻEkesōtosi 19:18; Fakahā 15:8).

• Ko e hā ha ngaahi foʻi lea pe kupuʻi lea mei he ngaahi veesi ko ʻení ʻoku tokoni ke mahino kiate koe ʻa e nāunau ʻo e ʻEikí?

• ʻOkú ke pehē naʻe mei fēfē haʻo fakafōtunga kapau naʻá ke mamata ki heni?

Lau ʻa e 2 Nīfai 16:5 ke ʻiloʻi e fakafōtunga ʻa ʻĪsaia ʻi heʻene mamata ki he ʻEikí.

• Ko e fē ʻa e ngaahi foʻi lea pe kupuʻi lea ʻoku tokoni atu ke mahino kiate koe naʻe ʻiloʻi ʻe ʻĪsaia ʻa ʻene ngaahi angahalá mo e ngaahi vaivaí?

• Ko e hā ha ngaahi ʻuhinga ʻe niʻihi ʻe ala ongoʻi taʻemaʻa pe taʻetaau ai e kakai he ʻaho ní ʻi he ʻao ʻo e ʻOtuá?

• Ko e hā ha ngaahi founga ʻe lava ke lelei ai kiate kitautolu ke tau fakatokangaʻi hotau ngaahi vaivaí ʻi heʻetau ʻunu ke ofi ange ki he ʻEikí?

ʻOku finangalo ʻa e ʻEikí ke toʻo ʻetau ngaahi angahalá

Lau ʻa e 2 Nīfai 16:6–7, ʻo kumi e meʻa ne hoko kia ʻĪsaiá. Mahalo ʻe tokoni ke manatuʻi naʻe fakaʻaongaʻi ʻa e ngaahi ʻōlitá ʻi he kuonga muʻá ki he moihū ʻi he temipalé.

• Te ke fakamatalaʻi fakanounou fēfē ʻa e meʻa naʻe hokó?

• ʻOkú ke pehē ko e hā ʻe lava ke fakataipe ʻe he meʻá ni?

Fakakaukau ki he aʻusia ʻa ʻĪsaia ʻi he ʻōlitá pea mo e founga te ne lava ai ʻo akoʻi e fakamolemoleʻi ʻo e ngaahi angahalá pea hoko ʻo maʻa ʻi he Fakalelei ʻa Sīsū Kalaisí.

• ʻOkú ke pehē naʻe tokoni fēfē kia ʻĪsaia ʻa hono toʻo ʻe he ʻEikí ʻene ngaahi angahalá?

• Ko e hā e ngaahi moʻoni ʻoku tokoni e ngaahi veesi ko ʻení ke mahino kiate koe fekauʻaki mo e ʻEikí?

Ko e moʻoni ʻe taha te tau lava ʻo akó ʻoku maʻu ʻe he ʻEikí ha mālohi ke fakamaʻa kitautolu.

Mahalo he ʻikai ke tau manatuʻi mo ongoʻi he taimi ʻe niʻihi e mahuʻinga ʻo e moʻoni ko ʻení. Naʻe vahevahe ʻe Brother Peletilī R. Uilikoki ʻo e Kau Palesitenisī Lahi ʻo e Kau Talavoú ha ngaahi lea ʻa ha talavou naʻá ne ui ko Teimioni. Naʻe vahevahe ʻe he talavoú ni e ngaahi fakakaukau mo e ngaahi ongo naʻá ne maʻu fekauʻaki mo ʻene ngaahi angahalá.

Naʻe pehe ʻe Teimioni: … “Naʻá ku mātuʻaki ongoʻi mā maʻu pē he ʻikai ke u toe lava ʻo fakahoko totonu ha ngaahi ngāué. … Naʻá ku fakakaukau naʻe totonu pē ke u ongoʻi mafasia he taimi kotoa pē. Ne u pehē mahalo naʻe fehiʻa ʻa e ʻOtuá ʻiate au koeʻuhí naʻe ʻikai ke u loto-fiemālie ke ngāue mālohi ange pea ikunaʻi kotoa ʻeni. Te u hao ʻi ha uike pea aʻu pē ʻo māhina, ka te u toe holomui pē pea fakakaukau, ‘He ʻikai pē ke u toe lelei au, ko e hā leva hano ʻaonga ʻo e feingá?ʼ” (Bradley R. Wilcox, “ʻOku ʻIkai Haohaoa ʻa e Moʻui Tāú,” Liahona, Nōvema 2021, 62)

• Ko e hā ka maʻu ai ʻe ha talavou hangē ko Teimioní ha ngaahi fakakaukau peheni?

1. Fakakakato e ʻekitivitī tohi ko ʻení:

Fakakaukauloto naʻá ke maʻu ha faingamālie ke tokoniʻi ha taha hangē ko Teimioní. Fakakaukau ki he meʻa ne aʻusia ʻe ʻĪsaiá. Fakakaukau foki ki he meʻa ʻokú ke ʻilo fakataautaha fekauʻaki mo e Fakamoʻuí te ke lava ʻo vahevahé. Hiki ʻa e meʻa ʻe ala tokoní. Te ke lava foki ʻo kumi ha ngaahi potufolofola pe fakamatala mei he kau taki ʻo e Siasí te ke lava ʻo fakaʻaongaʻi ʻi hoʻo fakamatalá. Mahalo ʻe ʻaonga e ngaahi sīpinga ko ʻení:

• ʻĪsaia 1:18

• Mōsaia 26:30

• ʻEta 12:27

Naʻe akonaki ʻa ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku ʻikai fiemaʻu ʻe he ʻOtuá ha kakai ʻoku haohaoa. ʻOkú Ne fekumi kiate kinautolu te nau foaki ʻa e “loto mo e ʻatamai fie [ngāué]” [Tokāteline mo e Ngaahi Fuakava 64:34], pea te Ne ngaohi kinautolu ke “haohaoa ʻia Kalaisi” [Molonai 10:32–33]. (Dieter F. Uchtdorf, “Five Messages That All of God’s Children Need to Hear” [Brigham Young University devotional, Aug. 17, 2021], 3, speeches.byu.edu)

Ko ha mahino foʻou

Lau ʻa e 2 Nīfai 16:8 ke ʻiloʻi e meʻa naʻe fai ʻe ʻĪsaia hili hono fakamaʻa ia ʻe he ʻEikí.

• ʻOkú ke pehē naʻe tākiekina fēfē ʻe he aʻusia ʻa ʻĪsaia ʻi hono fakamaʻa iá ʻa ʻene tali ʻi he veesi 8?

Hili e meʻa-hā-mai ko ʻení, naʻe loto-fiemālie ʻa ʻĪsaia ke tauhi ki he ʻEikí. ʻI he ngaahi taʻu lahi hono hokó, naʻá ne tokoni ke tataki e kakai ʻo Siutá. Kuo ueʻi fakalaumālie ʻe he ngaahi akonaki mo e ngaahi tohi ʻa ʻĪsaiá ha kakai tokolahi, pea naʻe lahi ange hono folofola ʻaki ia ʻe he Fakamoʻuí ʻi ha toe palōfita kehe.

Naʻe liliu foki mo Teimioni. ʻI he tokoni ʻa ha taki ʻo e Siasí, naʻe fakatokangaʻi ai ʻe Teimioni naʻe ʻikai ʻafio hifo ʻa e ʻEikí kiate ia ʻi he fakamaau ʻita ka ʻi he ʻaloʻofa, ʻo finangalo ke tokoniʻi ia ke fakalakalaka. Lau e ngaahi lea ʻa Teimioní ʻi he taimi naʻá ne maʻu ai ha fakakaukau foʻou fekauʻaki mo e ʻOtuá:

Naʻe pehee ʻe Teimioni: … “ʻI he ngaahi ʻahó ni ʻoku siʻi ange ʻa ʻeku fehiʻa ʻiate au koeʻuhí ko e meʻa kuó u fakahokó kae lahi ange ʻeku ʻofa kia Sīsū ʻi he meʻa kuó Ne fakahokó.” (Bradley R. Wilcox, “ʻOku ʻIkai Haohaoa ʻa e Moʻui Tāú,” Liahona, Nōvema 2021, 62)

• Kuo takiekina fēfē hoʻo moʻuí ʻi hoʻo aʻusia ʻa e Fakalelei, ʻofa, mo e faʻa fakamolemole ʻa e Fakamoʻuí?

Fakalaulauloto ki he fehuʻi ko ʻení ʻi hoʻo fakaʻosi hoʻo ako e vahe ko ʻení:

• ʻOkú ke pehē ko e hā te ke lava ʻo fai ke ke aʻusia lahi ange ai ʻa e ʻofa mo e fakamolemole ʻa e Fakamoʻuí ʻi hoʻo moʻuí?

Fili Pē: Fie Ako Lahi Ange?

2 Nīfai 16:1. Ko hai naʻe mamata ki ai ʻa ʻĪsaiá?

Naʻe fakamoʻoni fakatouʻosi ʻa Sione mo Nīfai ko e ʻEiki naʻe mamata ki ai ʻa ʻĪsaiá ko Sīsū Kalaisi ia ʻi he maama fakalaumālié (vakai, Sione 12:41; 2 Nīfai 11:2–3). ʻIkai ngata aí, kuo mamata tonu ha kau palōfita kehe ki ha meʻa tatau (vakai, Fakahā 4:1–11; Tokāteline mo e Ngaahi Fuakava 110:1–5).

2 Nīfai 16:5–8. Ko e hā naʻe ʻai ai ʻe he ʻāngeló ha foʻi malala vela ki he loungutu ʻo ʻĪsaiá?

ʻI he taimi naʻe pehē ai ʻe ʻĪsaia, “ʻE malaʻia kiate au! he ʻe motuhi atu au” (2 Nīfai 16:5), naʻá ne fakahā naʻá ne ongoʻi taʻefeʻunga ke ʻi he ʻao ʻo e ʻEikí. Ko e malala ko ia naʻe hilifaki ʻe he selafimí ʻi he loungutu ʻo ʻĪsaiá, ko ha fakataipe ia ʻo hono fakahaohaoaʻi, fakamaʻa, pea fakamolemoleʻi ʻo fakafou ʻia Sīsū Kalaisí. Naʻe toe fakahā foki kia Siosefa Sāmita naʻe fakamolemoleʻi ʻene ngaahi angahalá ʻi he taimi naʻe ui ai ia ʻe he ʻEikí (vakai, Tokāteline mo e Ngaahi Fuakava 20:2, 5–6).

2 Nīfai 16:9–10. Ko e hā ʻoku tau ʻilo fekauʻaki mo e kakai naʻe uiuiʻi ʻa ʻĪsaia ke malanga ki aí?

Naʻe fakahā ʻe he ʻEikí kia ʻĪsaia ʻe fakasītuʻaʻi ʻe he kakaí ʻa ʻene ngaahi leá ʻi ha ngaahi taimi lahi. Naʻa nau pehē ʻoku nau fanongo mo mamata, ka naʻa nau fili ke ʻoua te nau tali ʻa e laumālie ʻo e pōpoakí. Naʻe malanga ʻaki ʻe ʻĪsaia ʻa e pōpoaki ʻa e ʻEikí, ʻo ʻai ʻa e kakaí ke nau haʻisia ki he meʻa ne nau ako kae ʻikai ke nau talí.

Te u lava fēfē ʻo fakaʻehiʻehi mei he loto-foʻí ʻi he taimi ʻoku ou ʻiloʻi ai hoku vaivaí?

Naʻe akonaki ʻa Sisitā Mīseli D. Keleki ʻo e Kau Palesitenisī Lahi ʻo e Kau Finemuí ʻo pehē:

ʻOku totonu ke tau tali e ngaahi ongo taʻefiemālie fakalangi ʻoku ui kitautolu ki ha founga māʻolunga angé, lolotonga ia ʻetau ʻiloʻi mo fakaʻehiʻehi mei he fakatatau loi ʻa Sētané—ʻa e loto-foʻi taʻe fie ngāué. … Te tau lava ʻo fili ke ʻaʻeva ʻi ha hala māʻolunga ange ʻokú ne tataki kitautolu ke fekumi ki he ʻOtuá mo ʻEne melinó mo e ʻaloʻofá, pe ko ʻetau fanongo kia Sētane, ʻa ia ʻokú ne lōmekina kitautolu ʻaki ha ngaahi pōpoaki he ʻikai pē ke tau feʻunga kitautolú. … ʻE lava ke hoko ʻetau taʻefiemālié ʻo fakalangi—pe fakaʻauha. (Michelle D. Craig, “Taʻefiemālie Fakalangí,” Liahona, Nōvema 2018, 53)