2 Nīfai 21–24

Ko e Nofo Tuʻí

Fakakaukauloto pe naʻe mei fēfē ʻa e moʻuí kapau naʻe ʻikai ha kovi ʻi he māmaní. ʻE ʻi ai e ʻaho ʻe peheni ai ʻa e māmaní. ʻE hoko ia lolotonga e pule ʻa Sīsū Kalaisi ʻi he nofo tuʻí. Naʻe kikite ha kau palōfita tokolahi, kau ai ʻa Nīfai mo ʻĪsaia, ki he nofo melino taʻu ʻe 1,000 ʻoku ui ko e Nofo Tuʻí. ʻE lava ke tokoni e lēsoni ko ʻení ke mahino kiate koe mo ke teuteu ki he pule ʻa e Fakamoʻuí ʻi he nofo tuʻí.

Ko e kahaʻú

• Ko e hā ha ngaahi meʻa mahuʻinga ʻi he kahaʻú ʻokú ke hanganaki fiefia atu ki ai? Ko e hā hono ʻuhingá?

• Ko e hā ha ngaahi ongo ʻokú ke maʻu ʻi hoʻo fakakaukau ki he ngaahi meʻa ko ʻení?

• Ko e hā ʻokú ke fai ke teuteu ki aí?

Ko e Nofo Tuʻí

Ko e meʻa mahuʻinga ʻe taha ʻi he kahaʻú ko e Nofo Tuʻí.

• Ko e hā ʻokú ke ʻilo fekauʻaki mo e Nofo Tuʻí? Ko e hā ha ngaahi fehuʻi ʻokú ke maʻu fekauʻaki mo ia?

Mahalo te ke fie hiki e ngaahi fehuʻi ʻokú ke maʻú pea tuku ha feituʻu ke hiki ai ha ngaahi fakamatala. ʻI hoʻo ako he ʻaho ní, kumi e tali ki hoʻo ngaahi fehuʻí.

Naʻe tohi e palōfita ko Nīfaí fekauʻaki mo e ngaahi ʻaho fakaʻosí pea fakakau ai ha ngaahi kikite lahi ʻa ʻĪsaia kau ki he ngaahi ʻaho fakaʻosí. Naʻe kikiteʻi ʻe ʻĪsaia ʻa hono fakaʻauha ʻo ʻAsīlia mo Pāpiloné ko ha fakataipe ʻo e fakaʻauha ʻi he Hāʻele ʻAnga Ua Maí (vakai, 2 Nīfai 20; 23). Naʻá ne toe kikiteʻi foki ʻa hono Fakafoki Mai ʻo e ongoongoleleí kimuʻa ʻi he pule ʻa Sīsū Kalaisi ʻi he nofo tuʻí. ʻOku fonu ʻEne ngaahi kikité ʻi he fakataipe mo e fakatātā ʻokú ne fakalahi ke loloto ʻetau mahino kau ki he Nofo Tuʻí.

Lau e ngaahi kikite ko ʻeni meia Nīfai mo ʻĪsaiá pea kumi ha ngaahi fakamatala fekauʻaki mo e Nofo Tuʻí.

Mahalo te ke fie tā fakatātaaʻi ha niʻihi ʻo e ngaahi fakamatalá.

• 1 Nīfai 22:24–26

• 2 Nīfai 21:6–9

• 2 Nīfai 22:1–6

• 2 Nīfai 24:3,7

1. Tali e ngaahi fehuʻi ko ‘ení:

   • Mei he ngaahi fakamatala ko ʻení, ʻokú ke pehē ʻe kehe fēfē hoʻo moʻuí ʻi he Nofo Tuʻí?

   • Ko e hā ha ngaahi fakamatala ʻo e Fakamoʻuí naʻá ke maʻu? Ko e hā ʻoku nau akoʻi atu fekauʻaki mo Iá?

Ko e taha ʻo e ngaahi moʻoni ʻoku tau ako mei he ngaahi potufolofola ko ʻení, ʻe pule ʻa Sīsū Kalaisi ʻi he māmaní ʻi he māʻoniʻoni mo e melino lolotonga e Nofo Tuʻí.

Fakakaukauloto angé pe ʻe fēfē haʻo moʻui lolotonga e Nofo Tuʻi —ʻi he pule ʻa e Fakamoʻuí ʻi he māʻoniʻoni mo e melino. Fakakaukau ki he founga ʻe lava ke faitāpuekina ai ʻe he melino ʻa e Fakamoʻuí hoʻo moʻuí.

Naʻe fakamatalaʻi ʻe Tāleni H. ʻOakesi ʻo e Kau Palesitenisī ʻUluakí ha toe tāpuaki ʻe taha ʻo e Nofo Tuʻí:

ʻOku uesia ʻe he taʻe-malí, hala fānaú, maté pea mo e vete malí ʻa e ngaahi meʻa ʻoku fiemaʻú mo fakatoloi hono fakahoko ʻo e ngaahi tāpuaki kuo talaʻofá. … Kuo ʻosi talaʻofa ʻe he ʻEikí he ʻikai taʻofi ha ngaahi tāpuaki mei hono ngaahi foha mo e ngaahi ʻofefine ʻoku nau tauhi e ngaahi fekaú mo faipau ki heʻenau ngaahi fuakavá, mo fakaʻamua e meʻa ʻoku totonú.

Ko e konga lahi ʻo e ngaahi meʻa mahuʻinga taha ʻoku ʻikai hoko ʻi he moʻui fakamatelié ʻe fakahoko tonu ia ʻi he Nofo Tuʻí, ʻa ia ko e taimi ia ke fakakakato ai ʻa e meʻa kotoa pē ʻoku ʻikai kakato ʻi he palani lahi ʻo e fiefiá maʻá e fānau moʻui taau kotoa ʻa ʻetau Tamaí. ʻOku tau ʻilo ʻe moʻoni ia fekauʻaki mo e ngaahi ouau ʻo e temipalé. ʻOku ou tui ʻe toe hoko foki ia ʻo moʻoni ʻi he ngaahi vā fetuʻutaki mo e ngaahi aʻusia fakafāmilí. (President Dallin H. Oaks, “The Great Plan of HappinessEnsign,, Nov. 1993, 75)

2. Tali ha fehuʻi ʻe ua pe lahi ange mei he ngaahi fehuʻi ko ʻení:

   • Ko e hā ha meʻa ʻoku akoʻi atu ʻe he fakamatala ko ʻení kau ki he Tamai Hēvaní mo Sīsū Kalaisí?

   • Ko e fē ʻi he ngaahi tāpuaki ʻo e Nofo Tuʻí ʻokú ke fiemaʻu lahi tahá? Ko e hā hono ʻuhingá?

   • Lolotonga e lēsoní, ko e hā ha ngaahi tali naʻá ke maʻu ki hoʻo ngaahi fehuʻi fekauʻaki mo e Nofo Tuʻí?

Ke maʻu ha tokoni lahi ange ki hono tali hoʻo ngaahi fehuʻí, vakai, “Nofo Tuʻí” ʻi he Fakahinohino ki he Ngaahi Folofolá pe Ngaahi Tefito ʻo e Ongoongoleleí.

Teuteu ki he Nofo Tuʻí

Naʻe kamata ʻi he 2020 hono fakaleleiʻi ʻo e Temipale Salt Lake. Naʻe lea ʻa ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e ngaahi fakalelei ko ʻeni. Fekumi ki he founga naʻá ne fakafehoanaki ai kinautolu ki heʻetau moʻuí. Mamata ʻi he foʻi vitiō “Tokonaki ha Fakavaʻe Lelei ki he Kuonga ʻe Hoko Maí,” ʻoku maʻu ʻi he ChurchofJesusChrist.org, mei he taimi 14:51 ki he 15:26, pe lau ʻa e fakamatala ʻi laló.

Ko e fakaʻamu lahi ia ʻa e kau taki ʻo e Siasí, ke tokoni ʻa e fakaleleiʻi mahuʻinga ʻo e Temipale Sōlekí ki hono fakahoko ʻo e fakaʻānaua ko ia ʻa Pilikihami ʻIongi ke mamata “ʻoku langa ʻa e temipalé ʻi ha founga ʻe tuʻuloa ʻo aʻu ki he [nofo tuʻí].” Fakatauange te tau fakaʻatā e ngaahi fakalelei ko ia ʻoku fai ki he Temipale Sōlekí ʻi he ngaahi taʻu ka hokó, ke ne fakaʻaiʻai mo ueʻi kitautolu, ko e niʻi hi fakafoʻituitui mo e ngaahi fāmili, ke tau— ʻi hono fakalea fakaheliakí—ʻe “langa ʻi ha founga ʻe tuʻuloa ʻo aʻu ki he [nofo tuʻí].” (Gary E. Stevenson, “Tokonaki ha Fakavaʻe Lelei ki he Kuonga ʻe Hoko Maí,” Liahona, Mē 2020, 51–52)

• ʻOkú ke pehē ʻoku ʻuhinga ki he hā ke “langa ʻi ha founga ʻe tuʻuloa ʻo aʻu ki he [nofo tuʻí]”?

3. Tali e ngaahi fehuʻi ko ‘ení:

   • ʻI hoʻo fakakaukau ki he pule ʻa e Fakamoʻuí ʻi he nofo tuʻí, ko e hā ʻokú ke ongoʻí?

   • Ko e hā te ke lava ʻo fakahoko he taimí ni ke teuteu ai ki he Nofo Tuʻí?

   • Ko e hā ha ngaahi faingataʻa te ke ala fehangahangai mo ia ʻi hoʻo fakahoko e ngaahi teuteu ko ʻení?

Fili Pē: Fie Ako Lahi Ange?

Ko e kau kau mēmipa pē nai ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻe ʻi māmani ʻi he lolotonga e Nofo Tuʻí?

Naʻe akonaki ʻa Palesiteni Siosefa Filitingi Sāmita (1878–1972) ʻo pehē:

ʻOku maʻu ʻe ha kāingalotu ʻe niʻihi ʻo e Siasí ha fakakaukau hala ʻo pehē ʻi he taimi ʻe hoko mai ai ʻa e nofo tuʻí ʻe tafiʻi e kakai kotoa pē mei he funga ʻo e māmaní tuku kehe pē ʻa e kāingalotu angatonu ʻo e Siasí. ʻOku ʻikai tonu ia. ʻE lauimiliona ha kakai … ʻo e ngaahi tuʻunga kotoa pē, pea mo e ngaahi tui fakalotu kotoa pē, ʻe kei fakangofua ke nau nofo ʻi he funga ʻo e māmaní, ka ko kinautolu pē ia kuo nau moʻui maʻa, kuo nau tauʻatāina mei he faiangahalá mo e koví. …

Ka neongo ia, ʻe faifai pea ʻufiʻufi ʻe he ʻilo ʻo e ʻEikí ʻa e māmaní ʻo hangē ko hono fakafonu ʻe he ngaahi vaí ʻa e tahí. Ka ʻe ʻi ai ha fiemaʻu ke malanga ʻaki ʻa e ongoongoleleí, hili hono fakahoko e nofo tuʻí, kae ʻoua kuo ului pe mole atu ʻa e kakai kotoa pē. (Joseph Fielding Smith, Doctrines of Salvation, 1:86–87)

  ʻE ala tokoni ʻa e (New Era, June 2014, 41) ke tali ha ngaahi fehuʻi kehe ʻokú ke maʻu fekauʻaki mo e Nofo Tuʻí.

ʻE fēfē ʻa e moʻuí ʻi he Nofo Tuʻí?

Naʻe akonaki ʻa Palesiteni Pilikihami ʻIongi (1801–1877) ʻo pehē:

Ko e Nofo Tuʻí ʻoku maʻu ia heni—ʻi he loto ʻo e tangata kotoa pē ʻi he Siasi mo e Puleʻanga ʻo e ʻOtuá kuo hoko ʻo taha; ʻi he tupulaki ʻa e Puleʻangá ʻo ikunaʻi ʻa e meʻa kotoa pē ʻoku fakafetau ki he ngaahi meʻa ʻo e langí, ʻi hono haʻi ʻo Sētane ʻo ʻikai toe tukuangé. Ko e ngaahi meʻa kehé kotoa, te nau ʻi ha tuʻunga tatau pē mo ia he taimi ní, te tau kai, inu pea mo tui ha vala. …

ʻI he taimi ʻe fokotuʻu ai ʻa e Puleʻanga ʻo e ʻOtuá ʻi he māmaní ʻi he mālohi, nāunau, haohaoa, pea lolomi mo e pule fakaaoao ʻa e kau tangata angakoví, ʻi he Nofo Tuʻí, ʻe maʻu ʻe he Kāingalotu ʻa e ʻOtuá ha faingamālie ke langa honau ngaahi temipalé, pea ke nau hū ʻi ai, ʻo nau hoko ko e ngaahi pou ʻi he ngaahi temipale ʻo e ʻOtuá [vakai, Fakahā 3:12], pea te nau fakafofongaʻi ʻenau kau pekiá. Te tau mamata atu ki ha ʻalu hake ʻa hotau ngaahi kaungāmeʻá, pea mahalo mo ha niʻihi kuo tau maheni mo kinautolu heni. … Te tau maʻu ha ngaahi fakahā ʻa ia te tau ʻiloʻi lelei ai ʻa ʻetau ngaahi kuí ʻo aʻu ki heʻetau tamai ko ʻĀtamá pea mo ʻetau faʻē ko ʻIví, pea te tau ʻalu ki he ngaahi temipale ʻo e ʻOtuá ʻo fakafofongaʻi kinautolu. Ka hili iá ʻe fakamaʻu leva ʻa e [fānaú] ki he ngaahi [mātuʻá] kae ʻoua kuo fakakakato ʻa e hokohokó ʻo aʻu kia ʻĀtama, pea ʻi ai leva ha hokohoko haohaoa ʻo e Lakanga Fakataulaʻeikí meia ʻĀtama ki he taimi ʻe ʻosi ai ʻa e māmaní.

Ko e ngāue ʻeni ʻe fai ʻe he Kāingalotú ʻi he Nofo Tuʻí. (Ngaahi Akonaki ʻa e Kau Palesiteni ʻo e Siasí: Pilikihami ʻIongi [2007] 383-84)

ʻE kei tuʻu nai e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he Nofo Tuʻí?

Naʻe pehē ʻe Palesiteni Lāsolo M. Nalesoni:

He ʻikai hiki ʻa e Siasí ni mei hono tuʻungá, ʻo aʻu pē ki he Nofo Tuʻí. (Russell M. Nelson, “How Firm Our Foundation,” Liahona, May 2002, 76)

1 Nīfai 22:26. ʻE lava fēfē ke ʻikai maʻu ʻe Sētane ha mālohi?

Naʻe akoʻi ʻe Palesiteni Sipenisā W. Kimipolo (1895-1985) ʻo pehē:

Ko e taimi ʻoku haʻi ai ʻa Sētane ʻi ha ʻapí—ko e taimi ʻoku haʻi ai ʻa Sētane ʻi ha moʻui ʻa ha tahá—kuo ʻosi kamata leva ʻa e Nofo Tuʻí ʻi he ʻapi ko iá, ʻi he moʻui ko iá (Teachings of Spencer W. Kimball, ed. Edward L. Kimball [1982], 172)