2 Nīfai 26

Ko e Vakai, ʻOfa, mo Fakaʻapaʻapaʻi e Niʻihi Kehé ʻo Hangē ko e ʻOtuá

ʻOku tau fehangahangai ʻi he ʻaho kotoa pē mo ha ngaahi pōpoaki mo ha fakamatala naʻe fakataumuʻa ke ne tākiekina ʻetau ngaahi ongó mo e fakakaukaú. Naʻe akoʻi ʻe Nīfai ʻi he 2 Nīfai 26, ʻa e fakakaukau ʻa e ʻOtuá. ʻOku fakataumuʻa ʻa e lēsoni ko ʻení ke tokoniʻi koe ke ke Vakai, ʻOfa, mo Fakaʻapaʻapaʻi e Niʻihi Kehé ʻo Hangē ko e ʻOtuá

Ko ʻetau fakakaukaú

Vakaiʻi e ngaahi fakatātā ko ʻení pea fakakaukau ki he founga ʻoku liliu ai ʻe he ngaahi matasioʻata kehekehé ʻetau vīsoné.

• ʻE liliu fēfē nai ʻe he ngaahi matasioʻata kehekehe ko ʻení e fakakaukau ʻa ha taha?

• Ko e hā ha ngaahi meʻa ʻokú ne liliu e anga ʻo ʻetau vakai mo fakafeangai ki he niʻihi kehé?

Tuku ha kiʻi taimi ke ke fakakaukau ai ki he anga hoʻo vakai ki he niʻihi kehé. Fakakaukau ki he meʻa te ne fakafōtunga hoʻo fakakaukaú mo e founga ʻe lava ke ne tākiekina ai hoʻo ongo mo e tōʻonga ki he niʻihi kehé. ʻI hoʻo akó, fekumi ki ha ueʻi fakalaumālie ke ke ʻiloʻi ʻa e meʻa te ke lava ʻo fai ke mamata mo feohi ai mo e niʻihi kehé ʻo hangē ko e Fakamoʻuí.

ʻOku fakataumuʻa ʻa e lēsoni ko ʻení ke tokoniʻi koe ke ke Mamata, ʻOfa, mo Fakaʻapaʻapaʻi e Niʻihi Kehé ʻo Hangē ko e ʻOtuá

Ko e ʻulungaanga ʻa e ʻOtuá

ʻI he 2 Nīfai 26, naʻe mamata ʻa Nīfai ki he ngāue fakafaifekau ʻa e Fakamoʻuí ʻi he lotolotonga ʻo e kau Nīfaí, kae pehē ki he faiangahala mo e fakaʻauha fakaʻosi ʻo hono kakaí. Naʻá ne mamata foki ki he faiangahala ʻa e kau Senitailé ʻi he ngaahi ʻaho fakaʻosí. ʻI he tafaʻaki ʻe tahá, naʻá ne fakamamafaʻi e tokanga ʻa e ʻOtuá ki Heʻene fānaú kotoa.

Fakakaukau ki he ngaahi fehuʻi ʻe tolu ko ʻení ʻi hoʻo lau ʻa e 2 Nīfai 26:12–13, 23–33:

• Ko e hā e anga ʻo e vakai mo e ongo ʻoku maʻu ʻe he ʻOtuá ki Heʻene fānaú?

• ʻOkú Ne fakahaaʻi fēfē ʻení?

• Ko e hā Hono finangalo ki he founga ʻoku tau vakai mo fakafeangai ai ki he niʻihi kehé?

1. Tali e ngaahi fehuʻi ko ‘ení:

   • Ko e hā ha ngaahi foʻi lea, kupuʻi lea, pe ngaahi tefitoʻi moʻoni naʻá ke fakaʻilongaʻi te ne lava ʻo tali e ngaahi fehuʻí? Ko e hā hono ʻuhingá?

   • Ko e hā naʻá ke ako pe ongoʻi fekauʻaki mo e ʻulungaanga ʻo e ʻOtuá?

   • ʻE tākiekina fēfē ho vā fetuʻutaki mo e ʻOtuá ʻi hoʻo manatuʻi e ngaahi tefitoʻi moʻoni ko ʻeni fekauʻaki mo Iá? Te ne tākiekina fēfē nai hoʻo tōʻonga ki he niʻihi kehé?

Fakatokangaʻi naʻe fakaʻilongaʻi ʻe Nīfai ʻi he 2 Nīfai 26:33, ha niʻihi fakafoʻituitui kehekehe ʻaki ʻene fakatauhoa kinautolu ʻi ha ngaahi kulupu kehekehe. ʻE ala tokoni e ngaahi fehuʻi ko ʻení ke mahino lelei ange kiate koe e ngaahi meʻa ko ʻení. ʻE lava ke ke hiki e ngaahi fakaʻuhinga ko ʻení ʻi hoʻo folofolá ʻi he tafaʻaki ʻo e vēsí.

• Pōpulá: Ko ha hopoate.

• Hītení: Ko ha taha ʻoku ʻikai tui ki he ʻOtuá.

• Siú mo e Senitailé: Ko ha kupuʻi lea ʻoku ʻuhinga kiate kinautolu kotoa ʻoku kau ki he fale ʻo ʻIsilelí mo kinautolu ʻoku ʻikaí.

Ko ha potufolofola fakataukei fakatokāteline ʻa e 2 Nīfai 26:33. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

• Ko e hā ha faikehekehe ʻe hoko kapau naʻe tali mo moʻui ʻaki ʻe he māmaní e ngaahi ngaahi akonaki ʻi he veesi 33?

Fakaʻaongaʻi ha kiʻi taimi ke fakalaulauloto ai ki hoʻo fakakaukaú, kau ai ʻa e ongo ʻokú ke maʻú mo hoʻo tōʻonga ki he niʻihi kehé, ʻi hono fakafehoanaki ki he fakakaukau ʻa e ʻOtuá mo e anga ʻEne ongo mo e fakafeangai ki he niʻihi kehé.

  ChurchofJesusChrist.org 

We Don’t Need to Be the Same to Be One

We are different by design. Embrace the “and.”

2. Tali e ngaahi fehuʻi ko ‘ení:

   • Te ne takiekina fēfē nai koe ke ke manatuʻi e fakakaukau mo e ngaahi ongo ʻa e ʻOtuá ki he kakai kotoa pē?

   • Ko e hā ha ngaahi founga ʻokú ke fai lelei ai ʻi hoʻo vakai mo feohi mo e niʻihi kehé ʻo hangē ko ia ʻe fai ʻe he Tamai Hēvaní mo Sīsū kiate kinautolú?

   • ʻE tokoni fēfē hono manatuʻi e ngaahi akonaki fekauʻaki mo e ʻEikí ʻi he 2 Nīfai 26:33 ke ke vakai, ʻofa, mo fakaʻapaʻapaʻi e niʻihi kehé ʻo hangē ko e ʻOtuá?

ʻI he ngaahi ʻaho siʻi ka hokó, feinga ke fakatokangaʻi ʻa e anga hoʻo vakai, ongoʻi, pea mo fakafeangai ki he niʻihi kehé. Fakafanongo ki he ngaahi ueʻi mei he Laumālie Māʻoniʻoní pea fekumi ki he tokoni ʻa e ʻEikí ke fai ha faʻahinga liliu pē ʻoku fiemaʻu ke ke ʻofa ai mo fakaʻapaʻapaʻi e niʻihi kehé ʻo hangē ko e ʻOtuá.

Fili Pē: Fie Ako Lahi Ange?

Te u lava fēfē ʻo hangē ange ko e ʻOtuá ʻi heʻeku vakai mo ʻofa ki he niʻihi kehé?

Naʻe akoʻi ʻe Palesiteni Lāsolo M. Nalesoni ʻa e founga ʻe lava ke tokoniʻi ai kitautolu ʻe Sīsū Kalaisi ʻi heʻetau feinga ke fakalakalaká:

Kuo teʻeki ai ke tau maʻu ʻa e uouangataha mo e fefakaʻapaʻapaʻaki te ne fakaʻatā ʻa e tangata, fefine, tamasiʻi mo e taʻahine kotoa pē ke aʻusia e tuʻunga lelei taha ʻo kinautolú.

Ko e faitoʻo ʻo e ngaahi meʻa ʻokú ne fakafaingataʻaʻiaʻi kitautolú naʻe fakatupu ia ʻe he ʻEikí Faifakamoʻuí, ʻa e Sīsū ko e Kalaisí. ʻI he taimi naʻe poleʻi ai Ia ʻe ha tangata Fālesi manuki ke fakahā ʻa e fekau lahi taha ʻi he fonó, naʻe fakangalongataʻa mo nounou ʻa e tali ʻa e Fakamoʻuí. Naʻe fonu ia ʻi he moʻoni ʻoku fakatau ki ha moʻui ʻoku fakafiefiá. Ko ʻEne fakahinohinó ke ʻuluaki ʻofa ki he ʻOtuá ʻaki e kotoa hotau lotó, pea ke ʻofa ki hotau kaungāʻapí ʻo hangē pē ko kitautolú (vakai, Mātiu 22:35–39). …

ʻOku tau fehokotaki kotoa, pea ʻoku ʻi ai hotau ngafa mei he ʻOtuá ke tokoni ke fakaleleiʻi ange ʻa e moʻui maʻanautolu ʻoku tau feohí. ʻOku ʻikai fiemaʻu ia ke tau faitatau pe fōtunga tatau ka tau feʻofaʻaki. ʻOku ʻikai fiemaʻu ia ke tau felotoi ki ha meʻa ka tau feʻofaʻaki. Kapau ʻoku tau maʻu ha ʻamanaki lelei ke toe maʻu e angaleleí mo e ongoʻi ʻofa fakaetangata ʻa ia ʻoku tau fakaʻamuá, kuo pau ke kamata ia ʻiate kitautolu takitaha, ko ha tokotaha ʻi he taimi ʻe taha. (Russell M. Nelson, “NAACP Convention Remarks” [lea ʻi he fakataha fakataʻu ʻa e Fakataha Fakapuleʻanga ki hono Fakatupulekina ʻo e Kakai Lanú ʻi Tītuloiti, Misikeni, 21 Siulai, 2019], newsroom.ChurchofJesusChrist.org)

Naʻe vahevahe ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni:

ʻOku Fakangata ʻe he Melino ʻa Kalaisí ʻa e Tāufehiʻá

‘Oku akoʻi mai ‘e ‘Eletā Lenilani ko hono fakamuʻomuʻa e ʻofa ʻa e ʻOtuá mo hotau tuʻunga fakaākonga ʻo Sīsū Kalaisí, te tau lava ai ʻo ikunaʻi hotau ngaahi faikehekehé pea maʻu ʻa e melinó.

Ko e uouangatahá ʻoku fiemaʻu ai e ngāué. ʻOku tupulaki ʻi he taimi ʻoku tau tanumaki ai e ʻofa ʻa e ʻOtuá ʻi hotau lotó mo tau tokanga taha ki hotau ikuʻanga taʻengatá. ʻOku fakatahaʻi kitautolu ʻe hotau tuʻunga ko e fānau ʻa e ʻOtuá pea mo ʻetau loto ʻaki e ngaahi moʻoni ʻo e ongoongolelei kuo fakafoki maí. ʻOku fakatupu ʻe heʻetau ʻofa ki he ʻOtuá mo hotau tuʻunga fakaākonga ʻia Sīsū Kalaisí ha tokanga moʻoni ki he niʻihi kehé. ʻOku tau fakamahuʻingaʻi e tuifio ʻo e ngaahi ʻulungāngá, fakakaukaú, mo e talēniti ʻo e kakai kehé. Kapau ʻoku ʻikai ke tau tuku hotau tuʻunga fakaākonga ʻia Sīsū Kalaisí ke muʻomuʻa ange he ngaahi meʻa fakataautaha ʻoku tau tokanga ki aí mo ʻetau fakakaukaú, pea tā ʻoku totonu ke tau toe vakavakaiʻi e ngaahi meʻa ʻoku tau fakamuʻomuʻá pea liliu. (Dale G. Renlund, “ʻOku Fakangata ʻe he Melino ʻa Kalaisí ʻa e Tāufehiʻá,” Liahona, Nōvema 2021, 84)

Naʻe akoʻi ʻe Sisitā Mīsela D. Keleki, ko e Tokoni ʻUluaki ʻi he Kau Palesitenisī Lahi ʻo e Kau Finemuí ʻa e meʻá ni:

Pray for Eyes to See as He Sees

Michelle D. Craig of the Young Women General Presidency shares how to see things more deeply, as Jesus Christ does. “Pray for eyes to see,” she counsels. “His grace will increase our capacity.”

ʻE tokoniʻi fēfē ʻe he ngaahi akonaki ʻi he 2 Nīfai 26:33 ʻa e kakaí ke nau haʻu ki he Fakamoʻuí?

Naʻe fieʻilo ʻa Kalini ki he Siasí ka naʻá ne kei maʻu pē ha ngaahi fehuʻi. Sio he vitiō ʻi laló ke vakai ki he founga naʻe tokoniʻi ai ia ʻe he 2 Nīfai 26:33.

Jesus is Real: Calyann's Experience with the Book of Mormon

Friends, fun, success—Calyann had it all! That was until she realized she lived in a prison of her own making. While learning of Jesus Christ, Calyann felt His love, which is available to all who seek Him.

• Fakatokangaʻi ange ʻoku fokotuʻu atu foki mo e foʻi vitiō kimuʻá ko ha vitiō akoako ʻi he lēsoni hokó.

ʻOku ʻuhinga nai ʻa e faaitaha ʻia Kalaisí kuo pau ke tau tatau kotoa?

Naʻe akoʻi ʻe ʻEletā Kuenitini L. Kuki mo Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻoku fakaʻatā ai ʻe he fokotuʻutuʻu ʻa Kalaisí ʻa e ngaahi faikehekehe fakafoʻituituí:

ʻI hotau kuongá ni … [ʻoku] tō e fakamamafa ʻa e kakai tokolahi ki he fakafaʻahingá ʻo faʻa fakatefito ʻi he ongoongoá, tuʻunga tangata pe fefiné, matakalí, pea mo e koloaʻiá. ʻI he ngaahi fonua lahi pe meimei ko e tokolahi tahá, ʻoku vaetuʻua ai e kakaí ʻe he anga ʻo e moʻuí. ʻI he Siasi ʻo e ʻEikí, ko e tōʻonga moʻui pē ʻoku tau tauhi ki ai mo akoʻí, ʻa e tōʻonga moʻui ʻo e ongoongolelei ʻo Sīsū Kalaisí. Ko e uouongataha ʻoku tau fekumi ki aí, ke tau faaitaha mo e Fakamoʻuí mo ʻEne ngaahi akonakí. …

ʻI hono fakahoko ʻo e ngaahi fatongia fakalangí, ʻo fakatefito ʻi he anga-māʻoniʻoní, uouangatahá, mo e tuʻunga tatau ʻi he ʻao ʻo e ʻEikí, ʻokú ne ʻomi ha fiefia mo ha nonga fakataautaha ki he māmani ko ʻení mo teuteuʻi kitautolu ki he moʻui taʻengata ʻi he maama ka hokó. (Quentin L. Cook, “Teuteu ke Feʻiloaki mo e ʻOtuá,” Liahona, Mē 2018, 116)

ʻOku ʻatā [ia maʻanautolu] ʻoku kehekehe ʻenau leá, kau ki he ngaahi anga fakafonua kehekehe, pea nofo ʻi ha ngaahi feituʻu kehekehé. ʻOku ʻatā [ia] ki he tāutahá, kakai malí, fāmili tokolahí, mo e paʻá. ʻOku ʻatā [ia maʻanautolu] ne nau fakafehuʻia ʻenau tuí pea mo kinautolu ʻoku nau kei fakafehuʻia pē ʻenau tuí. ʻOku ʻatā kiate kinautolu ʻoku kehe ʻenau femanakoʻakí. Ko hono fakanounoú, ʻoku ʻi ai [ha] feituʻu maʻá e taha kotoa pē ʻoku ʻofa ki he ʻOtuá mo tauhi ʻEne ngaahi fekaú he ko ha meʻafua taʻe toe leʻeia ia ʻo e ʻulungaanga fakatāutahá. (Jeffrey R. Holland, “Ngaahi Hiva ʻoku Hivaʻi mo ʻIkai Hivaʻí,” Liahona, Mē 2017, 51)

Sio he foʻi vitiō ko ʻení, ʻa ia ʻoku ʻomi ai ʻe ʻEletā Hōlani ha faleʻi maʻanautolu ʻoku ongoʻi loto-foʻi pe liʻekina mei he puleʻanga ʻo e ʻEikí koeʻuhí ʻoku nau pehē ʻoku nau kehe ʻaupito mei he niʻihi kehé.

“Songs Sung and Unsung”

When you’re feeling low and your days are difficult, remember, “the Savior hears the songs you cannot sing. ”Don’t give up. “Believe in yourself and believe in Him.”

Ngaahi Hiva ʻoku Hivaʻi mo ʻIkai Hivaʻí

Ko hono ʻomai ʻe ʻEletā Hōlani ha fakalotolahi maʻanautolu ʻoku ʻikai ke nau lava ʻo hivaʻi e “fasi ʻo e tuí” ʻaki ʻene fakaʻaongaʻi e heliaki mei he himi ko e “Lolotonga ʻEku Nofó.”