2 Nephi 27

“Usa ka Kahibulongan nga Buhat ug usa ka Katingalahan”

Paghunahuna og mga panghitabo nga imong makonsiderar nga kahibulongan ug sa unsang paagi kini nga mga panghitabo nakaapekto kanimo ug niadtong nagpalibot kanimo. Si Jesukristo misaad sa paghimo sa kahibulongan nga buhat sa pagpahiuli sa Iyang ebanghelyo, lakip sa Basahon ni Mormon, dinhi sa yuta sa ulahing mga adlaw. Kini nga leksiyon makatabang nimo nga mobati og mas dakong pasalamat sa Ginoo sa pagpahiuli sa Basahon ni Mormon dinhi sa yuta.

Usa ka butang nga kahibulongan

Paghunahuna og usa ka tawo kinsa nakahimo og usa ka butang nga kahibulongan alang kanimo o alang sa usa ka tawo nga imong kaila.

• Unsa ang gibuhat niining tawhana?

• Unsay imong gibati sa tawo nga nagbuhat niini? Ngano man?

Sa 2 Nephi 27, ang Ginoo mipamatuod sa usa ka butang nga kahibulongan nga Iyang buhaton aron sa pagtabang kanato latas sa pagkadautan ug apostasiya sa kataposan nga mga adlaw. Samtang magtuon ka, pamalandongi kon sa unsang paagi nga ang unsay imong nakat-onan makaapekto sa imong gibati mahitungod sa Ginoo.

Basaha ang 2 Nephi 27:25–26, nga mangita sa unsay gisaad sa Ginoo nga Iyang buhaton.

Si Presidente Russell M. Nelson mipahayag nga kining “kahibulongan nga buhat maglakip sa pagtungha sa Basahon ni Mormon ug sa Pagpahiuli sa ebanghelyo” (“Mga Saksi sa Kasulatan,” Liahona, Nob. 2007, 46).

Usa ka kamatuoran nga atong makat-onan gikan niini nga panagna mao nga ang Ginoo mihimo og usa ka kahibulongan nga buhat ug usa ka katingalahan pinaagi sa pag-abot sa Basahon ni Mormon ug sa Pagpahiuli sa Iyang ebanghelyo.

• Unsa ang inyong nahibaloan mahitungod sa Basahon ni Mormon ug sa gipahiuli nga ebanghelyo nga mahimong hinungdan nga kamo motawag niini nga “kahibulongan”?

Ang Basahon ni Mormon: Usa ka kahibulongan nga buhat ug usa ka katingalahan

Daghan sa 2 Nephi 27 nagtutok sa pagtungha sa Basahon ni Mormon. Sa dili pa magtuon og dugang gikan niini nga kapitulo, paggahin og panahon sa pagpamalandong sa imong kaugalingong mga pagbati mahitungod sa Basahon ni Mormon. Kahibulongan ba kini kanimo sa personal? Ngano o nganong dili? Unsay imong mga pangutana? Samtang magtuon ka, pangitaa ang mga pagtulun-an nga makatabang nimo nga mas klaro nga makita ang Basahon ni Mormon isip usa ka “kahibulongan nga buhat ug usa ka katingalahan.”

Si Nephi nanagna nga ang Basahon ni Mormon moabot aron sa pagtabang sa mga problema sa kataposang mga adlaw (tan-awa sa 2 Nephi 27:6). Misulat usab siya nga ang Dios motugot sa pipila ka mga saksi nga makakita sa mga palid diin nahubad gikan ang Basahon ni Mormon ug aronmopamatuod sa katinuod sa basahon ngadto sa kalibotan (tan-awa sa 2 Nephi 27:12–14). Si Nephi mipaambit dayon og panagna mahitungod sa pipila ka mga detalye nga may kalabotan sa paghubad sa Basahon ni Mormon.

Kopyaha ang mosunod nga tsart ngadto sa imong journal sa pagtuon, ug basaha ang mga bersikulo nga gilista sa duha ka mga kolum. Gamita ang tsart sa pagtabang kanimo nga masabtan ang panagna ug ang katumanan niini.

	Panagna kon unsay buhaton sa tawo (2 Nephi 27:15–19)	Ang ngalan sa tawo nga nagtuman sa panagna (Joseph Smith—Kasaysayan 1:63–65)
Unang Tawo (“dili maalamon”)
Ikaduhang Tawo (“lain”)
Ikatulong Tawo (“maalamon”)

• Ngano sa imong hunahuna nga ang Ginoo migamit ni Joseph Smith, kinsa usa ka tawo nga dili maalamon, sa pagpatungha sa Basahon ni Mormon?

Basaha ang 2 Nephi 27:20–23, nga mangita og mga rason nganong gipili sa Dios ang usa ka tawo nga dili maalamon sa paghubad sa Basahon ni Mormon.

1. Tubaga ang mosunod nga mga pangutana:

   • Unsa ang imong nakat-onan mahitungod sa Ginoo gikan niini nga mga bersikulo? Sa unsang paagi nga ang pagkahibalo niini nga mga butang mahitungod Kaniya makaapekto kanimo?

   • Sa unsa nga paagi nga ang pagtungha sa Basahon ni Mormon ebidensiya sa pahayag sa Ginoo nga “Ako makahimo sa pagbuhat sa akong kaugalingon nga buhaton”? (bersikulo 21).

Si Emma Smith (1804–1879), ang asawa sa Propeta, mipamatuod sa balaanong tabang nga nadawat ni Joseph sa iyang paghubad sa Basahon ni Mormon:

Si Joseph Smith dili makasulat ni makadiktar og klaro ug maayong pagkahan-ay nga sulat, unsa pa kaha ang pagdiktar sa usa ka libro sama sa Basahon ni Mormon. Ug, bisan tuod ako usa ka aktibong partisipante sa mga talan-awon nga nahitabo, … kini kahibulongan alang kanako, “usa ka kahibulongan ug usa ka katingalahan.” …

Ang akong pagtuo mao nga ang Basahon ni Mormon kay balaanon ang pagkatinuod—wala koy bisan gamay nga pagduhaduha niini. … Kini kaduhaduhaan nga ang usa ka makinaadmanon nga tawo makahimo niini; ug, alang sa usa ka ignorante kaayo ug dili maalamon sama kaniya, imposible kini. (Emma Smith, sa “Last Testimony of Sister Emma,” The Saints’ Herald, Okt. 1, 1879, 290)

2. Tubaga ang labing menos duha sa mosunod nga mga pangutana:

   • Base sa unsay imong nakat-onan karon, sa unsang paagi nga ang pagtungha sa Basahon ni Mormon usa ka “kahibulongan nga buhat ug usa ka katingalahan”?

   • Sa unsang paagi nga ang pagkahibalo nga ang Ginoo mihatag kanato niini nga panalangin makaapekto sa imong gibati ngadto Kaniya?

   • Unsa nga mga kasinatian ang imong nasinati o sa uban nga naghulagway kon unsa ka kahibulongan ang Basahon ni Mormon?

Aron makakita og mga ehemplo kon unsa ka kahibulongan ang Basahon ni Mormon, mahimo nimong tan-awon ang “Ang Basahon ni Mormon: Unsa kaha ang Imong Kinabuhi Kon wala Kini?” gikan sa time code 5:38 hangtod sa 11:26. Ang bidyo makita sa ChurchofJesusChrist.org.

Solving Life's Problems with the Book of Mormon

Ang Basahon ni Mormon: Unsa kaha ang Imong Kinabuhi Kon wala Kini?

Sa sayong bahin niini nga leksyion, gihangyo ka sa paghunahuna mahitungod sa imong mga pagbati sa Basahon ni Mormon. Ikonsiderar kon ang bisan hain sa mga kamatuoran nga imong gitun-an karon nakaapekto sa imong pagpamatuod niining sagrado nga basahon. Sa imong journal sa pagtuon, irekord ang bisan unsang mga hunahuna o mga impresyon nga imong nadawat, ingon man usab ang umaabot nga mga lihokonon nga naaghat ka nga buhaton.

Opsiyonal: Gustong Makakat-on Pa og Dugang?

Sa unsang paagi nga ang pagtungha sa Basahon ni Mormon usa ka kahibulongan nga buhat ug usa ka katingalahan?

Si Presidente Russell M. Nelson mitudlo:

Hunahunaa ang mubo nga panahon nga gigamit ni Joseph sa paghubad sa Basahon ni Mormon. Nagtrabaho gikan sa Abril hangtod sa Hunyo 1828, gihubad ni Joseph ang 116 ka pahina nga sa wala madugay giwala ni Martin Harris. Misugod si Joseph sa paghubad pag-usab sa Martes, Abril 7, 1829, uban ni Oliver Cowdery isip tigsulat. Ang manuskrito nahuman paglabay sa otsenta y singko ka adlaw, sa pagka-Hunyo 30 niana nga tuig. Siyempre, dili tanan niana nga panahon gigahin sa pagtrabaho sa paghubad. Ang Propeta ug ang iyang mga tigsulat migahin usab og panahon sa pagkaon, sa pagkatulog, sa pagpangita og trabaho, aron sa pagdawat sa Aaronic ug Melchizedek nga mga pagkapari, sa paghimo og labing menos usa (ug posible duha) nga mga biyahe ngadto sa Colesville katloan ka milya ang gilay-on, aron sa pagdawat ug pagrekord sa napulog tulo ka mga pagpadayag nga mga seksiyon na karon sa Doktrina ug mga Pakigsaad, sa pagbalhin gikan sa Harmony ngadto sa Fayette, aron sa pag-angkon sa Basahon ni Mormon copyright, ug sa pagsugod sa paghimo og mga kahikayan alang sa pagmantala sa Basahon ni Mormon. Sa konserbatibong pagbana-bana, aduna na lay sayes sinta y singko o minos pa nga mga adlaw tingtrabaho diin ang propeta ug ang iyang mga tigsulat mihubad niini nga basahon, nga naglangkob og 531 ka mga pahina sa kasamtangang edisyon niini. (Tan-awa sa John W. Welch, Ensign, Ene. 1988, pp. 46–47.) Kana nagbana-bana og gidaghanong walo ka pahina matag adlaw. Hunahunaa kini kon maghubad ka og basahon, o samtang mag-iskedyul ka sa imong kaugalingong pagbasa sa Basahon ni Mormon. (Russell M. Nelson, “A Treasured Testament,” Ensign, Hulyo 1993, 61–62)

Si Elder Ulisses Soares sa Korum sa Napulog Duha ka Apostoles mipamatuod:

Ang proseso sa paghubad sa Basahon ni Mormon usa … ka milagro. Kining sagrado nga karaang rekord wala “gihubad” diha sa tradisyonal nga paagi nga ang mga eskolar mohubad sa karaan nga mga teksto pinaagi sa pagkat-on sa karaan nga pinulongan. Kita angay nga molantaw pa sa proseso nga sama og “pagpadayag” uban sa tabang sa pisikal nga kahimanan nga gihatag sa Ginoo, sukwahi ngadto sa “paghubad” pinaagi sa tawo nga dunay kahibalo sa mga pinulongan. … Ang tabang sa Ginoo diha sa paghubad sa mga palid—o sa pagpadayag, sa ingon nga pagkasulti—makita usab kon maghunahuna sa milagro sa kamubo sa panahon nga nagamit ni Joseph Smith sa paghubad niini. (Ulisses Soares, “Ang Pagtungha sa Basahon ni Mormon,” Liahona, Mayo 2020, 33)

Compelling Witness

Unsa ang kahibulongan mahitungod sa Pagpahiuli sa Simbahan ni Kristo ug sa ebanghelyo?

Tan-awa ang “Usa ka Pamahayag ngadto sa Kalibotan sa Ikaduhang Siglo nga Kasaulogan” gikan sa time code 2:41 hangtod sa 9:13 o basaha ang “Ang Pagpahiuli sa Kahingpitan sa Ebanghelyo ni Jesukristo” (ChurchofJesusChrist.org), nga mangita sa unsay kahibulongan mahitungod sa Pagpahiuli sa Simbahan ni Kristo ug sa ebanghelyo.

A Bicentennial Proclamation to the World