2 Նեփի 32.1–7

«Սնվեք Քրիստոսի խոսքերով»

Պատկերեք տոնական խնջույքի սեղան՝ լի համեղ ուտեստներով: Ինչպե՞ս եք տեսնում ձեզ՝ նման խնջույքը վայելելիս: Իր ժողովրդին ուխտի ճանապարհով Հիսուս Քրիստոսին հետևելու մասին ուսուցանելուց հետո Նեփին զգաց, որ նրանք դեռևս չգիտեին ինչ անել մկրտությունից հետո: Նա պատասխանեց՝ խրախուսելով իր ժողովրդին «սնվել Քրիստոսի խոսքերով» և վստահեցրեց նրանց, որ Փրկչի խոսքերը կառաջնորդեն նրանց առաջ մղվելիս (2 Նեփի 32.3): Այս դասը նպատակ ունի օգնել ձեզ սնվել Հիսուս Քրիստոսի խոսքերով:

Ուտելու ժամանա՛կն է

Նայեք հետևյալ նկարներին և մտածեք, թե ինչ նմանություններ ու տարբերություններ կան արագ խորտիկներ ուտելու, ճաշելու և հատուկ առիթի ժամանակ սնվելու միջև:

• Ի՞նչ նմանությունների ու տարբերությունների մասին մտածեցիք:

• Եթե Քրիստոսի խոսքերի ուսումնասիրությունը համեմատենք ուտելու այս երեք ձևերի հետ, ի՞նչ կներկայացնի յուրաքանչյուրը:

Երկնային Հայրը և Հիսուս Քրիստոսը ցանկանում են օրհնել ձեզ՝ առաջնորդելով, ուղղորդելով, օգնելով և մխիթարելով: Մտածեք, ինչպես եք վերջին անգամ ուսումնասիրել Փրկչի խոսքերը: Ինչպե՞ս կնկարագրեիք այդ փորձառությունը. որպես՝ արագ խորտիկներ ուտել, ճաշել, թե՞ խնջույքի ժամանակ սնվել: Ի՞նչ կասեք անցյալ շաբաթվա կամ անցյալ ամսվա մասին: Ուսումնասիրությունը շարունակելիս դիմեք Սուրբ Հոգու օգնությանը՝ իմանալու, թե Քրիստոսի խոսքերի ուսումնասիրումն ինչպես է օրհնում ձեր կյանքը: Փնտրեք նաև ոգեշնչում, որը կօգնի ձեզ իմանալ, թե ինչպես լավացնել Քրիստոսի խոսքերով սնվելու ձեր ջանքերը:

Հիսուս Քրիստոսի խոսքերը

Հիշեք, որ Նեփին իր ժողովրդին ուսուցանում էր «նեղ ու անձուկ արահետի մասին, որը տանում է դեպի հավերժական կյանք» և այդ ճամփորդությունը սկսելու համար անհրաժեշտ հատկությունների մասին (2 Նեփի 31.17–18): Նեփին հասկացավ, որ իր ժողովուրդը չգիտեր ինչ անել մկրտության պատվիրանը ստանալուց հետո և ինչպես շարունակել ուխտի ճանապարհը:

Կարդացեք 2 Նեփի 32.1–3 հատվածը և գտեք Քրիստոսի խոսքերն ուսումնասիրելու մասին Նեփիի խորհուրդը: Այդ ժամանակ մտածեք ձեր սեփական մտահոգությունների, հարցերի, կարիքների և այն մասին, թե Նեփիի ուսմունքներն ինչպես կարող են օգտակար լինել ձեր համար: Օգտակար է իմանալ, որ «խոսել հրեշտակների լեզվով» արտահայտությունը (2 Նեփի 32.2) «պարզապես նշանակում է … խոսել Սուրբ Հոգու զորությամբ» (Բոյդ Ք. Փաքեր, «Սուրբ Հոգու պարգևը. այն, ինչ պետք է իմանա յուրաքանչյուր անդամ», Ensign, օգոստոս 2006թ., 50):

2 Նեփի 32.3 հատվածը վարդապետության սերտման հատված է: Կարող եք առանձնահատուկ ձևով նշել վարդապետության սերտման հատվածները, որպեսզի հեշտությամբ գտնեք դրանք: Հաջորդ դասին դուք հնարավորություն կունենաք կիրառելու այս հատվածում ուսուցանված վարդապետությունը որևէ հարցի կամ իրավիճակի համար:

• Ի՞նչ բացահայտեցիք:

2 Նեփի 32.3 հատվածում ձեր բացահայտած ճշմարտություններից մեկը կարող է լինել այն, որ երբ մենք սնվում ենք Հիսուս Քրիստոսի խոսքերով, դրանք մեզ ասում են բոլոր բաները, որ պետք է անենք: Կարող եք այդ ճշմարտությունը նշել ձեր սուրբ գրություններում:

• Որտե՞ղ կարող ենք գտնել Հիսուս Քրիստոսի խոսքերը:

• Ըստ ձեզ՝ Նեփին ինչո՞ւ օգտագործեց «սնվել» բառը, երբ նկարագրում էր, թե ինչպես պետք է ուսումնասիրենք Փրկչի խոսքերը (2 Նեփի 32.3):

Կարդացեք Յոթանասունից երեց Տակաշի Վադայի հետևյալ հայտարարությունը: Առկայության դեպքում կարող եք դիտել Երեց Վադայի ուղերձը տեսանյութի ChurchofJesusChrist.org 0:53-1:42 հատվածը:

Սնվեք Քրիստոսի խոսքերով

Երբ երիտասարդ էի, ես կարծում էի, որ խնջույքն ուղղակի ճոխ ճաշ է՝ բրնձով, սուշիով և սոյայի սոուսով: Այժմ ես գիտեմ, որ իսկական խնջույքն ավելին է, քան համեղ կերակուր վայելելը: Դա ուրախության, սնուցման, հանդիսության, ընտանիքի և սիրելիների հանդեպ սիրով կիսվելու, Աստծուն մեր շնորհակալությունը հայտնելու և հարաբերություններ կառուցելու փորձառություն է, մինչ վայելում ենք առատ, աներևակայելի համեղ ուտելիք: Ես հավատում եմ, որ երբ մենք սնվում ենք Քրիստոսի խոսքերով, պարտավոր ենք մտածել նույն տեսակի փորձառության մասին: Սնվել սուրբ գրություններով չի նշանակում ուղղակի կարդալ դրանք: Այն պետք է բերի մեզ իսկական ուրախություն և կառուցի մեր փոխհարաբերությունները Փրկչի հետ: (Տակաշի Վադա, «Սնվեք Քրիստոսի խոսքերով», Լիահոնա, մայիս 2019թ., 38–39)

• Ի՞նչը տպավորեց ձեզ երեց Վադայի հայտարարության մեջ:

• Ի՞նչն է օգնում կամ կարող է օգնել ձեզ, որ ոչ թե պարզապես կարդաք Քրիստոսի խոսքերը, այլև սնվեք դրանցով:

• Հիշեք, թե ինչ գիտեք Հիսուս Քրիստոսի մասին և մտածեք, թե Նրա խոսքերն ինչու կարող են ուրախության, սնուցման և սիրո զգացումներ առաջացնել:

• Փրկչի խոսքով սնվելն ինչպե՞ս կարող է ուղղորդել ձեր կյանքը և ասել ձեզ՝ ինչ անել:

Հնարավորության դեպքում դիտեք «Եկ, հետևիր ինձ. Լիտո» տեսանյութը (0:59) (հասանելի է այստեղ՝ ChurchofJesusChrist.org), որպեսզի իմանաք, թե Տերն ինչպես կարող է բացահայտել գիտելիքն ու ճշմարտությունը, երբ Նրա խոսքերով եք սնվում:

Come, Follow Me—Lito

Ձեր սեփական փորձառությունները կարող են օգնել ձեզ սնվել Քրիստոսի խոսքերով:

Ուսումնասիրության բազմաթիվ եղանակներ կան, որոնք կարող են օգնել ավելի լավ սնվել Քրիստոսի խոսքերով, դրանց թվում են՝ աղոթել ոգեշնչման համար նախքան ուսումնասիրումը, ուղղել նախկինում և ուսումնասիրման ժամանակ ունեցած հարցերը, սահմանել բառերը, խորհել, կատարել խաչաձև հղումներ, կատարել նշումներ, փնտրել ճշմարտություններ Երկնային Հոր և Փրկչի մասին և նմանեցնել սուրբ գրությունները մեր սեփական կյանքին (1 Նեփի 19.23):

• Ի՞նչ ընդհանուր հուշումներ և հատուկ ուղղորդում եք ստացել, երբ սնվել եք Քրիստոսի խոսքերով:

Սնվել Քրիստոսի խոսքերով

Օգտվելով այսօր սովորածից՝ մի քանի րոպե կատարեք Քրիստոսի խոսքերով սնվելու վարժությունը: Դա կարող է լինել սուրբ գրությունների կամ մարգարեների խոսքերի ուսումնասիրությունը: Քրիստոսի խոսքերով սնվելիս փորձեք կատարել հետևյալ քայլերից մեկը կամ մի քանիսը.

• Կառուցեք ձեր հարաբերությունը Երկնային Հոր և Հիսուս Քրիստոսի հետ:

• Ավելի շատ սիրեք ու վստահեք Նրանց:

• Գտեք ճշմարտություններ, որոնք ձեզ ուրախություն են բերում և սնուցում են:

• Ստացեք ուղեցույց, թե ինչ պետք է անեք ձեր կյանքում:

1. Կատարեք հետևյալը․

   Գրի առեք որոշ բաներ, որոնք սովորեցիք, զգացիք և փորձեցիք Քրիստոսի խոսքերով սնվելու վարժությունը կատարելիս:

Ընտրովի. Ցանկանո՞ւմ եք ավելին իմանալ

2 Նեփի 32.2 Ինչպե՞ս կարող եմ խոսել հրեշտակների լեզվով:

Տասներկու Առաքյալների Քվորումից երեց Ջեֆրի Ռ. Հոլլանդը բացատրել է, որ երբ մենք ուրիշների հետ դրական ու սիրով ենք խոսում, մենք խոսում ենք հրեշտակների լեզվով:

Եղբայրնե՛ր և քույրե՛ր, մեր Փրկչին ավելի նմանվելու այս երկարատև հավերժական որոնումներում եկեք փորձենք այժմ «կատարյալ» տղամարդիկ և կանայք լինել գոնե այս մի ձևով՝ չվիրավորելով խոսքով կամ ավելի դրական ասած, խոսելով նոր` հրեշտակների լեզվով: Մեր խոսքերը մեր գործերի նման պետք է լցված լինեն հավատքով, հույսով ու գթությամբ` քրիստոնեական երեք մեծ պատվիրաններով, որոնք այնքան անհրաժեշտ են այսօրվա աշխարհում: Հոգու ազդեցությամբ այսպիսի խոսքեր ասելուց արցունքներ կարող են չորանալ, սրտեր կարող են բուժվել, կյանքեր կարող են բարձրացվել, հույսը կարող է վերադառնալ, վստահությունը կարող է գերիշխել (Ջեֆրի Ռ. Հոլլանդ, «Հրեշտակների լեզուն», Լիահոնա, մայիս 2007թ., 18):

Սուրբ գրություններում գրված Հիսուս Քրիստոսի խոսքերով սնվելն ինչպե՞ս կարող է ցույց տալ ինձ՝ ինչ անել:

Յոթանասունից երեց Սպենսեր Ջ. Քոնդին ուսուցանել է․

Դուք գուցե կանգնած եք առաքելության, ձեր ապագա կարիերայի և ի վերջո՝ ամուսնության վերաբերյալ որոշում կայացնելու խնդրի առաջ: Երբ կարդում եք սուրբ գրությունները և աղոթում ուղղորդման համար, պատասխանը գուցե չտեսնեք էջի վրա տպագրված բառերի տեսքով, սակայն կարդալիս կստանաք որոշակի տպավորություններ և հուշումներ, և ինչպես խոստացված է, Սուրբ Հոգին «ձեզ ցույց կտա բոլոր բաները, որ դուք պետք է անեք» [2 Նեփի 32.5] (Սպենսեր Ջ. Քոնդի, «Մեծ օգուտ լինել մեր մերձավորների համար», Ensign, մայիս 2002թ., 45):

Ինչո՞ւ պետք է ես կանոնավորապես սնվեմ Փրկչի խոսքերով:

Դիտեք «Հանապազօրյա հաց. օրինակ» տեսանյութը (2:51), որում Տասներկու Առաքյալների Քվորումից երեց Դ. Թոդ Քրիստոֆերսոնից կարող եք սովորել, թե մեր հոգիները սնելն ինչու է նույնքան կարևոր, որքան մեր ֆիզիկական մարմինները:

Daily Bread: Pattern