Atamai i Aoaoga Faavae: Mosaea 2:17

“Auauna Atu Lava Lea i Lo Outou Atua”

I le lesona “Mosaea 2:1–18,” na e aoao ai e faapea “pe a outou auauna atu i o outou uso-a-tagata, ua nao lo outou auauna atu lava lea i lo outou Atua” (Mosaea 2:17). O lenei lesona e mafai ona fesoasoani ia te oe e tauloto ai mau faasino o le atamai i aoaoga faavae ma le fasifuaitau autu o le mau mo le Mosaea 2:17, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga faataitai moni o le olaga.

Faamatala ma tauloto

Faitau le Mosaea 2:17 ma le fuaitau o le atamai i aoaoga faavae o le Feagaiga Fou Mataio 22:36–39, ma vaavaai mo mea e tutusa ai.

• O a ni mea e tutusa ai o e vaaia i le Mataio 22:36–39 ma le Mosaea 2:17?

• E faapefea ona e faamatalaina le aoaoga faavae o le auauna atu e faaaoga ai nei fuaitau?

Faaalu ni nai minute e tauloto ai le mau faasino ma le fasifuaitau autu o le mau mo le Mosaea 2:17. Tusi i luga o se fasipepa: “‘Pe a outou auauna atu i o outou uso-a-tagata, ua nao lo outou auauna atu lava lea i lo outou Atua’ (Mosaea 2:17).” Faaalu ni minute e toe fai ai le fasifuaitau autu o le mau ma le mau faasino i le faatele tou te mafai ai.

Ia e fealuai ma feaveai le fasipepa i le aso atoa. I le aso atoa pe a e lagona pe manatua le iai o le pepa iina, taumafai e toe fai le fasifuaitau autu o le mau ma le mau faasino i lou mafaufau. Ae e te lei alu e moe, taumafai e toe fai mai lou manatuaga.

Faataitai le faaaogaina

Faitau i mataupu faavae o le mauaina o le malamalama faaleagaga i le Pepa Autu o le Atamai i Aoaoga Faavae (2022). Filifili se fuaiupu se tasi mai vaega taitasi e te iloa e taua tele. Mafaufau e faailoga fuaiupu nei. Ia manatua fuaiupu nei a o e faia le gaoioiga lenei.

O le auauna atu e masani lava o se aafiaga lelei mo i latou o e auai ma i latou o loo auauna atu i ai. Peitai, e i ai foi luitau e mafai ona avea o se vaega o le auauna atu. Toe manatunatu i avanoa e auauna atu ai na e mauaina talu ai nei. O a nisi o luitau na oo faatasi mai ma le auauna atu? O a nisi mafuaaga atonu e filifili ai tagata ia lē auauna atu?

Tusi lau lava tulaga faataitai e faamatala ai se luitau i le auauna atu. O se faataitaiga lenei: Sa talosagaina Sofia e ona taitai o le Ekalesia e ave se meaai o le aso fanau i se teineitiiti e le toaga i lana vasega a Tamaitai Talavou. Ina ua sau le teineitiiti i le faitotoa, sa lei faauo tele o ia ia Sofia. I le lagonaina o le tiga, sa savali ese ai Sofia ma le faanoanoa ona sa ia faia le auaunaga.

Faatino i le faatuatua

1. Tali fesili nei:

   • E faapefea ona avea o se faatinoga o le faatuatua le auauna atu e ui lava i luitau?

   • E mafai faapefea e le aoaoga faavae o loo aoao mai i le Mosaea 2:17 ona fesoasoani i le tagata i lenei tulaga e faatino i le faatuatua?

Iloilo manatu faavae ma fesili ma se vaaiga e faavavau

2. Tali fesili nei:

   • O le a se suiga pe a e vaai i le tulaga faataitai mai se vaaiga e faavavau?

   • E mafai faapefea e le aoaoga faavae o loo aoao mai i le Mosaea 2:17 ona fesoasoani i lenei tagata e vaai ai i mea mai se vaaiga e faavavau?

   • O le a sou manatu o le a faapefea ona galue le Faaola i lenei tulaga?

Saili le malamalama atili e ala i punaoa mamana ua filifilia

Saili se mau faaopoopo po o se faamatalaga mai le konafesi aoao e mafai ona e faasoa atu e fesoasoani ai i se tagata e auauna atu ma se uiga naunautai. Ina ia faia lenei mea, taumafai e saili mo le “auaunaga” i le polokalama o le Gospel Library, ona vaai lea i tusitusiga paia po o lauga o konafesi o faaali mai. E mafai foi ona e sueina le “Auaunaga” i le Taiala o Autu po o le Taiala i Tusitusiga Paia.

3. Tusi le mau po o le upusii na e mauaina, ma faamatala pe faapefea ona fesoasoani i le tagata o loo i le vaaiga faataitai.