Atamai i Aoaoga Faavae: Mosaea 2:41

“O Le Tulaga Manuia ma Fiafia o i Latou o E e Tausi i Poloaiga a le Atua”

talavou o loo taliē

I se lesona talu ai, sa e aoaoina ai afai tatou te tausia poloaiga a le Atua, o le a Ia faamanuiaina i tatou i le faaletino ma le faaleagaga. O lenei lesona e mafai ona fesoasoani ia oe e tauloto ai le mau faasino o le atamai i aoaoga faavae ma le fasifuaitau autu o le mau mo le Mosaea 2:41, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.

Tauloto ma faamatala

Tusi se ata pe fatu se ata e faatusa i le aoaoga faavae o loo aoaoina i le Mosaea 2:41.

A uma ona e tusia lau ata, faaaoga e fesoasoani ia oe e tauloto ai le fasifuaitau autu o le mau: “O i latou o e e tausi i poloaiga a le Atua … e faamanuiaina i latou i mea uma.”

aikona, faamaumau

1. Tali le fesili lenei:

   • E mafai faapefea ona e faaaogaina lau atatusi e faamatala ai le aoaoga faavae o loo aoaoina i le Mosaea 2:41?

Faataitai le faaaogaina

Vaai faalemafaufau i le vaaiga faataitai lenei:

Sa i ai ia Jenna se lesona o le atamai i aoaoga faavae i le seminare lea na faamamafa ai o le usiusitai i poloaiga a le Atua e aumaia ai le fiafia sili atu ma faamanuiaga i o tatou olaga. Mulimuli ane, sa lagona e Jenna le lē mautonu e uiga i lona lava tulaga. E taumafai o ia e tausi poloaiga ae na te lē lagonaina ai e faigofie, fiafia, pe sili atu ona lelei lona olaga. O loo tauivi pea o ia i le aoga ma e i ai foi ni faafitauli i lona aiga ma uo. Afai o lona usiusitai i poloaiga e tatau ona aumaia ai le fiafia, aisea e faapea ai ona lagona?

Faatino i le faatuatua

Faitau parakalafa 5–6 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Vaavaai mo fasifuaitau e mafai ona fesoasoani ia Jenna.

• O le a se mea e mafai ona e faasoa atu mai nei parakalafa e fesoasoani ai ia Jenna e faatino i le faatuatua?

• O le a sou manatu e mafai faapefea ona fesoasoani lenei mea ia Jenna?

Iloilo manatu faavae ma fesili ma se vaaiga e faavavau.

Faitau le parakalafa 8 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Vaavaai mo fasifuaitau e mafai ona fesoasoani ia Jenna.

• O le a se mea e te faasoa atu ia Jenna?

• Aisea o le a e faasoa atu ai lenei mea ia te ia?

Saili le malamalama atili e ala i punaoa mamana ua filifilia

Faitau le parakalafa 11 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022). Vaavaai mo fasifuaitau e mafai ona fesoasoani ia Jenna.

• O a nisi o punaoa paia e mafai ona e fautuaina e liliu atu i ai Jenna?

• O le a sou manatu e faapefea ona fesoasoani lenei mea ia te ia?

2. Tali le fesili lenei i se parakalafa e lē itiiti ifo ma le 5 fuaiupu.

   • E mafai faapefea e Jenna ona faaaoga mataupu faavae o le mauaina o le malamalama faaleagaga ma le Mosaea 2:41 e foia ai lona popole?

Tuu i le faitalia: O e Manao e Aoao Atili?

Aisea e tatau ai ona faaauau pea ona ou usiusitai pe a foliga mai e lē vave oo mai faamanuiaga?

Sa faasoa mai e Elder Dieter F. Uchtdorf, a o i ai i le Au Peresitene Sili, se aafiaga mai le taimi ao aoaoina o ia i le Ea Fosi a Siamani. I le taimi o le faatinoga o aoaoga faaletino, sa ia vaaia ai isi o e sa lei ola i le Upu o le Poto e sili atu o latou faatinoga nai lo le mea sa ia faia.

Elder Dieter F. Uchtdorf

Ou te manatua lo’u mafaufau na i ai, “Faatali a laia! Pe sa lē tatau ea ona mafai ona ou tamoe ae lē vaivai?” Ae sa ou vaivai, ma sa pāsia a’u e tagata na manino e le’i mulimuli i le Upu o le Poto. Ou te tautino atu, sa fai ma faalavelave i lo’u mafaufau i lena taimi. Sa ou fesili ifo ia te au lava, pe sa moni ea le folafolaga pe leai?

Sa lei vave ona oo mai le tali. Ae na iu lava ina ou iloa e lē o taimi uma e vave faataunuuina ai folafolaga a le Atua pe faataunuuina foi i se ala tatou te ono faamoemoe i ai; ae e oo mai e tusa ai ma Lona lava taimi ma i Lana lava ala. O tausaga mulimuli ane na mafai ona ou vaai manino ai i faamaoniga o faamanuiaga faaletino e oo mai ia i latou o e usitai i le Upu o le Poto—e faaopoopo atu i faamanuiaga faaleagaga ia e vave oo mai mai le usitaia o soo se tulafono a le Atua. O le toe vaai faalemafaufau i tua, na ou mautinoa ai o folafolaga a le Alii, afai e le o taimi uma e vave mai ai, o taimi uma lava e mautinoa e faataunuuina ai. (Dieter F. Uchtdorf, “Faaauau i le Onosai,” Ensign po o le Liahona, Me 2010, 58)