Mosiah 5:1–5

Wala Nay Tinguha sa Pagbuhat og Dautan

Usahay, bation tingali nato ang panginahanglan sa paghimog mga kausaban o pagpauswag sa usa ka butang nga atong gibuhat. Ang katawhan ni Hari Benjamin mibati niini nga paagi human maminaw kaniya nga namulong mahitungod ni Jesukristo ug kon gikan sa unsa kita Niya giluwassa. Kini nga leksiyon makatabang kanimo nga madugangan ang imong tinguha nga mag-usab o magpadayon sa pag-usab uban sa tabang sa Ginoo.

Pagkahimong sama ni Jesukristo

Tan-awa ang mosunod nga mga butang ug hunahunaa kon sa unsang paagi mausab ang usa ngadto sa lain nga butang.

• Unsa ang mga hinungdan sa kausaban niini nga mga butang?

• Unsa ang mga hinungdan sa kausaban sa mga tawo?

• Sa unsa kaha nga paagi nga ang Ginoo mousab sa atong mga kasingkasing susama o lahi gikan sa unsa nga paagi kini nga mga butang mausab?

Hunahunaa kon unsa kadako paminaw nimo nga ang mosunod nga pamahayag may kalabotan kanimo:

• Gusto nako nga tabangan ko sa Ginoo nga mag-usab alang sa kaayohan.

Paggahin og usa o duha ka minuto ug hunahunaa kon nganong ingon niana ang imong gibati. Mahimong maglakip kini sa pagpamalandong sa mga paagi nga ang Ginoo mitabang kanimo kaniadto.

Samtang magtuon ka sa Mosiah 5, pangitaa ang mga rason nga mahimo nimong tinguhaon ang pagpangayo og tabang sa Ginoo nga mag-usab ug molambo.

Pagsinati og kausaban sa kasingkasing

Human namulong si Hari Benjamin ngadto sa iyang mga katawhan, gusto niyang mahibaloan kon sila “mituo ba sa mga pulong nga iyang gikapamulong ngadto kanila” (Mosiah 5:1).

Basaha ang Mosiah 5:1–5 aron makita kon giunsa nila pagtubag. Mahimong makatabang ang pagkahibalo nga ang pulong nga hilig nagpasabot sa kalagmitan o gusto sa usa ka tawo, kon unsa ang gikahiligan niya. Mahimo usab nimong tan-awon ang bidyonga “Ang Katawhan ni Hari Benjamin Naghimo og Pakigsaad” gikan sa time code 0:00 hangtod sa 1:37, anaa sa https://www.churchofjesuschrist.org/study/video/mosiah-1-5/2020-03-0150-the-people-of-king-benjamin-make-a-covenant-mosiah-5-1080p?lang=ceb ChurchofJesusChrist.org.

Kompletoha ang mosunod nga tsart base sa imong nakat-onan.

Giunsa pag-usab sa mga tawo	Unsa ang hinungdan sa pag-usab sa mga tawo
Giunsa pag-usab sa mga tawo	Unsa ang hinungdan sa pag-usab sa mga tawo

Base sa Mosiah 5:1–5, kompletoha ang mosunod nga hugpong sa mga pulong.

Samtang ang among mga kasingkasing nausab pinaagi sa Espiritu sa Ginoo, kami …

Mahimong makatabang ang pagrekord sa kamatuoran o mga kamatuoran nga imong naila sa imong mga kasulatan.

Importante nga masabtan nga bisan og ang mga katawhan ni Hari Benjamin “wala nay hilig [o gusto] sa pagbuhat og dautan” (Mosiah 5:2), wala kini nagpasabot nga wala na sila nakasala pag-usab. Hinoon, giusab sa Ginoo ang ilang mga kasingkasing sa sinsero nga pagtinguha sa pagbuhat og maayo ug sa paglikay sa sala.

1. Tubaga ang labing menos duha sa mosunod nga mga pangutana.

   • Kanus-a ka, sama sa katawhan ni Hari Benjamin, adunay dakong tinguha sa “pagbuhat og maayo sa kanunay”? Unsay nakatabang nimo nga mobati niini nga paagi?

   • Ngano sa imong hunahuna nga daghan kanato ang dili mobati niini sa tanang panahon?

   • Unsa sa imong hunahuna ang mahimo sa usa ka tawo aron mobati og ingon niini sa kanunay?

Pagsabot sa kausaban

Ikonsiderar ang pagmarka sa Mosiah 5:3 ang hugpong sa mga pulong nga “pinaagi sa walay kinutuban nga kaayo sa Dios.” Aron tinuod nga masabtan ang kausaban nga nahitabo sa mga katawhan ni Hari Benjamin, kinahanglan natong masabtan kon sa unsang paagi si Jesukristo makatabang nato nga magbag-o.

Si Sister Wendy W. Nelson mipasabot:

Ang Manluluwas mao ang kinatas-an ug bugtong tinuod ug buhi nga ahente sa kausaban. Siya ang tinubdan sa tanang kausaban. … Siya makapagawas sa labing maayo gikan kaninyo, samtang kamo modangop ngadto Kaniya. Luwason gayod Niya ang tanan nga labing maayo sa imong kahiladman. …

… Siya naghigugma kaninyo. Ganahan Siya sa inyong mga paningkamot sa kausaban.

Ang Iyang tinguha mao nga kamo nga mag-usab, sa paglabay sa panahon, hingpit nga isalikway ang kinaiyanhon nga tawo, nga makabaton og kausaban sa kasingkasing, kausaban sa kinaiya. Gibuhat ni Jesus nga Kristo ang tanan nga Iyang gibuhat aron ikaw mahimong mag-usab! Siya ang inyong Manluluwas ug akong Manluluwas!

Ug samtang kita aktibo, makanunayon nga nangamuyo alang sa gahom sa Iyang walay kinutuban ug maulaong sakripisyo nga magamit sa atong mga kinabuhi, ang Iyang kataposang pagkaayo magdala sa matag usa sa atong mga kinabuhi sa kataposang kausaban nga atong gitinguha pag-ayo. (Wendy W. Nelson, “Change: It’s Always a Possibility!” [Debosyonal sa Brigham Young University, Abril 7, 1998], 10, speeches.byu.edu)

2. Tubaga ang mosunod nga mga pangutana:

   • Sumala ni Sister Nelson, unsa ang mabuhat ni Jesukristo aron matabangan kita nga mag-usab?

   • Unsa ang imong nakat-onan mahitungod sa imong papel sa pag-usab?

Paghunahuna og usa ka tawo nga imong nailhan kinsa nausab uban sa tabang ni Jesukristo. ChurchofJesusChrist.org

• Giunsa pagtabang sa Ginoo kini nga tawo?

• Unsa nga kaugalingon nga mga paningkamot ang gihimo niini nga tawo aron mausab?

• Ngano sa imong hunahuna nga kini nga mga kausaban nagdala ngadto sa mas dakong kalipay?

Paghimo sa kausaban nga permanente

Aron tapuson ang imong pagtuon, hunahunaa ang imong kinabuhi ug ang imong kasamtangan nga pag-uswag ngadto sa pagkahimong sama sa Langitnong Amahan ug ni Jesukristo. Pamalandongi kon unsay imong gibati nga gusto sa Espiritu Santo nga imong buhaton isip resulta sa imong nakat-onan ug gibati.

Opsiyonal: Gustong Makakat-on Pa og Dugang?

Ang kausaban ba sa kasingkasing ug tinguha diha-diha dayon o nagkinahanglan ba kini og panahon?

Si Bradley R. Wilcox sa Kinatibuk-ang Kapangulohan sa Young Men miingon:

Ang pagpahilayo gikan sa sala ug ang pagka “wala nay hilig sa pagbuhat og daotan, apan sa pagbuhat og maayo sa kanunay” [Mosiah 5:2] mga tinguha sa tibuok kinabuhi.

Ang kinabuhi sama sa usa ka layo kaayo nga biyahe libot sa tibuok nasod. Kita dili makaabot sa atong destinasyon sa usa lang ka tangke nga gasolina. Kita kinahanglan nga magbalik-balik og pagtubil. Ang pag-ambit sa sakramento sama sa paghunong sa gasolinahan. Samtang kita maghinulsol ug mobag-o sa atong mga pakigsaad, kita mosaad sa atong kaandam sa paghupot sa mga sugo, ug ang Dios ug si Kristo mopanalangin kanato sa Balaang Espiritu. Buot ipasabot, kita mosaad nga magpadayon sa unahan sa atong panaw, ug ang Dios ug si Kristo nagsaad sa pagtubil sa atong tangke. (Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 62)

Si Sister Becky Craven sa Kinatibuk-ang Kapangulohan sa Young Women mitudlo:

Ang mga kasulatan wala mag-ingon nga sila [mga katawhan ni Hari Benjamin] diha dayon nahimo nga hingpit, hinoon, ang ilang tinguha sa pag-usab mipugos kanila sa paglihok. Ang ilang kausaban sa kasingkasing nagpasabut sa pagsalikway sa kinaiyanhon nga pagkalalaki o pagkababaye ug motahan ngadto sa Espiritu samtang naningkamot nga mahimong mas mahisama ni Jesukristo. …

Hiusahon ang atong mga paningkamot uban sa abilidad sa Manluluwas sa pag-usab kanato, kita mahimong bag-ong mga binuhat. (Becky Craven, “Imo na ang Sukli,” Liahona, Nob. 2020, 58)

Unsa ang tahas sa Espiritu Santo sa pagtabang kanato nga mausab?

Si Brother Brian K. Ashton, kanhi Kinatibuk-ang Kapangulohan sa Sunday School, mipasabot:

Ang proseso sa pagbalaan dili lang molimpyo kanato, apan naghatag usab kanato sa gikinahanglan nga espirituhanong mga gasa o balaanong mga kinaiya sa Manluluwas ug mousab sa ato mismong kinaiya, maingon “nga kita wala nay hilig sa pagbuhat og dautan.” [Mosiah 5:2]. Matag higayon nga atong madawat ang Espiritu Santo sa atong kinabuhi pinaagi sa hugot nga pagtuo, paghinulsol, mga ordinansa, Kristohanong pagserbisyo, ug uban nga matarung nga mga paningkamot, kita mausab hangtod sa hinay-hinay, anam-anam kita mahimong sama kang Kristo. (Brian K. Ashton, “Ang Doktrina ni Kristo,” Liahona, Nob. 2016, 108)