Mosaea 11–17

“Salamo ma Liliu Atu i le Alii”

Apinati o loo tala’i atu

E masani ona tatou taumafai e lapataia tagata tatou te alolofa i ai e uiga i faaiuga e ono mafai ona aumaia ai le tiga ma puapuaga. Na auina atu e le Alii ia Apinati ma le savali mo le Tupu o Noa ma lona nuu ia salamo ma alofia ai puapuaga e ono mafai ona oo mai ona o a latou amioga agasala. O lenei lesona e mafai ona fesoasoani e faateleina ai lou manao e talia perofeta a le Alii ma galue i valaaulia latou te tuuina mai e mai le Alii.

Ua lapatai mai le Alii i mea matautia

Manatu faapea faatoa e mauaina ni faamatalaga e uiga i setulaga matautia o loo ua i ai au uo ma e pele ia te oe.

• O a nisi o auala eseese e mafai ona e faailoa atu ai se sāvali lapatai ia i latou?

E tele auala e lapataia ai i tatou e le Alii. Mafaufau i auala nei:

• Fautuaga mai i matua

• O faatonuga mai perofeta ma isi taitai o le Ekalesia

• Aoaoga i tusitusiga paia, i le lotu, po o le seminare

• Mafaufauga po o lagona mai le Agaga Paia

• Isi:

Mafaufau po o le a le lelei o loo e faia e aloese ai mai le agasala ma le matautia ona o le auala e te filifili e tali atu ai i lapataiga a le Alii.

• O a auala e lagona le sili ona faigata ona talia? Aisea?

• O le a se mea o ta’u mai ai e uiga i le Alii i Lona aapa mai ia i tatou i ni auala eseese?

O le asō, o lau suesuega o le a taulai atu i le upumoni lenei: E fetalai mai le Alii ia i tatou e ala mai i Ana perofeta e valaaulia i tatou ia salamo ma liliu atu ia te Ia.

Ua valaauina e le Alii ia Noa ma lona nuu e salamo

Manatua na taitai e Senifa se vaega o tagata mai Saraemila agai atu i le laueleele o Nifae. A o lei maliu Senifa, na ia faaee atu le malo i lona atalii o Noa (tagai Mosaea 9–10). O Noa ma faitaulaga sa ia filifilia na ola i ni olaga amioleaga. Sa latou faatalitonuina tagata i pepelo ma upu faa’ole’ole ia faia o agasala (tagai Mosaea 11:7, 11).

Faitau le Mosaea 11:2, 14–15, 19 ma vaavaai mo agasala na faia e Noa ma lona nuu. (O lefuaiupu 19 o loo faamatala ai lo latou tali atu ina ua uma ona puipuia i latou lava mai se osofaiga a Sa Lamana.) E mafai foi ona e matamata i le vitio “Ua Toe Faamatala e Alema le Amioleaga o le Tupu o Noa | Mosaea 11–12, 17” (2:26), o loo maua i le ChurchofJesusChrist.org.

• O a ni auala e faatusatusa ai filifiliga ua faia e Noa ma lona nuu i filifiliga a tagata i aso nei?

• O a nisi o taunuuga o le ola ai e pei ona latou faia?

Na valaauina e le Alii se perofeta e igoa ia Apinati e tuuina atu se savali ia Noa ma lona nuu e fesoasoani ia i latou ia iloa taunuuga o a latou amioga.

Faitau le savali a Apinati i le Mosaea 11:20–25, ma vaavaai mo taunuuga na lapatai mai ai le Alii. O le upu “oi talofa” i le fuaiupu 20 o loo momoli mai ai le faanoanoa po o le tiga.

• O a nisi o taunuuga na e maua na lapataia ai e le Alii tagata?

Maitau ia fasifuaitau o loo tauave pea “vagana ai ua latou salamo” ma “vagana ai ua salamo lenei nuu.” Atonu e te manao e faailoga nei upu ma mafaufau e uiga i mea e mafai ona e aoaoina e uiga i le Alii mai nei fasifuaitau.

Faitau le Mosaea 11:26–29, ma vaavaai pe na faapefea ona tali atu le tupu o Noa ma isi ia Apinati.

O le vaaia atu i le salamo o se meaalofa o le alofa mai le Alii

Mafaufau i valaaulia eseese ua tuuina mai e le Alii i o tatou aso mo i tatou ina ia salamo ma suia. E mafai ona e iloiloina se lauga talu ai nei mai le perofeta a le Alii ma vaavaai mo lapataiga na ia tuuina mai.

• O a nisi o mea talitutusa po o ni eseesega i le va o le tali atu a tagata i ona po o Apinati ma le tali atu o tagata i o tatou aso i perofeta? Faamata aisea na latou tali ai faapea?

Mafaufau loloto i lau tautinoga patino e faalogo atu i le Atua, aemaise lava pe a Ia lapataia oe e ala mai i Ana perofeta e uiga i le agasala ma ona taunuuga.

Na faamalamalama mai e Elder D. Todd Christofferson o le Korama a Aposetolo e Toasefululua le ala tatou te ono vaai ai i le valaaulia ia salamo mai perofeta.

Elder D. Todd Christofferson

Ua leva ona faagaeetia a’u, ma ou lagonaina foi, le alofa naunau o perofeta a le Atua i a latou lapataiga e faasaga i le agasala. E le o faaosofia i latou e se manao ia ta’usalaina. O lo latou naunautaiga moni e faapei o le alofa o le Atua; o le mea moni, o le alofa lava lea o le Atua. Latou te alolofa ia i latou e auina i ai i latou, po o ai lava i latou ma pe o a lava foi ituaiga o tagata ua avea ai i latou. E faapei lava foi o le Alii, e le mananao Ana auauna ia mafatia se tasi i tiga o le agasala ma filifiliga lē lelei. (D. Todd Christofferson, “O Le Alofa o le Atua,” Liahona, Nov. 2021, 17)

• E mafai faapefea e le malamalama i lenei mea e uiga i perofeta ona uunaia lou manao e faatino a latou valaaulia?

Faatasi ma le alofa mutimutivale, na tuu atu ai e le Alii i tagata se taimi e liliu atu ai ia te Ia ma salamo ia latou agasala. Peitai, ina ua toe foi mai Apinati i le lua tausaga mulimuli ane, sa latou toe feitai foi ma vaavaai e ta’usalaina o ia (tagai Mosaea 12:1, 9, 19).

Sa molimau atu ma le lototoa Apinati e faapea e lei aoaoina e faitaulaga ia tagata e usiusitai i poloaiga a le Atua (tagai Mosaea 12:33–37; 13:12–25). Sa ia molimau mai foi o le a afio mai Iesu Keriso e togiola tagata uma ma o le faaolataga e na o le Togiola lava e mafai ai (tagai Mosaea 15:1, 19). Ina ua uma ona molimau atu Apinati e uiga ia Iesu Keriso, sa toe lamatia foi lona ola. Ae o le taimi lea, sa faapena foi le ola o se tasi o faitaulaga, o Alema.

Faitau le Mosaea 17:1–4 e sue ai tali a Noa ma Alema i le molimau a Apinati ia Keriso.

aikona, faamaumau

1. Tali le fesili lenei:

   • O a ni mea e ono fesoasoani ai nei tali e matuai eseese lava ia tatou malamalama ai?

Ina ua mavae aso e tolu i le falepuipui, sa toe aumai Apinati i luma o le Tupu o Noa. Na fai mai Noa o le a ia faasalaina Apinati i le oti vagana ua naunau o ia e faafitia upumoni sa ia aoao atu (tagai Mosaea 17:5–8).

Faitau le Mosaea 17:9–10, 13, ma vaavaai mo le tali a Apinati i le manao a le tupu e faafitia lana molimau. Pe e mafai foi ona e matamata i le vitio “Ua Mafatia Apinati i le Oti ona o Lona Faatuatua | Mosaea 16–17” (4:28), o loo maua i le ChurchofJesusChrist.org.

aikona, faamaumau

2. Tali fesili nei:

   • O le a se mea ua e aoaoina mai le faataitaiga a Apinati?

   • E ono mafai faapefea e lena mea ona aafia ai le ala e te tali atu ai i le Alii ma Ana perofeta?

Tuu i le faitalia: O e Manao e Aoao Atili?

Mosaea 11:20, 25. O le a se mea e mafai ona tatou aoaoina e uiga i le Alii mai lagona o loo ta’ua i le savali a Apinati?

Oi talofa, po o le faanoanoa: Ua lapatai mai le Alii e uiga i le faanoanoa po o le tiga lea e afua mai i se olaga agasala. E finagalo le Atua ia tatou fiafia (tagai 2 Nifae 2:25). Pe a tatou agasala, e finagalo o Ia ia tatou salamo ma le lotomaualalo ma faanoanoa ia tatou amioga (tagai 3 Nifae 20:9).

I aso anamua, o le salamo i le “ie talatala ma le lefulefu” o se auala lea e faaalia ai le faanoanoa tele ma le lotomaualalo na lagona e se tasi mo a latou agasala. Mo nisi faamatalaga, e mafai ona e matamata i le vitio puupuu “Ie Talatala” (0:32), o loo maua i le ChurchofJesusChrist.org.

Ita: Ua tatou iloa o le Atua “e le faafefeteina, e le amio mataga” (1 Korinito 13:5; Moronae 7:45), ma ua “tele gese lona toasa, e tele foi lona alofa” (Salamo 145:8). O tagata o e fouvale ma le loto i ai i le Atua ma filifili le amioleaga, mea inosia, ma le faitaaga ua toasa ai le Alii. O le toʻasā o le Atua e lē afua ai ona Ia finagalo lē pulea. Nai lo lena, ua Ia lapatai mai i taunuuga o a latou amioga ma faaauau pea ona valaaulia tagata uma ia salamo.

Lotovale: O le upu lotovale e mafai ona faaliliuina o le i ai o “lagona maaleale ma loloto” (O Le Taiala i Tusitusiga Paia, “Lotovale, Matau’a”). I se isi faaupuga, e popole tele le Atua ia i tatou ma valaaulia foi i tatou ina ia tuuto atoatoa atu ia te Ia.

O le a le matafaioi a se perofeta?

O se perofeta o “se tagata ua valaauina e le Atua ma e tautala foi mo le Atua” (O Le Taiala i Tusitusiga Paia, “Perofeta”). Tagai po o a isi mea o loo ta’u mai i le O Le Taiala i Tusitusiga Paia e uiga i perofeta. E mafai foi ona e matamata i le vitio lenei o se vaega o tamaiti o loo talanoa ma Peresitene Russell M. Nelson ma Sister Joy D. Jones i le fale fausia i ogalaau o le aiga o Samita i Palamaira, Niu Ioka.