Mōsaia 26

“Kapau te Ne Vete ʻEne Ngaahi Angahalá … pea Fakatomala”

ʻE lava fēfē ke tokoniʻi kitautolu ʻe he fakatomalá ʻi heʻetau moʻui fakaʻahó? Ko e hā ʻoku fiemaʻu ai ke tau vete ʻetau ngaahi angahalá ko ha konga ʻo ʻetau fakatomalá? ʻI he hoko ʻa ʻAlamā ko e taulaʻeiki lahi ʻi he Siasi ʻo e Fakamoʻuí, naʻá ne fakaʻamu ke tokoniʻi ʻa kinautolu ne nau fai ha ngaahi angahala mamafá. Naʻe ʻoange ʻe he ʻEikí ha fakahinohino mahino ki he meʻa ʻoku totonu ke ne faí. ʻOku fakataumuʻa ʻa e lēsoni ko ʻení ke tokoni ke mahino kiate koe ʻa e natula ʻofa mo faʻa fakamolemole ʻa e Tamai Hēvaní mo Sīsū Kalaisí pea mo e ʻuhinga ʻoku totonu ke tau fakatomala ai mei heʻetau ngaahi angahalá.

Ko e hā e meʻa te ke faí?

Fakakaukauloto naʻá ke fanongo ki ha taha ʻokú ne lave ki he ngaahi fehuʻi mo e hohaʻa ko ʻeni fekauʻaki mo e fakatomalá:

• ʻOku ʻikai ke u fakapapauʻi pe ʻoku ʻaonga ke fakatomala.

• Ko e hā ka u ka vete ai ʻeku ngaahi angahalá? Ko e hā ʻoku fiemaʻu ai ke vete ha ngaahi angahala ʻe niʻihi ki ha taki lakanga fakataulaʻeiki?

• Kuo fuʻu lahi ʻeku faiangahalá ke fakamolemoleʻi au ʻe he ʻEikí.

Kiʻi fakakaukau angé pe ʻokú ke ʻilo ha taha ʻe ala kaunga ki ai ha taha ʻo e ngaahi meʻa ko ʻení.

• Ko e hā ha ngaahi fehuʻi pe hohaʻa ʻe ala maʻu ʻe ha taha fekauʻaki mo e fakatomalá?

Fakalaulauloto pe ko e fē ʻi he ngaahi fehuʻi pe ngaahi hohaʻa ko ʻení ʻe mahuʻingamālie taha kiate koe ke ke tokanga taha ki ai ʻi hoʻo ako ʻa e lēsoni ko ʻení. Fekumi ki ha fakahinohino mei he Tamai Hēvaní ke tokoni atu ke ke maʻu ha ngaahi tali mo fakatupulaki hoʻo mahino ki he fakatomalá.

Ngaahi Palopalema ʻi he Siasí

Hili hono fakahaofi ʻe he ʻEikí ʻa ʻAlamā mo hono kakaí mei he nofo pōpulá, naʻa nau kau fakataha mo e kau Nīfaí pea mo e kakai ʻo Limihaí ʻi Seilahemala. Naʻe fokotuʻu ai ʻe he Tuʻi ko Mōsaiá ʻa ʻAlamā ke hoko ko e taki ʻo e Siasí. Naʻe fai ʻe ha kakai ʻe niʻihi lolotonga e pule ʻa ʻAlamaá ha ngaahi angahala mamafa pea ʻikai ke nau fakatomala (vakai ki he Mōsaia 26:1–6). Naʻe ʻomi kinautolu ki he ʻao ʻo ʻAlamaá, ka naʻe faingataʻa kia ʻAlamā ke ne ʻiloʻi e meʻa ke faí.

Lau ʻa e Mōsaia 26:13–15, 19–24, 28–31 pea kumi ʻa e fakahinohino naʻe fai ʻe he ʻEikí kia ʻAlamaá.

• Ko e hā naʻe folofola ʻe he ʻEikí kuo pau ke fakahoko ʻe he kakaí ke Ne tali mo fakamolemoleʻi ai kinautolú?

• Fakatatau ki he veesi 23, ko e hā ʻoku taau ai mo e Fakamoʻuí ke Ne fakapapauʻi pe ko hai ʻe lava ke fakamolemoleʻi mo maʻu ʻa e moʻui taʻengatá?

• Ko e hā mo ha toe meʻa fekauʻaki mo e ʻEikí naʻá ke ako mei he ngaahi veesi ko ʻení?

Kapau te tau fakatomala

Mahalo kuó ke ʻiloʻi ha ngaahi tefitoʻi moʻoni hangē ko ʻení: Kapau te tau vete ʻetau ngaahi angahalá pea fakatomala ʻi he moʻoni ʻo hotau lotó, ʻe fakamolemoleʻi kitautolu ʻe he ʻEikí. ʻE fakamolemoleʻi kitautolu ʻe he ʻEikí ʻi heʻetau toutou fakatomalá.

• ʻOku ʻuhinga ki he hā ke vete ʻetau ngaahi angahalá?

• ʻOkú ke pehē ʻoku ʻuhinga ki he hā ke “fakatomala ʻi he moʻoni ʻo [ho] lotó” (Mōsaia 26:29)?

• ʻOku liliu fēfē ʻe he ʻiloʻi e natula faʻa fakamolemole ʻa e ʻEikí ʻa hoʻo tōʻonga fakakaukau ki he fakatomalá?

ʻE lava ke tokoni e ngaahi tefitoʻi moʻoni ko ʻení ki he ngaahi fehuʻi mo e hohaʻa fekauʻaki mo e fakatomalá mei he kamataʻanga ʻo e lēsoní.

1. Fili ha meʻa ʻe ua mei he ngaahi hohaʻa ʻe fā ko ʻení pea tali ʻa e ngaahi fehuʻi ʻoku fekauʻaki mo iá.

Hohaʻa A: ʻOku ʻikai ke u fakapapauʻi pe ʻoku ʻaonga ke fakatomala.

• Ko e hā ha ngaahi potufolofola mo ha ngaahi tefitoʻi moʻoni mei he Mōsaia 26, pe ngaahi potufolofola kehe, te ke lava ʻo vahevahe ʻe ala tokoni ki he hohaʻa ko ʻení?

Manatuʻi naʻe fai ʻe ʻAlamā tonu ha ngaahi angahala mamafa kimuʻa ʻi heʻene moʻuí pea kuó ne fakatomala mo maʻu ha fakamolemole ʻo fakafou ʻi he Fakamoʻui ko Sīsū Kalaisí (vakai ki he Mōsaia 11:5–7; 18:1–3; 26:15, 20).

• ʻOkú ke pehē ko e hā ʻe lava ke vahevahe ʻe ʻAlamā mo ha taha ʻokú ne maʻu e hohaʻa ko ʻení?

Fakalaulauloto ki he meʻa kuó ke aʻusia pe aʻusia ʻe kinautolu ʻokú ke ʻiló ʻi he taimi naʻá ke tafoki ai ki he Fakamoʻui ko Sīsū Kalaisí ʻo fakafou ʻi he fakatomalá.

Hohaʻa E: Ko e hā ka u ka vete ai ʻeku ngaahi angahalá? Ko e hā ʻoku fiemaʻu ai ke vete ha ngaahi angahala ʻe niʻihi ki ha taki lakanga fakataulaʻeiki?

Naʻe fakahā ʻe he ʻEikí kia ʻAlamā ʻe fiemaʻu ʻa kinautolu kuo faiangahalá ke “vete [ʻenau] ngaahi angahalá ʻi ho ʻaó [ʻAlamā, ko honau taki lakanga fakataulaʻeikí] pea mo hoku ʻaó [ko e ʻEikí]” (Mōsaia 26:29).

• Koeʻuhí kuo ʻosi ʻafioʻi ʻe he ʻEikí ʻetau ngaahi angahalá, ko e hā ʻoku mahuʻinga ai ke tau vete ia kiate Iá? Te ne faitāpuekina fēfē ʻa ʻetau moʻui?

Lau e fakamatala ko ʻeni mei he kiʻi tohi Ki Hono Fakamālohia ʻo e Toʻu Tupú pea mo ʻEletā C. Sikoti Koloú, Fitungofulu Taki Māʻolunga mālōlō, pea kumi ha ngaahi fakakaukau fekauʻaki mo e taimi mo e ʻuhinga ʻoku totonu ke tau vete ai ki ha pīsope pe palesiteni fakakoló.

ʻOku ʻi ai e totonu ʻa e pīsopé … ki ha fakahā mei he Laumālie Māʻoniʻoní fekauʻaki mo e kāingalotu hono uōtí, kau ai koe. … ʻE lava [ke ne] tokoniʻi koe he lolotonga hoʻo fakatomalá, ʻi ha ngaahi founga he ʻikai ke lava ʻe hoʻo mātuʻá pe kau taki kehé ke ʻoatu. …

[Kapau he ʻikai ke tau vetehia, ʻoku tau] fuesia tokotaha pē … e mafasia ʻo e angahalá, kae ʻikai tuku ki he Fakamoʻuí ke Ne toʻo atu e kavengá. (C. Scott Grow, “Ko e Hā Hono ʻUhinga pea Ko e Hā ʻOku Fiemaʻu ai Ke u Vetehia ki Heʻeku Pīsopé?” Liahona, ʻOkatopa 2013.)

• ʻE tokoni fēfē nai ʻa e fakamatala ko ʻení ki ha taha ʻoku hohaʻa fekauʻaki mo e vetehia ki heʻene taki lakanga fakataulaʻeikí?

Hohaʻa F: Kuo fuʻu tōtuʻa ʻeku faiangahalá ke fakamolemoleʻi au ʻe he ʻEikí.

• ʻE tokoni fēfē nai e folofola ʻa e ʻEikí ʻi he Mōsaia 26:29–30 ki he hohaʻa ko ʻení? (Te ke lava foki ʻo fakakaukau ke ke ako ʻa e 1 Tīmote 1:15; 1 Sione 1:9; pe Tokāteline mo e Ngaahi Fuakava 18:10–12; 58:42–43.)

• Ko e hā ha ngaahi fakamatala fakafolofola fekauʻaki mo e Fakamoʻuí ʻokú ne fakahaaʻi ʻEne ngaahi ongo fekauʻaki mo kinautolu ʻoku feinga ke fakatomalá mo ʻEne finangalo lelei ke fakamolemolé?

Hohaʻa H: Ko hoʻo filí

Fakakaukau ki ha hohaʻa ʻe taha ʻoku moʻoni pe ko ha fehuʻi ʻe ala maʻu ʻe ha taha fekauʻaki mo e fakatomalá. Ako ʻa e “Fakatomalá” pe “Vete Hiá” ʻi he Fakahinohino ki he Ngaahi Folofolá (scriptures.ChurchofJesusChrist.org), ʻo kumi e ngaahi moʻoni ʻe ala tokoní. Te ke lava foki ʻo toe vakaiʻi e ngaahi potufolofola ʻoku fekauʻaki mo e “Fakatomalá” pe “Vete hiá” ʻi he Fakahinohino ki he Ngaahi Folofolá (ChurchofJesusChrist.org). ʻE ala tokoni foki ke ako ʻa e “fakatomalá” ʻi he kiʻi tohi Ki Hono Fakamālohia ʻo e Toʻu Tupú pea fakalaulauloto ki he meʻa ʻokú ke ʻilo fekauʻaki mo e ʻEikí ʻe ala tokoní.

Ko e hā e meʻa naʻe hokó?

Lau ʻa e Mōsaia 26:34–37, ʻo kumi e meʻa naʻe hoko ʻi he muimui ʻa ʻAlamā ki he ngaahi fakahinohino ʻa e ʻEikí.

Hiki ʻi hoʻo tohinoa akó ʻa e meʻa te ke ala fiemaʻu ke manatuʻi pe fakahoko koeʻuhí ko e lēsoni ko ʻení. ʻE lava ke kau ʻi he fakakaukau ko ʻení ʻa e founga ʻokú ke loto ke manatuʻi ai e finangalo lelei ʻa e ʻEikí ke fakamolemolé pe ko e founga te ke fiemaʻu ai ke feinga ke vete pea fakatomala ai mei hoʻo ngaahi angahalá.

Fili Pē: Fie Ako Lahi Ange?

Ko e hā ha founga ʻe ʻahiʻahiʻi ai kitautolu ʻe Sētane ke ʻoua naʻa tau vete ʻetau ngaahi angahalá?

Naʻe akonaki ʻa Sisitā Linitā S. Liivi, ko ha mēmipa mālōlō ʻo e Kau Palesitenisī Lahi ʻo e Fineʻofá, ‘o pehē:

ʻI he taimi kuo tau angahala aí, ʻoku faʻa feinga leva ʻa Sētane ke fakalotoʻi kitautolu ko e meʻa taʻesiokita ke tau faí ko hono maluʻi e niʻihi kehé mei he fakamamahi ʻo hono ʻiloʻi ʻetau ngaahi angahalá, kau ai ʻetau vetehia ki heʻetau pīsopé, ʻa ē te ne lava ʻo tāpuekina ʻetau moʻuí ʻo fakafou ʻi he ngaahi kī ʻo e lakanga fakataulaʻeikí ʻi heʻene hoko ko ha fakamaau fakalūkufua ki ʻIsilelí. Ka ko hono moʻoní, ko e meʻa taʻesiokita pea mo faka-Kalisitiane ke faí, ko e vetehia pea fakatomala. Ko e palani lahi ʻeni ʻa e Tamai Hēvaní ki he huhuʻí. (Linda S. Reeves, “Ko e Palani Lahi ʻo e Huhuʻí,” Liahona, Nōvema 2016, 88)

Mōsaia 26:32. Naʻe ʻuhinga ki he hā ke ʻoua ʻe toe lau fakataha mo e kakai ʻa e ʻEikí?

Naʻe fakahinohinoʻi ʻe he ʻEikí ʻa ʻAlamā kapau he ʻikai fie fakatomala e kakaí mei heʻenau ngaahi angahalá, “ʻe ʻikai lau [kinautolu] fakataha mo hoku kakaí” (Mōsaia 26:32). Lau ʻa e fakamatala ko ʻení ke ʻiloʻi e founga ʻe ala fakahoko ai ʻe he kau taki lakanga fakataulaʻeikí ha ngaahi tūkunga tatau he ʻahó ni pea mo hono ʻuhingá:

Kapau ʻoku fakahoko ʻe ha mēmipa ha angahala mamafa, ʻe tokoniʻi ia ʻe he pīsopé pe palesiteni fakasiteikí ke ne fakatomala. Ko ha konga ʻo e foungá ni, ko hono taʻofi ha niʻihi ʻo e ngaahi faingamālie ʻo e mēmipasipi ʻi he Siasí ʻi ha vahaʻataimi. ʻI he ngaahi tūkunga ʻe niʻihi, ʻe ala fiemaʻu ai ke ne toʻo fakataimi e mēmipasipi ʻo e tokotahá.

ʻOku ʻikai fakataumuʻa e fakangatangata pe toʻo e mēmipasipi ʻo ha taha ko ha tautea. Ka, ʻoku fiemaʻu e ongo ngāué ni he taimi ʻe niʻihi ke na tokoniʻi ha taha ke fakatomala mo foua ha liliu ʻo e lotó. ʻOku toe ʻoange foki ai ha taimi ki he tokotahá ke ne teuteu fakalaumālie ai ke ne toe fakafoʻou mo tauhi ʻene ngaahi fuakavá. (Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 32.2, ChurchofJesusChrist.org)