ʻAlamā 7:1–13

Koeʻuhí Ke Ne Tokoniʻi Hono Kakaí

Ko e ngāue mo e nāunau ʻo e ʻOtuá ke “fakahoko ʻa e moʻui taʻe-faʻa-mate mo e moʻui taʻengata ʻa e tangatá” (Mōsese 1:39). Ke fakahoko ʻení, naʻá Ne fekauʻi mai Hono ʻAlo ko Sīsū Kalaisí, ke mamahi maʻa ʻetau ngaahi angahalá pea ikunaʻi ʻa e maté ʻo fakafou ʻi Heʻene Toetuʻú. Naʻe finangalo lelei ʻa e Fakamoʻuí ke Ne foua ʻa e mamahi kotoa pē maʻatautolu “koeʻuhí ke ne ʻafioʻi ʻo fakatatau ki he kakanó ʻa e founga ke tokoniʻi ai ʻa hono kakaí ʻo fakatatau ki honau ngaahi vaivaí” (ʻAlamā 7:12). ʻE lava ke tokoniʻi koe ʻe he lēsoni ko ʻení ke ke falala mo ongoʻi ha ʻofa lahi ange ki hoʻo Fakamoʻuí.

Ko e ngaahi meʻa mahuʻinga tahá

Faʻu ha lisi ʻo e ngaahi meʻa ʻokú ke pehē ko e niʻihi ʻo e ngaahi meʻa mahuʻinga taha kuo hoko ʻi he hisitōlia ʻo e māmaní, pea toki fakahokohoko kinautolu mei he meʻa mahuʻinga tahá ki he meʻa ʻoku ʻikai mahuʻingá.

• Ko e hā ʻokú ne ʻai ke tuʻu-ki-muʻa pe mahuʻinga ha meʻa naʻe hoko?

• Ko e hā ka ngali faingataʻa ai ke fakahokohoko kinautolu ʻo fakatatau mo honau mahuʻingá?

ʻI he lea ʻa ʻAlamā ki he kakai ʻi he fonua ko Kitioné, naʻá ne kikiteʻi neongo “ʻoku ʻi ai ha ngaahi meʻa lahi ʻe hoko; … ʻoku ʻi ai ha meʻa ʻe taha ʻoku mamafa ange” ʻi ha toe meʻa kehe (ʻAlamā 7:7).

Lau ʻa e ʻAlamā 7:7, ʻo kumi e meʻa mahuʻinga taha ko ʻeni naʻe hokó. Fakakaukau ke fakaʻilongaʻi ʻa e meʻa ʻokú ke maʻú.

• ʻOkú ke pehē ko e hā hono ʻuhinga ʻoku hoko ai e hāʻele mai ʻa e Fakamoʻuí ko e meʻa mahuʻinga taha ʻe hoko ʻi he kuonga kotoa peé?

Hili e lea ʻa ʻAlamā ki he kakai ʻo Seilahemalá mo fokotuʻutuʻu maau ʻa e Siasí ʻi he feituʻu ko ia ʻo e fonuá (vakai ki he ʻAlamā 6), naʻá ne fononga ki he fonua ko Kitioné. ʻOku ʻi he ʻAlamā 7 ha ngaahi akonaki mahuʻinga meia ʻAlamā ki he kakai ʻo Kitioné fekauʻaki mo Sīsū Kalaisi mo ʻEne Fakaleleí. Kimuʻa peá ke kamata akó, toʻo ha kiʻi taimi ke ke fakakaukau ai ki he felāveʻi ʻa e Fakalelei ʻa Sīsū Kalaisí mo hoʻo moʻuí. Ko e hā ha ngaahi tūkunga ʻokú ke lolotonga fehangahangai mo ia ʻa ia ʻokú ke fiemaʻu ai ʻa e tokoni ʻoku ʻomi ʻe he Tamai Hēvaní mo e Fakamoʻuí?

ʻI hoʻo ako he ʻaho ní, fekumi ki he ngaahi akonaki fekauʻaki mo Sīsū Kalaisi mo ʻEne Fakaleleí ʻe lava ʻo tokoni ke mahino lelei ange kiate koe ʻa e meʻa kuó Ne fai maʻau mo e founga te Ne lava ʻo tokoniʻi ai koé.

Ko e akonaki ʻa ʻAlamā fekauʻaki mo e Fakalelei ʻa e Fakamoʻuí

Hiki tatau ‘a e saati ‘i laló ki hoʻo tohinoa akó.

Ko e meʻa naʻe fuesia ʻe he Fakamoʻuí maʻakú	Ko e ʻuhinga naʻe mamahi ai ʻa e Fakamoʻuí maʻakú

Ko e ʻAlamā 7:11–13 ko ha potufolofola fakataukei fakatokateline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

Lau ʻa e ʻAlamā 7:11–13, ʻo kumi e ngaahi akonaki ʻa ʻAlamā fekauʻaki mo e meʻa naʻe fuesia pe toʻo ʻe Sīsū Kalaisi kiate Ia maʻau ko ha konga ʻo ʻEne Fakaleleí. Lekooti e ngaahi meʻa ko ʻení ʻi he ʻuluaki kōlomu ʻo hoʻo sātí. Mahalo ʻe tokoni ke ʻiloʻi ʻoku ʻuhinga ʻa e foʻi lea ngaahi vaivaí ki he ngaahi vaivaiʻanga ʻoku tau aʻusia ʻi he moʻui fakamatelié.

Lau ʻa e 2 Nīfai 9:21; Mōsaia 3:5–8; mo e Tokāteline mo e Ngaahi Fuakava 19:16–19. ʻOku kau ʻi he ngaahi potufolofola ko ʻení ha ngaahi fakaikiiki kehe fekauʻaki mo e mamahi ʻa e Fakamoʻuí. Tānaki atu ha ngaahi foʻi lea pe kupuʻi lea ʻokú ke mahuʻingaʻia ai ki he kōlomu ʻuluaki ʻi hoʻo sātí. Fakakaukau ke tānaki atu ha potufolofola fakafekauʻaki pe fehokotakiʻanga mei he ngaahi potufolofola ko ʻení ki he ʻAlamā 7:11–13.

1. Tali e ongo fehuʻi ko ‘ení:

   • Ko e hā ʻa e ngaahi fakakaukau pe ongo naʻá ke maʻu ʻi hoʻo ako fekauʻaki mo e mamahi ʻa e Fakamoʻuí?

   • ʻOkú ke pehē ko e hā ʻoku mahuʻinga ai ke mahino ʻa e meʻa naʻe fuesia mo toʻo ʻe he Fakamoʻuí kiate Ia ko ha konga ʻo ʻEne feilaulau fakaleleí?

Ko e ʻuhinga naʻe fuesia ai ʻe Sīsū Kalaisi ʻa e ngaahi meʻa ko ʻení

Toe lau ʻa e ʻAlamā 7:11–13, ʻo fekumi ʻi he taimí ni ki he ʻuhinga naʻe mamahi ai ʻa e Fakamoʻuí maʻaú. Tokanga taha ki he ngaahi kupuʻi lea ʻoku kamata ʻaki ʻa e “koeʻuhí ke ne” pe “koeʻuhí ke” ʻi hoʻo laukongá. Tohi ʻi he kōlomu hono ua ʻo hoʻo sātí ʻa e meʻa ʻokú ke maʻú. Mahalo ʻe tokoni ke ke ʻiloʻi ʻoku ʻuhinga e foʻi lea tokoniʻí ke fakahoko ha fakafiemālie pe tokoni.

• Ko e hā naʻá ke ako fekauʻaki mo e ʻuhinga naʻe fuesia ai ʻe Sīsū Kalaisi ʻa e ngaahi meʻá ni maʻaú?

• Te ke fakamatalaʻi fakanounou fēfē ʻa e meʻa kuó ke ako ʻi he ʻAlamā 7:11–13 ki ha fakamatala ʻo ha meʻa moʻoni?

Mei he ʻAlamā 7:11–13, mahalo naʻá ke lava ʻo fakatokangaʻi ha foʻi moʻoni hangē ko ʻení: Naʻe mamahi ʻa Sīsū Kalaisi ke fakamoʻui au mei he maté pea ke tokonia au ʻi he ngaahi faingataʻa ʻo e moʻui fakamatelié.

Naʻe vahevahe ʻe Palesiteni Tāleni H. ʻOakesi ʻo e Kau Palesitenisī ʻUluakí ha niʻihi ʻo e ngaahi pole ʻo e moʻui fakamatelié ʻe lava ke tokoniʻi ai kitautolu ʻe he Fakamoʻuí. Lau ʻa e fakamatala ko ʻení pe mamata ʻi he foʻi vitiō “Fakamālohia ʻe he Fakalelei ʻa Sīsū Kalaisí,” ʻoku maʻu ʻi he ChurchofJesusChrist.orgmei he taimi 3:13 ki he 4:01.

Naʻe aʻusia mo foua ʻe hotau Fakamoʻuí ʻa e kānokato ʻo e ngaahi faingataʻa fakamatelié “ʻo fakatatau ki he kakanó“ koeʻuhí ke Ne lava ʻo ʻafioʻi ʻo “fakatatau mo e kakanó,” ʻa e founga ke “fakafiemālieʻi [ʻa ia ʻoku ʻuhinga ke fai ha tokoni] hono kakaí ʻo fakatatau mo honau ngaahi vaivaí.” Kuó Ne ʻafioʻi ai ʻetau fāifeingá, hotau loto-mamahí, hotau ngaahi ʻahiʻahí, pea mo ʻetau faingataʻaʻiá, he naʻá Ne foua loto-fiemālie kinautolu kotoa, ko ha konga mahuʻinga ʻo ʻEne Fakaleleí. Pea tuʻunga heni, hono fakaivia Ia ʻe Heʻene Fakaleleí ke tokoniʻi kitautolu—ke foaki mai ʻa e ivi ke tau lava ʻo fuesia iá. (Dallin H. Oaks, “Fakamālohia ʻe he Fakalelei ʻa Sīsū Kalaisí,” Liahona, Nōvema 2015, 61–62)

• Ko e hā ʻoku tokoni atu e fakamatala ko ʻení ke mahino kiate koe pe te ke ongoʻi fekauʻaki mo e Fakamoʻuí?

Ko hono fakafelāveʻi ia ki hoʻo moʻuí

Fakalaulauloto ʻi ha kiʻi taimi ki he meʻa naʻe fuesia ʻe he Fakamoʻuí maʻau fakafoʻituituí. Hangē ko ʻení, ko e hā ha ngaahi faingataʻa pau, ngaahi ʻahiʻahi, ngaahi vaivaiʻanga pe ngaahi mamahi ʻokú ke lolotonga foua pe kuó ke aʻusia? Fakakaukau ke lekooti hoʻo ngaahi fakakaukaú ʻi lalo ʻi hoʻo sātí.

Hokó, fakalaulauloto ʻi he faʻa lotu ki he founga kuo fakamālohia pe lava ke fakamālohia ai koe ʻe he Fakamoʻuí ʻi he ngaahi faingataʻa takitaha ko ʻení. Kole ki he Tamai Hēvaní ke Ne ueʻi fakalaumālie koe ʻi hoʻo hiki hoʻo ngaahi fakakaukaú mo e ongó.

2. Tali ha fehuʻi ʻe taha pe lahi ange ʻo e ongo fehuʻi ko ʻení:

   • Ko e fē ha taimi kuó ke ongoʻi ai e mālohi ʻoku ʻomi ʻe Sīsū Kalaisi ʻo fakafou ʻi Heʻene Fakaleleí?

   • Ko e hā kuó ke ako pe ongoʻi fekauʻaki mo Sīsū Kalaisi ʻi hoʻo ako he ʻaho ní ʻokú ke fakaʻamu ke manatuʻi?

Fili Pē: Fie Ako Lahi Ange?

Ko e hā ʻa e ongo ʻoku maʻu ʻe he ʻEikí fekauʻaki mo e ngaahi angahala pe ngaahi vaivai ʻoku ou fāifeinga ke ikunaʻí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e ongongo fakafiefia ki ha taha pē ʻoku loto ke ʻatā mei he ngaahi nunuʻa ʻo e fili taʻe fakapotopoto ʻo e kuohilí, ʻoku kehe e ʻafio ʻa e ʻEikí ki he ngaahi vaivaí mei Heʻene ʻafio ki he angatuʻú. Kuo fakatokanga e ʻEikí ʻe ʻi ai ha tautea ki he angatuʻu ʻoku teʻeki ke fakatomalaʻí, ka ʻoku folofola maʻu pē ʻa e ʻEikí ʻi he ʻaloʻofa ʻo kau ki he ngaahi vaivaí. (Richard G. Scott, “Mālohi Fakataautaha ʻi he Fakalelei ʻa Sīsū Kalaisí,” Liahona, Nōvema 2013, 83)

ʻOku ʻafioʻi moʻoni nai ʻe Sīsū Kalaisi hoku tūkungá?

Naʻe akonaki ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻe ʻaʻeva ʻa Kalaisi ʻi he hala ʻoku ui ʻa e tokotaha kotoa pē ʻi he moʻui fakamatelié ke ʻaʻeva aí koeʻuhí ke Ne ʻilo ʻa e founga ke tokoniʻi mo fakamālohia ai kitautolu ʻi hotau ngaahi taimi faingataʻaʻia lahi tahá. ʻOkú Ne ʻafioʻi ʻa e ngaahi kavenga mamafa taha mo mātuʻaki fakataautaha ʻoku tau fuesiá. ʻOkú Ne ʻafioʻi ʻa e ngaahi mamahi ʻoku hā ki tuʻa mo ongo fakamamahi taha ʻoku tau fuesiá. Naʻá Ne hifo ke māʻulalo ange ʻi he ngaahi mamahi peheé koeʻuhí ke Ne lava ʻo hiki hake kitautolu ke māʻolunga ai. ʻOku ʻikai ha loto-faingataʻaʻia, loto-mamahi pe mamahi ʻo e moʻuí kuo teʻeki ke Ne aʻusia koeʻuhí ko kitautolu peá Ne fua ʻi Hono umá ʻi he loto-toʻa mo e ʻaloʻofa. (Jeffrey R. Holland, Christ and the New Covenant: The Messianic Message of the Book of Mormon [1997], 223–24)

Naʻe akonaki ʻa ʻEletā Mātiu S. Hōlani ʻo e Kau Fitungofulú ʻo pehē:

Ki ha taha pē he ʻahó ni ʻoku mamahi lahi fau pe mahulu fau peá ke ongoʻi ʻoku ʻikai mahino kakato kinautolu ki ha taha, mahalo ʻokú ke tonu. Mahalo he ʻikai ha mēmipa ia ʻo e fāmilí, kaungāmeʻá, pe taki lakanga fakataulaʻeikí—neongo pe ko e hā haʻane ongoʻi pe ʻuhinga lelei—ʻokú ne ʻiloʻi lelei ho lotó pe maʻu e ngaahi lea totonu ke tokoni ke fakamoʻui koé. ʻIloʻi muʻa ʻeni: ʻOku ʻi ai ha Taha ʻoku mahino lelei [kiate Ia] e meʻa ʻokú ke fouá, ʻa ia ʻoku “māfimafi lahi ange ʻi he māmaní kotoa” [1 Nīfai 4:1], pea te Ne lava ke “[fakahoko] lahi hake [ʻo lahi] ʻaupito ʻi he meʻa kotoa pē [te mou] kolea pe mahalo ki aí” [ʻEfesō 3:20]. ʻE fakahoko ʻa e foungá ni ʻi Heʻene founga pē ʻAʻana mo ʻEne taimi-tēpile pē ʻAʻana, ka ʻoku tuʻu mateuteu maʻu pē ʻa Kalaisi ke fakamoʻui ʻa e konga siʻisiʻi mo e tafaʻaki kotoa hoʻo mamahí. (Matthew S. Holland, “Ko e Meʻafoaki Fakaʻofoʻofa ʻo e ʻAló,” Liahona, Nōvema 2020, 46)