ʻAlamā 7:14–27

ʻ“[Ko e] Hala ʻOku Fakatau Atu ki he Puleʻanga ʻo e ʻOtuá”

ʻOku faʻa lea ʻaki ʻe he kau palōfitá ʻa e “hala fāsiʻi mo lausiʻí” (2 Nīfai 31:19), ko e “hala ʻo e fuakavá,” pe “ko e hala ʻoku fakatau ki he puleʻanga ʻo e ʻOtuá” (ʻAlamā 7:19). Naʻe fakatokangaʻi ʻe ʻAlamā naʻe ʻi he hala ko ʻení ʻa e kakai ʻo Kitioné peá ne akoʻi kiate kinautolu ʻa e founga ke nau hokohoko atu ai ʻi aí pea hoko ʻo tatau ange mo e ʻOtuá. ʻOku fakataumuʻa ʻa e lēsoni ko ʻení ke tokoniʻi koe ʻi hoʻo feinga ke maʻu ʻa e ngaahi ʻulungaanga faka-Kalaisí ʻi hoʻo muimui ʻi he hala ʻoku fakatau ki he ʻOtuá.

Ko ha hala ke muimui ai

• Ko e hā ha ngaahi lelei ʻo hono maʻu ha hala ke muimui aí?

Fakakaukau ke ke mamata ʻi he “Fakafoki Fakaʻahó” mei he taimi 1:40 ki he 3:25 ke vakai kia ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene fakamatalaʻi ʻa e meʻa ʻoku hoko ki he kakai ʻoku fononga taʻe ʻi ai ha hala pe ngaahi fakaʻilonga falalaʻangá. ʻOku maʻu ʻa e vitiō ko ʻení ʻi he ChurchofJesusChrist.org.

Hili e kikite ʻa ʻAlamā ki he kakai ʻo Kitioné fekauʻaki mo e moʻui mo e Fakalelei ʻa Sīsū Kalaisí, naʻá ne vahevahe ha ngaahi lea fakalotolahi kiate kinautolu.

Lau ʻa e ʻAlamā 7:19–20 ke ʻiloʻi e meʻa naʻe lea ʻaki ʻe ʻAlamā fekauʻaki mo e ʻOtuá, Hono halá, mo e kakai ʻo Kitioné.

Fakakaukau ke fakaʻilongaʻi ʻa e kupuʻi lea “hala ʻoku fakatau atu ki he puleʻanga ʻo e ʻOtuá” ʻi he veesi 19. Te ke ako lahi ange he ʻahó ni fekauʻaki mo e hala ko ʻení.

• ʻOkú ke pehē te ke lava fēfē ʻo tala pe ʻokú ke ʻi he hala ʻoku fakatau ki he puleʻanga ʻo e ʻOtuá?

1. Fakakakato ʻa e ngaahi meʻá ni ko hoʻo ngāue ke fai ʻi he lēsoni ko ʻení. Tānaki atu ki ai ʻi he lēsoní kotoa ʻi hano fakahinohino atu.

   Tā ha fakatātā tatau mo ʻení pea fakahingoa ia “[Ko e] hala ʻoku fakatau atu ki he puleʻanga ʻo e ʻOtuá.”

   

Ko e hala ʻoku fakatau ki he puleʻanga ʻo e ʻOtuá ʻoku faʻa ui ia ko e hala fāsiʻi mo lausiʻí pe ko e hala ʻo e fuakavá. ʻOku tau ʻi he hala ko ʻení ʻi he taimi ʻoku tau muimui ai ki he sīpinga mo e ngaahi akonaki ʻa Sīsū Kalaisí. ʻI heʻetau hokohoko atu ʻi he hala ko ʻení ʻoku tataki ai kitautolu ki he moʻui taʻengatá (vakai ki he 2 Nīfai 31:19–20).

ʻI hoʻo akó, fakalaulauloto pe ʻokú ke vakai kiate koe ʻi he hala ʻoku fakatau ki he puleʻanga ʻo e ʻOtuá. Fekumi ki he ngaahi akonaki ʻoku tokoni atu ke mahino lelei ange kiate koe ʻa e hala ko ʻení pea mo e ngaahi tāpuaki ʻoku foaki atu ʻe he ʻEikí ʻi hoʻo muimui ki aí.

“[Ko e] hala ʻoku fakatau atu ki he puleʻanga ʻo e ʻOtuá”

Naʻe fakamatalaʻi ʻe ʻAlamā ha ngaahi ngāue te tau lava ʻo fai ʻa ia te ne tataki kitautolu ke tau foki ki he ʻao ʻo e ʻOtuá.

Lau ʻa e ʻAlamā 7:14–16, pea hiki ʻa e ngaahi ngāue ko ʻení ʻi he foʻi halá pe ʻi he tafaʻakí ʻi hoʻo fakatātaá.

• Ko e hā e meʻa naʻe tokoni atu e ngaahi veesi ko ʻení ke mahino kiate koe fekauʻaki mo e ʻuhinga ʻo e nofo ʻi he hala ʻoku fakatau ki he ʻOtuá?

Ko e moʻoni ʻe taha te tau lava ʻo ako mei he ngaahi veesi ko ʻení ko e taimi ʻoku tau fakatomala ai, fakahoko ha ngaahi fuakava mo e ʻOtuá, mo maʻu e ngaahi ouau ʻo e ongoongolelei ʻo Sīsū Kalaisí, ʻoku tau muimui ai ʻi he hala ʻoku fakatau ki he puleʻanga ʻo e ʻOtuá.

• ʻOku tokoni fēfē ʻa e ngaahi ngāue ko ʻení ke teuteuʻi kitautolu ke foki ki he ʻao ʻo e ʻOtuá?

• Ko e hā ha ngaahi tāpuaki te tau ala aʻusia ʻi he moʻui ko ʻení ʻi heʻetau muimui ʻi he hala ʻo e ʻOtuá?

Ko hono fakatupulaki ha ngaahi ʻulungaanga faka-Kalaisí lolotonga hoʻo fononga ʻi Hono halá

Naʻe fakamatalaʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ko e tāpuaki ʻe taha ʻo e muimui ki he hala ʻo e fuakava ʻa e ʻOtuá ko ʻene “taki kitautolu ke tau hoko ʻo tatau mo Iá” (“Mou Fili he ʻAhó Ni,” Liahona, Nōvema 2018, 104).

Vakai ki he ngaahi ʻīmisi ko ʻeni ʻo e Fakamoʻuí. Fakakaukau ki he ngaahi ʻulungaanga ʻokú ke mamata ʻokú Ne fakahaaʻi ʻi he fakatātā takitaha.

• Ko e hā ha ngaahi ʻulungaanga ʻo Sīsū Kalaisi ʻokú ke saiʻia taha ai? Ko e hā hono ʻuhingá?

• Ko e hā ha ngaahi founga ʻokú ke fie hoko ai ʻo hangē ko e Fakamoʻuí? Ko e hā ha meʻa te ne lava ʻo ʻai ke faingataʻa iá? Te tau ikunaʻi fēfē nai ʻa e ngaahi faingataʻa ko ʻení ʻi he tokoni ʻa e ʻEikí?

• Ko e fē ha taimi kuó ke ongoʻi ai ʻa e holi lahi taha ke ke hangē ko Iá? Ko e hā e meʻa naʻe hoko ʻi hoʻo moʻuí naʻá ne ʻai koe ke ke ongoʻi peheé?

Naʻe fakahā ʻe ʻAlamā ha niʻihi ʻo e ngaahi ʻulungaanga faka-Kalaisi ʻoku totonu ke tau feinga ke maʻu ʻi heʻetau ʻaʻeva ʻi he hala ʻoku fakatau ki he puleʻanga ʻo e ʻOtuá.

Lau ʻa e ʻAlamā 7:22–25 ʻo kumi ʻa e ngaahi ʻulungaanga mo e ngaahi tōʻonga faka-Kalaisi ʻokú ke sio ʻoku ʻomi pe fakamatalaʻi maí. Fakakaukau ke fakaʻilongaʻi e ngaahi meʻá ni ʻi hoʻo folofolá. Te ke lava foki ʻo fakakaukau ke lisi ʻa e ngaahi ʻulungaanga mo e tōʻonga ko ʻení ʻi he foʻi halá pe ʻi he tafaʻaki ʻo hoʻo fakatātaá.

Fili ʻi he faʻa lotu ha ʻulungaanga ʻoku hā ʻi he ʻAlamā 7:22–25 ʻokú ke ongoʻi ʻoku finangalo ʻa e Tamai Hēvaní ke ke fakatupulaki, pea fakakakato leva ʻa e ʻekitivitī ko ʻení. Lekooti hoʻo ngaahi fakakaukaú ʻi lalo ʻi hoʻo fakatātaá pe ʻi ha feituʻu kehe ʻi hoʻo tohinoa akó.

1. Ako lahi ange fekauʻaki mo e ʻulungaanga ko ʻení. Fakakaukau ke fakaʻaongaʻi ha ngaahi maʻuʻanga tokoni fakafolofola hangē ko e Fakahinohino ki he Ngaahi Folofolá ke tokoni ʻi he meʻá ni. Hiki ʻa e meʻa naʻá ke akó.

2. Lisi e ngaahi faingataʻa ʻo hono fakatupulaki e ʻulungaanga naʻá ke filí mo e ʻuhinga ʻokú ke pehē ʻoku tuku ai ʻe he ʻOtuá ke ke aʻusia e ngaahi faingataʻa ko iá.

3. Hiki ha founga kehekehe ʻe ua ki he tolu ʻe lelei ange ai hoʻo moʻuí hili hono maʻu e ʻulungaanga ko ʻení.

4. Fakahā ha sīpinga mei he moʻui ʻa e Fakamoʻuí ʻa ia naʻá Ne fakafōtunga ai ʻa e ʻulungaanga ko ʻení. Pe ko hoʻo lisi ha sīpinga mei he moʻui ʻa ha taha ʻokú ke ʻiloʻi ʻa ia naʻá ne fakafōtunga ai ʻa e ʻulungaanga faka-Kalaisi ko ʻení.

5. Feinga ke ʻiloʻi ha ngāue ʻe taha pe lahi ange te ke lava ʻo fai te ne fakaafeʻi e tokoni ʻa e ʻOtuá ʻi hoʻo fāifeinga ke fakatupulaki e ʻulungaanga ko ʻení. Faʻu ha palani ki he founga ke fakahoko ai ʻa e ngāue ko iá ʻi hoʻo moʻuí. Ko e founga ʻe taha te ke ala feinga ai ke fakahoko ʻa e ngāue ko ʻení ko haʻo talanoa mo e Tamai Hēvaní ʻi hoʻo ngaahi lotu fakaʻahó fekauʻaki mo hoʻo fakalakalaká pea kolea ʻEne tokoní ʻi he meʻa ʻokú ke tōnounou aí.

Fili Pē: Fie Ako Lahi Ange?

Ko e hā ʻoku toe ui ai ʻa e hala ki he puleʻanga ʻo e ʻOtuá ko e “hala ʻo e fuakavá”?

Naʻe fakamatalaʻi ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e hā ʻa e hala ʻo e fuakavá? Ko e hala pē ia ʻe taha ʻoku fakatau ki he puleʻanga fakasilesitiale ʻo e ʻOtuá. ʻOku tau kamata fononga ʻi he halá ʻi heʻetau fou he matapā ʻo e papitaisó mo “[vilitaki] atu kimuʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa mo ha ʻofa ki he ʻOtuá mo e kakai fulipē [ko e ongo fekau lalahi ʻe uá] … ki he ngataʻangá.” [2 Nifai 31:20]. ʻI he fonongaʻanga ʻo e hala ʻo e fuakavá (ʻa ia ʻoku ope atu ʻi he moʻui fakamatelié), ʻoku tau maʻu ai e kotoa ʻo e ngaahi ouau mo e ngaahi fuakava ʻoku fiemaʻu ki he fakamoʻuí mo e hākeakiʻí. (D. Todd Christofferson, “ʻUhinga e Hala ʻo e Fuakavá,” Liahona, Mē 2021, 116)

Te u fakatupulaki fēfē ʻa e ʻulungaana faka-Kalaisí?

Mamata ʻi he “Ngaahi ʻUlungaanga Faka-Kalaisí—ko e Mālohi ʻokú ne Hiki Hake Kitautolú” mei he taimi 12:08 ki he 16:19 ke mamata ʻi hono tali ʻe ʻEletā Tieta F. ʻUkitofa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e fehuʻi ko ʻení.

Naʻe fakamatala ʻa ʻEletā Lini G. Lōpini ʻo e Kau Fitungofulú ʻo pehē:

Koeʻuhí ko e ngaahi ʻulungaanga faka-Kalaisí ko ha ngaahi meʻafoaki ia mei he ʻOtuá pea he ʻikai te ke lava ʻo fakatupulaki kinautolu taʻekau ai ʻEne tokoní, hanga ʻo lotua ia ʻi he lotu fakafāmilí mo fakatāutahá. (Lynn G. Robbins, “Ko e hā ʻa e Anga ʻo e Tangatá mo Fefiné ʻoku Taau Mo Kimoutolú?,” Liahona, Me 2011, 105)

Naʻe tānaki mai ʻe ʻEletā Uitenei Keleitoni ʻo e Kau Fitungofulú ʻa e naahi fakakaukau ko ʻeni:

ʻOku “faifai” [Mōsese 7:21] pea maʻu ʻa e ʻulungaanga faka-Kalaisi ko ʻení ʻi hono loto ʻaki e fakalakalaka ʻi he hala ʻo e fuakavá. ʻOku fakamatamataleleiʻi ʻe he ngaahi ʻulungaanga faka-Kalaisí e moʻui ʻa kinautolu ʻoku fāifeinga ke faileleí. ʻOku nau fakafonu e ʻapí ʻaki e maama ʻo e ongoongoleleí, neongo pe ʻoku kelekele pe māpele e falikí. Naʻa mo e taimi ko koe pē ʻi homou ʻapí ʻoku muimui he fakahinohino ke “fekumi [ki he ngaahi meʻa ko ʻení],” [Ngaahi Tefito ʻo e Tui 1:13], te ke lava ʻo tokoni ki hono fakanaunau fakalaumālie ʻa e ʻapi homou fāmilí. (L. Whitney Clayton, “Ko e Ngaahi ʻApi Lelei Tahá,” Liahona, Mē 2020, 108)