Rebyo 11 sa Doktrinal nga Kahanas

Isag-ulo ug Sabta

estudyante nga nagpataas sa kamot aron mangutana

Ang pagsag-ulo sa mga tudling sa doktrinal nga kahanas ug pagsabot sa doktrina nga gitudlo niini makadapit sa Espiritu Santo sa imong kinabuhi ug makatabang kanimo nga mahimong mas mahisama ni Jesukristo. Kini nga leksiyon gituyo aron pagtabang kanimo sa pagsag-ulo sa mahinungdanon nga mga hugpong sa mga pulong sa kasulatan gikan sa unang 12 ka mga tudling sa doktrinal nga kahanas sa Basahon ni Mormon ug magtinguha og dugang nga panabot pinaagi sa pagpangutana ug pagtubag sa dinasig nga mga pangutana.

Isag-ulo ang mga pakisayran ug ang mahinungdanon nga mga hugpong sa mga pulong sa kasulatan

Gamita ang mosunod nga tsart sa pagrebyo sa unang 12 ka tudling sa doktrinal nga kahanas sa Basahon ni Mormon. Pagpili og duha ngadto sa tulo ka mahinungdanon nga mga hugpong sa mga pulong sa kasulatan nga wala pa nimo masag-ulo. Sa usa ka piraso nga papel o sa imong journal sa pagtuon, isulat ang pakisayran sa kasulatan ug ang mahinungdanon nga hugpong sa mga pulong sa kasulatan samtang isulti og kusog ang mga pulong. Balika kini nga proseso sa pipila ka higayon hangtod nga masaysay [recite] nimo ang tibuok hugpong sa mga pulong gikan sa memorya. Dayon padayon sa imong sunod nga tudling.

Unang 12 ka Tudling sa Doktrinal nga Kahanas ug Mahinungdanon nga mga Hugpong sa mga Pulong

Manwal sa Magtutudlo sa Basahon ni Mormon (2024)

Pakisayran sa Kasulatan	Mahinungdanon nga Hugpong sa mga Pulong sa Kasulatan
Pakisayran sa Kasulatan 1 Nephi 3:7	Mahinungdanon nga Hugpong sa mga Pulong sa Kasulatan “Ako moadto ug mobuhat sa mga butang nga ang Ginoo nagsugo.”
Pakisayran sa Kasulatan 2 Nephi 2:25	Mahinungdanon nga Hugpong sa mga Pulong sa Kasulatan “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay.”
Pakisayran sa Kasulatan 2 Nephi 2:27	Mahinungdanon nga Hugpong sa mga Pulong sa Kasulatan “Sila gawasnon sa pagpili sa kalingkawasan ug sa kinabuhi nga dayon … o … sa pagkabihag ug sa kamatayon.”
Pakisayran sa Kasulatan 2 Nephi 26:33	Mahinungdanon nga Hugpong sa mga Pulong sa Kasulatan “Ang tanan managsama ngadto sa Dios.”
Pakisayran sa Kasulatan 2 Nephi 28:30	Mahinungdanon nga Hugpong sa mga Pulong sa Kasulatan Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”
Pakisayran sa Kasulatan 2 Nephi 32:3	Mahinungdanon nga Hugpong sa mga Pulong sa Kasulatan “Pagbusog sa mga pulong ni Kristo; kay tan-awa, ang mga pulong ni Kristo magtug-an kaninyo sa tanan nga mga butang nga inyong buhaton.”
Pakisayran sa Kasulatan 2 Nephi 32:8–9	Mahinungdanon nga Hugpong sa mga Pulong sa Kasulatan “Kamo kinahanglan gayod nga mag-ampo sa kanunay.”
Pakisayran sa Kasulatan Mosiah 2:17	Mahinungdanon nga Hugpong sa mga Pulong sa Kasulatan “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios.”
Pakisayran sa Kasulatan Mosiah 2:41	Mahinungdanon nga Hugpong sa mga Pulong sa Kasulatan “[Kadto] nga naghupot sa mga sugo sa Dios … bulahan sa tanan nga mga butang.”
Pakisayran sa Kasulatan Mosiah 3:19	Mahinungdanon nga Hugpong sa mga Pulong sa Kasulatan “[Isalikway] ang … kinaiyanhon nga pagkatawo ug [mahimo] nga usa ka santos pinaagi sa pag-ula ni Kristo ang Ginoo.”
Pakisayran sa Kasulatan Mosiah 4:9	Mahinungdanon nga Hugpong sa mga Pulong sa Kasulatan “Tuo sa Dios; … tuo nga siya aduna sa tanan nga kaalam.”
Pakisayran sa Kasulatan Mosiah 18:8–10	Mahinungdanon nga Hugpong sa mga Pulong sa Kasulatan “Pagpabunyag diha sa ngalan sa Ginoo, ingon og usa ka saksi … nga kamo nakasulod ngadto sa usa ka pakigsaad uban kaniya.”

Pagpangutana og dinasig nga mga pangutana

Ang dinasig nga mga pangutana usa ka importante nga bahin sa proseso sa pagkat-on. Atol sa Iyang mortal nga pangalagad, ang Manluluwas kasagarang nangutana nga nagdapit sa mga tigkat-on sa paghunahuna, pagbati, ug paglihok sa mga kamatuoran nga Iyang gitudlo (tan-awa sa Mateo 16:13–16; Juan 6:66–69). Tingali namatikdan nimo ang usa ka ginikanan, magtutudlo, o lider sa Simbahan nga nangutana nga nakatabang kanimo nga mas masabtan ang ebanghelyo o makonekta ang imong nakat-onan sa imong kaugalingong kinabuhi. Ang pagpangutana ug pagtubag sa dinasig nga mga pangutana makahimo sa proseso sa pagkat-on nga mas makadani ug makahuluganon nga kasinatian alang kanimo.

Adunay daghang nagkalainlaing mga matang sa mga pangutana. Karong adlawa makabaton ka og kahigayonan aron sa pagbansay sa pagpangutana ug pagtubag sa dinasig nga mga pangutana aron sa pagtabang kanimo nga makasabot sa mga tudling sa doktrinal nga kahanas.

Ang mosunod mao ang mga ehemplo sa nagkalainlaing mga matang sa mga pangutana nga mahimong magamit kon magtuon sa mga kasulatan. Ang mga ehemplo nga mga pangutana may kalabotan sa mga kamatuoran nga gitudlo sa 2 Nephi 32:8–9.

Mga pangutana aron matabangan ka nga makasabot sa konteksto sa mga kasulatan

• Kinsa ang nagsulti diha sa 2 Nephi 32:8–9?

• Kang kinsa siya nakigsulti? Ngano man?

Mga pangutana aron matabangan ka nga masabtan ang content o kahulugan sa mga kasulatan

Kini nga mga pangutana makatabang kanato sa pag-ila sa doktrina ug mga baroganan.

• Unsa ang tuyo sa tagsulat nga atong makat-onan?

• Unsa sa imong hunahuna ang gipasabot sa “mag-ampo sa kanunay, ug dili mawad-an sa paglaom”? (2 Nephi 32:9).

Mga pangutana aron matabangan ka nga makasabot sa doktrina ug mga baroganan diha sa mga kasulatan

• Sa imong hunahuna sa unsang paagi ang pag-ampo sa kanunay makaimpluwensiya sa atong relasyon uban sa Langitnong Amahan?

• Unsa ang makatabang kanato sa paghinumdom sa pag-ampo kanunay, bisan og gibati nato nga dili nato gusto?

1. Kompletoha ang mosunod:

   Pagpili og usa sa mga tudling sa doktrinal nga kahanas tali sa 1 Nephi 3:7 ug Mosiah 18:8–10. Pagsulat og tulo ka pangutana—usa alang sa matag kategoriya sa ibabaw—nga mahimo nimong ipangutana mahitungod sa tudling sa doktrinal nga kahanas. Tan-awa ang miaging mga ehemplo kon kinahanglan nimo og tabang. Tubaga ang matag pangutana nga imong gisulat.

   Ikonsiderar ang pagtuon sa imong gipili nga tudling sa doktrinal nga kahanas uban sa usa ka ginikanan, igsoon, o higala ug hangyoa sila sa pagtubag sa imong mga pangutana.