Alema 13

“Ina Ia Mafai Ona Outou Ulu Atu i Lena Malologa”

I lenei olaga, e tele o tatou popolega ma faafitauli. O loo i ai le Alii iina e fesoasoani ia i tatou ma finagalo ia tatou ulu atu i Lona malologa. Sa faamalamalama mai e Alema e faapea na faauuina e le Alii ia faitaulaga sili e aoao atu poloaiga ma faatino sauniga ina ia mafai ai e tagata ona ulu atu i le malologa o le Alii. O lenei lesona e mafai ona fesoasoani ia te oe e malamalama ai i le uiga o le ulu atu i le malologa o le Alii ma le auala e mafai ona e faia ai.

O le malologa o le Alii

• O le a se taimi ua faamanuiaina ai oe mai le malologa?

E masani ona talanoa mai tusitusiga paia e uiga i le malologa o le Alii. O le malologa o le Alii e faasino i “le atoatoaga o lona mamalu” (Mataupu Faavae ma Feagaiga 84:24). O le malologa o le Alii e faasino foi i “le olioli lea i le filemu ma le saolotoga mai le popole ma le faasoesa. Na folafola mai e le Alii lena malologa i Ona soo faamaoni i lenei olaga. Ua Ia saunia foi se nofoaga o le malologa mo i latou i le olaga a sau” (Taiala i Tusitusiga Paia, “Malologa,” scriptures.ChurchofJesusChrist.org).

O le maua ai o le filemu ma le saolotoga mai le popole ma le faasoesa e le faapea o le a aunoa ai le olaga ma tofotofoga. Faitau le Mataio 11:28–30, ma vaavaai mo mea o loo aoao mai e le Alii e uiga i Lona malologa i taimi o faigata o le olaga.

Mafaufau i ou tulaga o i ai nei.

• E mafai faapefea ona e manuia mai le oo ai i le malologa o le Alii?

Na valaaulia e Alema le nuu o Amonaea ia salamo ma aua nei faamaaaina o latou loto ina ia mafai ona faamagaloina i latou ma ulu atu i le malologa o le Alii (tagai Alema 12:33–37). A o e suesueina le Alema 13, vaavaai mo mea ua saunia e le Alii e fesoasoani ia te oe e ulu atu ai i Lona malologa i lenei olaga ma i le olaga a sau.

E fesoasoani taitai perisitua ia i tatou e ulu atu i le malologa o le Alii

Na manatu le nuu o Amonaea o i latou lava, e tusa “ma le faatulagaga ma le faatuatuaga a Neʼoa” (Alema 14:16). Ona o lenei mea, sa latou talitonu ai e mafai ona faaolaina i latou e aunoa ma le Togiola a Iesu Keriso, ma sa latou suia le perisitua i se faatulagaga sese na taua e Alema o le “faafaitaulaga pepelo” (tagai Alema 1:3–4, 12, 16). Ina ia faasa’o o latou talitonuga sese, sa aoao atu e Alema i latou i le ala na “faauu ai e le Alii le Atua o faitaulaga, e tusa ma lana faatulagaga paia” (Alema 13:1).

Faitau le Alema 13:1–2, 6, ma vaavaai pe aisea e faauuina ai e le Alii ia taitai perisitua.

• O a nisi o mafuaaga ua valaauina ai e le Alii ia taitai perisitua?

Mai nei fuaiupu, ua tatou aoao ai e valaauina e le Faaola ia taitai perisitua e fesoasoani ia i tatou e vaavaai atu ia te Ia mo le togiolaina ma aoao atu Ana poloaiga ina ia mafai ai ona tatou ulu atu i Lona malologa.

Na aoao mai Elder Dale G. Renlund o le Korama a Aposetolo e Toasefululua:

Ona o Lana taulaga togiola, ua i ai ia Iesu Keriso le mana ma le pule e togiola ai tagata uma. Ina ia mafai ona maua Lona mana togiola, ua Ia faamatuu atu ai se vaega o Lona mana ma le pule i alii o i le lalolagi. O lenei mana ma le pule ua faamatuuina mai ua ta’ua o le perisitua. (Dale G. Renlund, “O Le Perisitua ma le Mana Togiola o le Faaola,” Liahona, Nov. 2017, 64)

• O le a se mea ua fesoasoani lenei upusii e te malamalama ai e uiga i le mafuaaga o loo faaauau ai pea ona valaauina e le Atua ia tagata e umia le perisitua i o tatou aso?

O faitaulaga sili na tautala i ai Alema sa “valaauina ma saunia i latou mai le faavaega o le lalolagi … ona o lo latou faatuatua tele ma a latou galuega lelei” (Alema 13:3). I le taimi lava e tasi, o isi “sa latou teena le Agaga o le Atua ona o le maaa o o latou loto” (Alema 13:4).

O isi taitai o le Ekalesia, e pei o taitai o le Aualofa, Tamaitai Talavou, ma le Aoga Sa, e galulue faatasi ma le pule faamatuu o le perisitua. O le auauna atu faatasi ma taitai perisitua, latou te fesoasoani ai e taiala tagata taitoatasi ma aiga ia o mai ia Keriso.

• O a nisi o auala e fesoasoani ai taitai o le Ekalesia ia i tatou e vaai atu ia Iesu Keriso ma ulu atu i Lona malologa?

O sauniga o le perisitua e fesoasoani ia i tatou e ulu atu ai i le malologa o le Alii

Na taua e Alema ia faataitaiga amiotonu a faitaulaga sili ma le ala na “faapaiaina” ai i latou (Alema 13:11) ma “faamamaina ma ulu atu i le malologa o le Alii lo latou Atua” (Alema 13:12). Ona ta’ua faapitoa lea e Alema o Mekisateko o se faataitaiga o se taitai perisitua amiotonu. Maitau o le nuu o Mekisateko na muai amioleaga e pei o le nuu o Amonaea (tagai Alema 8:9; 13:17).

Faitau le Alema 13:14–19, vaavaai pe na faapefea ona auauna atu Mekisateko i lona nuu.

• O a ni mea talitutusa ua e maitauina i le va o Mekisateko ma Iesu Keriso?

• E tusa ai ma le fuaiupu 16, o le a se faamoemoega e tasi o sauniga o le perisitua?

Mai le fuaiupu 16 ua tatou aoao ai o sauniga o le perisitua e fesoasoani tatou te vaavaai atu ai ia Iesu Keriso mo se faamagaloga o agasala ina ia mafai ai ona tatou ulu atu i Lona malologa.

Na aoao mai e Peresitene Russell M. Nelson le ala e mafai ai e nisi o sauniga o le perisitua ona fesoasoani ia i tatou e tepa taulai atu ai ia Iesu Keriso. Matamata le vitio “O le Togiola” mai le faailo taimi 13:22 i le 13:51, o loo maua i le ChurchofJesusChrist.org, pe faitau le faamatalaga lenei.

O sauniga taua o le talalelei e faatusa i le Togiola. O le papatisoga e ala i le faatofuina o se faatusa lea o le maliu, tanumia, ma le Toetu o le Faaola. O le tagofia o le faamanatuga e faafou ai feagaiga o le papatisoga ma faafouina ai foi lo tatou manatuaina o le tino nutimomoia o le Faaola ma le toto na Ia faamaligiina mo i tatou. O sauniga o le malumalu e faatusa i lo tatou faaleleiga ma le Alii ma faamau faatasi ai aiga e faavavau. (Russell M. Nelson, “The Atonement,” Ensign, Nov. 1996, 35)

• O le a se mea na e aoaoina mai ia Peresitene Nelson e uiga i sauniga o le perisitua?

• O anafea na e lagonaina ai le latalata atu i le Faaola e ala i le auai i se sauniga faaleperisitua?

Ina ia mafai ona outou ulu atu i Lona malologa

E pei o faitaulaga o loo faamatalaina i le Alema 13:1–19, sa saili ma le filiga Alema e fesoasoani i tagata ia saunia e ulu atu i le malologa o le Alii. Sa ia faamanatu atu ia i latou o le a le pine ae afio mai le Alii (tagai Alema 13:21–26). Sa manao Alema ma le “atuatuvale tele e oo lava i le tiga, ina ia latou faalogo mai i [ana] upu” (Alema 13:27).

Faitau le Alema 13:27–30, ma vaavaai mo mea na valaaulia e Alema ia tagata e fai.

• O le fea o valaaulia a Alema (filifili se valaaulia faapitoa) e te manatu e mafai ona fesoasoani ia i tatou e ulu atu ai i le malologa o le Alii?

• O le a se mea ua e aoaoina mai le Alema 13 e mafai ona fesoasoani ia te oe i lou olaga i le taimi nei?

Saili le taitaiga a le Agaga Paia ia iloa ai le mea e mafai ona e faia e faaaoga ai mea ua e aoaoina e ulu atu ai i le malologa o le Alii.

1. Faamaea mea nei:

   Vaai faalemafaufau o loo e talanoa ma se uo o loo popole e uiga i se faafitauli o loo feagai ma ia. O le a se mea o le a e faasoa atu i lau uo mai lau suesuega o le Alema 13 e fesoasoani ai ia i latou e ulu atu i le malologa o le Alii? Ia aofia ai le tasi pe sili atu o se fuaiupu mai le Alema 13 i lau tali.

Tuu i le faitalia: O e Manao e Aoao Atili?

E mafai faapefea ona ou ulu atu i le malologa o le Atua?

Na aoao mai e Peresitene Iosefa F. Samita (1838–1918) le ala e mafai ai ona tatou ulu atu i le malologa o le Atua a o i ai i le olaga nei:

Na taua e perofeta anamua le “ulu atu i le malologa o le Atua” [tagai i le Alema 12:34; Mataupu Faavae ma Feagaiga 84:23–24]; o le a lona uiga? I lo’u manatu, o lona uiga o le ulu atu i le malamalama ma le alofa o le Atua, ina ua maua le faatuatua i ona faamoemoega ma lana fuafuaga, e oo i le tulaga tatou te iloa ai e sa’o i tatou, ma tatou te le o sailiili mo se isi mea, ua le faalavelaveina i tatou i le feaveaiina i matagi uma lava o mataupu, poo le pepelo o tagata i togafiti leaga ua saunia e faasese ai. … O le tagata ua oo i lena tulaga o le faatuatua i le Atua ma ua aveesea le masalosalo ma le fefe mai ia te ia, ua ulu atu o ia i le “malologa o le Atua.” (Aoaoga a Peresitene o le Ekalesia: Iosefa F. Samita [1998], 56)

O le a le faamoemoega o le perisitua?

E mafai ona e matamata i le vitio “Auala e Galue ai le Perisitua” (3:45), o loo maua i le ChurchofJesusChrist.org, e aoao atili ai e uiga i le faamoemoega o le perisitua.