Alema 19

“Ua Faaloaloa Mai Lona Aao ia i Latou Uma O E e Salamo ma Talitonu”

o se talavou o loo faasoa atu le talalelei i uo

A o e mafaufau e faasoaina atu le talalelei i isi, pe o e lagonaina ea e pei o loo i ai nisi o tagata o le a le taliaina lava aoaoga a le Faaola? O le a sou manatu i le silasila a le Tama Faalelagi i nei tagata? Mai aafiaga faafaifeautalai a Amona ma sa Lamana, ua tatou iloa ai o loo saunia e le Alii loto o tagata mai so o se ituaiga matata o le olaga ina ia maua Lana talalelei. E mafai ona fesoasoani ia te oe lenei lesona ia malamalama ai e alofa le Alii i tagata uma ma finagalo ia latou o mai ia te Ia.

Suesue oe lava

Faatulaga oe lava i se fua o le 1–5 pe faamata e te manatu o le a e valaaulia tagata nei e aoao atili e uiga i le talalelei a Iesu Keriso.

1. O se tasi e te iloa sa faaalia lona fiafia i le Ekalesia

2. O se uo po o se tagata o le aiga e masani ona mulimuli i tulaga faatonuina o le talalelei ae e le o se tagata o le ekalesia

3. O se uo po o se tagata o le aiga e le mulimuli i tulaga faatonuina o le talalelei

4. O se tasi e te iloa na teenaina valaaulia muamua mai isi e aoao atili e uiga i le talalelei

Mafaufau loloto i mafuaaga na e tali atu ai i le ala na e faia ai.

• E mafai faapefea e o tatou manatu patino e uiga i isi ona aafia ai a tatou taumafaiga e faasoa atu le talalelei?

Ina ua amata e atalii o Mosaea la latou misiona i sa Lamana, e toatele tagata na talie ia i latou ma masalosalo pe o le a manuia le latou talaiga i totonu o na tagata amioleaga. (tagai Alema 26:23–25). Peitai, sa faamanuiaina Amona ma ona uso. Atonu e te manatua ina ua uma ona aoao atu e Amona le talalelei i le Tupu o Lamonae, sa talitonu le tupu i upu a Amona, tatalo mo le alofa mutimutivale, ma pau fao i le eleele ina ua lofituina o ia e le Agaga (tagai Alema 18:40–43).

Lamonae o loo tatalo

O le asō o le a e aoao ai e uiga i mea na tutupu i le aiga o Lamonae ina ua uma ona aoao atu e Amona le tupu. A o e suesue, vaavaai mo upumoni e mafai ona fesoasoani e te malamalama atili ai i le ala e silasila mai ai le Tama Faalelagi i Ana fanau, e aofia ai i latou atonu e foliga mai e le taliaina le talalelei.

Sa faaauau pea ona aoao e Amona le aiga o Lamonae

Ina ua iloa e le masiofo o sa Lamana le maliu o lana tane, sa ia aami ia Amona ina ia mafai ona ia talanoa atu ia te ia (tagai Alema 19:1–3).

Faitau le Alema 19:4–17, ma vaavaai mo mea na oo i ai le masiofo ma isi ina ua uma ona talanoa ma Amona. Atonu foi e te manao e matamata le “Ua Auauna ma Aoao Atu e Amona le Tupu o Lamonae” mai le faailo taimi 15:18 i le 20:06. O loo maua lenei vitio i le ChurchofJesusChrist.org.

• O a ni mea ua e aoaoina e uiga i le masiofo mai nei fuaiupu?

• O le a se mea na aoaoina e Lamonae e uiga ia Iesu Keriso i aso e tolu na faatoa mavae atu?

• Aisea e te manatu ai o lenei malamalama na aumaia ai ia Lamonae lena olioli?

Ina ua uma ona faapotopoto atu isi i le fale o le tupu, sa faateia ma faanoanoa le auauna a le masiofo o Apiso ina ua amata ona finau tagata ia i latou lava e uiga i le mafuaaga na taooto ai le tupu ma isi i luga o le fogaeleele e peiseai ua feoti (tagai Alema 19:18–28).

Faitau le Alema 19:29–36, ma vaavaai mo mea na faia e Apiso i lenei taimi o le fefinauai ma le mea na tupu mulimuli ane ia sa Lamana. Atonu foi e te manao e matamata le “Ua Auauna ma Aoao Atu e Amona le Tupu o Lamonae” mai le faailo taimi 20:07 i le 23:04. O loo maua lenei vitio i le ChurchofJesusChrist.org.

• O le a le aafiaga o le talalelei a Iesu Keriso i le toatele o sa Lamana o e na filifili e talitonu?

• O le a le upumoni e uiga i le Alii na aoao mai e Mamona i le fuaiupu 36 ina ua uma ona faasoa atu lenei tala?

O le finagalo o le Alii mo tagata uma ia o mai ia te Ia

Mai upu a Mamona i le fuaiupu 36, ua tatou aoao ai o le aao o le Alii ua faaloaloa mai i tagata uma o e o le a salamo ma talitonu i Lona suafa. Mafaufau e faailoga lenei upumoni i au tusitusiga paia.

I lenei faatatauga, o le faaloaloa mai o le aao o le Alii e aofia ai Lona alofa mutimutivale ma le naunau e faamagalo atu.

• O a ni aafiaga na fesoasoani ia te oe e iloa ai le moni o lenei mataupu faavae i lou lava olaga po o olaga o isi?

O nisi taimi atonu tatou te filifili sese ai o le a le fiafia se tasi i le talalelei ona o foliga o lena tagata po o mea sa ia faia i le taimi ua tuanai. Faaalu sina taimi e vaai faalemafaufau ai i se tasi i lenei tulaga. Atonu o se tagata patino e te iloa, pe e mafai foi ona e mafaufau e uiga i tagata e masani ona fetaui i ai lenei faamatalaga.

aikona, faamaumau

1. Tali fesili nei i se parakalafa ia tolu i le lima ni fuaiupu:

   • E faapefea le lagona o le Atua e uiga i lenei tagata?

   • E mafai faapefea e le malamalama i lagona o le Atua e uiga i lenei tagata ona aafia ai ou lagona ia i latou?

Tuu i le faitalia: O e Manao e Aoao Atili?

E mafai ona ou liua i le Alii mai se aafiaga mamana se tasi?

O tagata sa Lamana na aoao atu e Amona sa oo i se liua i se ala maoae lea na lofituina ai i latou e le Agaga ma pauu ifo ai i le eleele. E le o se auala masani lea e oo ai le toatele o le fanau a le Tama Faalelagi i le liua.

Na aoao mai Elder David A. Bednar o le Korama o Aposetolo e Toasefululua:

Elder David A. Bednar

Mo le toatele o i tatou, o le liuaina o se faagasologa e faifai pea, ae le o se mea e tupu i se taimi e tasi e mafua mai i se aafiaga mamana pe maoae foi. O lea fuaitau ma lea fuaitau ma lea fuaiupu i lea fuaiupu, e faasolosolo malie toetoe lava ina le maitauina, o o tatou faamoemoega, o o tatou manatu, o a tatou upu, ma a tatou mea e fai e ogatusa ma le finagalo o le Atua. O le liua i le Alii e manaomia ai le tumau ma le onosai. (David A. Bednar, “Faaliliuina i le Alii,” Liahona, Nov. 2012, 107–8)

O a ni lagona o Iesu Keriso e uiga ia i latou o e e le taliaina e isi?

Na aoao mai Sister Sharon Eubank, sa avea ma Fesoasoani Muamua i le Au Peresitene Aoao o le Aualofa:

Sister Sharon Eubank

Ua faaali mai e le Feagaiga Fou ni taumafaiga maoae na faia e Iesu e aapa atu ai i ituaiga uma o tagata: o lepela, ao lafoga, tamaiti, le au Kalilaia, fafine talitane, o fafine, au Faresaio, o ē agasala, o Samaria, fafine ua oti a latou tane, o fitafita Roma, tagata mulilulua, o ē le mama i tulaga faalesauniga. I le toetoe lava o tala uma, o loo Ia aapa atu i se tasi e le masani ona taliaina i faapotopotoga. (Sharon Eubank, “O Keriso: O Le Malamalama e Susulu i le Pogisa,” Liahona, Me 2019, 74)

E mafai faapefea e le taumafai e vaai atu i isi e pei ona faia e le Atua ona aafia ai au?

Na aoao mai Elder Dale G. Renlund o le Korama a Aposetolo e Toasefululua:

Elder Dale G. Renlund

O le auauna atu ma le mataalia i isi, e tatau lava ona tatou vaai atu ia i latou mai se vaaiga faamatua, e ala atu i se vaaiga mai fofoga o le Tama Faalelagi. Ona faatoa mafai lea ona tatou amata ona malamalama i le taua moni o se agaga. Ona faatoa mafai lea ona tatou lagonaina le alofa o loo i ai i le Tama Faalelagi mo Ana fanau uma. Ona faatoa mafai lea ona tatou lagonaina le popole tele o le Faaola mo i latou. (Dale G. Renlund, “E Ala i Fofoga o le Atua,” Liahona, Nov. 2015, 94)