Alema 20–22

“O Le A Se Mea Ou Te Faia Ina Ia Mafai Ona Ou Maua Le … Ola e Faavavau?”

O le a se mea e mafai ona fesoasoani e te manao ai e mulimuli i le Atua e sili atu nai lo se isi lava mea? O le tamā o le Tupu o Lamonae sa avea muamua ma se tagata amioleaga, ae ina ua uma ona ia aoaoina upumoni taua e uiga i le fuafuaga o le faaolataga a lo tatou Faaola ma le Tama Faalelagi, sa amata ona suia tele ona manaoga. O lenei lesona e mafai ona fesoasoani ia te oe e manao ai i mea a le Atua e sili atu nai lo se isi lava mea e ofoina mai e le lalolagi.

O e naunau e fai?

Pe ua e maitauina ea o ni tulaga iloga patino e mafai ona uunaia ai lou naunau e faia se mea—pe le faia foi se mea?

Mo se faataitaiga, mafaufau i tulaga o le a e naunau ai e fai mea nei. Ona mafaufau lea i tulaga o le a faaitiitia ai lou naunau e faia.

• Faamama lou potumoe.

• Faitau se tusi.

• Savali i se mea mamao.

O nisi mea iloga e mafai ona faaosofia ai i tatou e mulimuli i le Atua.

Faaalu sina taimi e mafaufau ai e uiga i ou manaoga e mulimuli i le Atua. Afai e te lagonaina se manao e mulimuli ia te Ia, o le a se mea ua fesoasoani ia te oe e lagona ai lena manao? Afai e le o i ai i le taimi nei sou manao e mulimuli ia te Ia, o le a sou manatu i le mea o saofaga i na lagona?

O le asō o le a e aoao ai e uiga i se tagata ua matua faateleina lona manao e mulimuli i le Atua i totonu o se taimi puupuu. A o e suesue, ia gauai atu i le mea na mafua ai lenei suiga. Vaavaai mo aoaoga e mafai ona fesoasoani ia te oe e maua ai se naunautaiga sili atu e mulimuli i le Atua ma maua faamanuiaga ua na o Ia lava e mafai ona ofoina atu ia te oe.

Ua feiloai Amona ma Lamonae i le tamā o Lamonae

A o auauna ma aoao atu e Amona le nuu o le Tupu o Lamonae i le laueleele o Isamaeli, sa faaali atu e le Alii ia Amona o Arona ma isi mai le latou vaega sa faafalepuipuiina i le laueleele o Mitonae. Na faia e Amona ma le tupu ni fuafuaga e malaga ai iina e laveai Arona ma isi. A o latou i ai i luga o le ala, sa latou fetaiai ai ma le tamā o Lamonae, o le sa avea ma tupu i le laueleele atoa (tagai Alema 20:1–8).

Faitau le Alema 20:13–28, ma vaavaai mo feutagaiga na tupu i le va o Amona, Lamonae, ma le tamā o Lamonae.

• Na faapefea ona e maitauina le suiga o manaoga o le tama o Lamonae i le taimi atoa o lana feutagaiga ma Amona ma Lamonae?

• O a nisi o mea na saofaga i lena suiga?

Mafaufau e faailoga i le fuaiupu 23 mea na naunau le tama o Lamonae e lafoai pe afai e faasaoina e Amona lona ola. E mafai ona e faatusatusaina lana tali atu i lenei fuaiupu ma lana tali atu i isi fuaiupu o le a e suesueina i se taimi mulimuli mai o le lesona.

Ua aoao e Arona le tama o Lamonae

Ina ua uma ona tatalaina Arona ma i latou sa faatasi ma ia mai le falepuipui, sa toe foi atu Amona i le laueleele o Isamaeli faatasi ma le Tupu o Lamonae. Na taitai e le Agaga ia Arona e asiasi atu i le tama o Lamonae i le laueleele o Nifae (tagai Alema 22:1).

Faitau le Alema 22:2–6, ma vaavaai mo fesili na i ai i le tama o Lamonae a o feiloai ma Arona.

• O le a se mea e mafai ona e faasoa atu e uiga i le Tama Faalelagi ma Lana fuafuaga e tali atu ai i fesili a le tupu i fuaiupu 5–6?

Faitau le Alema 22:7–14 ma vaavaai pe na faapefea ona tali atu Arona i fesili a le tupu. Maitau o le upu agavaa i le fuaiupu 14 o lona uiga “ia maua pe e tatau ai.”

• O le a se mea na aoaoina e le tupu e uiga i le Atua ma Lana fuafuaga lea atonu na aafia ai lana vaaiga e uiga i le olaga?

• E mafai faapefea e le talitonu ma le malamalama ai i aoaoga a Arona e uiga i le Atua ma Lana fuafuaga ona tosina ai i tatou?

Faitau le Alema 22:15–18, vaavaai mo le mea na manao i ai le tupu ma sa naunau e fai ina ua uma ona aoaoina o ia e Arona.

1. Tali mai ia le itiiti ifo ma le lua o fesili nei:

   • O a upu po o fasifuaitau e fesoasoani ia te oe e iloa ai na suia manaoga o le tupu mai le taimi na ia feiloai ai ia Amona ma Lamonae i le ala i Mitonae?

   • O le a le tala a le tupu i fuaiupu 15 ma le 18 e faapea o le a ia naunau e lafoai?

   • E faavae i mea ua e aoaoina mai lau suesuega o Alema 20 ma le 22, o a nisi o mea moni na saofaga i le suiga na oo i ai le tupu?

   O se upumoni e tasi e mafai ona tatou aoao mai i lenei tala e faapea, a tatou malamalama i lo tatou manaomia ai o Iesu Keriso, o le a faateleina lo tatou naunau e mulimuli ia te Ia ma maua faamanuiaga e mafai ona Ia ofoina mai ia i tatou.

   • Aisea e te manatu ai o le malamalama ai i lo tatou manaomia o le Faaola e mafai ona i ai se aafiaga tele i o tatou manaoga ma faatinoga?

   • O le a se mea e mafai ona fesoasoani pe na fesoasoani ia te oe e malamalama atili ai i lou manaomia o Iesu Keriso?

O auala e mafai ai e o tatou manaoga amiotonu ona aafia ai i tatou

O le aafiaga o le tupu ma Arona na i ai se aafiaga loloto i le tupu ma lona nuu. O le tupu, lana avā, lona auaiga atoa, ma le toatele o isi sa Lamana na liua i le Alii ma sa faamaoni ia te Ia mo aso na totoe o o latou olaga (tagai Alema 22:23; 23:6).

Toe mafaufau i le mea na fai mai le tupu na ia manao i ai i fuaiupu 15–18. E aofia ai

• faamanuiaga o le ola e faavavau (fuaiupu 15, 18);

• ina ia “fanauina o au i la le Atua, ina ia seʼia ese ai i fafo lenei agaga leaga mai [lona] fatafata” (fuaiupu 15);

• ia maua le Agaga Paia (fuaiupu 15);

• ina ia faatumulia i le olioli (fuaiupu 15); ma

• ia iloa le Atua (fuaiupu 18).

2. Tali fesili nei:

   • O le a le eseesega e te manatu o le a faia i lou olaga e manao ai pea lava pea i nei mea?

   • O le a se mea e ono manaomia ona tatou lafoai pe suia ina ia maua ai nei faamanuiaga?

   Manatunatu loloto i mea ua e aoaoina ma lagonaina a o e suesue ai i le asō. Mafaufau po o le a se mea e mafai ona e faia e atili naunau atoatoa ai i faamanuiaga e finagalo le Tama Faalelagi e tuuina atu ia te oe. Mafaufau i mea e ono manaomia ona e faia pe lafoai ina ia maua ai nei faamanuiaga. Faamaumau ou manatu ma uunaiga faaleagaga i lau api talaaga mo suesuega.

Tuu i le faitalia: O e Manao e Aoao Atili?

E mafai faapefea ona ou maua le “olioli tele” (Alema 22:15) na faamatalaina e le tama o Lamonae?

Na aoao mai Peresitene Russell M. Nelson:

Afai tatou te vaai atu i le lalolagi ma mulimuli i ona mamanu mo le fiafia, tatou te le iloaina lava le olioli. E ono maua e tagata amioletonu le tele o lagona ma faalogona, ae latou te le mauaina lava le olioli! O le olioli o se meaalofa mo le au faamaoni. O se meaalofa e sau mai le taumafai ma le leai o se mafaufau i ai ia ola i se olaga amiotonu, e pei ona aoao mai e Iesu Keriso.

Na Ia aoao i tatou ia maua le olioli. Afai tatou te filifilia le Tama Faalelagi e avea ma o tatou Atua ma pe a tatou lagona le aoga o le Togiola a le Faaola i o tatou olaga, o le a faatumulia i tatou i le olioli. (Russell M. Nelson, “Olioli ma le Ola ai Faaleagaga,” Liahona, Nov. 2016, 84)

O le a se mea e mafai ona fesoasoani ia te a‘u e iloa ai lo‘u manaomia o Iesu Keriso?

Sa aoao mai Peresitene Ezra Taft Benson (1899–1994):

E pei lava o se tagata e le manao i se meaai seiloga ua fiaai, na te le manao ai foi i le faaolataga a Keriso seiloga ua ia iloa le pogai na te manaomia ai Keriso.

E leai se tasi na te iloa lelei ma le tonu pe aisea na te manaomia ai Keriso sei vagana ua ia malamalama ma talia le aoaoga faavae o le Pa’ū ma lona aafiaga i tagata uma. Ma e leai se isi tusi i le lalolagi o loo faamatalaina ai lenei aoaoga faavae taua e toetoe lava o le Tusi a Mamona. (Ezra Taft Benson, “The Book of Mormon and the Doctrine and Covenants,” Ensign, Me 1987, 85)

Na faapefea ona suia le tama o Lamonae mai lana feutagaiga muamua ma Amona i le taimi na aoaoina ai o ia e Arona?

A o auauna ai o se tasi o le Fitugafulu, sa aoao mai ai Elder Terence M. Vinson: