‘Alamā 30:1–29

Ko e Taki ʻe he Ngaahi Akonaki ʻa Koliholá ha Kakai Tokolahi ke Nau Mamaʻo mei he Fakamoʻuí

Naʻe haʻu ha tangata angakovi ko Kolihola ki he lotolotonga ʻo e kakai Nīfaí. Naʻá ne malanga ʻo fakafepakiʻi ʻa e ngaahi kikite fekauʻaki mo Sīsū Kalaisí peá ne tohoakiʻi ʻa e loto ʻo ha kakai tokolahi ke nau mamaʻo mei he ʻOtuá. ʻOku lahi ha ngaahi leʻo ʻi hotau kuongá ʻoku feinga ke tataki kitautolu ke mamaʻo meia Sīsū Kalaisi. ʻE lava ke tokoni ʻa e lēsoni ko ʻení ke ke ʻiloʻi mo fakasītuʻaʻi ʻa e ngaahi akonaki te ne lava ʻo takihalaʻi koe ke ke mamaʻo meia Sīsū Kalaisí.

Ko e kākā ʻa Sētané

Ko e maka-feké ko ha tauhele feke ia. ʻOku faʻu e ngaahi tauhele feké ke ʻasi tatau mo ha meʻatokoni moʻoni ʻe ʻikai teitei tukuange ʻe he feké ʻi he taimi te ne maʻu ai iá. ʻI he taimi ʻe hoko ai ʻení, ʻe faingofua leva ki he tangata toutaí ke ne hiki hake ʻa e feké ʻo lī ki hono vaká.

Naʻe fakaʻaongaʻi ʻe Palesiteni Tōmasi S. Monisoni (1927–2018) ʻa e sīpinga ʻo ha maka-feke ke akoʻi ʻaki e founga ʻoku ngāue ai ʻa Sētané.

ʻOku ʻākilotoa kitautolu he ʻahó ni ʻe he ngaahi maka-feke ʻoku fakahāhā mai ʻe he tokotaha angakoví ʻa ia ʻokú ne feinga ke fakataueleʻi ʻaki kitautolu pea maʻu ai kitautolú. ʻI he taimi pē ʻoku maʻu aí, ʻoku mātuʻaki faingataʻa ʻaupito ʻa e ngaahi maka-feke peheé—pea taʻemalava ʻi he taimi ʻe niʻihi—ke toe tukuange. Kuo pau ke tau fakatokangaʻi kinautolu ʻi honau tuʻunga totonú pea tau tuʻu taʻe toe ueʻia ʻi heʻetau vilitaki ke fakaʻehiʻehi mei aí, kae lava ke tau malu. (Thomas S. Monson, “True to the Faith,” Liahona, May 2006, 18)

• Ko e hā e lahi hoʻo ongoʻi loto-falala ki hoʻo tuʻunga malava ke ʻiloʻi e ngaahi akonaki hala ʻa Sētané ʻa ia te ne lava ʻo “fakataueleʻi” mo “maʻu” koé?

Ko e fakaʻehiʻehi mei he ngaahi meʻa ʻokú ne tohoakiʻi kitautolu mei he Fakamoʻuí

Hili ha tau lahi ʻi he vahaʻa ʻo e kakai Nīfaí mo e kakai Leimaná, naʻe melino ʻa e funga ʻo e fonuá. Hili nai ha taʻu ʻe ua mei ai, naʻe kamata ke malanga ha tangata ko Kolihola ʻi he lotolotonga ʻo e kakaí ʻi Seilahemala. Naʻe fakahā ʻe Sētane kia Kolihola ʻa e meʻa ke ne lea ʻakí (vakai, ʻAlamā 30:53). ʻI hoʻo ako he ʻaho ní, fakatokangaʻi ʻa e founga naʻe fakaʻaongaʻi ai ʻe Kolihola ʻene ngaahi leá mo e ngaahi akonaki halá ko ha maka-feke ke tauheleʻi ʻaki e kakaí.

Lau ʻa e ʻAlamā 30:6, 12, ʻo kumi e ngaahi lea mo e ngaahi kupuʻi lea ʻoku nau fakamatalaʻi ʻa e pōpoaki mo e misiona ʻo Koliholá.

• ‘Okú ke pehē ʻoku ʻuhinga ki he hā ʻene hoko ko ha “Fili ʻo Kalaisí”? (ʻAlamā 30:6).

ʻOku ʻuhinga ʻa e foʻi lea fili ʻo Kalaisí ki ha “taha pe ko ha faʻahinga meʻa ʻokú ne fakakeheʻi ʻa e palani ʻo e fakamoʻui ʻo e ongoongolelei moʻoní pea ʻokú ne fakafepakiʻi fakahāhā pe fakafufū ʻa Kalaisi” (Fakahinohino ki he Ngaahi Folofolá, “Fili ʻo Kalaisí,” scriptures.ChurchofJesusChrist.org). Ko e moʻoni ʻe taha ʻe lava ke tau ako mei he talanoa kia Koliholá ʻoku fakaʻaongaʻi ʻe Sētane ʻa e ngaahi akonaki halá ke tohoakiʻi kitautolu ke tau mamaʻo meia Sīsū Kalaisi.

Ngaahi akonaki fakafepaki ʻa Kolihola kia Kalaisí

Lau ʻa e ʻAlamā 30:12–18, ʻo kumi e ngaahi akonaki hala ʻa Koliholá. Fakakaukau ke fakaʻilongaʻi e ngaahi akonaki ʻa Koliholá ʻi ha founga ʻoku kehe (hangē ko ʻení, ʻaki ha lanu pe fakaʻilonga makehe) pe hiki kinautolu ʻi hoʻo tohinoa akó.

• Ko e hā ha niʻihi ʻo e ngaahi akonaki hala ʻa Koliholá?

1. Tali ʻa e ngaahi fehuʻi ko ʻení.

   Fili ha akonaki pau ʻe ua pe tolu ʻa Kolihola ke fakaʻaongaʻi ʻi hoʻo tali ʻa e ongo ʻuluaki fehuʻí:

   • Te ke toe fakamatalaʻi fēfē ʻa e ngaahi akonaki ʻa Koliholá ʻo fakaʻaongaʻi ha lea ʻoku angamaheni ange ʻi hotau kuongá?

   • Fakaʻaongaʻi ha meʻafua mei he 1 ki he 10 (ko e mālohi tahá ʻa e 10), ko e hā ʻa e mālohi hoʻo vakai ki hono poupouʻi ʻo e ngaahi akonaki ʻa Koliholá ʻi he ʻaho ní?

   • Ko e hā ha meʻa fekauʻaki mo e ngaahi akonaki ko ʻení te ne taki e kakaí ke mamaʻo meia Sīsū Kalaisí? Ko e hā ʻoku fakatuʻutāmaki ai e ngaahi fakakaukau ko ʻení?

Fekumi ki he fakahinohino ʻa e Laumālié pea fakakaukau ki he ola ʻo e ngaahi akonaki ʻa Koliholá ʻi hoʻo moʻuí. Fakakaukau ki ha ngaahi founga ʻe lava ke tākiekina fakataautaha ai koe ʻe ha taha ʻo e ngaahi akonaki hala ko ʻení.

Naʻe lea ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo Kolihola mo ʻene ngaahi akonakí. Mahalo te ke fie mamata ʻi he foʻi vitiō “Ko e Meʻaʻofa Fakalangi ʻo e Fakatomalá” mei he taimi 2:08 ki he 2:40, ʻoku maʻu ʻi he ChurchofJesusChrist.org.

[Ko e kakai hangē ko] Koliholá … [ʻoku nau] fakaʻikaiʻi [ʻa] Kalaisi [mo pehē] ʻoku ʻikai ke ʻi ai ha faiangahala ia. ʻOku pehē ʻe heʻenau tokāteliné ʻoku lava pē ke feliliuaki ʻa e ngaahi tuʻunga ʻulungaanga māʻolungá, ngaahi tuʻunga moʻuí, ʻo aʻu ki he moʻoní. Ko ia ko e hā pē ha meʻa ʻoku ongoʻi ʻe ha taha ko e meʻa totonu ia ki aí, he ʻikai lava ke fakamaauʻi ai ia ʻe he niʻihi kehé ʻo lau ʻokú ne hala pe faiangahala.

ʻOku hā ngali manakoa ki tuʻa e ngaahi fakakaukau ko ʻení he ʻoku nau fakangofua kitautolu ke tau fakatuituia ha faʻahinga uʻa pe holi ʻo ʻikai tokanga ki he ngaahi nunuʻa ʻe tupu mei aí. (D. Todd Christofferson, “Ko e Meʻaʻofa Fakalangi ʻo e Fakatomalá,” Liahona, Nōvema 2011, 38)

• ʻOkú ke pehē ʻe lava fēfē ʻe he ngaahi akonaki ko ʻení ʻo tataki ʻa e kakaí ke nau faiangahalá? (Vakai, veesi 18).

Lau ʻa e ʻAlamā 30:19–21, ʻo kumi e tali ʻa e kakai ʻo Selesoni mo Kitioné ki he ngaahi akonaki ʻa Koliholá.

2. Tali ʻa e ngaahi fehuʻi ko ‘ení:

   ʻOkú ke pehē ko e hā naʻe “poto ange” ai ʻenau talí (ʻAlamā 30:20) ʻi he tali ʻa e kakai ʻo Seilahemalá? (vakai, ʻAlamā 30:18).

   • Te tau lava fēfē ʻo “poto ange” mo fakasītuʻaʻi ʻa e ngaahi pōpoaki fakafepaki kia Kalaisí?

   • ʻE liliu fēfē ʻe hoʻo ʻilo ki he Fakamoʻuí pea mo hoʻo vā fetuʻutaki mo e Fakamoʻuí ʻa e lahi ʻo e tākiekina ʻoku fakahoko ʻe he ngaahi akonaki fakafepaki ko ʻeni kia Kalaisí kiate koé?

Fakakaukauloto ki he meʻa kuó ke ako mo ongoʻi mei hoʻo akó. Fekumi ki he fakahinohino ʻa e Laumālie Māʻoniʻoní ke tokoniʻi koe ke ke tokanga taha kia Sīsū Kalaisi mo fakafisingaʻi e ngaahi akonaki te ne tataki koe ke ke mamaʻo meiate Iá.

Fili Pē: Fie Ako Lahi Ange?

Ko e hā ʻoku mahuʻinga ai ke tali ʻa e faleʻi mei he kau palōfita mo e kau ʻaposetolo ʻo onopōní?

Naʻe pehē ʻe Palesiteni Henelī B. ʻAealingi:

Naʻe taukaveʻi ʻe Kolihola ‘o pehē ʻoku ʻuhinga e talangofua ki he faleʻi mei he kau tamaioʻeiki ʻa e ʻOtuá ke tukuange ʻa e ngaahi totonu kuo foaki mai ʻe he ʻOtuá ki heʻetau tauʻatāiná, ʻa e meʻa kuo fakakikihi hala ai ʻa e kau tangata mo fafine mei he kamataʻanga ʻo taimí. Ka ‘oku loi ‘a e fakakikihi ko iá he ‘okú ne fakafofongaʻi hala ‘a e moʻoní. ʻI he taimi ‘oku tau fakasītuʻaʻi ai ‘a e akonaki ‘oku fai mai mei he ‘Otuá, ‘oku ‘ikai ke tau fili ai ke tau tauʻatāina mei he mālohi mei tuʻá. ‘Oku tau fili ‘e kitautolu ia ha mālohi kehe. ‘Oku tau fakaʻikaiʻi ai ‘a e maluʻi ‘a ha Tamai ‘i Hēvani ‘oku ‘ofa haohaoa, pea māfimafi taha pē, pea ‘oku tokaimaʻananga kiate Ia ‘a e meʻa kotoa pē, ‘a ia ko ‘Ene taumuʻá kotoa, kaeʻumaʻā Hono ‘Alo ‘Ofaʻangá, ke foaki mai kiate kitautolu ‘a e moʻui taʻengatá, mo foaki mai kiate kitautolu ‘a e meʻa kotoa pē ‘okú Ne maʻú, pea fakafoki atu ‘a kitautolu ‘i hotau ngaahi fāmilí ki ʻapi ki he toʻukupu ‘o ‘Ene ‘ofá. Ko ia ‘i heʻetau fakasītuʻaʻi ‘Ene akonakí, ‘oku tau fili ai ‘a e tākiekina ‘a ha mālohi kehe ‘a ia ko ‘ene taumuʻá ke ngaohi kitautolu ke tau mamahi pea ‘oku tuʻunga pē ‘ene ngāué ‘i he tāufehiʻá. (Henry B. Eyring, “Finding Safety in Counsel,” Ensign, May 1997, 25)

ʻE uesia fēfē ʻe he ngaahi akonaki halá ʻetau moʻuí?

Naʻe pehē ‘e Palesiteni Lāsolo M. Nalesoni:

ʻI heʻetau nofotaha faivelenga ʻi he Fakamoʻuí pea muimui ʻi Heʻene sīpinga ʻo e fiefiá, ʻe fiemaʻu leva ke tau fakamamaʻo mei he ngaahi meʻa te ne lava ʻo taʻofi ʻetau fiefiá. Manatuʻi ʻa Kolihola, ko e fili ʻo Kalaisí? Ne ʻalu ʻa Kolihola ki ha ngaahi feituʻu lahi ʻo lea ʻaki ha ngaahi meʻa loi ki he Fakamoʻuí, kae ʻoua kuo toki ʻomi ia ki ha taulaʻeiki lahi naʻá ne ʻeke kiate ia: “Ko e hā ʻokú ke ʻalu holo ai ʻo fakakoviʻi ʻa e ngaahi hāʻeleʻanga ʻo e ʻEikí? Ko e hā ʻokú ke ako ai ki he kakaí ni ʻo pehē ʻe ʻikai ke ʻi ai ha Kalaisí, ʻo motuhi ai ʻenau fiefiá?” [ʻAlamā 30:22].

ʻE mole ʻetau fiefiá ʻi ha faʻahinga meʻa pē te ne fakafepakiʻi ʻa Kalaisi pe ko ʻEne tokāteliné. ʻOku kau ai e ngaahi fakakaukau fakapoto ʻa e tangatá, ʻa ia ʻoku lahi ʻaupito ʻi he ʻinitanetí mo e ngaahi uepisaití, pea ʻoku nau fai e meʻa tatau ne fai ʻe Koliholá.

Kapau te tau muimui mo fakahoko ʻa e founga ʻa e māmaní ki he fiefiá, he ʻikai pē ke tau aʻusia ʻe kitautolu ia e fiefiá. (Russell M. Nelson, “Fiefiá mo e Moʻui Fakalaumālié,” Liahona, Nōvema 2016, 83–84)

Te tau ʻilo fēfē ʻa e moʻoní mo muimui ki he Fakamoʻuí?

Naʻe akonaki ʻa Palesiteni Lāsolo M. Nalesoni ʻo pehē:

ʻOku vivili mo taʻefaʻalaua e ngaahi leʻo mo e mālohi ʻo e māmaní. Ka ʻoku lahi fau ha ngaahi leʻo ʻoku kākā, olopoto, mo lava ke fusi kitautolu mei he hala ʻo e fuakavá. Ke hao mei he loto-mamahi mahino ʻoku muiaki maí, ʻoku ou kōlenga atu he ʻahó ni ke mou fakafepakiʻi e fakatauele ʻa e māmaní ʻaki hano fokotuʻu ha taimi moʻó e ʻEikí ʻi homou moʻuí—he ʻaho kotoa pē. (Russell M. Nelson, “Fokotuʻu ha Taimi moʻó e ʻEikí,” Liahona, Nōvema 2021, 120)

ʻI he ngaahi ʻaho ka hokó, he ʻikai lava ke tau moʻui fakalaumālie taʻe kau ai ʻa e tataki, fakahinohino mo e ivi fakafiemālie, mo tatau maʻu pē ʻo e Laumālie Māʻoniʻoní. (Russell M. Nelson, “Fakahā maʻá e Siasí, Fakahā ki Heʻetau Moʻuí,” Liahona, Mē 2018, 96)

Ko e hā ha ngaahi pōpoaki fakafepaki kia Kalaisi ʻoku akoʻi ʻi hotau kuongá?

Naʻe akoʻi ʻe Sisitā Suli B. Peki, ko e palesiteni lahi kimuʻa ʻo e Fineʻofá ʻo pehē:

Ko Koliholá ko ha fili ʻo Kalaisi. Ko e fili ʻo Kalaisí, ko e fili ia ʻo e fāmilí. Ka ʻi ai ha tokāteline pe tefitoʻi moʻoni ʻoku fanongo ai hotau toʻu tupú mei māmani ʻoku fakafili ki he fāmilí, ʻoku fakafili foki ia kia Kalaisi. ʻOku mahino pehē ia. Kapau he ʻikai tui hotau toʻu tupú ki he ngaahi tukufakaholo māʻoniʻoni ʻa ʻenau ngaahi tamaí … , kapau he ʻikai mahino ki hotau toʻu tupú ʻa ʻenau konga ʻi he palaní, ʻe lava ke tataki atu kinautolu ʻo nau hē. (Julie B. Beck, “Akoʻi ʻa e Tokāteline ʻo e Fāmilí,” Liahona, Māʻasi 2011, 15)