Atamai i Aoaoga Faavae: Alema 34:9–10

“E ao ona faia o se togiola, … o se taulaga e le gata ma faavavau.”

Keriso i luga o le satauro

I se lesona talu ai, sa e aoao ai e uiga i le Togiola e le gata ma faavavau a Iesu Keriso. O lenei lesona e mafai ona fesoasoani ia te oe e tauloto mau faasino ma le fasifuaitau autu o le mau mo le Alema 34:9–10, faamatala le aoaoga faavae o loo aoao mai i nei fuaitau, ma faaaoga mataupu faavae o le mauaina o le malamalama faaleagaga i tulaga moni o le soifuaga e faaaogaina ai lenei fuaitau o tusitusiga paia.

Faamatala ma tauloto

Pe ua e maitauina ea e mafai ona faigofie atu ona malamalama i se mea i lou mafaufau nai lo le faamatalaina i upu? O se tasi o faamoemoega o le atamai i aoaoga faavae o le tuuina atu lea ia te oe o avanoa e faamalamalama ai le aoaoga faavae mai fuaitau o le atamai i aoaoga faavae i au lava upu.

I lau suesuega talu ai nei o le Alema 34:9–10, ua e aoao ai a aunoa ma le Togiola e le gata ma faavavau a Iesu Keriso, o le a leiloloa tagata uma e faavavau.

Vaai faalemafaufau e faapea, sa e maua se avanoa e faamatala ai le uiga o le Alema 34:9–10 i se tasi e itiiti sona iloa e uiga ia Iesu Keriso. Faaalu sina taimi e toe iloilo ai nei fuaiupu ma maka pe tusi i lalo upu po o fasifuaitau e te manao ia malamalama i ai lenei tagata.

aikona, faamaumau

1. Tali le fesili lenei:

   • O le a faapefea ona e faamatalaina aoaoga o le Alema 34:9–10 i au lava upu?

O le fasifuaitau autu o le mau mo le Alema 34:9–10 o le: “E ao ona faia o se togiola, … o se taulaga e ao ina le gata ma faavavau.”

Ina ia fesoasoani ia te oe e tauloto le mau faasino ma le fasifuaitau autu o le mau, tusi le “E ao ona faia o se togiola, … ” mo ni nai taimi i luga o se pepa seia e taulotoina le vaega lea o le fuaitau. Ona fai lea o le mea lava lea e tasi mo le vaega lona lua o le fasifuaitau: “o se taulaga e le gata ma faavavau.” A uma ona e taulotoina le vaega lona lua, toe fai faatasi le mau faasino atoa ma le fasifuaitau autu o le mau seia e taulotoina atoa.

Faataitai le faaaogaina

E mafai ona e manatua igoa o mataupu faavae e tolu o le mauaina o le malamalama faaleagaga? Vaai pe mafai ona e toe faia e aunoa ma le tilotilo i ai. A e manaomia se fesoasoani, e mafai ona e toe faamanatu nei mataupu faavae e ala i le suesueina o parakalafa 5–12 o le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2022). O le a e maua avanoa e iloilo ai nei mataupu faavae ma faataitai ona faaaogaina i le aluga o lenei lesona.

Vaai faalemafaufau faapea na talosagaina oe e aoao atu se lesona e uiga i le Togiola a Iesu Keriso i lau vasega o le Aoga Sa. I le avea ma se vaega o lau sauniuniga, e te aapa atu ai i se tamaitai talavou i lau uarota e igoa ia Olive ma fai atu ia te ia e faasoa mai ona manatu e uiga i le ala ua faamanuiaina ai e Iesu Keriso lona olaga ona o Lana Togiola.

O le tali a Olive e faateia ai oe. Fai mai a ia, “Ma le faamaoni ia te oe, ou te manatu e maoae le Togiola a Iesu Keriso mo le toatele o tagata, ae ou te le o mautinoa pe o le a le tele o lona aoga ia te au ona o nisi o mea sese sa ou faia ma faaauau pea ona fai. E i ai nisi agasala ou te le iloa pe o le a mafai ona ou faatoilaloina.”

A o faaauau pea ona e saunia lau lesona, e te mafaufau pea e uiga i faamatalaga a Olive ma manao e fesoasoani ia te ia. Mafaufau pe mafai faapefea e aoaoga o loo i le Alema 34:9–10 ma mataupu faavae o le mauaina o le malamalama faaleagaga ona fesoasoani ia Olive i lona popolega.

Faatino i le Faatuatua

aikona, faamaumau

2. Tali fesili e o faatasi ma se tasi pe sili atu foi o vaega faailogaina nei:

   • O a ni faatinoga faamaoni patino e te manatu e mafai ona faia e Olive e mafai ona fesoasoani ia te ia?

   • O le a se mea e mafai ona e aoao atu ia Olive e uiga ia Iesu Keriso ma Lana Togiola e mafai ona fesoasoani ia te ia e faatino ai i le faatuatua? E ono mafai faapefea ona fesoasoani aoaoga o loo i le Alema 34:9–10?

Mo nisi manatu e uiga i le ala e mafai ai e Olive ona faatino i le faatuatua, e mafai ona e faitau i parakalafa 5–7 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

Iloilo manatu faavae po o fesili faatasi ai ma se vaaiga e faavavau

aikona, faamaumau

3. Tali ia le itiiti ifo ma le tasi o fesili nei:

   • O le a sou manatu o le a se vaaiga a le Tama Faalelagi ma Iesu Keriso i se popolega e pei o le popolega o Olive?

   • Aisea e taua ai mo Olive ona manatua o le Togiola a le Faaola e “le gata ma e faavavau” (Alema 34:10)?

   • E mafai faapefea e le manatuaina e faapea o tagata uma e pauu ma leiloloa e aunoa ma le Togiola a le Faaola ona fesoasoani ia te ia e vaai ai i lona popolega i se isi itu?

Mo nisi manatu e uiga i le auala e mafai ai e Olive ona iloilo manatu po o fesili faatasi ai ma se vaaiga e faavavau, e mafai ona e faitauina le parakalafa 8 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.

Saili le malamalama atili e ala i punaoa mamana ua filifilia

aikona, faamaumau

4. Tali fesili e o faatasi ma se tasi pe sili atu o vaega faailogaina nei:

   • O a ituaiga o punaoa mamana ua filifilia o le a e fautuaina atu ia Olive e fesoasoani ia te ia e maua ai le taitaiga ma le taialaga? Aisea?

   • E faaopoopo atu i le Alema 34:9–10, o le a se mau po o se faamatalaga mai se taitai o le Ekalesia e mafai ona e faasoa atu ia Olive? E ono mafai faapefea e lenei mea ona fesoasoani ia te ia?

Mo nisi manatu e uiga i le auala e mafai ai e Olive ona saili le malamalama atili e ala i punaoa mamana ua filifilia, e mafai ona e faitauina parakalafa 11–12 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae.