Alema 34:17–41

O Le Olaga Lenei o Le Taimi Lea e Saunia ai e Feiloai ma le Atua

o se tioata fuaitula

Na e mafaufau ea pe faape’i le feiloai atu i le Tama Faalelagi pe a mavae lenei olaga? Sa faamanatu atu e Amoleka ia sa Sorama e faapea “o le olaga lenei o le taimi lea … e saunia ai e feiloai ma le Atua” (Alema 34:32) ma aioi atu ia te i latou ia aua nei faatuai le aso o lo latou salamo. O lenei lesona ua faamoemoe e fesoasoani ia te oe i au taumafaiga e saunia ai e feiloai ma le Atua.

O le taua o sauniuniga

Mafaufau i se mea sa tatau ona e saunia ai i lou olaga, e pei o se suega, se faaaliga, po o se taaloga afeleti.

• O a nisi o fuafuaga faataatitia na e faaaogaina e fesoasoani ai ia te oe ia saunia?

• O a nisi o mea na faia pe na faafaigata ai sauniuniga?

Manatua na talai atu Alema ma Amoleka i se vaega o sa Sorama o e na tutuliese mai o latou sunako ona o lo latou matitiva. O nei sa Sorama sa lei talitonu muamua ia Iesu Keriso (tagai Alema 31:16), o lea na apoapoai atu ai Alema ma Amoleka ia i latou e fai se avanoa i o latou loto mo se molimau i le Faaola ia tuputupu ae ai (tagai Alema 32:27–28; 34:4–6). A o aoaoina ai nei tagata, sa faasoa atu e Amoleka se mea e tatau ona tatou saunia uma i ai.

Faitau le Alema 34:32, ma vaavaai mo mea na aoao atu e Amoleka.

Mai aoaoga a Amoleka, ua tatou aoao ai o lenei olaga o le taimi lea mo i tatou e saunia ai e feiloai ma le Atua.

• O a nisi o uiga ma amioga o le a e faamoemoe i ai mai se tasi o loo sauniuni e feiloai ma le Atua?

Faaalu sina taimi e mafaufau loloto ai i ou lagona e uiga i le toe foi atu i le afioaga o le Atua. Mafaufau pe o e taumafai e toe foi atu ma le agavaa i Lona afioaga ma pe o le a se mea e ono faalavelave ia te oe mai lena sini. A o faaauau pea ona e suesue, mafaufau i ni auala e mafai ona e faaaogaina ai aoaoga o loo i le Alema 34 e fesoasoani ai ia te oe ia saunia lelei atili e fetaiai ma le Atua.

O auala e mafai ona tatou saunia ai e feiloai ma le Atua

O le tele o aoaoga a Amoleka i le Alema 34 ua fesoasoani tatou te malamalama ai i le ala e mafai ai ona tatou saunia ai nei e fetaiai ma le Atua.

Filifili ia le itiiti ifo ma le tolu seti o fuaiupu nei e suesueina, ma vaavaai mo aoaoga e mafai ona fesoasoani tatou te saunia ai e fetaiai ma le Atua.

• Alema 34:17–27

• Alema 34:28–29

• Alema 34:30–31

• Alema 34:33–34

• Alema 34:37–39

• Alema 34:40–41

aikona, faamaumau

1. Tali fesili nei mo seti e tolu o fuaiupu na e filifili e suesueina:

   • O le a se mea na aoao atu e Amoleka i nei fuaiupu e mafai ona fesoasoani ia te oe e saunia ai e feiloai ma le Atua?

   • E mafai faapefea e le mulimuli i nei aoaoga ona fesoasoani ia i tatou e saunia lelei ai e toe foi atu ma le agavaa i le afioaga o le Atua?

   • O le a se mea na e aoaoina e uiga i uiga faaalia ma le finagalo o le Tama Faalelagi ma Iesu Keriso mai fuaiupu sa e suesueina?

Aua le faatuai lou salamo

Tagai i le faamatalaga a Amoleka i le fuaiupu 33: “Aua nei o outou faatuai le aso o lo outou salamo seia oo i le iuga.” Mafaufau e faailoga lenei fuaitau i au tusitusiga paia.

• Aisea e mafai ai ona faaosoosoina nisi tagata e faatuai ona salamo?

Faitau le Alema 34:33–35, ma vaavaai mo mafuaaga na uunaia ai e Amoleka ia aua nei faatuai lo tatou salamo.

Ua aoaoina i tatou e mafai ona tupu le salamo i le lalolagi o agaga (tagai Mataupu Faavae ma Feagaiga 138:31, 33, 58). Ae ua faamamafa mai e tusitusiga paia ma perofeta o aso e gata ai le taua o lo tatou salamo i le olaga nei. Na tuuina mai e Elder Melvin J. Ballard [1873–1939] o le Korama a Aposetolo e Toasefululua lenei taitaiga:

Elder Melvin J. Ballard

E matua faigofie atu le manumalo ma auauna atu i le Alii pe a tuufaatasia uma le tino ma le agaga ia tasi. O le taimi lenei e sili atu ona faatosinaina tagata ma aafia gofie ai. … O le olaga lenei o le taimi lea e salamo ai. (Melvin J. Ballard: Crusader for Righteousness (1966), 212–13; sii mai i le Dallin H. Oaks, “Faamamaina e le Salamo,” Liahona, Me 2019, 94)

• O a mea ua fesoasoani ai fuaiupu 33–35 ma lenei saunoaga ia te oe e malamalama ai e uiga i le mafuaaga e le tatau ai ona faatuai lo tatou salamo?

O le salamo o se vaega taua o le saunia ai e toe foi atu i le afioaga o le Atua. Manatua e tuuina mai ma le alofa e le Alii le alofa mutimutivale ia i latou o e taumafai e salamo, e tusa lava pe faigata ona latou faatoilaloina ni agasala patino.

Na aoao mai Elder Neil L. Andersen o le Korama a Aposetolo e Toasefululua:

Elder Neil L. Andersen

O nisi taimi i lo tatou salamo, i a tatou taumafaiga i aso taitasi ia avea atili e faapei o Keriso, tatou te iloaina ai lo tatou lava tauivi pea lava pea ma faafitauli lava e tasi. …. Aua le lotovaivai. Afai o loo e taumafai ma galue ia salamo, ua e i ai i le faagasologa o le salamo. (Neil L. Andersen, “Repent …. That I May Heal You,” Liahona, Nov. 2009, 41)

aikona, faamaumau

2. Tali fesili nei:

   • O le a se mea e mafai ona e faasoa atu mai aoaoga a Amoleka i le Alema 34:30–38 lea e mafai ona fesoasoani i se tasi o loo faaosoosoina e faatali seia oo i se taimi mulimuli ane i le olaga ia salamo ma suia?

   • Aisea e te manatu ai e aoga le salamo, e ui lava i mafuaaga atonu o loo iai i lenei tagata e le faia ai?

   • O le a se mea ua e iloa e uiga i le Tama Faalelagi ma Iesu Keriso lea e mafai ona uunaia ai lenei tagata ia salamo vave ma faifai pea?

Mafaufau i mea ua e aoaoina ma lagonaina i le asō e uiga i le saunia e fetaiai ma le Atua ma le le faatuai. Mafaufau i faatinoga e te manao e fai ona o mea sa e suesueina i le asō. Tusi faamaumau ou manatu ma uunaiga i lau api talaaga mo suesuega.

Tuu i le faitalia: O e Manao e Aoao Atili?

E mafai faapefea ona ou faatoilaloina le manao e faatuai lo’u salamo?

Matamata i le vitio, “O Le Aso Nei” mai le faailo taimi 0:00 i le 1:00. Sa lapataia i tatou e Peresitene Henry B. Eyring o le Au Peresitene Sili e faapea o le fuaiupu o “se aso” e mafai ona afaina ai lo tatou alualu i luma faaleagaga:

Ae faapefea pe afai ou te fefe e salamo ona ou te le manao i le mea moni e faatiga ai i e pele ia te au?

Na faamatala mai e Elder Matthew L. Carpenter o le Fitugafulu e faapea:

Elder Matthew L. Carpenter

Ao ou fefautuaai ma isi o loo saili ina ia salamo, sa ou maofa i tagata sa ola i le agasala sa faigata ona [latou] faia ni faaiuga sa’o. … E masani ona ou faalogo o latou faasoaina lo latou fefefe pe afai e silafia e tagata e pele ia i latou mea sa latou faia, o le a latou lē toe alolofa ia i latou pe o le a tuua i latou. Pe a latou maua i na mafaufauga, e tonu ia i latou ina ia fifilemu ma tolopo lo latou salamo. Latou te maua le lagona sese e faapea e sili atu ona lelei le lē salamo i le taimi nei ia latou lē toe faatiga ai i e latou te alolofa i ai. Latou te mafaufau e sili atu ona pagatia pe a mavae lenei olaga i lo le faia o le faagasologa o le salamo i le taimi nei. Uso e ma tuafafine, e le o se manatu lelei lava le tolopoina o lou salamo. E masani ona faaaogaina e le fili le fefe e taofia ai i tatou mai le vave faatino i luga o lo tatou faatuatua ia Iesu Keriso.

Pe a fetaiai i latou o ē pele ma le mea moni e uiga i se amioga agasala, e ui latou te lagonaina le ootia o le tiga, e masani lava ona latou mananao e fesoasoani atu i le tagata agasala ua salamo ina ia sui ma faaleleia ma le Atua. E moni lava, e faatelevaveina le faamalologa faaleagaga pe a ta’uta’u atu e le tagata agasala ma o loo siomia e i latou e alolofa ia i latou ma fesoasoani ia i latou e lafoai a latou agasala. (Matthew L. Carpenter, “E Te Fia Malolo Ea?” Liahona, Nov. 2018, 102–3)

Alema 34:34. O le a le uiga o le “agaga e tasi” o le a i ai i lo’u tino pe a ou oti?

E tauave e agaga mai le lalolagi ma o latou uiga tuuto po o uiga faatuiese i mea o le amiotonu (tagai Alema 34:34). Ua i ai ia i latou tuinanau ma manaoga sa i ai i latou a o ola i le lalolagi. (Autu o le Talalelei, “Lalolagi o Agaga,” topics.ChurchofJesusChrist.org)