Alema 57

Taumafai Ai e Usiusitai i Poloaiga E Le Aunoa

O a ni ou uiga faaalia i le tausia o poloaiga? Aisea e taua ai ou uiga faaalia? A o tau ai i se isi taua matautia, sa usiusitai le autau talavou “i upu uma o poloaiga ma le sa’o atoatoa,” ma tuu atu “o latou faalagolago i le Atua e le aunoa” (Alema 57:21, 27). O lenei lesona ua mamanuina e fesoasoani ia te oe e taumafai ai e usiusitai e le aunoa i poloaiga a le Atua.

Uiga faaalia i poloaiga

Faamatala ni uiga faaalia eseese se tolu e ono i ai i se tasi i le tausia ai o poloaiga a le Atua ma pe aisea.

Faaalu sina taimi e tusi ai tali i fesili nei i lau api talaaga mo suesuega:

• O le a sou uiga faaalia i le tausiaina o poloaiga a le Atua? Aisea e taua ai ou uiga faaalia?

• Afai e te lē o taumafai i le taimi nei e tausia poloaiga i le mea sili e te mafaia, o le a se mea o taofia oe mai le faia o lena mea?

A o e suesue i le asō, vaavaai mo mataupu faavae e uiga i le usiusitai e ono musuia ma faaosofia ai oe ma fesoasoani ia te oe i soo se fesili po o ni atugaluga. Mafaufau loloto pe mafai faapefea ona latou faatatau ma faamanuiaina ai lou olaga.

Autau talavou

I le lesona talu ai, sa e aoao ai i le ala na fesoasoani ai le autau talavou e 2,000 ia Anetipa ma ona tagata e faatoilalo “le autau sili ona malosi” ma “sili ona toatele” a sa Lamanā i lena vaega o le laueleele (tagai Alema 56:34). I le Alema 57, na faaauau ai e Helamana lana tusi ia Kapeteni Moronae. E onosefulu isi atalii o le nuu o Amona na faatasi atu i lana autau (tagai Alema 57:6), ma sa feagai fitafita talavou e 2,060 ma se isi taufaamata’u. Sa osofa’ia e sa Lamanā ia sa Nifaē ma na toeititi a faatoilaloina i latou ae faatasi atu loa iā Helamana ma ona tagata se vaega o fitafita o ē sa auina atu muamua e momoli pagota sa Lamanā (tagai Alema 57:1–18).

O tomai e lua e suesue ai tusitusiga paia e mafai ona faalolotoina ai lau suesuega o lenei tala ma fesoasoani ai ia te oe e faaaoga ona lesona i lou olaga o le faailoa lea ma mafaufau loloto i upu po o fasifuaitau taua.

Faitau le Alema 57:19–23 e vaai ai i le mea na tupu. Mafaufau e faailoga upu ma fasifuaitau o loo faamatala ai le autau talavou a Helamana.

I le fuaiupu 21, mafaufau e faailoga pe na faapefea ona faamatala e Helamana le usiusitai o nei alii talavou. Faitau le Alema 58:40, ma vaavaai mo uiga faaalia o fitafita i le Atua ma Ana poloaiga ina ua mavae le isi taufaamata’u tau i vaega’au.

• O le ā sou manatu i le uiga o le “fai upu uma o poloaiga ma le sao atoatoa” (Alema 57:21) ma “tausisi e tausi … ana poloaiga e le aunoa” (Alema 58:40)?

• E faapefea e lo tatou faatuatua, ma le manatuaina o Iesu Keriso ona tosina ai lo tatou manao ma le gafatia e usiusitai i poloaiga a le Atua?

Faitau le Alema 57:24–27, ma vaavaai mo upu po o fasifuaitau o loo faaalia ai le ala na faamanuiaina ai atalii o Helamana i la latou taua lona lua ona o lo latou faatuatua ma le usiusitai i le Atua.

• O le a se mea na e aoaoina mai lenei tala lea e mafai ona fesootai i lou olaga i le asō?

O se mataupu faavae e tasi e mafai ona tatou aoaoina o le afai tatou te tuu atu lo tatou faalagolago i le Atua ma taumafai e tausi e le aunoa Ana poloaiga, ona Ia faamanuiaina lea o i tatou e ala i Lona mana ofoofogia.

• E mafai faapefea e le iloaina o loo i ai “se Atua faamasinotonu” o lē ua i ai le “mana faavavega” ma le “mana ofoofogia” (Alema 57:26) ona aafia ai o tatou uiga faaalia i le usiusitai ia te Ia?

• O le a se uiga e te manatu e finagalo le Alii tatou te maua pe a tatou taumafai e tausi Ana poloaiga ae lē ausia le usiusitai atoatoa? E faapefea ona fesoasoani lou malamalama i le Togiola a Iesu Keriso e tali ai lenei fesili?

E taua le malamalama ai e faapea afai tatou te usiusitai i Ana poloaiga, o le a faamanuiaina i tatou e le Atua i Lana lava ala ma le taimi. I a latou taua uma e lua, sa faamanuiaina ai le autau talavou i le faasaoina o o latou ola e ui lava i fetaua’iga ma manuaga matautia.

1. Faamae’a ia lē itiiti ifo ma le lua o mea nei, ma tusi mea ua e aoaoina:

   1. Faitau ia lē itiiti ifo ma le lua o fuaitau nei e faateleina ai lou malamalama i faamoemoega o poloaiga a le Atua ma pe faapefea ona Ia faamanuiaina oe mo lou usiusitai: Aperaamo 3:25; Ioane 14:15; Mosaea 2:41; Alema 9:13.

   2. Mafaufau i faataitaiga o le usiusitai o le Faaola i le Tama Faalelagi, ma mafaufau loloto i mea ua e aoaoina mai Lana faataitaiga. Na aoao mai Elder Robert D. Hales (1932–2017) o le Korama a Aposetolo e Toasefululua e faapea “o lo tatou alolofa i le Faaola o le ki lea i le usiusitai faale-Faaola” (“Afai Tou te Alofa Mai ia te Au, Ia Outou Tausi Mai i Au Poloaiga,” Liahona, Me 2014, 37). Mafaufau i nisi o mafuaaga e te alofa ai i le Faaola ma pe faapefea e lena alofa ona aafia ai ou uiga faaalia i le usitaia ai o poloaiga.

   3. Manatunatu i auala na e usiusitai ai i poloaiga a le Atua ma faamanuiaga ua Ia tuuina mai ia te oe mo lou usiusitai.

2. Faamae’a le gaoioiga tusitusi lenei ma tali fesili o loo i lalo:

   Mafaufau i se tasi o poloaiga a le Atua. Faamatala pe faape’ī foliga moni o se talavou i aso nei o loo taumafai e manatua le Alii ma usiusitai e le aunoa i lenei poloaiga. Ona faamatala lea po o a faamanuiaga e ono maua e se talavou e usitai i lenei auala.

   • O a nisi o mafuaaga atonu tatou te lagona ai le faaosoosoina ia aua ne’i faia le mea sili tatou te mafaia e usitai ai i se poloaiga? E mafai faapefea ona tatou faatoilaloina nei faaosoosoga?

   • E faapefea e le taumafai ai e tausia poloaiga e le aunoa ona manaomia ai pea i tatou e faalagolago i le Faaola o Iesu Keriso?

   Ina ia faaiuina lenei lesona, fai se sini i lau api talaaga mo suesuega pe faapefea ona e manao e “manatua le Alii [lou] Atua mai lea aso i lea aso; [ma] … tausisi e tausi … ana poloaiga e le aunoa” (Alema 58:40). Atonu e te filifilia se poloaiga faapitoa e te manao e usitaia atili. I le avea o se vaega o lau sini, mafaufau e tuu atu ia te oe lava se taimi—mo se faataitaiga, “O le a ou taumafai e tatalo faamaoni i le taeao ma le po mo le isi lima aso” po o le “O le a ou i le aso Sapati mo le isi fa vaiaso.”

Tuu i le faitalia: O e Manao e Aoao Atili?

O a faamanuiaga e oo mai mai le usiusitai ai i poloaiga uma a le Atua?

Sa ta’u mai e Peresitene Russell M. Nelson se isi auala e mafai ona tatou taumafai ai e usiusitai ma le sa’o atoatoa:

O le a [e] fetaui i ni tagata o le a latou filifili po o lē fea poloaiga latou te tausia ae lē ano i isi poloaiga latou te filifili e soli. Ou te ta’ua lenei mea o le ‘ai filifili i poloaiga e usitai i ai. O lenei faiga o le ilo ma filifili o le a lē manuia. O le a oo atu ai i le faanoanoa. Ina ia saunia e fetaia’i ma le Atua, o lea ia tausia ai e se tagata Ana poloaiga uma . …

… O le usiusitai i poloaiga a le Atua o le a aumaia ai le puipuiga faaletino ma le faaleagaga. (Russell M. Nelson, “Faasaga Atu ma le Faatuatua i le Lumanai,” Liahona, Me 2011, 34–35)

Aisea e tuuina mai ai e le Alii ia i tatou ni poloaiga?

Na aoao mai Elder Dale G. Renlund o le Korama a Aposetolo e Toasefululua:

O le sini a lo tatou Tama Faalelagi i tulaga faamatua, o le lē tuu atu lea i Ana fanau ia faia le mea sa’o; ae o le tuu atu lea i Lana fanau e filifili e fai le mea sa’o ma mulimuli ane avea e faapei o Ia. Afai e na o Lona finagalo lava ia tatou usiusitai atu, o le a Ia faaaogaina taui ma faasalaga vave e tosina ai a tatou amioga.

Ae e lē naunau le Atua i Lana fanau e na ona avea ma ni “fagafao” ua aoaoina ma usiusitai…

Na faavaeina e le Atua se fuafuaga lea e mafai ona tatou avea ai ma suli i Lona malo, o se ala o feagaiga lea e taitai atu ai i tatou ia avea e faapei o Ia, maua le ituaiga olaga ua Ia maua, ma nonofo e faavavau o ni aiga i Lona afioaga. O le filifiliga a le tagata lava ia sa—ma e—taua i lenei fuafuaga, lea na tatou aoaoina i lo tatou mua’i olaga. (Dale G. Renlund, “Ina Filifili ia o Outou i le Aso Nei,“ Liahona, Nov. 2018, 104)

O a nisi mea na aoao mai e le Au Pulega Aoao ma taitai o le Ekalesia e uiga i le usiusitai?

O vitiō nei o loo faamamafa mai ai aoaoga a le Au Pulega Aoao ma isi taitai o le Ekalesia:

“E Manuia ma Fiafia i Latou o E Tausi i Poloaiga a le Atua” (5:41)

“Alu ai ia Tināmatua” (4:02)

“O Le Usiusitai e Aumaia ai Faamanuiaga” (3:26)