Alema 59–61

Filifili Ai E Aua Le Maitaita

Pe na i ai se taimi na e malamalama sesē ai i faatinoga a se tasi? Pe na faatiga ea isi ia te oe e ala i a latou mea sesē? O Paorana, le faamasino sili o sa Nifaē, na feagai ma lenei luitau ma sa ao ona ia filifili pe faapefea ona tali atu. O lenei lesona e mafai ona musuia ai oe ia avea atili e faapei o Iesu Keriso a o e tali atu i mea sesē a isi ma le alofa faateleina ma le onosai.

O anafea na faaosoosoina ai oe ia lagona le lē fiafia?

E i ai taimi, e ono faaosoosoina ai i tatou ia lagona le lē fiafia. Na lisiina e Elder David A. Bednar o le Korama a Aposetolo e Toasefululua nisi o mafuaaga na ta’u atu e tagata auai ia te ia e faapea ua latou lē fiafia ai:

“Sa fai e se alii se tala i le Aoga Sa na ou tiga ai. …”

“E leai ma se tasi o lenei paranesi na faafeiloa’ia pe na aapa mai foi ia te au. Sa ou lagona le pei o se tagata ese. …”

“Ou te le’i malie i le fautuaga a le epikopo na aumai ia te au. …”

E tele isi mafuaaga o le lē fiafia sa ta’ua—mai eseesega o tagata matutua i aoaoga faavae i le taufaifai, taufaalili, ma le faaesea e le autalavou. (David A. Bednar, “E Leai Foi se Mea e Tausuai ai i Latou,” Liahona, Nov. 2006, 89)

• O a nisi mafuaaga atonu e faaosoosoina ai i tatou ia lagona le lē fiafia?

• E faapefea e le ita ona aafia ai i tatou?

• O anafea na faaosoosoina ai oe ia lagona le lē fiafia? Na faapefea ona e tali atu i ai? Aisea?

• Na faapefea e le ala na e lagona ma faatino ai [nisi o tulaga] ona aafia ai au sootaga ma isi atoa ai ma le Alii?

A o faaauau pea ona e suesue, saili musumusuga e maua ai malamalamaaga ma upumoni ia e ono fesoasoani ia te oe i nei tulaga.

O tusi a Moronae

Ina ua uma ona iloa sa leai ni alii ma ni sapalai a le autau a Helamana e puipuia ai sa Nifaē mai se autau tele a sa Lamanā, sa auina atu e Kapeteni Moronae se tusi ia Paorana, le faamasino sili o sa Nifaē. Na talosaga atu Moronae ia Paorana e auina atu nisi e faamalosia le autau a Helamana. Sa leai se fesoasoani na taunuu atu, ma sa faaauau pea ona mafatia le autau a Helamana. I le taimi lea, na faatoilaloina ai e se autau a sa Lamanā ia Nifaea, o se isi aai lea na faamoemoe Moronae e maua mai ai se faamalosiauga (tagai Alema 59:9).

Taumafai e vaai faalemafaufau i lagona atonu na oo ia Moronae a o ia tauivi e puipui sa Nifaē e aunoa ma le lagolago lea na manaomia e ana autau mai le malo.

Sa ita Moronae ma tusi atu se isi tusi ia Paorana. Faitau le Alema 60:5–11, 30 e vaai ai i se vaega o le sāvali a Moronae.

• O le a se mea o e vaaia i le tusi a Moronae na ono mafai ona faaita ai Paorana?

O le filifiliga a Paorana

O le mea sa le’i iloa e Moronae e faapea o se vaega o sa Nifaē amioleaga sa galulue faatasi ma sa Lamanā sa fouvale ia Paorana, na mafua ai ona sola o ia ina ia faasaoina lona ola. Sa pulea e le au fouvale le aai o Saraemila. O Paorana o se tagata amiotonu o lē sa taumafai e tuufaatasi autau ia toe maua mai Saraemila (tagai Alema 61:1–8).

• Ana faapea o oe o Paorana, faamata e faapefea ona faaosoosoina oe e tali atu i le tusi a Moronae?

• Na ono faapefea ona aafia le tulaga i le tali atu a Paorana?

O le Alema 61 o loo i ai le tali a Paorana ia Moronae. Faitau le Alema 61:9, 17–21 e iloa ai pe na faapefea ona ia tali atu.

• O le a se mea ua faagaeetia ai oe i le tali a Paorana?

• O a ni uiga o e vaaia ia Paorana e faamanatu atu ai ia te oe e uiga ia Iesu Keriso?

Sa faasoa mai e Elder Bednar se upumoni taua e mafai ona tatou aoao mai lenei tala. (Atonu e te manao e faamaumau lenei faamatalaga i totonu o au tusitusiga paia i tafatafa o le Alema 61:9.)

O le maitaita o se filifiliga lea tatou te faia; e lē o se tulaga e faatupu pe fai faamalosi mai e se tagata po o se isi mea i o tatou luga. …

… O se mea, o se mea e tupu, po o se faamatalaga e ono mafai ona faatausuai, peitai e mafai e oe ma au ona filifili e aua nei tiga ai—fai atu faatasi ma Paorana, “e lē afaina.” (Bednar, “E Leai Foi se Mea e Tausuai ai i Latou,” Liahona, Nov. 2006, 90–91)

1. Tali fesili nei:

   • E faapefea ona e faamatalaina le upumoni lenei i se tasi? E mafai ona tatou filifili e aua nei maitaita i upu ma faatinoga a isi.

   • Aisea e te manatu ai e finagalo le Tama Faalelagi ma Iesu Keriso ia tatou malamalama i lenei upumoni?

O aoaoga ma le faataitaiga a Iesu Keriso

O le Faaola o le faataitaiga sili lea o lenei upumoni.

2. Ina ia fesoasoani ia te oe e mafaufau loloto i Ana aoaoga ma le faataitaiga, faamaea gaoioiga A ma le E.

   1. Faitau aoaoga a Iesu Keriso i le 3 Nifae 11:29–30 ma le Mataio 5:43–48. O le a se mea na e aoaoina mai i Ana aoaoga?

   2. Mafaufau i se faataitaiga o le tali atu o le Faaola ma le onosai ma le alofa i mea sesē ma vaivaiga o isi. Aisea e taua ai ia te oe le iloa e faapea o le Faaola e onosai ma agaalofa ma e lē to’asāgofie?

• E mafai faapefea e faataitaiga a Paorana ma le Faaola ona fesoasoani ia te oe i se tulaga na fai atu ai pe faia ai e se tasi se mea faatiga ia te oe po o sē e pele?

O le fesoasoani a le Alii

O le mulimuli i le faataitaiga a le Faaola o le aua ne’i maitaita e mafai ona faigata. Sa faamalamalama mai e Elder Bednar le fesoasoani o loo avanoa mo i tatou pe a tatou lē lagonaina le malosi e faatoilalo ai lagona o le ita.

E ala i le mana faamalosiau o le Togiola a Iesu Keriso, e mafai ai e oe ma au ona faamanuiaina e aloese ma manumalo i le faatausuai. …

O le malosi e faatoilalo ai le faatausuai atonu e foliga mai e lē oo i ai lo tatou malosi. … O le natura tonu lava o le Togiola a le Faaola ma le faamoemoega o le Ekalesia toefuataiina, ua fuafua e fesoasoani ai ia te i tatou ia maua tonu lava lenei ituaiga o malosiaga faaleagaga. (Bednar, “E Leai Foi se Mea e Tausuai ai i Latou,” Liahona, Nov. 2006, 90–91)

• O le a se mea na e aoaoina mai i manatu faaalia o Elder Bednar?

• O le a se mea e ono fai e se tasi e saili ai le fesoasoani mai le Faaola pe a faaosoosoina i latou ia lagona le ita?

Faaalu ni nai minute e tusi ai se tusi i lou tagata i le lumanai. O le a se fautuaga e te tuuina atu ia te oe lava i le auala e tali atu ai pe a fai mai pe faia e se tasi se mea faatiga pe faatausuai? Ia aofia ai mea na e aoaoina mai le Faaola ma Paorana ia e mafai ona e faaaogaina i lena tulaga. Ia aofia ai foi le auala e te ono sailia ai le fesoasoani a le Alii.

Tuu i le faitalia: O e Manao e Aoao Atili?

E mafai faapefea e la tatou filifiliga ia aua nei ita ona aafia ai i tatou?

Sa faasoa mai e Elder Neil L. Andersen o le Korama a Aposetolo e Toasefululua ia le folafolaga lenei:

Ou te folafola atu ia te oe, a e filifili ia aua nei ita … , o le a e lagonaina Lona alofa ma le faamaoniga. O le a e iloa ua e avea atili e faapei o Ia. (Neil L. Andersen, “Aua Lava Nei Tuua o Ia,” Liahona, Nov. 2010, 41)

Pe tatau ea ona ou faatagaina se tasi e faaauau pea ona faatiga ia te au ina ia mafai ai ona ou faamagalo atu ma aua nei maitaita?

Sa faamalamalama mai e Elder Jeffrey R. Holland o le Korama a Aposetolo e Toasefululua:

Peitai, e taua mo soo se tasi o outou o loo ola i le tiga moni e maitau mea sa le’i fetalai ai [Keriso]. Sa le’i fetalai mai o Ia, “E le faatagaina outou e lagonaina le tiga moni po o faanoanoaga moni mai aafiaga matuitui na e oo i ai ona o le isi tagata.” Pe na Ia fetalai foi, “Ina ia mafai ona faamagalo atu atoatoa e ao ona e toe faia se sootaga faatiga pe toefoi atu i se tulaga faasaua ma faataumaoi.” (Jeffrey R. Holland, “O le Galuega o le Faaleleiga,” Liahona, Nov. 2018, 79)

Ae faapefea pe afai ou te lagonaina le lē lava o le malosi e onosaia ai se mea faatausuai?

Sa faamalamalama mai e Elder Jeffrey R. Holland o le Korama a Aposetolo e Toasefululua lo tatou manaomia o le fesoasoani a le Faaola: