Helaman 5:1–13

“[Ang] Lig-on nga Sukaranan sa Atong Manunubos”

ang Manluluwas naglingkod sa bato, nagtudlo

Nakabati na ba ka nga giliyokan sa negatibo nga mga impluwensiya o sa mga tintasyon sa yawa? Gipahisama ni propeta Helaman ang mga pag-atake ni Satanas ngadto sa usa ka unos nga adunay mapintas nga mga hangin ug ulan nga yelo nga mihapak kanato. Mipahayag usab siya nga kadtong nagtukod sa tukoranan sa ilang mga kinabuhi “diha sa lig-on nga sukaranan sa atong Manunubos” (Helaman 5:12) makabaton og gahom sa pagsukol sa daotan ug magpabiling matinud-anon. Kini nga leksiyon makatabang kanimo sa pagsugakod sa yawa ug sa pagtukod sa imong tukoranan diha kang Jesukristo.

Ang imong espirituhanong tukoranan [foundation]

Ikonsiderar ang mosunod nga pangutana samtang sugdan nimo ang imong pagtuon:

• Unsa ang pipila ka mga hagit o mga isyu nga makapahuyang sa hugot nga pagtuo o espirituhanong tukoranan [foundation] sa usa ka tawo? Ikonsiderar ang paglista niini diha sa imong journal sa pagtuon.

ang Salt Lake Temple

Atol sa Oktubre 2021 nga kinatibuk-ang komperensiya, gihisgotan ni Presidente Russell M. Nelson ang panginahanglan sa pagpalig-on sa orihinal nga pundasyon sa Salt Lake Temple. Gidapit dayon niya ang mga miyembro sa Simbahan sa pagkonsiderar sa ilang kaugalingong mga espirituhanong pundasyon. Basaha ang mosunod nga pamahayag ug pamatikdi kon giunsa pagtandi ni Presidente Nelson ang pagpalig-on sa templo ngadto sa atong kaugalingon nga mga kinabuhi.

Presidente Russell M. Nelson

Sa samang paagi, panahon na karon nga kita moimplementar sa dili ordinaryo nga mga paagi—tingali mga paagi nga wala nato mahimo kaniadto—sa pagpalig-on sa atong personal nga espirituwal nga mga pundasyon. Ang dili ordinaryo nga mga panahon nagkinahanglan og dili ordinaryo nga mga paagi.

Minahal nako nga mga kaigsoonan, kini mao ang ulahing mga adlaw. Aron kamo ug ako makasugakod sa umaabot nga mga katalagman ug mga kalisod, kinahanglan nga kita adunay lig-on nga espirituwal nga pundasyon nga natukod diha sa lig-on nga sukaranan sa atong Manunubos, nga si Jesukristo.

Mao nga ako mangutana sa matag usa kaninyo, unsa kalig-on ang inyong tukoranan? Ug unsa nga mga pagpalig-on sa inyong pagpamatuod ug pagsabot sa ebanghelyo ang gikinahanglan? (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93-94)

• Unsa ang mipatigbabaw diha kanimo sa pamahayag ni Presidente Nelson?

Pamalandongi kon unsaon nimo pagtubag ang mga pangutana ni Presidente Nelson mahitungod sa imong espirituwal nga pundasyon. Tinguhaa ang impluwensiya sa Espiritu Santo, ug isulat ang imong mga tubag.

Si Helaman midasig sa iyang anak nga mga lalaki sa paghinumdom

Atol sa ika-54 nga tuig sa pagmando sa mga maghuhukom, daghan sa mga Nephite nahimong dunot ug mipili sa daotan kay sa maayo. Isip resulta, si Nephi mikanaog isip labaw nga maghuhukom ug miduyog sa iyang igsoon nga si Lehi sa pagsangyaw sa pulong sa Dios ngadto sa mga katawhan (tan-awa sa Helaman 5:1–4), sama sa gibuhat sa iyang apohan sa tuhod, si Alma nga batan-on, mga 60 ka mga tuig na ang nakalabay (Alma 4:15–20). Si Lehi ug Nephi nagpabilin nga matinuod-anon, sa usa ka bahin tungod kay sila nahinumdom sa mga panudlo sa ilang amahan, nga si Helaman.

icon sa doktrinal nga kahanas

1. Basaha ang Helaman 5:5–11 ug paghimo og lista sa unsay gusto ni Helaman nga mahinumdoman sa iyang mga anak nga lalaki. Pagpili og labing menos duha ka mga butang nga gusto niya nga ilang mahinumdoman nga imong nakita nga makahuloganon. Ipasabot sa daklit kon sa unsang paagi ang paghinumdom niini makatabang kanimo sa pagtukod sa imong tukoranan diha ni Jesukristo.

Atong tinuod nga tukoranan

Basaha ang Helaman 5:12, mangita og dugang nga mga kamatuoran nga gusto ni Helaman nga mahinumdoman sa iyang mga anak nga lalaki.

Ang Helaman 5:12 usa ka tudling sa doktrinal nga kahanas. Ikonsiderar ang pagmarka sa mga tudling sa doktrinal nga kahanas sa lahi nga paagi aron mas dali ra nimo kining makit-an. Mahatagan ka og kahigayonan sa sunod nga leksiyon sa pagpraktis sa paggamit sa doktrina nga gitudlo niini nga tudling ngadto sa usa ka pangutana o sitwasyon.

• Unsa ang pipila ka mga kamatuoran nga imong nakaplagan sa Helaman 5:12?

Duha ka importante nga mga kamatuoran nga anaa sa Helaman 5:12 mao ang si Jesukristo mao ang atong tinuod nga tukoranan ug kon atong tukuron ang atong tukoranan diha kang Jesukristo, ang yawa walay gahom ibabaw kanato.

• Sa unsang paagi nga si Jesukristo sama sa usa ka lig-on nga sukaranan ug usa ka tinuod nga tukoranan sa atong mga kinabuhi?

• Sa unsang paagi nga ang mga pag-atake sa yawa sa imong hugot nga pagtuo mabati nga sama sa usa ka unos o alimpulos?

Kon anaa, tan-awa ang bidyo nga “Espirituhanong mga Alimpulos” (2:24) anaa sa ChurchofJesusChrist.org aron makat-on gikan ni Elder Neil L. Andersen sa Korum sa Napulog Duha ka Apostoles kon unsaon pagbuntog ang mga alimpulos sa yawa.

icon, rekord

2.  Tubaga ang mosunod nga mga pangutana:

   • Unsa ang pipila ka mga paagi nga kita makatukod sa atong espirituhanong mga tukoranan diha sa “lig-on nga sukaranan sa atong Manunubos”?

   • Unsa ang pipila ka mga babag sa pagtukod sa atong tukoranan diha sa Manluluwas niini nga mga paagi?

   • Sa unsa kaha nga paagi nga ang pagbuhat niining mga butanga makapugong sa yawa nga makabaton og gahom ibabaw kanato?

Personal nga paggamit

Hunahunaa ang mga personal nga mga unos o mga hagit nga kasamtangan nimong giatubang o tingale atubangon sa umaabot. Ikonsiderar sa mainampoong paagi kon sa unsang paagi ang pagtukod o ang pagpalig-on sa imong tukoranan diha ni Jesukristo makatabang kanimo nga makasugakod niini nga mga hagit.

Pagdrowing og hulagway nga nagrepresentar kanimo nga nagbarog sa lig-on nga tukoranan. Sulatiang tukoranan og “Jesukristo.” Pagdrowing og pipila ka nagdilaab nga pana (sama sa usa ka gaan nga bangkaw) o usa ka alimpulos ug sulati ang mga pana o alimpulos sa piho nga mga tintasyon o mga hagit nga imong giatubang.

Diha o duol sa tukoranan, pagsulat og piho nga butang nga imong gibuhat o mahimo nimong sugdan sa pagbuhat aron matukod ang imong tukoranan diha ni Jesukristo.

Pananglitan, mahimong usa kini ka personal nga tumong sa paggahin og panahon sa pagbuhat sa kasaysayan sa pamilya o sa pagtambong sa templo. Mahimong ang pagtuon kini sa ebanghelyo sa Manluluwas kada adlaw diha sa mga kasulatan o mas sinsero nga personal nga pag-ampo. Ang pagtuon sa doktrinal nga kahanas makatabang usab kanimo sa pagpalig-on sa imong tukoranan.

Hunahunaa ang bisan unsang mga babag nga tingali gikinahanglan nimong mabuntog, ug isulat kon unsa ang imong buhaton aron mabuntog kini.

Kon mahimo, pagbutang og pahinumdom diha sa imong telepono aron sa pagtabang kanimo sa pagpadayon sa pagsunod sa mga pasalig nga imong gihimo atol niini nga leksiyon. Ikonsiderar ang pagpakigbahin sa imong mga pasalig ngadto sa kasaligan nga sakop sa pamilya, lider sa Simbahan, o higala ug sa pagpangayo og tabang kanila aron matuman nimo kini.

3.  Tubaga ang mosunod nga pangutana:

   • Unsa ang butang nga mahimo nimong sugdan og buhat o padayonon sa pagbuhat aron sa pagtukod sa imong tukoranan diha kang Jesukristo?

Opsiyonal: Gustong Makakat-on Pa og Dugang?

Unsaon nako pagtukod ang akong espirituhanong pundasyon diha kang Jesukristo?

Si Elder Quentin L. Cook sa Korum sa Napulog Duha ka Apostoles mitudlo:

Elder Quentin L. Cook

Ang personal nga mga pundasyon, sama sa daghang angay nga mga paningkamot, kasagaran natukod og hinay-hinay—usa ka patong, usa ka kasinatian, usa ka hagit, usa ka problema, ug usa ka kalamposan sa usa ka higayon. …

Ingon nga ang pagbalik-balik ug makanunayong paningkamot gikinahanglan aron makaangkon og pisikal o mental nga kapasidad, mao usab kini sa espirituhanong mga butang. …

Sa kataposan, ang atong [hugot nga] pagtuo diha ni Jesukristo mao ang gikinahanglan nga pundasyon alang sa atong kaluwasan ug kahimayaan. (Quentin L. Cook, “Mga Pundasyon sa Hugot nga Pagtuo,” Liahona, Mayo 2017, 127–31)

Si Elder Donald L. Hallstrom sa Seventy mitudlo:

Elder Donald L. Hallstrom

Ang tanang mga himan nga inyong kinahanglan sa pagtukod, pag-ayo, o pagpalig-on sa inyong pundasyon anaa ra. Kini ang pareho nga mga himan nga gigamit aron mapadayon ang usa ka natukod nga pundasyon. Nahibalo kamo kon unsa sila. Naglakip kini sa makanunayon, tinuoray nga pag-ampo; inadlaw-adlaw nga pagtuon sa ebanghelyo pinaagi sa mga kasulatan; aktibong pag-apil sa mga miting sa Simbahan, ilabi na sa pag-ambit sa sakramento uban sa tinuod nga katuyoan; padayong dili hinakog nga pagserbisyo; ug makugihong pagtuman sa pakigsaad.

Ang laing mahinungdanong himan mao ang tambag sa buhi nga mga propeta. (Donald L. Hallstrom, “Jesus Christ: Our Firm Foundation,” Ensign, Abril 2016, 61)

Unsaon nako pag-atubang ang akong personal nga mga unos ug mga hagit nga adunay pagsalig?

Si Presidente Russell M. Nelson mitudlo:

Presidente Russell M. Nelson

Palihog tuohi ko kon ako moingon nga kon ang inyong espirituwal nga pundasyon natukod nga lig-on diha ni Jesukristo kamo dili kinahanglan nga mahadlok. Kon kamo magmatinud-anon sa inyong mga pakigsaad … , kamo lig-onon pinaagi sa Iyang gahom. Dayon, kon ang espirituhanon nga mga linog mahitabo, kamo makabarog nga lig-on tungod kay ang inyong espirituwal nga pundasyon lig-on ug dili matarog. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021,95-96)