3 Nīfai 2–5

“Mateuteu … ʻi he Māfimafi ʻo e ʻEikí”

Minerva Teichert (1888-1976), The Answer of Lachoneus (Ko e Tali ʻa Leikoneosé), 1949-1951, ko e lolo ʻi he līneni ʻoku fakapipiki ki he masonite, ʻinisi ʻe 36 x 48. Brigham Young University Museum of Art.

Hangē pē ko ʻetau fehangahangai mo e ngaahi faingataʻa ʻoku hoko ʻo aʻu ki he liuaki mai ʻa e Fakamoʻuí, naʻe fehangahangai ʻa e kau Nīfaí mo ha ngaahi faingataʻa ʻi he ngaahi taʻu kimuʻa peá Ne hāʻele mai kiate kinautolú. Naʻe fakamanamana ʻa e kau kaihaʻa ʻa Katianetoní ke fakaʻauha ʻa e kau Nīfaí. Ka neongo ia, naʻe “mateuteu [ʻa e kau Nīfaí] ke fepaki mo kinautolu … ʻi he māfimafi ʻo e ʻEikí” (3 Nīfai 4:10). Te tau lava ʻo ikunaʻi ʻa e ngaahi faingataʻá ʻaki ʻetau mateuteu, ʻo hangē ko e kau Nīfaí. ʻE lava ke tokoni ʻa e lēsoni ko ʻení ke ke maʻu ʻa e mālohi ʻo e ʻEikí ʻaki hoʻo teuteu fakalaumālie mo fakatuʻasino.

Mateuteu

Fakakaukau ki ha taimi ʻi hoʻo moʻuí naʻá ke ongoʻi mateuteu pe taʻemateuteu ai.

• Ko e hā ʻa e tūkungá, pea ko e hā naʻá ke ongoʻi mateuteu pe taʻemateuteu aí?

• Kapau naʻá ke ongoʻi taʻemateuteu, ko e hā kuó ke fai ke mateuteu lelei ange ai ki he kahaʻú?

• Ko e hā kuó ke fai ke teuteu fakalaumālie ai ki he ngaahi faingataʻa ʻokú ke fehangahangai mo iá pe te ke fehangahangai mo ia ʻi he kahaʻú?

ʻI hoʻo ako ʻa e 3 Nīfai 2–5, fekumi ki he fakahinohino ʻa e Laumālié ke ke ʻiloʻi ʻa e meʻa te ke lava ʻo fai ke teuteuʻi fakatuʻasino mo fakalaumālie ai koe ki he kahaʻú.

Ngaahi Teuteu ʻa Leikoneosé

Naʻe kikiteʻi ʻe he palōfita ko Samuelá ʻe ʻi ai ha pō taʻe ʻi ai ha fakapoʻuli ʻa ia ko ha fakaʻilonga ki hono ʻaloʻi ʻo Sīsū Kalaisí. ʻI he taimi naʻe fakahoko ai ʻa e kikite ko ʻení (vakai, 3 Nīfai 1:15–19), “naʻe tui ʻa e konga tokolahi ʻo e kakaí, naʻa nau tui ʻo ului ki he ʻEikí” (3 Nīfai 1:22). Ka neongo ia, hili ha ngaahi taʻu siʻi, naʻe kamata ke taʻetui ha niʻihi.

Lau ʻa e 3 Nīfai 1:27–30 mo e 3 Nīfai 2:1–3, ʻo kumi ʻa e ngaahi ʻuhinga naʻe hē ai ha kakai ʻe niʻihi mei he ʻEikí.

• Ko e hā ha ngaahi lēsoni te tau lava ʻo ako mei he ngaahi veesi ko ʻení ʻe lava ʻo tokoni ke tau tuʻu maʻu ai ʻi he ʻEikí ʻi hotau kuongá ni?

Naʻe tupu tokolahi ʻa e kau kaihaʻa ʻa Katianetoní pea nau tauʻi ʻa e kau Nīfaí. ʻI hono talí, “ko e kau Leimana kotoa pē ʻa ia kuo nau ului ki he ʻEikí, naʻa nau kau fakataha mo honau kāinga, ko e kau Nīfaí” (3 Nīfai 2:12). Naʻe fai ʻe Kitianehai ko e taki ʻo e kau kaihaʻa ʻa Katianetoní ha tohi kia Leikoneose, ko e tuʻi fakamaau ʻo e kau Nīfaí. Naʻá ne fakamanamanaʻi ʻi he tohí ke fakaʻauha ʻa e kau Nīfaí ʻo kapau he ʻikai ke nau tukulolo (vakai, 3 Nīfai 3:1–10).

Lau ʻa e 3 Nīfai 3:11–12, ʻo kumi e tali ʻa Leikoneosé.

• Ko e hā ha fakamoʻoni ki he tui ʻa Leikoneose ki he ʻEikí ʻokú ke vakai ki ai?

Lau ʻa e ngaahi potufolofola ko ʻení, pea faʻu ha lisi ʻoku ui ko e “Ngaahi Teuteu ʻa e Kau Nīfaí” ʻi hoʻo tohinoa akó ki he founga naʻe teuteu fakatuʻasino mo fakalaumālie ai ʻa e kakaí ki he taimi ʻe ʻohofi ai kinautolu ʻe he kau kaihaʻa ʻa Katianetoní. Kapau ʻe malava, te ke lava ʻo fanongo ki he ongo ʻo e ngaahi potufolofola ko ʻení ʻi he Gospel Library app.

• 3 Nīfai 3:13–16

• 3 Nīfai 3:17–21

• 3 Nīfai 3:22–26

• 3 Nīfai 4:3–4

• Ko e ngaahi teuteu fē ʻokú ke pehē naʻe tokoni lahi tahá? Ko e hā hono ʻuhingá?

• ʻOkú ke pehē naʻe tokoniʻi fēfē kinautolu ʻe he ngaahi teuteu ko ʻení ke nau falala ki he ʻEikí?

Lau ʻa e 3 Nīfai 4:7–12, ʻo kumi ʻa e founga naʻe tāpuekina ai ʻa e kau Nīfaí koeʻuhí ko ʻenau mateuteu fakalaumālie mo fakatuʻasinó.

• Ko e hā ha ngaahi tefitoʻi moʻoni te tau lava ʻo ako mei he fakamatalá ni? (Vakai, 3 Nīfai 4:10.)

Ko e taha ʻo e ngaahi tefitoʻi moʻoni ʻoku tau ako mei he fakamatala ko ʻení, ʻi heʻetau teuteu fakalaumālie mo fakatuʻasinó, ʻe fakaivia kitautolu ʻe he ʻEikí ke tau ikunaʻi pe kātekina ʻa e ngaahi faingataʻá.

Ngaahi teuteu ʻi hotau kuongá

Ke tokoniʻi koe ke fakafekauʻaki ʻa e folofolá ki hotau kuongá ni, faʻu ha lisi ʻo ui ko e “Ngaahi Meʻa Tatau Fakaeonopōní” ʻo hoko atu ʻi he lisi ʻo e ngaahi teuteu ʻa e kau Nīfaí. Hiki ha ngaahi teuteu tatau te tau lava ʻo fai, kau ai ʻa e ngaahi teuteu naʻe faleʻi mai ʻe he kau palōfitá ke tau faí. Fakakaukau ki he meʻa ʻokú ke teuteu ki aí mo e founga ʻe lava ke tokoniʻi ai koe ʻe he ngaahi fakakaukaú ni ke ke mateuteu ʻi he mālohi ʻo e ʻEikí.

Ke sio ʻi ha sīpinga ʻo ha fāmili naʻe tāpuekina koeʻuhí ko ʻenau mateuteú, sio ʻi he vitiō “Temporal Preparedness Resources” (3:09), ʻoku maʻu ʻi he ChurchofJesusChrist.org.

1. Tali ʻa e ongo fehuʻi ko ‘ení:

• Fili ha teuteu ʻe taha pe lahi ange mei hoʻo lisí. Te ne tokoniʻi fēfē kitautolu ke ikunaʻi ʻa e ngaahi faingataʻa pau ʻoku tau fehangahangai mo ia ʻi hotau kuongá ni?

• ʻOkú ke pehē ko e hā ha ngaahi founga ʻoku fakafaingamālieʻi ai ʻe heʻetau teuteú ʻa e ʻEikí ke fakamālohia kitautolú?

Naʻe ʻikai ke ola lelei e ʻākolo ʻa e kau kaihaʻa Katianetoní koeʻuhí he naʻe maʻu ʻe he kau Nīfaí ha tokoni fakalangi ʻi heʻenau teuteú. Naʻe faifai pea holomui ʻa e kau kaihaʻa ʻa Katianetoní. Naʻe fakafetaulakiʻi kinautolu ʻe he kau tau Nīfaí pea nau tukulolo ko ha kau pōpula pe ko hono tāmateʻi (vakai, 3 Nīfai 4:16–27).

Lau ʻa e 3 Nīfai 4:30–33; 5:1–4, ʻo kumi ʻa e founga naʻe tali ʻaki ʻe he kakaí hono fakamālohia kinautolu ʻe he ʻEikí.

• Naʻe fakahaaʻi fēfē ʻe heʻenau tōʻongá ʻa ʻenau tui ki he ʻOtuá?

Fakakaukau ki ha taimi naʻá ke ongoʻi ai ʻa e mālohi ʻo e ʻEikí ʻi hoʻo teuteu fakatuʻasino mo fakalaumālié.

Naʻe fakamoʻoni ʻa Palesiteni Lāsolo M. Nalesoni ki he ngaahi tāpuaki ʻo e mateuteú:

ʻOku ʻikai teitei tuku e ʻoho ʻa e filí. Ko ia ai, he ʻikai ke tau teitei lava ʻo taʻofi ʻetau teuteú! Ko e lahi ange ko ia ʻetau moʻui fakafalala pē kiate kitautolu—fakatuʻasino, fakaeloto, mo fakalaumālié—ko ʻetau mateuteu ange ia ke fepaki mo e ngaahi ʻoho taʻetuku ʻa Sētané. …

ʻOku ʻikai ke u pehē ʻe faingofua ʻa e ngaahi ʻaho ka hoko maí, ka ʻoku ou palōmesi atu ʻe nāunauʻia ʻa e kahaʻú maʻanautolu ʻoku mateuteu mo hokohoko atu ʻa e teuteu ke hoko ko ha ngaahi meʻangāue ʻi he toʻukupu ʻo e ʻEikí. (Russell M. Nelson, “Tali Lelei ʻa e Kahaʻú ʻi he Tui,” Liahona, Nōvema 2020, 75–76)

2. Fakakakato ʻeni:

Fakakaukau ki ha faingataʻa, tūkunga, pe meʻa kuo pau ke ke mateuteu ki ai. Fakakaukau ki he ongo ʻokú ke maʻu ki hoʻo mateuteu ʻi he ʻaho ní. Fekumi ki he fakahinohino ‘a e Laumālie Māʻoniʻoní ‘i hoʻo tali ʻa e ngaahi fehuʻi ko ‘ení.

• Ko e hā ha ngaahi ngāue pau te ke fakahoko ke ke mateuteu ai?

• Te ke lava fēfē ʻo fakakau ʻa e ʻEikí ʻi hoʻo ngaahi teuteú?

Fili Pē: Fie Ako Lahi Ange?

Te tau teuteu fēfē?

Naʻe akonaki ʻa Palesiteni Lāsolo M. Nalesoni ʻo pehē:

Kuo ʻosi talaʻofa mai “kapau te [tau] mateuteu, ʻe ʻikai te [tau] manavahē” [Tokāteline mo e Ngaahi Fuakava 38:30]. Ko e fakapapauʻi mai ko ʻení ʻoku ʻi ai hono lelei lahi he ʻahó ni. Kuo ʻosi folofola ʻa e ʻEikí neongo ʻa e ngaahi faingataʻa makehe ʻo e ʻaho ní, ka ko kinautolu ʻe langa honau fakavaʻé ʻia Sīsū Kalaisí, mo ʻosi ako ki he founga hono fakaʻaongaʻi Hono mālohí, ʻoku ʻikai fiemaʻu ke nau moʻulaloa ki he ʻū meʻa fakahohaʻa makehe ʻo e kuonga ko ʻení. (Russell M. Nelson, “Ko e Temipalé mo Ho Fakavaʻe Fakalaumālié,” Liahona, Nōvema 2021, 94)

Naʻe pehē ʻe Palesiteni Tāleni H. ʻOakesi ʻo e Kau Palesitenisī ʻUluakí:

ʻOku fiemaʻu ke tau fakatou teuteu fakatuʻasino mo fakalaumālie ki he ngaahi meʻa naʻe kikiteʻi ʻe hoko ʻi he taimi ʻo e Haʻele ʻAnga Ua Maí. Pea ʻoku mahino ko e teuteu ʻe ngalingali fai hano liʻakí ʻa ē ʻoku ʻikai faʻa fakatokangaʻi mo faingataʻa angé—ko e fakalaumālié. (Dallin H. Oaks, “Preparation for the Second Coming,” Liahona, Mē 2004, 9)

Naʻe fakamatala ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku totonu ke muimui ʻetau ngaahi tokateu ki hono siviʻi ʻo e ngaahi aʻusia ʻi he matelié ʻi he tā sīpinga ʻa e Fakamoʻuí ʻa ia naʻe fakaʻau ke “tupulaki ʻa e potó mo e lahí, pea naʻe ʻofeina ia ʻe he ʻOtuá mo e tangatá” [Luke 2:52]—ko ha potupotutatau ia ʻo hono fakatahaʻi ʻo e mateuteu fakaʻatamaí, fakatuʻasinó, fakalaumālié, mo e fakasōsialé. (David A. Bednar, “Te Tau Siviʻi ʻa Kinautolu,” Liahona, Nōvema 2020, 9)

Naʻe akoʻi ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻOku faʻa taʻeʻamanekina ʻaupito e ngaahi matangi mo e ʻahiʻahi ia ʻo e moʻui ko ʻení. Ka ko e meʻa ʻeni ʻoku tau ʻiló: te nau hoko mai! ʻE fiemaʻu ha teuteu ia ʻi he angatonu pea mo fakaʻaongaʻi e ngaahi maluʻi fakalangi kuo tuku maí, kae lava ke tau ikunaʻi e ngaahi faingataʻa mo e ngaahi ʻahiʻahi ʻoku tau fekuki fakaʻaho mo iá. Kuo pau ke tau fakapapauʻi ke moʻui taau mo e temipalé neongo pe ko e hā ʻoku tau fepaki mo iá. “Ka ʻo kapau te [tau] mateuteu, ʻe ʻikai te [tau] manavahē.” (Quentin L. Cook, “Tuha mo Taau mo Pilisitolo: Moʻui Taau mo e Temipalé—ʻi he Faingamālié mo e Faingatāmakí,” Liahona, Nōvema 2015, 39)

3 Nīfai 2:15. ʻOku ʻuhinga ki he hā ʻa e “naʻe toʻo meiate kinautolu ʻa honau malaʻiá”?

Ko e malaʻia ʻo e kau Leimaná ʻi he kuonga ʻo Nīfaí, ko hono “motuhi atu ʻa [kinautolu] mei he ʻao [ʻo e ʻEikí] … koeʻuhí ko ʻenau angahalá” (2 Nīfai 5:20–21). ʻE toki ngata pē ʻa e fakamalaʻiá ʻi ha tuku e faiangahala ʻa e kakaí. ʻI he taimi naʻe tali ai ʻe he kau Leimaná kimui ange ʻa e ongoongolelei ʻo Sīsū Kalaisí, “naʻe ʻikai ke toe ʻiate kinautolu ʻa e fakamalaʻia ʻa e ʻOtuá” (ʻAlamā 23:18 ʻI he 3 Nīfai 2, naʻe toʻo ʻa e fakamalaʻiá mei he kau Leimana naʻe ului ki he ʻEikí (vakai, 3 Nīfai 2:12, 15).