3 Nīfai 6–7

ʻOku Fakatupu ʻe he Hīkisiá ʻa e Moveteveté mo e Fakaʻauhá

Kuó ke fakatokangaʻi nai naʻa mo e hili ha ngaahi aʻusia fakaofo mo e ʻOtuá, ʻoku kei ʻi ai pē ha kakai ʻe niʻihi ʻoku nau toe siʻaki pē Ia? Hili hono maluʻi ʻe he ʻOtuá ʻa e kau Nīfaí mei he kau kaihaʻa ʻa Katianetoní, naʻa nau foki ki honau ngaahi ʻapí ʻo kamata ke toe langa hake ʻenau moʻuí. Naʻe tataki ʻe Sētane ʻa e kakaí ke nau angatuʻu ki he ʻOtuá, koeʻuhi ko e loto-hīkisiá mo e moveteveté. Naʻe fuʻu kovi ʻaupito ʻa e ngaahi nunuʻá ʻo holofa ai ʻa e puleʻangá, pea naʻe mavahevahe fakamatakali ʻa e kakaí. ʻE lava ke tokoni ʻa e lēsoni ko ʻení ke mahino lelei ange kiate koe ʻa e haʻahaʻa ʻo e hīkisiá mo e founga ke ikunaʻi ai ia ʻaki hoʻo muimui ki he Fakamoʻuí.

• ʻOku malava nai ha taha ʻo:

• Tuʻumālie mo loto-fakatōkilalo?

• Masiva mo hīkisia?

• Poto mo loto-fakatōkilalo?

• Taʻeako mo hīkisia?

Fakakaukau ki he meʻa ʻokú ne tataki ha kakai ʻe niʻihi ke nau hīkisia ʻi hotau kuongá. ʻOku uesia fēfē koe, niʻihi kehé, mo e sosaietí ʻi hoʻo loto-hīkisiá? ʻI hoʻo akó, fakalaulauloto ki he founga ʻe ala fakaʻaongaʻi ai ʻa e lēsoni ko ʻení ki hoʻo moʻuí mo ho ngaahi tūkungá.

Ko e hokohoko atu e ngaahi ʻahiʻahi ʻa Sētané

Hili hono ikunaʻi ʻe he kau Nīfaí ʻa Kitianehai mo e kau kaihaʻa ʻa Katianetoní ʻi he tokoni ʻa e ʻEikí, naʻa nau “fakangata ʻa e ngaahi kautaha kovi, mo fufū, mo fakalielia ko iá” (3 Nīfai 5:6). Naʻa nau foki ki honau ngaahi ʻapí ʻo kamata ke toe langa hake ʻenau moʻuí. Ka naʻe ʻikai ke tuku e feinga ʻa Sētane ke ne kākaaʻi ʻa e kakaí ke muimui ʻiate iá. Naʻe liliu ʻa e kau Nīfaí ʻi ha kiʻi taimi nounou. ʻI he 3 Nīfai 6–7, naʻe tokoni ʻa Molomona ke mahino kiate kitautolu ʻa e meʻa naʻe fai ʻe he kakaí pea iku ai ʻo mate honau tokolahi ʻi he ngaahi fakaʻauha kimuʻa pea toki hāʻele ʻa e Fakamoʻuí ki he Ongo ʻAmeliká (vakai, 3 Nīfai 8). ʻOku fakamatalaʻi foki ʻe he ngaahi akonaki ko ʻení ʻa e ʻuhinga naʻe teuteuʻi ai mo ha niʻihi kehe ʻi he hā ʻa Kalaisi ʻi he temipalé ʻi he fonua ko Mahú (vakai, 3 Nīfai 11).

Faʻu ha saati hangē ko ʻení. Lau ʻa e ngaahi potufolofolá pea fakafonu ʻa e meʻa ʻokú ke ʻilo ki he tūkunga ʻo e kakaí.

Ko e taʻu hono 26 (3 Nīfai 6:4–9)	Ko e taʻu hono 29 (3 Nīfai 6:10–18)
Ko e taʻu hono 26 (3 Nīfai 6:4–9)	Ko e taʻu hono 29 (3 Nīfai 6:10–18)

• Ko e hā naʻá ne fakatupu ʻa e liliú ʻi ha kiʻi taimi nounou?

• Ko e hā ha ngaahi moʻoni ʻoku lava ke tau ako mei he ngaahi sīpinga ko ʻení?

Mahalo ko e moʻoni ʻe taha naʻá ke ʻiló ko e taimi ʻoku tau hīkisia aí, ʻoku tau foaki kia Sētane ha mālohi lahi ange ke ʻahiʻahiʻi mo tataki kitautolu ki he faiangahalá.

Fakakaukau ki he ʻuhinga ʻo e hīkisiá. Kumi ha ngaahi fakakaukau mei he lea ko ʻeni ʻa Palesiteni ‘Eselā Tafu Penisoni (1899–1994):

Ko e tefitoʻi fōtunga ʻo e hīkisiá ko e loto-tāufehiʻa—tāufehiʻa ki he ʻOtuá pea mo hotau kāingá. ʻOku ʻuhinga ʻa e tāufehiʻá ko e “fehiʻa ki ha taha, fakafili ki ha taha, pe ʻi ha tuʻunga fakafepaki.” Ko e mālohi ia ʻoku fakaʻamu ʻa Sētane ke ne puleʻi ai kitautolú. (Ezra Taft Benson, “Beware of Pride,” Ensign, May 1989, 4)

• ʻOkú ke pehē ko e hā ʻoku fakaʻatā ai ʻe he hīkisiá ʻa Sētane ke ne maʻu ha ivi tākiekina lahi ange kiate kitautolú?

• ʻOku kehe fēfē ʻa e meʻá ni mei he founga ʻoku poupouʻi ʻe he Tamai Hēvaní mo Sīsū Kalaisi ke tau fakahokó?

Ngaahi nunuʻa ʻo e hīkisiá ʻi he taimi ko iá mo e taimí ni

Koeʻuhí ko e hīkisia ʻa e kakaí, naʻe kamata ke uesia ʻa e konga kotoa pē ʻo e sosaietí. Lau ʻa e 3 Nīfai 6:20–30 pe 7:1–14, ʻo kumi ha ngaahi sīpinga ʻo hono hanga ʻe he hīkisiá ʻo uesia ʻa e niʻihi fakafoʻituituí mo e sosaietí.

1. Tali ʻa e ongo fehuʻi ko ‘ení:

• Ko e hā ha ngaahi sīpinga ʻo e nunuʻa ʻo e hīkisiá naʻá ke maʻu mei he ngaahi veesi ko ʻení?

• Ko e hā ha ngaahi founga ʻoku fakaʻaongaʻi ai ʻe Sētane ʻa e hīkisiá ke tataki ʻa e kakaí ke faiangahala ʻi hotau kuongá?

Ko hono ikunaʻi ʻo e hīkisiá

Fakakaukau ki he founga ʻoku uesia ai koe ʻe hoʻo hīkisiá pe hīkisia ʻa e niʻihi kehé pea mo e founga te ke lava ai ʻo ikunaʻi ʻa e hīkisiá mo hono ngaahi nunuʻá.

Neongo naʻe fakatupu ʻe he hīkisiá ha fakaʻauha lahi, ka naʻe talangofua ha niʻihi ki he ngaahi lea ʻa e palōfitá pea hokohoko atu ʻenau muimui ki he Fakamoʻuí.

Lau ʻa e 3 Nīfai 7:15–26, ʻo kumi ʻa e meʻa naʻe akoʻi ʻe Nīfai ki he kakaí pea mo ʻene ʻaonga kiate kinautolú. ʻE ala tokoni hano fakaʻilongaʻi ʻa e taimi kotoa pē ʻoku ʻasi ai e Fakamoʻuí.

2. Tali ‘a e fehuʻi ko ‘ení:

• Ko e hā ha ngaahi sīpinga naʻá ke maʻu ʻi he ngaahi veesi ko ʻení ki he founga naʻe tokoniʻi ai ʻe he Fakamoʻuí mo ʻEne ongoongoleleí ha kakai ʻe niʻihi ke nau ikunaʻi ʻa e hīkisiá mo e faiangahalá?

ʻE lava ke tokoni kiate koe ʻa e tūkunga ko ʻení ke ke fakahaaʻi hoʻo ʻilo ki he nunuʻa ʻo e hīkisiá pea mo e founga ʻe tokoni ai ʻa e muimui kia Sīsū Kalaisí ke ikunaʻi ʻa e hīkisiá.

Ko Simi ʻeni. ʻOku teʻeki ai ke ne ʻiloʻi ia, ka ʻokú ne moʻua ʻi he hīkisiá.

3. Tali e ngaahi fehuʻi ko ‘ení:

• Ko e hā ha fakamoʻoni ʻokú ke ʻamanaki te ke ʻiloʻi ʻi he moʻui ʻa Simí ʻokú ne moʻua ʻi he hīkisiá?

Hili hono ʻiloʻi ʻene palopalemá mo ʻiloʻi ko e tupuʻanga ʻo e ngaahi mamahi lahi taha ʻi heʻene moʻuí mei heʻene hīkisiá, ʻokú ne loto ke maʻu ha ngaahi tali ki he founga ke siʻaki ai ʻa e hīkisiá.

• Ko e hā ha ngaahi solovaʻanga te ke fokotuʻu ke tokoni kia Simi ke ne ikunaʻi ʻa e hīkisiá?

Fili Pē: Fie Ako Lahi Ange?

ʻOku fēfē ʻetau vakai ki he hīkisiá mo e māvahevahé ʻi hotau kuongá?

Naʻe fakamatala ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI hotau kuongá ni, ʻoku lahi hono tukunoaʻi ʻo e ngaahi folofola mahuʻinga fekauʻaki mo e uouangatahá, pea tō e fakamamafa ʻa e tokolahi ki he fakafaʻahingá, ʻo faʻa fakatefito ʻi he ongoongoá, tuʻunga tangata pe fefiné, matakalí, mo e koloaʻiá. ʻI he ngaahi fonua lahi pe meimei ko e tokolahi tahá, ʻoku vaetuʻua ai e kakaí ʻe he anga ʻo e moʻuí. ʻI he Siasi ʻo e ʻEikí, ko e tōʻonga moʻui pē ʻoku tau tauhi ki ai mo akoʻí, ʻa e tōʻonga moʻui ʻo e ongoongolelei ʻo Sīsū Kalaisí. Ko e uouangataha ʻoku tau fekumi ki aí, ko tau faaitaha mo e Fakamoʻuí mo ʻEne ngaahi akonakí. …

… ʻOku fakamahinoʻi mai ʻe he Tohi ʻa Molomoná he ʻikai fai ha lau kakai, fakafaʻahinga, pe fakatuʻutuʻunga. Kuo pau ke tau faaitaha mo tuʻunga tatau ʻi he ʻao ʻo e ʻOtuá. (Quentin L. Cook, “Teuteu ke Feʻiloaki mo e ʻOtuá,” Liahona, Mē 2018, 116)

Ko e hā ha ngaahi fakaʻilonga ʻo e hīkisiá?

Naʻe pehē ‘e ʻEletā Keuli E. Sitīvenisoni ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻI he taimi ʻoku tau loto-hīkisia aí, ʻoku tau maʻu ʻe kitautolu e lāngilangí kae ʻikai foaki ia ki he niʻihi kehé, kau ai e ʻEikí. ʻOku faʻa fakavahavahaʻa e loto-hīkisiá; ko ha fakahehema ia ke fekumi ke maʻu lahi ange mo pehē ʻoku tau lelei ange ʻi he niʻihi kehé. ʻOku faʻa iku e loto-hīkisiá ki he ongoʻi ʻitá mo e loto-tāufehiʻá; ʻo ne fakatupu ha taha ke ʻita fakamolokau pe taʻefakamolemole. (ʻEletā Gary E. Stevenson, “Mate Fakalaumālie,” Liahona, Nōvema 2017, 47)

ʻOku felāveʻi fēfē ʻa e ngaahi meʻa ʻi he Tohi ʻa Molomoná ki hotau kuongá ni?

Naʻe fakatatau ʻe Palesiteni ʻĒsela Tafu Penisoni (1899–1994) ʻa e ngaahi meʻa naʻe hoko ʻi he Tohi ʻa Molomoná ki hotau kuongá ʻaki ʻene pehē:

ʻOku tau maʻu ʻi he Tohi ʻa Molomoná ha sīpinga ʻo e teuteu ki he Hāʻele ʻAnga Ua Maí. ʻOku fakatefito ha konga lahi taha ʻo e tohí ʻi he ngaahi taʻu lahi kimuʻa pea hāʻele ʻa Kalaisi ki ʻAmeliká. ʻI hono ako fakalelei ʻo e vahaʻataimi ko iá, te tau lava ke ʻiloʻi ʻa e ʻuhinga naʻe fakaʻauha ai ha niʻihi ʻi he ngaahi tautea fakalilifu naʻe hoko kimuʻa ʻi Heʻene hāʻele maí mo e meʻa naʻá ne ʻomi ʻa e niʻihi kehé ke tuʻu ʻi he temipalé ʻi he fonua ko Mahú, ʻo velo honau nimá ki he ngaahi mata kafo ʻi Hono ongo nimá mo e ongo vaʻé. (Ezra Taft Benson, “The Book of Mormon—Keystone of Our Religion (Ko e Tohi ʻa Molomoná-Ko e Makatuʻuloto ʻo ʻEtau Tui Fakalotú),” Ensign, Nov. 1986, 6–7)