Seminary
3 Nephi 11:18–41: Si Jesukristo Mipahayag sa Iyang Doktrina

“3 Nephi 11:18–41: Si Jesukristo Mipahayag sa Iyang Doktrina,” Manwal sa Magtutudlo sa Basahon ni Mormon (2024)

“3 Nephi 11:18–41,” Manwal sa Magtutudlo sa Basahon ni Mormon

3 Nephi 11:18–41

Si Jesukristo Mipahayag sa Iyang doktrina

Imahe
Kristo nagtudlo sa Amerika

Nakahunahuna ka ba sukad kon unsa nga mga kamatuoran ang gipakigbahin sa mga misyonaryo niadtong ilang gitudloan? Usa sa ilang labing importante nga mga mensahe may kalabotan sa unsay gikinahanglan natong buhaton aron makadawat sa mga panalangin sa kinabuhing dayon. Kini nga mensahe usahay gitawag og ang doktrina ni Kristo (tan-awa sa 2 Nephi 31:21). Ang Manluluwas mitudlo niini nga doktrina ngadto sa mga Nephite sa wala madugay human magpakita ngadto kanila diha sa templo. Kini nga leksiyon makatabang kanimo nga mas makasabot ug makapasabot sa doktrina ni Jesukristo.

Mahimong usa ka sumusunod ni Jesukristo

Handurawa nga ikaw adunay usa ka higala kinsa nahimong interesado sa Simbahan. Ang imong higala nagsulti kanimo nga siya adunay usa ka maayo nga pagbati mahitungod sa unsay iyang nakat-onan ug nasinati hangtod karon. Gusto niyang masayran kon unsay sunod nga gikinahanglan niyang buhaton aron mas hingpit nga mosunod sa Manluluwas.

  • Unsa kahay imong idapit nga buhaton sa imong higala? Ngano man?

“Kini mao ang akong doktrina”

Wala madugay human ang nabanhaw nga Manluluwas mipakita ngadto sa mga Nephite didto sa yuta sa Bountiful, Siya mitudlo kanila sa Iyang doktrina. Kini nga doktrina, usahay gitawag og “ang doktrina ni Kristo” (2 Nephi 31:21), makatabang nato nga masabtan kon sa unsang paagi kita makasunod ni Jesukristo ug makadawat sa mga panalangin sa kinabuhing dayon. Karong adlawa makabaton ka og oportunidad aron mas makasabot sa doktrina ni Kristo ug makapasabot niini sa imong kaugalingong mga pulong.

  1. Kompletoha ang mosunod nga kalihokan:

  1. Tun-i ang mga pagtulun-an sa Manluluwas mahitungod sa Iyang doktrina diha sa 3 Nephi 11:31–41.

  2. Kon tinguhaon, pagtuon og dugang nga mga pagtulun-an mahitungod sa doktrina o ebanghelyo ni Jesukristo, sama sa 2 Nephi 31:17–21 o 3 Nephi 27:19–22. Mahimo usab nimong pangitaon ang “doktrina ni Kristo” diha sa Gospel Library nga app o sa ChurchofJesusChrist.org.

  3. Pag-andam og tulo ngadto sa lima ka minuto nga leksiyon mahitungod sa doktrina ni Kristo. Gamita ang template nga gihatag sa ubos aron sa pagtabang kanimo sa pag-andam sa imong latid [outline]. Mahimo nimong handurawon nga ikaw usa ka misyonaryo nga nag-andam niini nga leksiyon alang sa usa ka tawo nga imong gitudloan. O tingali maghunahuna ka mahitungod sa usa ka tawo nga imong kaila ug mangandam nga kintahay mopakigbahin ka og leksiyon ngadto kaniya.

Plano sa Leksiyon sa Ang Doktrina ni Kristo

Manwal sa Magtutudlo sa Basahon ni Mormon (2024)—“3 Nephi 11:18–41: Si Jesukristo Mipahayag sa Iyang Doktrina”

  1. Gikan sa unsay imong nakat-onan ug gitun-an, pagsulat og usa ka pagpamubo kabahin sa doktrina ni Kristo.

  2. Isulat ang duha o tulo ka pangutana nga mahimo nimong ipangutana aron matabangan kadtong imong gitudloan nga makasabot ug maghunahuna og mas lawom mahitungod sa doktrina ni Kristo.

  3. Ihulagway kon nganong gibati nimo nga importante nga sundon kining mga pagtulun-an sa Manluluwas. Kon mahimo, ilakip ang mga kasinatian nga imong nasinati nga nagpakita kon sa unsang paagi kining mga pagtulun-an nakapanalangin sa imong kinabuhi.

  4. Pagsulat og usa o duha ka pagdapit nga mahimo nimong ipaabot aron matabangan kadtong imong gitudloan sa paggamit sa unsay ilang nakat-onan mahitungod sa doktrina ni Kristo.

  5. (Opsiyonal) Paghunahuna og usa ka butang o kalihokan aron matabangan kadtong imong gitudloan nga mas makasabot sa doktrina ni Kristo.

© 2024 by Intellectual Reserve, Inc. All rights reserved.

Pagsukod sa Kaugalingon

Sa imong pagtapos sa leksiyon, paggahin og pipila ka gutlo aron mamalandong unsaon nimo sa paggamit ang doktrina ni Kristo sa imong kinabuhi sa matag adlaw. Ang mosunod nga pagsukod sa kaugalingon makatabang kanimo sa pag-ila sa mga paagi nga kasamtangan nimong gipuy-an ang doktrina sa Manluluwas, ingon man usab ang mga paagi nga mahimo kang molambo.

Tubaga ang matag usa sa mosunod nga mga pamahayag gamit ang usa niining mga tubag: “kanunay,” “usahay,” o “talagsa ra.”

  1. Nagpakita ako og hugot nga pagtuo diha ni Jesukristo pinaagi sa pagpaningkamot sa paghupot sa mga sugo ug pagsalig nga Siya makatabang kanako sa pagbuntog sa akong mga hagit.

  2. Naghinulsol ako matag adlaw sa akong mga sayop ug nagtinguha sa gahom sa Manluluwas sa pagtabang nako nga mahimong mas mahisama Kaniya.

  3. Naningkamot ako sa pagtuman sa akong mga pakigsaad sa bunyag ug sa matag semana nagbag-o niana nga paningkamot pinaagi sa pag-ambit sa sakramento sa takos nga paagi.

  4. Nagdapit ako sa Espiritu Santo sa akong kinabuhi pinaagi sa kanunay nga pag-ampo ngadto sa Langitnong Amahan ug pagtuon ug nagtinguha sa paglihok sa espirituwal nga mga pag-aghat.

Iprinta