3 Nephi 12:17–48

“Nais Ko na Kayo ay Maging Ganap”

Larawan ni Jesucristo

Itinuro ni Jesucristo na dapat tayong “maging ganap” na katulad Niya at ng ating Ama sa Langit na ganap (3 Nephi 12:48). Bagama’t maaaring mahirap ang kautusang ito, nagbibigay ito ng mga makabuluhang ideya tungkol sa likas na katangian ng ating Ama sa Langit at ni Jesucristo. Itinuturo din nito sa atin na maaari tayong maging katulad Nila. Ang lesson na ito ay naglalayong tulungan ka na maunawaan ang iyong potensyal na maging ganap o perpekto katulad ng ating Ama sa Langit at ni Jesucristo.

Ang iyong potensyal

binhi sa lupa, brown na tuta

masayang sanggol sa tabi ng basket

• Ano ang maaaring mangyari sa bawat isa sa mga ito kapag lubos nang lumaki ang mga ito?

• Ano ang kailangan ng mga ito upang maabot ang kanilang potensyal?

• Ano ang potensyal ng bawat anak sa plano ng Ama sa Langit?

• Paano nakakaimpluwensya sa iyong mga desisyon ang nauunawaan mo tungkol sa iyong banal na potensyal? Paano ito nakakaimpluwensya sa nadarama mo tungkol sa iyong sarili?

Habang pinag-aaralan mo ang lesson ngayon, isipin kung gaano ka na lumaki at natuto sa buhay mo at kung ano pa ang kaya mo pa ring makamtan sa tulong ng Diyos.

Ang paanyaya ng Tagapagligtas na abutin ang ating potensyal

Sa 3 Nephi 12:17–47, nagbahagi si Jesus ng ilang halimbawa mula sa batas ni Moises sa mga tao sa Aklat ni Mormon. Sinundan Niya ang bawat halimbawa ng paliwanag tungkol sa mas mataas na batas o paanyaya na mamuhay sa mas mataas na antas ng kabutihan na makatutulong sa atin na mas maunawaan kung ano ang nais Niya at ng ating Ama sa Langit na maging dapat na kahinatnan natin.

Para makita ang mga halimbawa ng mas mataas na batas, basahin ang 3 Nephi 12:21–22, 27–29, 38–42, at alamin kung paano tayo inaanyayahan ng Tagapagligtas na umunlad patungo sa pagtatamo ng ating potensyal.

• Paano tayo matutulungan ng mga turo na ito na maging higit na katulad ng Ama sa Langit at ni Jesucristo?

Basahin ang 3 Nephi 12:48, at alamin ang buong potensyal na alam ni Jesucristo na nasa bawat isa sa atin.

Ang 3 Nephi 12:48 ay isang doctrinal mastery passage. Maaari mong markahan ang mga doctrinal mastery passage sa partikular na paraan upang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuturo sa passage na ito sa isang tanong o sitwasyon.

Itinuturo ng talatang ito na nais ni Jesucristo na maging ganap tayo na katulad Niya at ng ating Ama sa Langit.

• Ano sa palagay mo ang mga tanong o alalahanin ng mga tao tungkol sa turong ito? Bakit?

• Ano ang nagbibigay sa iyo ng pag-asa o kumpiyansa na posible na maging katulad tayo ng Ama sa Langit at ni Jesucristo?

• Paano nauugnay ang katotohanang ito sa mga larawan mula sa simula ng lesson?

Ang ganap na pagmamahal ng Ama sa Langit at ni Jesucristo

Ang pagiging ganap ay pagiging katulad ng Ama sa Langit at ni Jesucristo. Ang mas mataas na batas na itinuro ni Jesus sa kabanatang ito ay makatutulong sa atin na maunawaan ang pagkatao at mga katangian ng Ama sa Langit at ni Jesucristo. Kapag mas nauunawaan natin kung sino Sila, mapagsisikapan nating maging katulad Nila at magkakaroon tayo ng pag-asa na matiyaga Nila tayong tutulungan habang sinisikap nating umunlad.

Basahin ang 3 Nephi 12:43–45 at ang sumusunod na pahayag ni Elder Jeffrey R. Holland ng Korum ng Labindalawang Apostol, at alamin ang itinuturo ng mga ito tungkol sa pagmamahal ng Ama sa Langit at ni Jesucristo.

Elder Jeffrey R. Holland

Salamat at nalaman ko na sa kabila ng aking mga kakulangan, ang Diyos ay sakdal—na nagagawa Niyang mahalin, halimbawa, ang Kanyang mga kaaway, dahil kadalasan, dahil sa pagiging “likas na tao” natin, tayo kung minsan ang kaaway na iyon. Nagpapasalamat ako na pinagpapala pa rin ng Diyos ang mga yaong ginagamit Siya nang may masamang hangarin dahil lahat tayo sa hindi sinasadyang pagkakataon kung minsan ay nagagamit Siya nang may masamang hangarin. (Jeffrey R. Holland, “Kayo Nga’y Mangagpakasakdal—Sa Wakas,” Liahona, Nob. 2017, 41)

icon, isulat

1. Isulat ang mga sagot mo sa mga sumusunod na tanong:

• Bakit nakapapanatag na malaman na mahal ng Ama sa Langit at ni Jesucristo ang Kanilang mga kaaway at pinagpapala ang mga taong gumagamit sa Kanila?

• Paano nagbibigay sa iyo ng pag-asa ang Kanilang pagmamahal, tulong, at pagtitiis para maging ganap balang-araw?

Ang pagiging ganap o perpekto ay isang proseso na posible lamang sa pamamagitan ni Jesucristo

Natural lang na isipin kung posible bang maging ganap o perpekto. Kung magagawa ba nating mag-isa na maging perpekto, o kung kailangang maisakatuparan ito sa ating mortal na buhay, magiging imposible ito.

Basahin ang Doktrina at mga Tipan 76:69–70 at Moroni 10:32–33, at alamin kung bakit naging posible na maging ganap tayo. Maaari mong i-cross reference ang mga passage na ito sa 3 Nephi 12:48.

• Bakit naging posible ito para sa lahat ng magiging ganap o perpekto?

Basahin ang Doktrina at mga Tipan 93:11–13 at alamin kung ano ang idinagdag ng mga talatang iyon sa ating naunawaan tungkol sa pagiging ganap ni Jesucristo.

• Bakit mahalagang maunawaan na maging ang pagiging ganap ni Jesucristo ay isang proseso?

Itinuro ni Pangulong Russell M. Nelson ang sumusunod tungkol sa kahulugan at proseso ng pagiging ganap:

Pangulong Russell M. Nelson

Pansinin na ang salitang ganap ay hindi nagpapahiwatig ng “kawalan ng pagkakamali.” …

Hindi tayo dapat panghinaan ng loob kung ang tapat nating mga pagsisikap na maging ganap ay tila nakakapagod [mahirap] at walang katapusan. Ang pagiging ganap ay hindi pa darating nang lubusan. Darating lamang ito nang lubusan pagkaraan ng Pagkabuhay na Mag-uli at sa pamamagitan lamang ng Panginoon. Naghihintay ito sa lahat ng nagmamahal sa kanya at sumusunod sa kanyang mga kautusan. (Russell M. Nelson, “Perfection Pending,” Ensign, Nob. 1995, 86, 88)

• Ano ang naidagdag ng pahayag na ito sa naunawaan mo sa pagiging ganap?

icon, isulat

2. Gawin ang sumusunod na aktibidad:

Isipin kunwari na hinilingan ka na magbigay ng dalawa hanggang tatlong minutong spiritual thought sa susunod na aktibidad ninyo ng mga kabataan. Hiniling sa iyo ng mga lider mo na magbahagi ka ng iyong mga ideya kung bakit nagbibigay sa atin ng pag-asa ang turo sa 3 Nephi 12:48. Isulat ang mga naiisip mo. Isama ang mga sagot sa mga sumusunod na tanong:

• Ano ang ibig sabihin ng maging ganap? Ano ang hindi ibig sabihin nito?

• Paano nagbibigay sa iyo ng pag-asa ang nalalaman mo tungkol sa Ama sa Langit at kay Jesucristo para maging katulad Nila?

Opsiyonal: Gusto Mo Bang May Matutuhan Pa?

Paano kung pakiramdam ko ay hindi ko magagawa ang mga inaasahan sa akin ng Tagapagligtas?

Itinuro ni Pangulong Dieter F. Uchtdorf, na noon ay kabilang sa Unang Panguluhan:

Pangulong Dieter F. Uchtdorf

Maaaring sabihin ng ilan, “Palagay ko hindi ako makakaayon sa mga pamantayan ninyo.”

Mas lalo kayong dapat sumama sa amin kung gayon! Layunin ng Simbahan na pangalagaan ang mga may kakulangan, nahihirapan, at napapagal. Puno ito ng mga taong naghahangad nang buong puso na sundin ang mga kautusan, kahit kulang pa ang kakayahan nilang sundin ang mga ito. (Dieter F. Uchtdorf, “Halina, Sumama sa Amin,” Liahona, Nob. 2013, 23)

Ipinayo ni Elder Jeffrey R. Holland ng Korum ng Labindalawang Apostol:

Elder Jeffrey R. Holland

“Pumarito ka bilang ikaw,” ang sabi ng mapagmahal na Ama sa bawat isa sa atin, subalit idinagdag Niya, “Huwag kang manatiling ganyan.” Ngumingiti tayo at naaalala na determinado ang Diyos na gawin tayong higit pa sa inaakala natin na kahihinatnan natin. (Jeffrey R. Holland, “Mga Awiting Naawit at Hindi Naawit,” Liahona, Mayo 2017, 51)

Itinuro ni Propetang Joseph Smith (1805–1844):

si Propetang Joseph Smith

Kapag kayo ay aakyat ng hagdan, kailangan kayong magsimula sa ibaba, at umakyat nang [pa]isa-isang baitang, hanggang sa kayo ay makarating sa itaas; gayundin sa mga alituntunin ng Ebanghelyo—kailangan kayong magsimula sa una, at magpatuloy hanggang sa matutuhan ninyo ang lahat ng alituntunin ng kadakilaan. Subalit matagal pang panahon matapos na kayo ay magdaan [sa] tabing bago ninyo matutuhan ang mga ito. Hindi lahat ay mauunawaan sa daigdig na ito; magiging malaking gawain ang matutuhan ang ating kaligtasan at kadakilaan maging sa kabilang buhay. (Mga Turo ng mga Pangulo ng Simbahan: Joseph Smith [2007], 312)

Ano ang pagiging perpeksyonista at paano ko ito haharapin?

Itinuro ni Elder Gerrit W. Gong ng Korum ng Labindalawang Apostol:

Elder Gerrit W. Gong

Ang salitang perpekto kung minsan ay nabibigyan ng maling pakahulugan na ang ibig sabihin nito ay hindi nagkakamali kailanman. Marahil nagsisikap kayo o ang isang taong kilala ninyo na maging perpekto sa ganitong paraan. Dahil ang gayong [pagiging] perpekto ay tila laging imposibleng maabot, na kahit ang pinakamainam nating mga pagsisikap ay maaaring magpadama sa atin ng pagkabalisa, kawalan ng pag-asa, o pagkapagod. Hindi natin kayang kontrolin ang ating mga sitwasyon at ang mga tao sa ating paligid. Naliligalig tayo sa ating mga kahinaan at kamalian. Katunayan, habang lalo tayong nagsisikap, lalo tayong napapalayo sa [pagiging] perpekto na hangad natin. …

Ang maling pagkaunawa sa ibig sabihin ng maging perpekto ay maaaring mauwi sa pagiging perpeksyonista—isang pag-uugali o asal na may kahanga-hangang hangaring maging mabuti at nagkakaroon ng di-makatotohanang pag-asa na maging perpekto [kaagad]. Ang pagiging perpeksyonista kung minsan ay bunga ng damdamin na iyon lamang mga perpekto ang dapat mahalin o na hindi tayo nararapat maging masaya kung hindi tayo perpekto. (Gerrit W. Gong, “Pagiging Ganap kay Cristo,” Liahona, Hulyo 2014, 14–15, 17)

Panoorin ang video na “Perfectionism: Will I Ever Be Good Enough?” (4:33).