“ʻEta 7–11: ‘Ko e Moʻoni ʻe Fakatupu ʻe he Meʻá Ni ʻa e Pōpula,’” Tohi ʻa Molomoná - Tohi Lēsoni ʻa e Tokotaha Akó (2024)
“ʻEta 7–11,” Tohi ʻa Molomoná - Tohi Lēsoni ʻa e Tokotaha Akó
ʻEta 7–11
“Ko e Moʻoni ʻe Fakatupu ʻe he Meʻá Ni ʻa e Pōpula”
Koeʻuhí ʻoku ʻofa ʻa e ʻOtuá ʻiate kitautolu, ʻokú Ne ui ha kau palōfita ke fakatokanga mai kiate kitautolu ʻa e koví pea poupouʻi kitautolu ke tauhi ʻa e ngaahi fekaú. Naʻe ʻikai tokanga ʻa e kau Sēletí ki ha fakatokanga mei he tokoua ʻo Sēletí, pea naʻe iku ia ki ha ngaahi nunuʻa faingataʻa ʻi ha ngaahi toʻu tangata lahi. ʻE lava ke tokoni ʻa e lēsoni ko ʻení ke ke ongoʻi ʻa e mahuʻinga ʻo e talangofua ki he kau palōfita ʻa e ʻOtuá.
Nofo pōpulá
Sio ki he fakatātā ko ʻení. Ko e hā nai ha meʻa ʻoku fakakaukau pe ongoʻi ʻe he tokotaha ko ʻení?
Fakakaukau pe ko e ngaahi fili fē kuo fakahoko kimuʻa naʻe tupu māmālie mei ai ʻa e ngaahi tūkunga ko ʻení pea ko e hā ʻa e ʻuhinga naʻe fakahoko ai ʻe he tokotaha ko ʻení ʻa e ngaahi fili ko iá.
Ko e kau atu ki hono fakahoko ʻo e ngaahi ʻulungaanga faiangahalá ʻe lava ke tataki ai ʻa e kakaí ki he pōpula fakalaumālié mo e fakatuʻasinó.
Te ke ako ʻi he ʻahó ni ha fakamatala ʻe tokoni ke mahino kiate koe ha founga mahuʻinga ke fakaʻehiʻehi ai mei he pōpula fakalaumālié. ʻI hoʻo akó, tokanga ki he ngaahi ueʻi ʻa e Laumālié te ne lava ʻo tokoniʻi koe ke ke ʻilo ʻa e founga ke fakaʻaongaʻi ai ʻa e meʻa ʻokú ke akó ʻi hoʻo moʻuí.
“Ko e moʻoni ʻe fakatupu ʻe he meʻá ni ʻa e pōpula”
Hili e tūʻuta ʻa e kau Sēletí ki he fonua ʻo e talaʻofá, naʻa nau ngāue faivelenga maʻá e ʻEikí pea fakatokolahi mo fakaʻau ʻo mālohi ʻi he fonuá (vakai, ʻEta 6:17–18). ʻI he ofi ke mate ʻa Sēleti mo hono tokouá, naʻá na fakatahatahaʻi mai hona kakaí ke na lea kiate kinautolu.
Lau ʻa e ʻEta 6:19–23, ʻo kumi ʻa e meʻa naʻe fiemaʻu ʻe he kakaí.
-
Ko e hā ʻa e fakatokanga naʻe fai ʻe he tokoua ʻo Sēletí ki he kakaí ʻi he veesi 23?
Fakakaukauloto ʻokú ke ʻi ai ʻi he taimi naʻe fai ai ʻa e fakatokanga ko ʻení. Fakalaulauloto ki he tali naʻá ke mei fai ʻi he ngaahi tūkunga ko ʻení. Fakakaukau ki he meʻa ʻokú ke ʻilo fekauʻaki mo e ʻOtuá mo ʻEne kau palōfitá pea mo e founga naʻe mei tākiekina ai ʻe he meʻa ʻokú ke ʻiló ʻa hoʻo filí.
Fakakakato ʻa e ngaahi fakatokangá
Neongo e fakatokanga naʻe fai ‘e he tokoua ‘o Sēletí, ka naʻe kei fili pē ʻa e kakaí ke fokotuʻu ha tuʻi maʻanautolu. Hili e fakafisi ha niʻihi ʻo hona ngaahi fohá, naʻe faifai pea loto-fiemālie ʻa e foha ʻo Sēleti ko ʻOlaihaá ke hoko ko e tuʻi pea naʻá ne pule ʻi he māʻoniʻoni ʻi he kotoa ʻo ʻene moʻuí (vakai, ʻEta 6:24–29; 7:1). Ka neongo ia, naʻe toutou hoko ʻi he hisitōlia ʻo e kakai Sēletí ʻa e kikite ʻo e tokoua ʻo Sēletí ʻi heʻene pehē ʻe iku ʻenau maʻu ha tuʻí ki ha nofo pōpula.
Lau ʻa e ngaahi potufolofola ko ʻení, ʻo kumi ha ngaahi sīpinga ʻo e founga naʻe fakahoko ai ʻa e kikite ʻa e tokoua ʻo Sēletí. Mahalo te ke fie hiki ʻa e ngaahi fakamoʻoni fakafolofola ko ʻení ʻi he tafaʻaki ʻo e ʻEta 6:23.
-
Ko e hā ha meʻa naʻe makehe kiate koe mei he ngaahi veesi ko ʻení?
-
Ko e hā ha foʻi moʻoni te tau lava ʻo ako mei he talanoa ko ʻení fekauʻaki mo e ngaahi nunuʻa ʻo hono fakasītuʻaʻi ʻa e kau palōfita ʻa e ʻEikí?
Ko e moʻoni ʻe taha ʻe lava ke tau ako mei he talanoa ko ʻení, ʻe lava ke iku hono fakafisingaʻi ʻo e kau palōfita ʻa e ʻEikí ki he nofo pōpulá.
-
Ko e hā ha ngaahi sīpinga ʻo e founga ʻe aʻusia ai ʻe ha taha ʻa e nofo pōpulá ʻi hono tukunoaʻi pe fakasītuʻaʻi ʻa e kau palōfita ʻa e ʻEikí?
-
ʻOkú ke pehē ko e hā ʻoku fili ai ʻa e kakaí ke tukunoaʻi ʻa e faleʻi mo e ngaahi fakatokanga ʻoku ʻomi ʻe he ʻEikí ʻo fakafou ʻi Heʻene kau palōfitá?
Faleʻi he lolotongá ni mei he kau palōfita ʻa e ʻEikí
Kumi ha faleʻi pe fakatokanga mei he kau palōfita mo e kau ʻaposetolo ʻo onopōní. ʻE lava ke maʻu ʻeni mei he Ki Hono Fakamālohia ʻo e Toʻu Tupú (tohi tufa, 2022), pe mei he ngaahi lea ʻo e konifelenisi lahi fakamuimuitahá. Vakai angé pe te ke lava ʻo maʻu ha ngaahi foʻi lea pe kupuʻi lea pau ʻoku nau fakamatalaʻi ʻa e founga ʻe tāpuekina ai kitautolu ʻi heʻetau muimui ki he faleʻi ko ʻení, kae pehē ki he ngaahi nunuʻa te tau lava ʻo aʻusia ʻi heʻetau taʻetokanga ki aí.
-
Tali ʻa e ngaahi fehuʻi ko ‘ení:
-
Ko e hā ha ngaahi fakatokanga pe faleʻi naʻá ke lava ʻo maʻu?
-
Ko e hā ha ngaahi founga ʻe tāpuekina ai kitautolu ʻe he ʻEikí ʻi heʻetau muimui ki he faleʻi ko ʻení?
-
ʻE tākiekina fēfē ʻe he taʻetokanga ki he faleʻi pe ngaahi fakatokanga ko ʻení ha taha ki he nofo pōpulá?
-
Ko hono fakaʻaongaʻi ia ki hoʻo moʻuí
Fakakaukau ki he founga ʻokú ke tali ʻaki e faleʻi mo e ngaahi fakatokanga ʻa e kau palōfita ʻa e ʻEikí, ngaahi tāpuaki kuó ke maʻu ʻi hoʻo muimui kiate kinautolú, pea mo e faleʻi ʻe ala fiemaʻu ke ke muimui faivelenga ange ki aí.
Mahalo ʻe ongoʻi loto-foʻi ha niʻihi ʻi heʻenau aʻusia ʻa e ngaahi nunuʻa ʻo e taʻe-tokanga ki he faleʻi mo e fakatokanga ʻa e ʻEikí ʻo fakafou ʻi Heʻene kau palōfitá. Ka naʻa mo e taimi kuo tau fai ai ha ngaahi fehalaākí, ʻe lava ke fakatauʻatāinaʻi kitautolu ʻe he Fakamoʻuí mei hotau pōpulá ʻi heʻetau tafoki kiate Iá. Hangē ko ʻení, lau ʻa e ʻEta 7:25–27, pea fakatokangaʻi ʻa e meʻa naʻe hoko ʻi he taimi naʻe fakatomala ai ʻa e kakaí pea tafoki ki he ʻOtuá.
-
Ko e hā ʻoku akoʻi atu ʻe he potufolofola ko ʻení fekauʻaki mo e ʻEikí? (vakai foki ki he Mōsaia 7:33).
Ke vakai ki ha sīpinga ʻo e founga naʻe aʻusia ai ʻe ha taha ʻa e tauʻatāina ʻoku foaki ʻe he ʻEikí hili haʻane aʻusia ʻa e pōpula fakalaumālié, fakakaukau ke mamata ʻi he “Ko e Angalelei Vave ʻa e ʻOtuá,” ʻoku maʻu ʻi he ChurchofJesusChrist.org, mei he taimi 3:37 ki he 6:33.
Hiki ʻi hoʻo tohinoa akó ʻa e meʻa kuó ke ako mo ongoʻi ʻi he ʻahó ni fekauʻaki mo e muimui ki he kau palōfita ʻa e ʻEikí. Lekooti ha faʻahinga ongo fakalaumālie pē kuó ke maʻu pea palani ke ngāueʻi kinautolu.