ʻEta 8

“ʻOku ʻIkai Ke Ngāue ʻa e ʻEikí ʻi he Ngaahi Kautaha Fufū”

Naʻe fakaʻauha ʻe he ngaahi kautaha fufuú ha ngaahi kulupu kehekehe ʻo ha kakai ʻi he kotoa ʻo e Tohi ʻa Molomoná. Naʻe ʻilonga ʻa e sīpinga ko ʻení ʻi he lotolotonga ʻo e kau Sēletí pea naʻe iku ai ki honau fakaʻauhá. ʻI he tohi ʻa e palōfita ko Molonaí fekauʻaki mo e kau Sēletí, naʻá ne tānaki ki ai ha ngaahi moʻoni mahuʻinga te tau lava ʻo ako mei he ngaahi tūkunga fakaʻauha ko ʻení. ʻE lava ke tokoni ʻa e lēsoni ko ʻení ke mahino kiate koe ʻa e fiemaʻu ke fakafisingaʻi ʻa e ngaahi kautaha fufuú ʻaki haʻo muimui kia Sīsū Kalaisi.

Ngaahi ngāue fakapulipulí

• Ko e hā ha ngaahi founga ʻoku fakaʻaongaʻi ai ʻe Sētane ʻa e fakapulipulí ke aʻusia ʻene ngaahi taumuʻa koví?

• ʻE uesia fēfē ʻe he fakapulipuli peheé ʻa e vā fetuʻutaki ʻo ha taha mo Sīsū Kalaisi? Ko e hā hono ʻuhingá?

• Ko e hā te ke fiemaʻu ke ʻilo ʻe ha taha ʻokú ne ongoʻi te ne lava ʻo fai kovi pea hao pē koeʻuhí ʻokú ne tauhi ia ko ha fakapulipuli?

Te ke ako ʻi he ʻahó ni fekauʻaki mo ha falukunga kakai naʻa nau kau ʻi ha ngaahi angafai fakafufū ʻo e faiangahalá ʻoku ʻiloa ko ha kautaha fufuú. ʻI hoʻo akó, kumi ha ngaahi akonaki ʻe tokoni ke mahino kiate koe ʻa hono fakatuʻutāmaki ʻo e ngaahi kautaha fufuú.

Faiangahala ʻi he lotolotonga ʻo e Kau Sēletí

Mahalo te ke manatuʻi hili e tūʻuta ʻa e kau Sēletí ki he fonua ʻo e talaʻofá, naʻa nau fili ha tuʻi ke pule kiate kinautolu neongo ʻa e ngaahi fakatokanga ʻa e tokoua ʻo Sēletí ʻe iku ia ki ha nofo pōpula (vakai, ʻEta 6:22–23). ʻI he ngaahi toʻu tangata ne muiaki atú, naʻe fakatupu ʻe he ngaahi tuʻi faiangahalá ha māvahevahe mo ha faingataʻaʻia ʻi he lotolotonga ʻo e kakaí.

Lau ʻa e ʻEta 8:1–10, ʻo kumi ʻa e meʻa naʻe hoko ʻi he taimi naʻe hoko ai ha tangata ko hono hingoá ko ʻOmea ko e tuʻí.

Fakakaukau ke hiki ha fakamatala nounou ʻo e meʻa naʻe hoko ʻi he ngaahi veesi ko ʻení ʻi hoʻo tohinoa akó.

Naʻe loto-fiemālie ʻa Sēleti ki he palani kovi ʻa hono ʻofefiné. ʻI he taimi naʻe kole ai ʻe ʻEikisi ke mali mo e ʻofefine ʻo Sēletí, naʻe faʻufaʻu ʻe ʻEikisi, Sēleti, mo hono ʻofefiné, mo ha kau mēmipa kehe ʻo e fāmilí ha kautaha fufū ke tāmateʻi ʻa ʻOmea (vakai, ʻEta 8:11–15).

Ko e fakatuʻutāmaki ʻo e ngaahi kautaha fufuú

Ko e kautaha fufuú “ko ha kautaha [ia] ʻo [ha] kakai ʻoku nau haʻisia ki ha ngaahi fakapapau ke nau fakahoko ʻa e ngaahi taumuʻa kovi ʻa e kulupú” (“Kautaha Fufuú, Ngaahi,” Fakahinohino ki he Ngaahi Folofolá, scriptures.ChurchofJesusChrist.org). Ko Sētane ʻa e tupuʻanga ʻo e ngaahi kautaha fufuú (vakai, Hilamani 6:25–30).

ʻI he hoko ʻa e palōfita ko Molonaí ko e tokotaha fakamatala ʻo e talanoa ko ʻení, naʻá ne vahevahe ha ngaahi akonaki mo ha fakatokanga mahuʻinga fekauʻaki mo e ngaahi kautaha fufuú. Lau ʻa e ʻEta 8:18–25, ʻo kumi e ongo ʻa e ʻEikí ki he ngaahi kautaha fufuú.

1. Tali ‘a e fehuʻi ko ‘ení:

   • Ko e hā naʻá ke ako fekauʻaki mo e ngaahi kautaha fufuú mei he ngaahi veesi ko ʻení?

Ko e moʻoni ʻe taha te tau lava ʻo ako mei he ngaahi veesi ko ʻení ʻoku fakalielia ʻa e ngaahi kautaha fufuú ʻi he ʻao ʻo e ʻOtuá (ʻEta 8:18).

Ke tokoni ke mahino lahi ange kiate koe ʻa e ʻuhinga ʻoku fakalielia ai ʻa e ngaahi kautaha fufuú ki he ʻEikí, lau ʻa e ongo potufolofola ko ʻení, ʻo kumi ʻa e meʻa ʻokú ke ako fekauʻaki mo Sīsū Kalaisí:

• 2 Nīfai 26:22–24

• ʻAlamā 39:8

• Ko e hā naʻá ke ako mei he ngaahi veesi ko ʻení naʻe mei tokoni ki he kakai naʻá ke ako ki ai ʻi he ʻEta 8?

• Ko e hā naʻe akoʻi atu ʻe he ngaahi veesi ko ʻení fekauʻaki mo e ʻEikí?

• ʻE lava fēfē ke tokoniʻi ʻe he ngaahi akonaki ko ʻení ʻa e toʻu tupú ʻi he ʻahó ni?

Naʻe fakaʻosi ʻe Molonai ʻene ngaahi akonaki fekauʻaki mo e ngaahi kautaha fufuú ʻaki ʻene fakamatalaʻi ʻa e ʻuhinga naʻá ne fakakau ai ʻa e ngaahi fakatokanga ko ʻení. Lau ʻa e ʻEta 8:26, ʻo kumi ʻa e meʻa naʻe fiemaʻu ʻe Molonai ke tau ʻiló.

2. Tali ʻa e ongo fehuʻi ko ‘ení:

   • Ko e hā naʻá ke ako fekauʻaki mo e ʻuhinga naʻe fakakau ai ʻe Molonai ʻa e ngaahi akonaki ko ʻení ʻi he Tohi ʻa Molomoná?

   • Ko e hā kuó ke ako ʻi he ʻahó ni te ne lava ʻo ueʻi koe ke ke muimui kakato ange kia Sīsū Kalaisí?

Fili Pē: Fie Ako Lahi Ange?

Ko e hā ha ngaahi founga ʻoku tau sio ai ki he ngaahi kautaha fufuú ʻi he ʻahó ni?

Naʻe pehē ʻe Palesiteni M. Lāsolo Pālati ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku akoʻi ʻe he Tohi ʻa Molomoná ko e kau ko ia ʻa e ngaahi kautaha fufuú ʻi ha faihiá ʻokú ne ʻomi ha pole faingataʻa, ʻo ʻikai ki he fakafoʻituituí mo e ngaahi fāmilí pē ka ki he fonuá fakalūkufua. Ko e ngaahi kautaha fufū ʻo e ʻaho ní ʻoku kau ai ʻa e kau kengí, kau feʻaveʻaki faitoʻo konatapu taʻe fakalaó, mo e ʻū kulupu fai hia faʻufaʻu fakafāmilí. Ko e ngaahi kautaha fufū ʻo e ʻaho ní ʻoku nau ngāue tatau mo e kuonga ʻo e kau kaihaʻa ʻa Katianetoni ʻi he Tohi ʻa Molomoná. ʻOku ʻi ai ʻenau ngaahi fakaʻilonga mo ha ngaahi lea fakapulipuli. ʻOku nau kau ʻi ha ngaahi ouau mo ha ngaahi faʻufaʻu fakafufū. ʻOku kau ʻi heʻenau ngaahi taumuʻá ʻa e “fakapoó, mo vete koloa, mo kaihaʻa, mo fai feʻauaki mo fai ʻa e faʻahinga angahala kotoa pē, ʻo fepaki mo e ngaahi lao ʻo honau fonuá pea mo e ngaahi fono ʻa honau ʻOtuá” (Hilamani 6:23).

Kapau he ʻikai ke tau tokanga, ʻe maʻu ʻe he ngaahi kautaha fufū ʻo e ʻaho ní ha mālohi lahi mo ha tākiekina ʻo vave mo kakato ʻo hangē pē ko ia naʻe hoko ʻi he taimi ʻo e Tohi ʻa Molomoná. (M. Russell Ballard, “Standing for Truth and Right,” Ensign, Nov. 1997, 38)

Ko e hā ʻoku fiemaʻu ai ke tau faitotonu kiate kitautolu pea mo e ʻEikí fekauʻaki mo ʻetau ngaahi angahalá?

Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI heʻetau holi ke fakatomalá, ʻoku fuʻu mahuʻinga ʻaupito ʻa e faitotonú. Ko e meʻa ʻuluaki mo mahuʻinga tahá, kuo pau ke tau faitotonu ki heʻetau Tamai Hēvaní pea mo kitautolu foki. ʻOku hoko ʻa e taʻefaitotonú mo e kākaá ko e fakavaʻe mo e tupuʻanga ʻo e meimei angahala kotoa pē. ʻI he taimi ʻe niʻihi, ko e taimi ʻoku kamata fakatomala ai ha tahá, ʻokú ne kamata ʻaki pē ʻene fakahaaʻi ha konga ʻo ha palopalema lahi ange. ʻI he taimi ʻe niʻihi ʻoku tau faʻa fakakaukau ʻoku ʻikai fiemaʻu ke fakahā kakato ʻa e meʻa naʻe hokó, pe ko e konga ʻo e meʻa naʻe hokó ko ha foʻui ʻo ha taha kehe. ʻE lava ke kākaaʻi ʻe he kakai leleí ʻa kinautolu pē pea kākaaʻi kinautolu ʻe ha niʻihi kehe. ʻOku fakatoloi ʻe ha faʻahinga kākā pē ʻa e fakatomalá. (Neil L. Andersen, The Divine Gift of Forgiveness [2019], 194)

ʻI he foʻi vitiō ko ʻení, “Koe Faitotonu ʻi Heʻetau Fakatomalá” (4:05), ʻoku fakamatala ai ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ki ha ngaahi fakakaukau fekauʻaki mo ʻene tohi The Divine Gift of Forgiveness (Ko e Meʻafoaki Fakalangi ʻo e Fakamolemolé) (2019). ʻOkú ne vahevahe fekauʻaki mo ha ongo meʻa naʻá na fai ha angahala tatau ka ʻi ha ngaahi founga kehekehe: naʻe faitotonu ʻa e taha pea taʻefaitotonu ʻa e taha.