“Moronae 1: O Le A Ou Le Faafitia le Keriso,” Tusi Lesona a Tagata o le Vasega o le Tusi a Mamona (2024)
“Moronae 1,” Tusi Lesona a Tagata o le Vasega o le Tusi a Mamona
Moronae 1
O Le A Ou Le Faafitia le Keriso
O le avea ma se soo o Iesu Keriso e le’i faigofie lava. Ina ua lata i le faaiuga o le Tusi a Mamona, sa faailoa mai e le perofeta o Moronae e faapea, na fasiotia soo o Keriso sei vagana na latou faafitia le Faaola (tagai i le Moronae 1:2). Ona sa musu Moronae e faafitia Iesu Keriso, sa faamalosia o ia e alu i soo se mea na te maua ai le saogalemu ma lafi ai mai tagata Sa Lamanā. Atonu na e lagonaina le tuuatoatasi a’o e taumafai e ola i lou faatuatua ma tumau faamaoni i le Faaola ma Lana Ekalesia. O lenei lesona e mafai ona fesoasoani e faaosofia ai oe ia mulimuli pea ia Iesu Keriso ma aua le faafitia o Ia.
Fetaia’i ma mea faafeagai
Faaalu sina taimi e mafaufau ai pe faapefea ona e tali atu pe a siomia oe e i latou atonu e lē tutusa o outou tulaga faatonuina po o talitonuga e uiga i le Atua.
O lanu o i lenei ata e mafai ona fesoasoani ia te oe e vaai faalemafaufau ai i tulaga eseese o le tetee e ono feagai ma se soo o Iesu Keriso. O le lanumeamata e mafai ona faatusa i le leai o se tetee. O le lanu samasama ma le lanu moli e mafai ona faatusa i ai le faateleina o tulaga o le tetee, ae o le lanu mumu e mafai ona faatusa i le tetee sili ona faigata.
Sa auauna atu Thomas S. Monson (1927–2018) i le militeli o se alii talavou ma molimauina le tele o faatinoga o le lototele. Sa ia faasoa mai le faataitaiga lenei:
Mafaufau i le lanu o le a e filifili e fai ma sui i le tulaga o le tetee na oo i ai lenei alii talavou. O le a sou manatu e ono faapefea ona e tali atu i lea tulaga?
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2Fe2%2F09%2Fe209564ecf3b64252fb86f90e0e15fac9ba757e8%2Fe209564ecf3b64252fb86f90e0e15fac9ba757e8.jpeg/full/!250,/0/default)
O se tasi o ia faataitaiga e le mafai ona galo ia te au o le lototele leleoa o se aliivaa e 18 tausaga le matua—e le o se tasi o lo tatou faatuatuaga—o lē sa le faamaualuga tele e tatalo. Mai le 250 o alii i le militeli, sa na o ia lava le tagata e tootuli i po uma i talaane o lona moega e tatalo, a o faifai ma tauemu atu i ai ē sa le talitonu [i le Atua]. Sa punou pea o ia, ma tatalo atu i le Atua. Sa lei fefe lava o ia. Sa lei popole lava o ia. Sa ia te ia le lototele. (Thomas S. Monson, “Ia Faamalosi ma Loto Tele,” Liahona, Me 2014, 67)
-
O le a le mea e tumatila ia te oe e uiga i lenei faataitaiga?
-
O le a se mea e te lagona e faigata ai le mulimuli pea ia Iesu Keriso? O a ni mea e fesoasoani ia te oe?
Lisi nisi o tulaga e ono luitauina ai le mulimuli ia Iesu Keriso. Taumafai e vaai faalemafaufau i faamatalaga patino ma mafaufau po o le a le lanu o i le ata e sili ona fetaui i tulaga taitasi.
Ioe, e sili atu le faigofie o le talanoa e uiga i la tatou tautinoga ia Iesu Keriso nai lo le mulimuli i le taimi e luitauina ai i tatou. A o e suesue, saili ia maua le uunaiga e manaomia ona e tumau faamaoni i lou talitonuga ia Iesu Keriso ma i tulaga faatonuina o Lana Ekalesia toefuataiina.
Ua sailia Moronae e Sa Lamanā
Ina ua tuuina atu ia Moronae le tiutetauave e tausia ma faasaoina faamaumauga a tagata Sa Nifae, sa fetaia’i foi o ia ma le tetee.
Faitau le Moronae 1:1–4, mafaufau pe faapefea ona e fuaina le tetee sa fetaia’i ma ia.
Ina ia fesoasoani ia te oe ia maua se manatu sili atu pe faape’ī le olaga mo Moronae, e mafai foi ona e matamata i le “Ua Valaaulia e Moronae Tagata Uma ia O Mai ia Keriso” mai le faailotaimi 0:00 i le 3:59, o loo maua ChurchofJesusChrist.org.
![](https://www.churchofjesuschrist.org/imgs/https%3A%2F%2Fassets.churchofjesuschrist.org%2F77%2F94%2F7794521da0ef693fa6a0cb5c92cb0feee6e0de28%2F7794521da0ef693fa6a0cb5c92cb0feee6e0de28.jpeg/full/!250,/0/default)
-
O le a le malosi o le a e fuaina ai le tetee na fetaia’i ma Moronae?
-
O le a se mea ua tatou aoaoina mai le faataitaiga a Moronae?
O se upumoni e tasi e mafai ona tatou aoaoina o le, e mafai ona tatou faamaoni ia Iesu Keriso i soo se tulaga ma ia le faafitia o Ia.
-
Aisea e taua ai mo i tatou ona tumau, pe faamaoni, ia Iesu Keriso?
-
O a ni aafiaga e te manatu na oo ia Moronae na fesoasoani ia te ia ia matuā faamaoni ai ia Iesu Keriso?
-
O le a se mea ua e iloa e uiga ia Iesu Keriso o le a uuna’ia ai oe ina ia le faafitia o Ia?
Mafaufau e faailoga upu a Moronae i le fuaiupu e 3. E mafai foi ona e tusia lou igoa i autafa o le igoa o Moronae e fesoasoani e faaosofia ai oe ia mulimuli pea ia Iesu Keriso.
Sue nisi o faataitaiga nei o tagata o e sa faamaoni i le Atua i taimi o tulaga faigata.
-
Masiofo o Eseta (tagai Eseta 4:16)
-
Sataraka, Mesako, ma Apeteniko (tagai Tanielu 3:17–18)
-
Apinati (tagai Mosaea 17:20)
-
Iosefa Samita (tagai Mataupu Faavae ma Feagaiga 135:4–5)
-
O afafine o Onaita (tagai Aperaamo 1:11)
Faaali atu o la tatou tautinoga
-
O anafea na e faaalia ai po o se tasi e te iloa le tuuto atu ia Keriso i tulaga faigata?
-
Pe o i ai ni tulaga o loo e feagai ai ma ni tetee mo le mulimuli ia Iesu Keriso?
-
O le a se mea o le a e faia ia faamaoni ai ia Iesu Keriso i na tulaga?
-
Faamae’a mea nei:
Ina ia fesoasoani ia te oe e aotele mea na e aoaoina mai lenei lesona, fai se pepa lautele o i ai se sāvali po o se faamatalaga i luga o le initoneti e mafai ona faaosofia ai oe ma isi ia tumau faamaoni ia Keriso i soo se tulaga. Ia aofia ai se sāvali mai tusitusiga paia e mafai ona faaosofia ai oe ia faamaoni ia Iesu Keriso ma ia le faafitia o Ia. E mafai ona e mamanuina lau pepa lautele o i ai se sāvali i sāvali o loo i le mekasini o le Mo Le Malosi o le Autalavou . O se faataitaiga lenei:
E mafai ona e amata i le su’eina o se ata i le vaega o “Image Collection” www.ChurchofJesusChrist.org/media pe fatu sau oe lava ata e fesoasoani e faailoa atu ai lau sāvali. Ona su’e lea o se mau e faaaofia i lau ata. E mafai ona e faaaogaina se fuaiupu mai le Moronae 1, o se mau e mauaina e oe lava, po o se mau mai le lisi lenei.
-
“Commitment” i le Topical Guide