Iloilo Lou Aoaoina 9

Mamona 7–Eteru 15

alii talavou o loo faalagolago i se laau

O le manatunatu i ai ma le iloiloina o lou aoaoina faaleagaga e mafai ona fesoasoani ia te oe e faalatalata atili atu ai i le Faaola. O lenei lesona e mafai ona fesoasoani ia te oe e manatua ai ma iloilo pe na faapefea ona fesoasoani ou aafiaga i le Mamona 7–Eteru 15 e te tuputupu a’e ai faaleagaga.

Li’o o laau

ponati laau ma ni li’o o laau

Sa aoao mai Peresitene Dieter F. Uchtdorf, o lē sa avea ma uso o le Au Peresitene Sili:

Peresitene Dieter F. Uchtdorf

E maoa’e le tele o mea e mafai ona tatou iloa e uiga i le olaga i le suesueina o le natura. Mo se faataitaiga, e mafai e saienitisi ona vaai i li’o o laau ma faia ai ni taumatematega poto e uiga i le tau ma tulaga na ola ae ai laau i le faitau selau ma le faitau afe o tausaga ua mavae. O se tasi o mea tatou te aoaoina mai le suesueina o le ola a’e o laau o le, i le taimi o vaitau pe a manaia tulaga o le tau, e ola lelei laau i le vave e masani ai. Peitai, i vaitau e faalēlelei tele ai tulaga o le tau, e tuai teisi le ola o laau ae tuuto atu lo latou malosi i elemene taua e manaomia e ola ai. (Dieter F. Uchtdorf, “E Uiga i Mea e Sili Ona Taua,” Liahona, Nov. 2010, 19)

E pei o laau, e i ai a tatou vaitau o le tuputupu a’e ma taimi atonu tatou te lagona ai e pei o loo na ona tatou taumafai lava e ola. E tofu maua e i tatou taitoatasi le tuputupu a’e i auala eseese ma i tulaga eseese. Mafaufau i taimi i lou olaga atonu na e oo ai i le tuputupu a’e faaleagaga.

• O a nisi o tulaga na fesoasoani ia te oe e tuputupu a’e ai faaleagaga? O le a le ituaiga o tuputupu a’e na e oo i ai?

• O a nisi o auala e mafai ai ona tatou iloiloina faavaitaimi lo tatou tuputupu a’e faaleagaga?

I lenei lesona, o le a e maua ai le avanoa e faamalamalama atu ai nisi o mea sa e aoaoina ma iloilo ai sini atonu na e setiina a o suesueina le Mamona 7–Eteru 15.

Faamatala le taua o le Tusi a Mamona

Manatu faapea o oe o se faifeautalai o loo faamatalaina le taua o le Tusi a Mamona i le Toefuataiga o le talalelei. O le a e tuuina atu se kopi o le Tusi a Mamona i se tasi e faitau.

Saunia mea o le a e fai atu e faaaoga ai se fuaitau se tasi pe sili atu i le Mamona 8. E mafai foi ona e faaaogaina le itulau autu o le Tusi a Mamona. Vaavaai mo avanoa e faamatala ai pe faapefea ona fesoasoani le Tusi a Mamona ia i tatou ia talitonu ia Iesu Keriso.

E mafai ona e tagai i fuaitau atonu na e makaina i le Mamona 8 ma faamatalaga na e faia i lau api faamaumau mo suesuega. Afai e te manaomia se fesoasoani, e mafai ona e toefaamanatuina le Mamona 8:14–16, 25–26, 34–35. Atonu foi e te faaaogaina isi fuaitau na e maua i le Tusi a Mamona i le taimi o au suesuega i lenei tausaga.

aikona, faamaumau

1. Tusi mea e te ono fai atu ai pe ana fai sa e faamatalaina atu le matafaioi a le Tusi a Mamona i le Toefuataiga o le talalelei e faaaoga ai le Mamona 8 ma le itulau autu o le Tusi a Mamona.

Manatunatu i fuafuaga e faatino ai le faatuatua ia Iesu Keriso

falaoa

• O a nisi o mea e manaomia i se pāpā falaoa?

• E le gata i le tuufaatasia o mea e manaomia, o le a se isi mea e tatau ona e faia e fai ai le falaoa?

O mea e faaaoga i se pāpā falaoa e mafai ona aofia ai falaoamata, fefete, masima, ma vai. Atonu foi e te manaomia se taimi e faafefete ai le falaoa, ma e manaomia ona tao.

O le taoina o le falaoa e mafai ona faatusatusa i le faatinoina o le faatuatua ia Iesu Keriso. O taunuuga, molimau, po o le vavega o loo e sailia e pei lava o le pāpā falaoa ua vela. O au taumafaiga e faatino le faatuatua ia Iesu Keriso e mafai ona faatusatusa i mea e manaomia, taimi e faafefete ai, ma le taoina o le falaoa. I lesona talu ai nei, sa e suesueina ai tala o tagata taitoatasi o e sa faatinoina le faatuatua ia Iesu Keriso (tagai i le Eteru 3:1–16; 12:6–22). Sa outou suesueina foi upu a perofeta o loo valaauliaina oe e faaaoga le faatuatua i le Alii ma saili vavega (tagai i le Mamona 9:15–27; Eteru 12:6–9).

Faitau le Mamona 9:19–21; Eteru 3:9; 12:6–9 e fesoasoani ia te oe e manatua ai mea sa e suesueina e uiga i le faatuatua ia Iesu Keriso ma fuafuaga atonu na e faia.

aikona, faamaumau

2. Mafaufau i taunuuga, molimau, po o le vavega o loo e sailia, ma tali fesili e tolu o fesili nei:

   • O le a se mea ua e faia e faatino ai le faatuatua ia Iesu Keriso?

   • Afai o le faatinoina o le faatuatua ia Iesu Keriso e pei o le taoina o le falaoa, o le a le vaega o le faagasologa o loo e i ai i le taimi nei? O e faapotopotoina pea po o palu faatasi mea e faaaoga [i le faiga o le falaoa]? O e faatalitali mo le falaoa ina ia fefete? Ua tao le falaoa? Pe ua uma ona e ’aia le falaoa? Faamatala pe aisea.

   • O a nisi o luitau na e oo i ai pe o manaomia pea ona faatoilaloina? O le a se mea na fesoasoani pe e mafai ona fesoasoani ia te oe e faatoilalo ai?

   • O le a sou lagona e pei ua faamanuiaina oe mo taumafaiga ua e faia e faatino ai le faatuatua ia Iesu Keriso?