“Atamai i Aoaoga Faavae: Moronae 7:45–48—‘O Le Alofa Mama o le Alofa Le Pona lea o Keriso,’” Tusi Lesona a Tagata o le Vasega o le Tusi a Mamona (2024)
“Atamai i Aoaoga Faavae: Moronae 7:45–48,” Tusi Lesona a Tagata o le Vasega o le Tusi a Mamona
Atamai i Aoaoga Faavae: Moronae 7:45–48
“O le alofa mama o le alofa le pona lea o Keriso”
I lau suesuega o le Moronae 7:44–48, ua e aoao ai i le auala e saili ai e atiina ae le alofa mama, le alofa le pona lea o Iesu Keriso. O lenei lesona e mafai ona fesoasoani ia te oe e tauloto ai le mau faasino o le atamai i aoaoga faavae ma le fasifuaitau autu o le mau mo le Moronae 7:45–48, faamatala le aoaoga faavae o loo aoao mai i lenei fuaitau, ma faaaoga mataupu faavae o le mauaina o le malamalama faaleagaga i tulaga moni o le olaga.
Faamatala ma tauloto
Mafaufau i le ata faataitai lenei e fesoasoani ia te oe e faataitai ai le faamalamalamaina o le uiga paia o le alofa mama.
Vaai faalemafaufau i le taimi o se talanoaga o le Sau, Mulimuli Mai ia te A’u ma lou aiga, a o talanoa e uiga i le uiga o le alofa mama, ua fai mai lou uso laitiiti se mea faapenei, “Pe le o le alofa mama le na o le faia o ni mea lelei mo tagata?” E te ta’u atu i lou uso o le agalelei o se vaega o le alofa mama ae sa e aoao atili e uiga i ai i le seminare.
-
O a isi faamatalaga e uiga i le alofa mama o le a e ta’u atu i lou uso?
-
I ni fuaiupu se lua pe tolu, faamatala le uiga o le alofa mama e faaaoga ai au lava upu ma aoaoga o loo maua i le Moronae 7:45–48.
Faaaoga le manatu lenei e fesoasoani ia te oe e tauloto ai lenei mau faasino ma le fasifuaitau autu o le mau. Pe filifili se auala ese e sili ona fesoasoani ia te oe e tauloto ai.
Tusi le ata o se fatu lapoa i totonu o lau api faamaumau mo suesuega. Vaai i le ata lenei, ma totonu o le ata o lau fatu na tusi, tusi ai le mau faasino ma le fasifuaitau autu o le mau i le faasologa sa’o.
Tauloto le mau faasino ma le fasifuaitau autu o le mau mo ni nai taimi seia oo ina e taulotoina. Mafaufau e oti ese le ata ma tuu i se mea o le a e vaai soo i ai.
Faataitai le faaaogaina
Ina ia fesoasoani ia te oe e toe faamanatu mataupu faavae o le mauaina o le malamalama faaleagaga, faasa’o fasifuaitau nei e tolu ma faamatala o latou uiga. Afai e te manaomia se fesoasoani, suesue i parakalafa 5–12 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2023).
-
Suesue i le faatuatua.
-
Saili le malamalama atili e ala i manatu faalelagi ua atofaina.
-
Faatino manatu faavae ma fesili faatasi ai ma se punavai e faavavau.
Faitau ata faataitai nei:
-
E faigofie lava ona ita Oskar i ona tei laiti. E masani ona latou augani atu ia Oskar e taaalo ma i latou pe fesoasoani atu i a latou meaaoga. Na o le manao lava o Oskar i ona tei e tuua na o ia ina ia mafai ona fai ana lava mea.
-
Sa iloa e Hae-Won o se isi teineitiiti i lana vasega a Tamaitai Talavou ua faasalalauina ni tala feaveai e uiga ia te ia. E lagona e Hae-Won le le mautonu ma le tiga i lenei mea ma e le o mautinoa pe faapefea ona tali atu.
-
E manao Kapo ia lauiloa i le aoga ma foliga le fefe i luma o ana uo. E masani ona ia ta’ufaatauvaaina isi tagata o le vasega ma ave a latou mea e aunoa ma le fesili.
-
Filifili ia le itiiti ma le tasi se ata faataitai na muamua atu. Vaai faalemafaufau o loo e taumafai e fesoasoani i le tagata o loo i lena ata faataitai. Tali ia le itiiti ifo ma le tasi le fesili mai ulutala taitasi nei.
Saili le malamalama atili e ala i punavai paia filifilia
-
O le a se mea e te ono faasoa atu mai le Moronae 7:45–48 e mafai ona faaosofia ai lenei tagata e tali atu ma le alofa mama sili atu i o latou tulaga?
-
O a nisi o mau po o saunoaga mai taitai o le Ekalesia e ono mafai ona fesoasoani i ai?
Faatino i le faatuatua
-
O a ni luitau e ono feagai ma lenei tagata a o latou taumafai e faaaoga mea e te faasoa atu ia i latou?
-
E mafai faapefea ona latou faatino i le faatuatua e ui lava i nei luitau?
Iloilo manatu faavae ma fesili faatasi ai ma se vaaiga e faavavau
-
E mafai faapefea e le vaai atu i le tulaga ma se vaaiga e faavavau ona fesoasoani ia te ia e lagona atili ai le alofa mama mo isi?
-
E mafai faapefea e le suesueina o le ala na taulimaina ai e Iesu Keriso isi ona fesoasoani i lenei tagata ia sili atu ona agaalofa?