Moronae 7:1–19

“Sailiili ma le Filiga i le Malamalama o Keriso”

motu o tagata o loo faalogologo ia Keriso

E mafai i nisi taimi ona faigata ona iloa le mea sa’o ma le mea e le sa’o. Peitai, ua saunia e le Atua le fesoasoani mo i tatou. O Moronae, i le faaaogaina o upu a lona tama, na faamalosiauina i tatou e faaaoga le Malamalama o Keriso ia iloa ai le sa’o mai le sese. O lenei lesona e mafai ona fesoasoani ia te oe e faalagolago ai ia Iesu Keriso e faamasino ai i le va o le lelei ma le leaga.

O le fea o faatafafā e vaivai lona lanu?

Vaai i le ata lenei, ma filimaoti po o le fea o faatafafā [sikuea] lanuefuefu e lua e vaivai lona lanu.

vaaiga taufaasese o faatafafa lanuefuefu i luga o laina papae ma lanu uliuli

Mata e faateia oe i le iloa o faatafafa uma e lua e tutusa lanu? Ua manatu lou faiai o faatafafa lanuefuefu e lua e eseese o la lanu o ona o lanu vaivai ma pā’auli o loo siomia ai.

E pei o lenei vaaiga taufaasese, atonu e i ai ni tulaga e faigata ai ona faia faamasinoga sao. Na valoia e Isaia e faapea, o aso e gata ai, o nisi tagata o le a “fai mai, ua lelei le mea leaga, a e leaga le mea lelei; [ma] fai ma malamalama le pouliuli, a e fai foi ma pouliuli le malamalama” (Isaia 5:20; tagai foi 2 Nifae 15:20).

Mafaufau loloto i fesili nei:

• E faapefea ona e filimaotia pe ua sa’o pe sese se mea?

• O le a lou mautinoa e mafai ona e iloa le lelei mai le leaga? Aisea?

Mafaufau i se mea e te manao e iloa manino atili e lelei pe leaga. Mo se faataitaiga, atonu e manatu se tasi ua lelei la latou filifiliga o musika, ae atonu e le ioeina e o latou matua. O ai e sa’o? O isi faataitaiga o le filifili lea po o le fea le tulaga e tu ai i se faafitauli faaagafesootai, filifili po o ai e faauo i ai, auai i se mea e fiafia i ai, ma isi mea faapena.

A o e suesue i le aso, vaavaai mo mea e mafai ona fesoasoani ia te oe e iloa ai pe lelei se mea pe leai.

O le eseesega i le va o le lelei ma le leaga.

E pei o Isaia, na vaai foi Moronae i o tatou aso (tagai Mamona 8:35). Sa ia faaaofia ai le fesoasoani mo i tatou i le Tusi a Mamona. Ina ua uma ona aoao atu i le taua o le faia o galuega lelei ma le manatu moni i ai (tagai Moronae 7:1–11), sa ia tusia upu na aoao atu e lona tama, o Mamona, i tagata o le Ekalesia e uiga i le faamasinoina i le va o le lelei ma le leaga.

Faitau le Moronae 7:12–17, ma mafaufau e faailoga mea e te maua mo uunaiga taitasi o loo i lalo:

1. Auala e mafai ona tatou iloa ai pe o lelei se mea

2. Auala e mafai ona tatou iloa ai pe o leaga se mea

3. O mea e faia e le Faaola e fesoasoani ai ia i tatou

• E faavae i mea sa e mauaina i nei fuaiupu, e faapefea ona e aoteleina ia faamatalaga na talanoaina?

Mai le Moronae 7:12–17 e mafai ona tatou iloa ai o mea uma e mai le Atua e valaaulia ai i tatou e fai mea lelei, talitonu ia Iesu Keriso, ma alofa ma auauna atu i le Atua. I se isi itu, o le mea ua leaga e faatauanauina i tatou e agasala, faafitia Iesu Keriso, pe tau faasaga i le Atua.

Ina ia fesoasoani ia e malamalama i aoaoga a Mamona, manatu faapea, e talitonu se tagata o musika o latou faalogologo i ai ma le auala latou te faaaogaina ai a latou telefoni ma isi tekinolosi e lelei, ae e le ioeina e o latou matua po o taitai.

• E faavae i upumoni ua e faailoaina, o le a se mea e mafai e lenei tagata ona fesili ifo ai ia i latou lava e iloa ai pe lelei pe leai a latou musika ma tekinolosi?

O nisi faataitaiga o:

• Pe o le faalogologo i lenei musika po o le faaaogaina o la’u telefoni ma tekinolosi i le ala o loo ou faia ai …

  • … faatumu lo’u mafaufau i mafaufauga e fai le lelei pe fai le agasala?

  • … uunaia au e fai mea o le a faia pe le faia e se soo o Iesu Keriso?

  • … fesoasoani ia ou fiafia i mea a le Atua pe leai?

Ia matau atonu e manaomia ona e mafaufau loloto i tagata pepese faapitoa po o ni pese taitasi, faapea foi ni polokalama, taaloga, po o ala o faasalalauga faapitoa. E le gata i lea, o le tele o le taimi e te faaaluina i se gaoioiga atonu o se vaega taua lea e mafaufau i ai.

Malamalama e fesoasoani e te vaai ai

Atonu ua e matauina i nisi o tulaga atonu e faigata ona faamasino i le va o le sa’o po o le sese.

Vaai faalemafaufau i le taumafai e vaai atoatoa pe faamasino se mea i le pogisa. Ona vaai faalemafaufau lea i le mafai ona ki moli pe faaaoga se moliuila.

Faatasi ai ma lenei atafaatusa i le mafaufau, matau fasifuaitau i le fuaiupu 16 o loo faaalia ai le ala e fesoasoani ai le Faaola ia i tatou.

Faitau le saunoaga lenei a Peresitene Henry B. Eyring o le Au Peresitene Sili e fesoasoani e te malamalama ai i le Malamalama o Keriso:

Peresitene Henry B. Eyring

O fanau uma a le Tama Faalelagi e fananau mai i le lalolagi ua tuuina atu i ai i le taimi e fananau ai, se meaalofa mauafua, o le Malamalama o Keriso. E te lagonaina lena mea? O le lagona o le mea sa’o ma le mea sese ma le mea moni ma le mea pepelo. Sa i ai lena mea ia te oe talu mai ona amata lau malaga i le olaga. …

… E te faia filifiliga i aso uma ma toetoe lava o itula uma e te savali ai pea i le malamalama po o le agai ese atu i le pogisa. (Henry B. Eyring, “Savavali i le Malamalama,” Liahona, Me 2008, 123–124)

• O le a se mea ua e aoaoina e uiga i le Malamalama o Keriso?

Mo nisi faamatalaga i le Malamalama o Keriso, tagai Gospel Topics, “Light of Christ,” topics.ChurchofJesusChrist.org.

Faitau le Moronae 7:18–19, ma vaavaai mo nisi fautuaga na tuuina mai e Mamona e uiga i le faamasinoina i le va o le lelei ma le leaga.

• O le a sou manatu i le uiga o le “sailiili ma le filiga i le Malamalama o Keriso”?

• E mafai faapefea ona avea le faataitaiga ma aoaoga a le Faaola e pei o se malamalama e fesoasoani ia i tatou e faamasino sa’o ai i le va o le sa’o ma le sese i aso nei?

• O a nisi o auala e mafai ona tatou faalogo ai i Ana afioga ma lagona ai Lana faatosinaga o taialaina i tatou?

Faaaogaina o mea ua e aoaoina

Toe mafaufau i le tulaga na e mafaufau muamua i ai ina ua talosagaina oe e mafaufau i se mea e te manao e iloa atili pe lelei pe leai. Faaalu ni nai minute e mafaufau ai ma le agaga tatalo pe ono faapefea ona e faaaogaina mataupu faavae sa e aoaoina i le asō e filimaoti ai pe sa’o pe sese. Taumafai e saili ma le filiga i le Malamalama o Keriso a o e mafaufau loloto i le tulaga. Tusifaamaumau ou manatu i lau api faamaumau mo suesuega.

aikona, faamaumau

1. Tali se tasi o fesili nei:

   • O le a se mea ua e aoaoina i le asō e mafai ona fesoasoani e faaleleia ai lou tomai e filifili ai i le va o le sa’o ma le sese?

   • O a ni vaega se lua pe tolu o le olaga o e vaaia ai le manaomia ona iloa lelei o le lelei mai le leaga? Aisea?

Tuu i le faitalia: O e Manao e Aoao Atili?

O le a le mea e faia e le Malamalama o Keriso?

Na aoao mai Elder Timothy J. Dyches o le Fitugafulu:

Elder Timothy J. Dyches

I Lona alofa e atoatoa, ua ofo mai ai e le Atua le malamalama o Keriso i tagata uma “e o mai i le lalolagi” [Mataupu Faavae ma Feagaiga 93:2] ia o latou “iloa le lelei mai le leaga” [Moronae 7:16] ma ia uunaia ai “e faia pea le lelei” [Moronae 7:13]. O lena malamalama, e faaalia mai o ia lava e ala i mea e masani ona tatou ta’ua o lo tatou manatu fuatiaifo, e valaaulia i tatou ia galulue ma ia sili atu, ia avea ma tagata sili e mafai ona tatou avea ai. (Timothy J. Dyches, “O Le Malamalama e Pipii i le Malamalama,” Liahona, Me 2021, 113)

E faapefea ona fesoasoani le Malamalama o Keriso ia i tatou ma isi?

Na aoao mai Elder Mark A. Bragg o le Fitugafulu:

Elder Mark A. Bragg

O le Malamalama o Keriso o le a fesoasoani tatou te vaai atu ai i isi e ala i fofoga o le Faaola. O le a atili atu ona tatou alolofa ma malamalama i tauiviga a isi. O le a fesoasoani tatou te onosai atili ai ia i latou o e atonu e le tapuai e pei o i tatou pe auauna atu e pei ona tatou faia. O le a fesoasoani tatou te malamalama atili ai i le fuafuaga sili o le fiafia ma iloa ai le ala tatou te i ai uma i totonu o lena fuafuaga sili o le alofa. E aumaia ai le ola, uiga, ma le faamoemoega i mea uma tatou te faia. (Mark A. Bragg “Susulu Pea Lava Pea Seia oo i le Aso Atoatoa,” Liahona, Me 2017, 38)