Fakataukei Fakatokāteliné: Molonai 10:4–5

“ʻI he Mālohi ʻo e Laumālie Māʻoniʻoní Te Mou Lava Ai Ke ʻIloʻi hono Moʻoni ʻo e Ngaahi Meʻa Kotoa Pē”

ʻI hoʻo ako ʻa e Molonai 10:1–7, naʻá ke ʻilo ai kapau te tau kole ki he ʻOtuá ʻi he loto-fakamātoato, loto-moʻoni, pea tui kia Kalaisi, te tau lava ʻo ʻiloʻi ʻoku moʻoni ʻa e Tohi ʻa Molomoná ʻi he mālohi ʻo e Laumālie Māʻoniʻoní. ʻE lava ke tokoni ʻa e lēsoni ko ʻení ke ke ako maʻuloto ʻa e potufolofola fakataukei fakatokāteline mo e kupuʻi lea folofola mahuʻinga ki he Molonai 10:4–5, fakamatalaʻi ʻa e tokāteliné, pea fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻi ha ngaahi tūkunga moʻoni ʻo e moʻuí.

Ako maʻuloto pea fakamatalaʻi

Ako maʻuloto ʻa e potufolofola fakataukei fakatokāteline mo e kupuʻi lea folofola mahuʻinga ko ʻení ʻaki hono ako maʻuloto fakafoʻituitui ʻa e ngaahi konga takitaha ko ʻení. Hili hoʻo fai ʻení, feinga ke ke toutou lau maʻuloto ʻa e kupuʻi leá mo e potufolofolá. Toutou lau ʻa e kupuʻi lea mo e potufolofola ko ʻení ʻi he lolotonga ʻo e ʻahó.

• Molonai 10:4–5

• “Kole ʻi he loto-fakamātoato,

• Mo e loto-moʻoni, ʻo maʻu ʻa e tui kia Kalaisi. …

• Pea ʻi he mālohi ʻo e Laumālie Māʻoniʻoní

• Te mou lava ai ke ʻiloʻi hono moʻoni ʻo e ngaahi meʻa kotoa pē.”

1. Tali ‘a e fehuʻi ko ‘ení.

   • Ko e hā ʻe lava ke fai ʻe ha taha ke maʻu ha fakamoʻoni ʻoku moʻoni ʻa e Tohi ʻa Molomoná?

Akoako hono fakaʻaongaʻí

Fakaʻaongaʻi ha ngaahi miniti siʻi ke toe vakaiʻi ai ʻa e ngaahi tefitoʻi moʻoni ki hono maʻu ʻo e ʻilo fakalaumālié ʻaki hono lau ʻa e palakalafi 5–12 ʻo e konga “Ko Hono Maʻu ʻo e ʻIlo Fakalaumālié” ʻi he Fakamatala ki he ʻElito ʻo e Fakataukei Fakatokāteliné (2023).

• Ko e tefitoʻi moʻoni fē ʻo hono maʻu ʻo e ʻilo fakalaumālié ʻoku mahuʻingamālie taha kiate koé? Ko e hā hono ʻuhingá?

Fakakaukauloto ʻoku maʻu ʻa e tūkunga ko ʻení ʻi he konga “Ngaahi Fehuʻí mo e Talí” ʻi he makasini Ki Hono Fakamālohia ʻo e Toʻu Tupú. Ke vakai ki ha sīpinga, ʻalu ki ha makasini kimuí ni mai ʻi he ChurchofJesusChrist.org.

• “Kuó u hoko ko ha mēmipa ʻo e Siasí ʻi he konga lahi taha ʻo ʻeku moʻuí. ʻOku ou feinga ke tauhi ʻa e ngaahi fekaú, lau ʻeku folofolá, lotu, mo ʻalu ki he Lotú. ʻOku ou fanongo ki hono vahevahe ʻe he kakai kehé ʻenau ngaahi aʻusia fekauʻaki mo hono ʻiloʻi ʻoku moʻoni ʻa e Tohi ʻa Molomoná. Ko e hā ʻoku teʻeki foaki mai ai ʻe he ʻOtuá ʻa e faʻahinga aʻusia tatau kiate aú?”

2. Tali ʻa e ngaahi fehuʻi ko ʻení.

   • Ko e tefitoʻi moʻoni fē ʻo hono maʻu ha ʻilo fakalaumālié te ke poupouʻi ke ʻuluaki fakakaukau ki ai ʻa e tokotaha ko ʻení? Ko e hā hono ʻuhingá?

   • ʻE tokoniʻi fēfē koe ʻe he tokāteline ʻoku akoʻi ʻi he Molonai 10:4–5 ke ke fakaʻaongaʻi ʻa e ngaahi tefitoʻi moʻoni ki hono maʻu ʻo e ʻilo fakalaumālié ki he tūkunga ko ʻení?

ʻE lava ke tokoni ʻa e ngaahi fehuʻi ko ʻení ke ke fakakaukau ki he founga ʻe lava ke tokoniʻi ai ʻe he ngaahi tefitoʻi moʻoni ki hono maʻu ʻo e ʻilo fakalaumālié ha taha ʻi he tūkunga ko ʻení.

Fekumi ki ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí

• Ko e ngaahi foʻi lea pe kupuʻi lea fē ʻi he Molonai 10:4–5 te ke poupouʻi ʻa e tokotahá ni ke ne ako mo feinga ke ne maʻu ha mahino lelei angé? Ko e hā hono ʻuhingá?

• Ko e hā ha ngaahi maʻuʻanga tokoni kuo fokotuʻu fakalangi ʻe lava ʻo tokoni ki he tokotahá ni ke ne maʻu ha fakamoʻoni fakataautaha ki hono moʻoni ʻo e Tohi ʻa Molomoná?

Ngāue ʻi he tuí

• ʻE fēfē nai kapau te ke akoako fakahoko ha niʻihi ʻo e ngaahi fakaafe ʻa Molonai mei he Molonai 10:4–5 ʻi he tūkunga ko ʻení? ʻOku fekauʻaki fēfē ʻa e ngaahi meʻá ni mo e ngāue ʻi he tuí?

Vakaiʻi ʻa e ngaahi fakakaukaú mo e ngaahi fehuʻí ʻaki ha fakakaukau ʻoku taʻengatá

• Ko e hā ha ngaahi moʻoni fekauʻaki mo e ʻOtuá, founga ʻo ʻEne fetuʻutaki mo ʻEne fānaú, pea mo Hono finangaló ʻe lava ʻo tokoni ki ha taha ʻi he tūkunga ko ʻení?

3. Tali ‘a e fehuʻi ko ‘ení.

   • Te ke fakaʻaongaʻi fēfē ʻa e tokāteline ʻoku akoʻi ʻi he Molonai 10:4–5 ke tokoni ki he ngaahi fehuʻi kehe ʻoku ʻikai fekauʻaki mo e Tohi ʻa Molomoná?