“Molonai 10:8–25: ‘ʻOku Tupu Meia Kalaisi ʻa e Meʻafoaki Lelei Kotoa Pē,’” Tohi ʻa Molomoná - Tohi Lēsoni ʻa e Tokotaha Akó (2024)

“Molonai 10:8–25,” Tohi ʻa Molomoná - Tohi Lēsoni ʻa e Tokotaha Akó

Molonai 10:8–25

“ʻOku Tupu Meia Kalaisi ʻa e Meʻafoaki Lelei Kotoa Pē”

Ko e hā ha meʻaʻofa kuó ke maʻu naʻá ne fakahoko ha liliu mahuʻinga ʻi hoʻo moʻuí? Ko e hā naʻe talaatu ʻe he meʻaʻofa ko ʻení fekauʻaki mo e tokotaha naʻá ne foaki atu iá? Naʻe fakamoʻoni ʻa Molonai ki he ngaahi meʻafoaki kuo foaki ʻe he ʻOtuá ki Heʻene fānaú ʻo fakafou ʻi he Laumālié ke ʻaonga kiate kinautolu. Naʻe naʻinaʻi leva ʻa Molonai ki he kau laukongá ke nau ʻiloʻi mo maʻu ʻa e ngaahi meʻafoaki fakalaumālie ko ʻení. ʻE lava ke tokoni ʻa e lēsoni ko ʻení ke ke fekumi ki he ngaahi meʻafoaki ʻo e Laumālié.

Ngaahi Meʻafoaki

Fakakaukau ki ha niʻihi ʻo e kau foaki meʻaʻofa lelei taha ʻokú ke ʻiló.

Ko e hā ha ngaahi ʻulungaanga ʻoku maʻu ʻe he kakai ko ʻení ʻokú ne ʻai ke nau hoko ko ha kau foaki meʻaʻofa leleí?

Naʻe akoʻi ʻe Sīsū Kalaisi ʻEne kau ākongá fekauʻaki mo ha taha ʻo e ngaahi ʻulungaanga ʻo e Tamai Hēvaní ʻi he Mātiu 7:9–11. Lau ʻa e ngaahi veesi ko ʻení, ʻo kumi ʻa e meʻa naʻe ʻakoʻi ʻe he Fakamoʻuí fekauʻaki mo e Tamaí.

Ko e hā ha niʻihi ʻo e ngaahi meʻafoaki mahuʻinga taha kuo foaki mai ʻe heʻetau Tamai Hēvaní pe finangalo ke foaki mai maʻatautolú? (ʻO ka fiemaʻu, lau ʻa e Sione 3:16; 2 Nīfai 31:12; mo e Tokāteline mo e Ngaahi Fuakava 14:7.)

Te ke maʻu he ʻahó ni ha faingamālie ke ako fekauʻaki mo e ngaahi meʻafoaki mei he ʻOtuá ʻa ia ʻoku ui ko e ngaahi meʻafoaki ʻo e Laumālié pe ngaahi meʻafoaki fakalaumālié. ʻI hoʻo akó, fakakaukau ki he founga ʻoku hoko ai e ngaahi meʻafoaki ko ʻení ko ha fakamoʻoni ʻo e ʻofa ʻa e Tamai Hēvaní mo Sīsū Kalaisi kiate koe mo e niʻihi kehé. Fakakaukau foki ki he founga ʻe lava ke tākiekina ai hoʻo houngaʻia mo e ʻofa ki he Tamai Hēvaní mo Sīsū Kalaisí ʻi hono tāpuakiʻi koe ʻaki e ngaahi meʻafoaki ko ʻení.

Ngaahi meʻafoaki fakalaumālie mei he ʻOtuá

ʻE lava ke fakaʻuhingaʻi ʻa e ngaahi meʻafoaki fakalaumālié ko ha “ngaahi tāpuaki pe ngaahi tuʻunga malava ia ʻoku foaki ʻe he ʻOtuá ki Heʻene fānaú ʻo fakafou ʻi he mālohi ʻo e Laumālie Māʻoniʻoní. ‘Oku foaki mai ʻa e ngaahi meʻafoaki ʻo e Laumālié ke tāpuekina mo ʻaonga kiate kinautolu ʻoku ʻofa ki he ʻOtuá mo feinga ke tauhi ʻEne ngaahi fekaú. (Vakai, Tokāteline mo e Ngaahi Fuakava 46:9.)” (Ngaahi Tefito ʻo e Ongoongoleleí, “Ngaahi Meʻafoaki Fakalaumālié,” topics.ChurchofJesusChrist.org).

Lau ʻa e Molonai 10:8, ʻo kumi ʻa e meʻa naʻe akoʻi ʻe Molonai fekauʻaki mo e ngaahi meʻafoaki fakalaumālié.

Ko e hā naʻá ke ako fekauʻaki mo e ngaahi meʻafoaki fakalaumālié mei he veesi ko ʻení?

Ko e moʻoni ʻe taha ʻoku lava ke tau ako mei he veesi ko ʻení ʻoku foaki ʻe he ʻOtuá ki Heʻene fānaú ʻa e ngaahi meʻafoaki ʻo e Laumālié ke ʻaonga kiate kinautolu.

ʻOkú ke pehē te tau lava fēfē ʻo fakaʻaongaʻi ʻa e ngaahi tāpuaki pe ivi malava ʻoku foaki mai ʻe he ʻOtuá, ke tokoniʻi kitautolu pe niʻihi kehé ʻo fakafou ʻi he Laumālie Māʻoniʻoní?

Fakakaukau ki ha ngaahi fehuʻi ʻokú ke kei maʻu fekauʻaki mo e ngaahi meʻafoaki fakalaumālié. Hiki e ngaahi fehuʻi ko ʻení ʻi hoʻo tohinoa akó. ʻI he hokohoko atu hoʻo akó, kumi ha ngaahi akonaki ʻe tokoni ke tali hoʻo ngaahi fehuʻí.

Ko e hā ha ngaahi sīpinga ʻo e ngaahi meʻafoaki fakalaumālié?

Naʻe vahevahe ʻe Molonai ha ngaahi sīpinga ʻe niʻihi ʻo e ngaahi meʻafoaki fakalaumālie ʻe lava ke foaki mai ʻe he ʻOtuá kiate kitautolú. Lau ʻa e Molonai 10:9–16, ʻo kumi ʻa e ngaahi sīpinga ko ʻení.

ʻE ala tokoni ke ʻiloʻi ʻe lava ke ʻuhinga ʻa e akonaki ʻaki ʻa e “lea ʻo e potó” (veesi 9) ki he malava ke tokoniʻi ʻa e niʻihi kehé ke fakaʻaongaʻi ʻa e fakaʻutoʻuta leleí pe fakaʻaongaʻi ʻenau ʻiló; ʻe lava ke ʻuhinga ʻa e akonaki ʻaki ʻa e “lea ʻo e ʻiló” (veesi 10) ki he malava ke tokoni ki he niʻihi kehé ke nau ʻiloʻi ʻa e ʻOtuá mo ʻEne ngaahi fonó; pea ʻe lava ke ʻuhinga ʻa e “ngaahi faʻahinga lea kehekehe kotoa pē” (veesi 15) ki he malava ke lea ʻi ha ngaahi lea fakafonua muli pe taʻeʻiloá.

Ko e hā ha ngaahi meʻafoaki ʻo e Laumālié naʻe lau ki ai ʻi he ngaahi veesi ko ʻení?
Ko e hā ha ngaahi sīpinga ʻo ha founga kuó ke mamata ai ki hono fakahaaʻi ʻo e ngaahi meʻafoaki ko ʻení?

Naʻe akoʻi ʻe ʻEletā Pulusi R. Makongikī (1915–85) ʻo e Kōlomu ʻo e Kau ʻAposetolo ʻe Toko Hongofulu Mā Uá ko e “ngaahi meʻafoaki fakalaumālié ʻoku lauikuonga pea ʻoku taʻefakangatangata hono kehekehé” (A New Witness for the Articles of Faith [1985], 371).

ʻE lava ke tāpuekina kitautolu ʻe he ʻOtuá ʻaki ha ngaahi meʻafoaki fakalaumālie ʻoku ʻikai hano ngataʻanga, kau ai ʻa e tui kia Sīsū Kalaisí, fakahā fakatāutahá, tupulaki ʻetau malava ke tauhi ʻa e ngaahi fekaú, mo hono ongoʻi ʻo e ʻofa faka-Kalaisí ki he niʻihi kehé.

Te tau lava fēfē ʻo maʻu ha ngaahi meʻafoaki fakalaumālié?

Lau ʻa e Molonai 10:24–25, 30, ʻo kumi ʻa e meʻa naʻe akoʻi ʻe Molonai fekauʻaki mo hono maʻu ha ngaahi meʻafoaki fakalaumālie mei he ʻOtuá.

Ko e hā naʻe akoʻi atu ʻe he ngaahi veesi ko ʻení fekauʻaki mo e founga ʻe lava ke tāpuekina ai kitautolu ʻaki ha ngaahi meʻafoaki ʻo e Laumālié?

Naʻe vahevahe ʻe Palesiteni Siaosi Q. Kēnoni (1827–1901) ʻo e Kau Palesitenisī ʻUluakí ha founga ʻe taha te tau lava ai ʻo fekumi ki he ngaahi meʻafoaki fakalaumālié:

Kapau ʻoku ʻi ai hatau niʻihi ʻoku ʻikai haohaoa, ko hotau fatongiá ke lotua e meʻafoaki te ne ʻai ke tau haohaoá. … ʻOku ʻikai totonu ke pehē ʻe ha taha, “ʻIo, he ʻikai ke u lava ʻe au; ko hoku natulá pē ia ʻoʻoku” ʻOku ʻikai fakatonuhiaʻi ia heni, he ko e ʻuhinga ia kuo talaʻofa ai e ʻOtuá ke … foaki e ngaahi meʻafoaki te ne fakangata [hotau ngaahi vaivaí]. (George Q. Cannon, “Ko e Fekumi ki he Ngaahi Meʻafoaki Fakalaumālié,” Liahona, ʻEpeleli 2016, 80)

Naʻe fakamatala ʻa Palesiteni Henelī B. ʻAealingi ʻo e Kau Palesitenisī ʻUluakí ki ha founga ʻe taha ʻe lava ke tau taau ai mo e ngaahi meʻafoaki ʻo e Laumālié:

2:3

ʻOku tau maʻu e ngaahi meʻafoaki fakalaumālié ʻi hono tauhi e ngaahi fekaú mo e feinga ke moʻui haohaoá. ʻE fiemaʻu ai e tui kia Sīsū Kalaisí ke tau fakatomala mo fakamaʻa kitautolu ʻo fakafou ʻi Heʻene Fakaleleí. (Henry B. Eyring, “Ngāue ʻaki ʻi he Laumālié,” Liahona, Nōvema 2010, 59)

Fakakaukau ki he meʻa kuó ke ako he ʻahó ni fekauʻaki mo e ngaahi meʻafoaki fakalaumālie ʻokú ke loto ke manatuʻí, kau ai ʻa e founga ʻe lava ke fakahoko ai ʻe he ngaahi meʻafoaki fakalaumālié ha liliu ʻi hoʻo moʻuí. Fakapapauʻi ʻa e meʻa te ke fai ke maʻu lahi ange ai ʻa e ngaahi meʻafoaki fakalaumālie ʻoku finangalo ʻa e Tamai Hēvaní ke tāpuakiʻi ʻaki koé. Lekooti hoʻo ngaahi fakakaukaú mo e ongo fakalaumālié ʻi hoʻo tohinoa akó.

Fili Pē: Fie Ako Lahi Ange?

Ko e hā mo ha toe ngaahi meʻafoaki fakalaumālie kehe?

Naʻe akonaki ʻa ʻEletā Māvini J. ʻEsitoni (1915–1994) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Tau toe vakaiʻi e ngaahi meʻafoaki ko ʻeni ʻoku siʻisiʻi ange ʻene hā mahino maí: ʻa e meʻafoaki ʻo e kolé; fakafanongó; ongoʻi mo ngāue ʻaki ʻo e kihiʻi leʻo siʻí; malava ke tangí, fakaʻehiʻehi mei he fakakikihí; loto-fiemālie ki ha meʻá; fakaʻehiʻehi mei he toutou lea ʻaki ha meʻa taʻeʻaongá; fekumi ki he māʻoniʻoní; ʻa e meʻafoaki ʻo e ʻikai ke loto-fakamaau ki he kakai kehé; hanga ki he ʻOtuá ki ha fakahinohinó; hoko ko ha ākongá; tokangaʻi e niʻihi kehé; malava ke fakalaulaulotó; fakahoko ha lotú; fai ha fakamoʻoni mālohi; mo e meʻafoaki ʻo e maʻu ʻa e Laumālie Māʻoniʻoní. (Marvin J. Ashton, “There Are Many Gifts,” Ensign, Nov. 1987, 20)

Ko e hā ha ngaahi sīpinga ʻo ha kakai ʻoku tāpuekina ʻaki ha ngaahi meʻafoaki fakalaumālie?

Ko ha ngaahi sīpinga ʻeni ʻo ha niʻihi fakafoʻituitui naʻe tāpuekina ʻaki kinautolu ha ngaahi meʻafoaki fakalaumālie ʻi he taimi ʻo e faingataʻá. Fakakaukau ki he meʻa ʻoku akoʻi atu ʻe he ngaahi sīpinga ko ʻení fekauʻaki mo e Tamai Hēvaní mo Sīsū Kalaisí.

Sīpinga 1: Naʻe fuʻu fiemaʻu ʻe ʻAmanitā Pānisi Sāmita e tokoni ʻa e ʻEikí hili hono fanaʻi ʻe ha kau fakatanga ʻi he Fahiʻanga Papa Hauní ʻi Mīsuli, USA, ʻi he 1838, ʻa e kongaloto hono foha taʻu ono ko ʻAlamaá. Naʻe fakapoongi ʻa e husepāniti ʻo ʻAmanitaá mo ha taha ʻo hono ngaahi fohá ʻi he ʻohofí.

Ke vakai ki he founga naʻe tāpuakiʻi ai ʻe he ʻEikí ʻa ʻAmanitā lolotonga ʻene faingataʻaʻiá, lau ʻi he vahe 30 ʻo e Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 (2018), mei he kupuʻi lea “Naʻe mamahi mo fakalilifu ʻa e mataʻi kafó” ʻi he peesi 392 ki he palakalafi ʻi he peesi 393 ʻoku kamata ʻaki ʻa e “ʻI he ʻiloʻi pē …” Hili iá pea lau ʻi he vahe 32 mei he kupuʻi lea “ʻI he hola ʻa e Kāingalotú mei Mīsuli …” ʻi he peesi 420 ki he palakalafi ʻi he peesi tatau pē ʻoku kamata ʻaki ʻa e “Naʻe ʻikai tokanga atu …”
Sīpinga 2: ʻI he taimi naʻe ngāue ai ʻa Palesiteni Lāsolo M. Nalesoni ko ha toketā tafa mafu kimuʻa peá ne hoko ko ha ʻAposetoló, naʻá ne fehangahangai mo ha tūkunga naʻá ne fiemaʻu ai e tokoni ʻa e ʻEikí.

2:3