1 Nīfai 6–10

Vakai Fakalūkufuá

Naʻe maʻu ʻe Līhai ha mata meʻa-hā-mai ʻa ia naʻá ne mamata ai ki ha fuʻu ʻakau fakaʻofoʻofa. Naʻe fakafofongaʻi ʻe he fuʻu ʻakaú ni mo hono fuá ʻa e ʻofa ʻa e ʻOtuá, pea naʻe “fakafonu [e] laumālie [ʻo Līhaí] ʻaki ha fuʻu fiefia lahi” (1 Nīfai 8:12). Naʻe ako ʻe Līhai ʻi heʻene mata meʻa-hā-maí, fekauʻaki mo e hala kuo pau ke tau fouá mo e founga ke tau nofo maʻu ai ke fiefia ʻi he ngaahi tāpuaki ʻo e ʻofa ʻa e ʻOtuá. Hili e fanongo ʻa Nīfai ki he akonaki ʻa Līhai kau ki he ʻakau ʻo e moʻuí mo kikite ki he hāʻele mai ʻa Kalaisí, naʻá ne holi ke ʻilo ʻiate ia pē ʻa e moʻoni ʻo e ngaahi lea ʻa ʻene tamaí.

Teuteu ke Akoʻi

ʻOku ʻoatu ʻe he fakamatala ko ʻení ha ngaahi fakakaukau ki he kau faiakó fekauʻaki mo e meʻa ʻe ala fiemaʻu ke tomuʻa teuteuʻi kimuʻa ʻi he lēsoni takitaha.

1 Nīfai 6–7

Taumuʻa ʻo e lēsoní: ʻE tokoni ʻa e lēsoni ko ʻení ke mahino ki he kau akó ʻa e founga ʻe lava ke tokoniʻi ai kinautolu ʻe he ngaahi taumuʻa ʻo e Tohi ʻa Molomoná ʻi heʻenau akó pea ʻi heʻenau moʻuí.

• Teuteu ʻa e tokotaha akó: Poupouʻi e kau akó ke fakahoko ʻenau ako fakataautaha fakaʻaho e Tohi ʻa Molomoná. Fakaafeʻi kinautolu ke nau fakalaulauloto ki he meʻa ne nau aʻusia ʻi heʻenau ako mai ko ʻeni e Tohi ʻa Molomoná ʻo aʻu mai ki he taimi ní pea mo e meʻa ʻoku nau akó.

• Vitiō: “Ko e Kau Fakataha ʻa e Fāmili ʻo ʻIsimelí mo e Fāmili ʻo Lihaí” (12:24)

• Fokotuʻu ki he akoʻi he konifelenisi fakavitioó: Fakakaukau ke fakatātaaʻi ʻa e tūkunga ʻi he kamataʻanga ʻo e lēsoní ʻaki hano fai ange ki he kau akó e ngaahi fehuʻí pea fakaafeʻi kinautolu ke taipeʻi ʻenau ngaahi talí ʻi he polokalama fetalanoaʻakí. ʻE ala tokoni ke vahe ki ha tokotaha ako ʻe taha ke ne tokangaʻi ʻa e fetalanoaʻakí mo lau e ngaahi talí ʻi heʻenau hū maí. Fakamālō ki he kau akó ʻi heʻenau ngaahi talí pea fai ha ngaahi fehuʻi vakaiʻi ʻe ala iku ki ha ngaahi fakakaukau lahi angé.

Ko Hono Maʻu ʻo e ʻIlo Fakalaumālié, Konga 3

Taumuʻa ʻo e lēsoní: ʻE lava ke tokoni e lēsoni ko ʻení ke mahino ki he kau akó ʻa e mahuʻinga ʻo e fekumi ki he moʻoní mei he ngaahi maʻuʻanga fakamatala kuo foaki mai ʻe he Tamai Hēvaní mo Sīsū Kalaisi ʻi he ʻofa maʻatautolú.

• Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi fehuʻi pe ngaahi meʻa mahuʻinga ʻoku nau hohaʻa ki ai pea mo ha ngaahi maʻuʻanga tokoni kehekehe te nau lava ʻo kumi ki ai e ngaahi talí. Poupouʻi kinautolu ke nau mateuteu ke vahevahe ha sīpinga ʻo ha taha ʻo e ngaahi maʻuʻanga tokoni ko ʻení pe ʻomi ha taha ki he kalasí.

• Ngaahi Meʻá: Ko ha sioki vai inu maʻa mo ha ipu sioʻata maʻa; pe, ko ha pēsoni vai, koa fanofano, mo ha taueli

• Laʻipepa Tufa: “Ko Hono Fakaʻaongaʻi ʻo e Ngaahi Maʻuʻanga Tokoni Kuo Fokotuʻu Fakalangí”

• Fokotuʻu ki he akoʻi he konifelenisi fakavitioó: Ki he ʻekitivitī ʻi he “Ko hono fakaʻaongaʻi ʻo e ngaahi maʻuʻanga tokoni kuo fokotuʻu fakalangí,” fakakaukau ke fakaʻaliʻali e ngaahi fakahinohino ʻi he screen pea fakaafeʻi e kau akó ke nau faitaaʻi. ʻI he tafaʻaki ʻe tahá, fakakaukau ke tuku hake ʻi he polokalama fetalanoaʻakí e ngaahi fakahinohinó pea fakaafeʻi e kau akó ke hiki tatau pea fakapipiki kinautolu ki ha fakamatala ʻi heʻenau meʻangāue fakaʻilekitulōniká. Hili iá pea vahevahe e kau akó ki ha ngaahi loki fetalanoaʻaki ke aleaʻi mo fakakakato fakataha ai ʻa e ʻekitivitī akó.

1 Nīfai 8:1–18

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke fakatupulaki ʻenau holi ke ongoʻi fiefia ʻi he ʻofa ʻa e ʻOtuá mo e Fakalelei ʻa Sīsū Kalaisí.

• Teuteu ʻa e tokotaha akó: Fakaafeʻi e kau akó ke nau fakalaulauloto ki he ngaahi fehuʻi ko ʻení: Ko e hā ha ngaahi founga ʻe lava ke ongoʻi ai ʻe ha taha ʻa e ʻofa ʻa e ʻOtuá? Ko e fē ha taimi naʻá ke ongoʻi ai ʻEne ʻofa maʻaú? ʻE lava foki ke talanoa e kau akó ki ha mēmipa ʻo e fāmilí pe taki ʻo e Siasí fekauʻaki mo ʻenau ongoʻi e ʻofa ʻa e ʻOtuá kiate kinautolú.

• Ngaahi Vitioó: “Ko Kalaisi ʻa e Maama ʻOku Ulo ʻi he Fakapoʻulí” (11:29; mamata mei he taimi 0:00 ki he 0:54 pea mei he taimi 9:09 ki he 10:02); “ʻOku Pīkitai ʻa e Māmá ki he Māmá” (11:11; mamata mei he taimi 0:32 ki he 2:33); “Ko e ʻIloʻi ʻe Līhai ʻa e ʻakau ʻo e Moʻuí” (4:32; mamata mei he taimi 1:52 ki he 4:32)

• ʻĪmisí: Ko ha ʻīmisi ʻo Mele ʻokú ne pukepuke ʻa e pēpē ko Sīsuú

• Fokotuʻu ki he akoʻi he konifelenisi fakavitioó: Ki he ʻekitivitī 2 ʻi he “Ko hono ongoʻi e ʻofa mo e fiefia lahi ʻa e ʻOtuá ʻo fakafou ʻia Sīsū Kalaisí,” fakakaukau ke download e ngaahi vitioó pea fakaʻatā e kau akó ke nau fili ʻa e foʻi vitiō ke mou mamata aí. Pe, vahevahe ʻa e kau akó ki ha fanga kiʻi loki fetalanoaʻaki mavahevahe, pea vahe ha taha ʻo e ngaahi vitioó ki he kulupu takitaha. ʻE fiemaʻu ke huluʻi ʻe ha tokotaha ako ʻi he kulupu takitaha ʻa e foʻi vitioó pea vahevahe ʻene screen ki he kau mēmipa kehe ʻo e kulupú. Fakaafeʻi e kau akó ke nau fakalaulauloto mo aleaʻi e ngaahi tāpuaki ʻoku lava ke maʻu ʻo fakafou ʻia Sīsū Kalaisí. Hili iá, ʻe lava ke vahevahe ʻe he kulupu takitaha ʻa e meʻa ne nau aleaʻí ki he kalasí.

1 Nīfai 8:19–38

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau muimui he folofola ʻa e ʻOtuá ke tataki kinautolu ki Heʻene ngaahi tāpuaki maʻongoʻonga tahá.

• Teuteu ʻa e tokotaha akó: Poupouʻi e kau akó ke nau lau ʻa e 1 Nīfai 8:19–34 ke nau maheni mo e ngaahi fakataipe ʻi he mata meʻa-hā-mai ʻa Līhaí pea mateuteu ke aleaʻi kinautolu ʻi he kalasí.

• ʻĪmisi ke fakaʻaliʻalí: Ko ha fakatātā ʻo e mata meʻa-hā-mai ʻa Līhaí

• Vitiō: “Ko e Mamata ʻa Līhai ki ha Vaʻa Ukamea pea mo Kinautolu ʻoku Hē Atú” (3:30)

• Fokotuʻu ki he akoʻi he konifelenisi fakavitioó: Makehe mei haʻo kole ki he kau akó ke nau tā ha ngaahi konga ʻo e mata meʻa-hā-maí, fakakaukau ke huluʻi e foʻi vitioó pea taʻofi ia ʻi ha taimi pē ʻoku huluʻi ai ha taha ʻo e ngaahi meʻa mahuʻingá. ʻE lava ke ke kole ki he kau akó ke vahevahe ʻenau ngaahi fakakaukau fekauʻaki mo e fakataipé pea kumi e meʻa ʻoku akoʻi ʻe he folofolá fekauʻaki mo iá. Ke teuteu ki he kalasí, fakakaukau ke hiki e taimi ki he mōmeniti takitaha ʻi he taimi ʻoku totonu ke taʻofi ai ʻa e vitioó.

1 Nīfai 10; 11:1–6

Taumuʻa ʻo e lēsoní: ʻE lava ke tokoniʻi ʻe he lēsoni ko ʻení ʻa e kau akó ʻi heʻenau feinga ke fekumi faivelenga ki he ʻiló mei he ʻEikí.

• Teuteu ʻa e tokotaha akó: Fakaafeʻi e kau akó ke ʻeke ki ha mātuʻa pe taki ʻo e toʻutupú ʻa e meʻa ʻoku nau fai ke fekumi faivelenga ai ki he moʻoni mei he ʻOtuá pe ko e founga ʻoku fakahā ai ʻe he Laumālie Māʻoniʻoní ʻa e moʻoní kiate kinautolú. Poupouʻi e kau akó ke nau haʻu mateuteu ke vahevahe ha fakakaukau mo e kalasí.

•  

• Fokotuʻu ki he akoʻi he konifelenisi fakavitioó: Fakakaukau ke fakaʻaongaʻi ha digital whiteboard ke lava e kau akó ʻo ngāue fakataha ʻi hono lisi ha ngaahi founga ke fekumi faivelenga ai ki he moʻoni mei he ʻOtuá mo e ngaahi founga ʻoku fakahā ai ʻe he ʻOtuá ʻa e moʻoní ʻo fakafou ʻi he Laumālie Māʻoniʻoní.