1 Nīfai 6–7

Ko Hono ʻIloʻi e “Ngaahi Meʻa ʻa e ʻOtuá”

Kapau naʻe fiemaʻu ke ke hiki ha lekooti ke tauhi maʻá e ngaahi toʻutangata ʻi he kahaʻú ke nau ako mei ai, ko e hā ha meʻa te ke fakakau ai? Naʻe fakahaaʻi ʻe Nīfai ʻene fakaʻamu ʻe fakahoifua ʻene ngaahi tohí ki he ʻOtuá mo fakalotoʻi e niʻihi kehé ke muimui ʻia Sīsū Kalaisi. ʻE tokoni e lēsoni ko ʻení ke mahino kiate koe ʻa e founga ʻe lava ke tokoniʻi ai koe ʻe he ngaahi taumuʻa ʻo e Tohi ʻa Molomoná ʻi hoʻo akó pea ʻi hoʻo moʻuí.

Ko e tokanga taha ki he taumuʻa ʻa e tokotaha faʻu tohí. Fakatatau ki he peesi talamuʻaki ʻo e Tohi ʻa Molomoná, naʻe hiki ia “ʻi he laumālie ʻo e kikite mo e fakahā” ke fakalotoʻi ʻa e kakai kotoa pē ko Sīsū ʻa e Kalaisí. ʻI he ako ʻa e kau akó, poupouʻi kinautolu ke nau fakalaulauloto ki he ʻuhinga naʻe hiki ai ʻe he tokotaha faʻu tohi takitaha ha akonaki pe meʻa pau naʻe hoko pea mo e founga ʻoku tokoni ai ki he kau laukongá ke nau ofi ange kia Sīsū Kalaisí.

Teuteu ʻa e tokotaha akó: Poupouʻi e kau akó ke fakahoko ʻenau ako fakataautaha fakaʻaho e Tohi ʻa Molomoná. Fakaafeʻi kinautolu ke nau fakalaulauloto ki he meʻa ne nau aʻusia ʻi heʻenau ako mai ko ʻeni e Tohi ʻa Molomoná ʻo aʻu mai ki he taimi ní pea mo e meʻa ʻoku nau akó.

Ngaahi ʻEkitivitī Ako ʻOku Ala Fakahokó

Ko e hā ʻoku ako ai ʻa e Tohi ʻa Molomoná?

ʻOku fakataumuʻa ʻeni ke tokoni ki he kau akó ke nau ʻiloʻi ʻa e ʻuhinga naʻe fakakau ai ʻe Nīfai e meʻa naʻá ne fakakaú ʻi heʻene lekōtí. Kapau ʻokú ke fie fakaʻaongaʻi ha fakatātā, ʻomi ha tatau ʻo e Tohi ʻa Molomoná ʻo tuku fakataha mo e ngaahi tohi kehé pea fakaafeʻi ʻa e kau akó ke nau fakatātaaʻi fakakalasi pe tauhoa ʻa e tūkunga ko ʻení.

Fakakaukauloto pe ko e hā haʻo tali kapau ʻe fai atu ʻe ha taha ʻa e ngaahi fehuʻi ko ʻení kiate koe:

• ʻOku lahi ha ngaahi tohi fekauʻaki mo e tui fakalotú pea mo e hoko ko ha tokotaha lelei angé; ko e hā ʻoku totonu ai ke u lau e Tohi ʻa Molomoná? Ko e hā te ne fakahoko maʻakú? ʻOku kehe pe lelei fēfē ange ia ʻi he ngaahi tohi kehé?

Fakaafeʻi ha niʻihi ʻo e kau akó ke vahevahe e meʻa te nau ala lea ʻakí. Fakamālō kiate kinautolu ʻi heʻenau ngaahi talí pea fakahīkihikiʻi kinautolu ʻi he ngaahi founga ʻoku nau tali lelei aí. Fakaafeʻi kinautolu ke fekumi ki ha ngaahi fakakaukau lahi ange ʻi heʻenau akó.

Naʻe vahevahe ʻe Nīfai ʻene fakakaukaú, pe ngaahi taumuʻá, ʻi hono lekooti e meʻa naʻá ne lekooti ʻi he Tohi ʻa Molomoná. ʻE lava ke tokoni hono ʻiloʻi e ngaahi taumuʻa ko ʻení ke mahino kiate kitautolu ʻa e ʻuhinga ʻoku totonu ke tau lau ai ʻa e tohí mo e meʻa te ne lava ʻo fakahoko maʻatautolú.

Lau ʻa e 1 Nīfai 6:3–6 pea fakakaukau ke fakaʻilongaʻi e ngaahi foʻi lea pe kupuʻi lea ʻoku nau fakahaaʻi ʻa e ngaahi taumuʻa ʻa Nīfai ʻi hono tauhi ʻene lekōtí. Mahalo ʻe tokoni ke ʻiloʻi “ko e ʻOtua ʻo ʻĒpalahamé, … ʻAisaké, mo … Sēkopé” (veesi 4) ko ha huafa ia ʻo Sīsū Kalaisi.

• Te ke fakamatalaʻi fēfē ʻa e ʻuhinga naʻe lekooti ai ʻe Nīfai ʻa e meʻa naʻá ne lekōtí?

Fakatatau kia Nīfaí, naʻe fakataumuʻa ʻene ngaahi tohí ke fakalotoʻi kitautolu ke haʻu kia Sīsū Kalaisi pea ko e ngaahi meʻa pē ʻoku fakahōifua ki he ʻOtuá naʻe ʻi aí.

Tuku ha kiʻi taimi ke fakakaukau ai ki he meʻa kuó ke aʻusia ʻi hono lau ʻo e Tohi ʻa Molomoná.

Fakakaukau pe ʻe lelei ki he kau akó ke nau tali leʻolahi ʻa e ngaahi fehuʻi ko ʻení, fakakaukau fakafoʻituitui ki heʻenau talí, pe hiki ʻenau talí ʻi heʻenau tohinoa akó.

• ʻOku tokoniʻi nai koe ʻe he Tohi ʻa Molomoná ke ʻiloʻi e ngaahi meʻa ʻoku fakahōifua ki he ʻOtuá? Kapau ko ia, ʻoku founga fēfē?

• ʻOkú ke ongoʻi nai ʻoku tokoniʻi koe ʻi hono ako e Tohi ʻa Molomoná ke ke toe ofi ange ai kia Sīsū Kalaisi pea ke fakahaofi ai koe? Ko e hā hono ʻuhingá?

• ʻE hoko fēfē hono ʻiloʻi e ngaahi meʻa ʻa e ʻOtuá pea ofi ange kia Sīsū Kalaisí ko ha tāpuaki ʻi hoʻo moʻuí?

Haʻu kia Sīsū Kalaisi pea ʻiloʻi ʻa e ngaahi meʻa ʻoku fakahōifua ki he ʻOtuá

Ko ha taukei ako folofola lelei ʻa hono kumi e ngaahi taumuʻa ʻa Nīfaí ʻi hoʻo lau e Tohi ʻa Molomoná. Te ke maʻu ʻa e faingamālie ke ʻahiʻahi fakahoko ʻeni ʻi hoʻo ako ʻa e 1 Nīfai 7.

Fakakaukau ke fakaʻaliʻali e ngaahi fakahinohino ko ʻení, ngaahi fakamoʻoni fakafolofolá, mo e ngaahi fakamatala fakanounoú pea fakaafeʻi e kau akó ke nau fili ha konga ke ako. Fakapapauʻi pe ʻe lelei taha ki he kau akó ke nau ako fakafoʻituitui, tauhoa, pe fakakulupu iiki. Mahalo ʻe lelei ke ke lue takai ʻi he lokí ʻo tokoniʻi ha tokotaha ako pē ʻoku ʻi ai haʻane ngaahi fehuʻi pe fiemaʻu tokoni ke mahino kiate ia pe fakaʻaongaʻi fakataautaha e meʻa ʻoku nau laú.

ʻE lava ke vahevahe e ngaahi meʻa naʻe hoko naʻe fakamatalaʻi ʻe Nīfai ʻi he 1 Nīfai 7 ki ha konga lalahi ʻe tolu. Lau e ngaahi fakamatala fakanounou ko ʻeni ʻo e konga takitaha. Fili ha taha pea toe hokohoko atu hono ako iá, ʻo kumi ha faʻahinga meʻa pē ʻoku fakahōifua ki he ʻOtuá mo tokoniʻi kitautolu ke tau haʻu kia Kalaisi.

Konga 1. 1 Nīfai 7:1–5. Naʻe toe foki ʻa Nīfai mo hono ngaahi tokouá ki Selusalema ke fakalotoʻi e fāmili ʻo ʻIsimelí ke nau kau ʻi heʻenau fononga ki he fonua ʻo e talaʻofá. Naʻe lava heni ʻa Nīfai mo hono ngaahi tokouá ke nau mali mo nau maʻu ha ngaahi fāmili.

Konga 2. 1 Nīfai 7:6–18. Naʻe haʻi ʻe Leimana mo Lēmiuela ʻa Nīfai, ʻo na fakataumuʻa ke tuku ia ke ne mate ʻi he feituʻu maomaonganoá. Ka naʻe fakahaaʻi ʻe Nīfai ha tui lahi, pea naʻe fakahaofi ia ʻe he ʻEikí ʻi ha founga fakaofo.

Konga 3. 1 Nīfai 7:17–22. Naʻe fakamolemoleʻi moʻoni ʻe Nīfai hono ongo taʻoketé ʻi heʻena feinga ke tāmateʻi iá, pea foki ʻa e kulupú kia Līhai mo Selaia.

ʻI he ʻosi e ako ʻa e kau akó, tuku ke nau aleaʻi e meʻa ne nau akó pea hiki ʻenau tali ki he fehuʻi ko ʻení ʻi he palakipoé.

• Ko e hā naʻá ke ako mei hoʻo akó ʻokú ke pehē ʻe fakahōifua ki he ʻOtuá mo tokoni atu ke ke haʻu kia Kalaisí?

ʻE lava ke vahevahe ʻe he kau akó ha ngaahi tefitoʻi moʻoni ʻo hangē ko e nofo-malí mo e fāmilí ko e uho ia ʻo e palani ʻa e ʻOtuá; kapau te tau ngāue ʻaki ʻa e tui ki he ʻEikí, te Ne lava ʻo fai ʻa e meʻa kotoa pē maʻatautolu ʻo fakatatau ki Hono finangaló; pea ʻoku ʻomi ha nonga ʻi hono fakamolemoleʻi ʻo e niʻihi kehé.

• ‘E tokoniʻi fēfē nai koe ʻe he meʻa naʻá ke akó ʻi hoʻo moʻuí?

Kapau ʻe fiemaʻu, fakakaukau ke fai ha ngaahi fehuʻi vakaiʻi hangē ko ʻení: ʻE founga fēfē hano fakaʻaongaʻi e meʻa naʻá ke akó ʻi hoʻo moʻuí? Ko e hā ha ngaahi sitepu hoko te ke lava ʻo fakahoko?

Fakakaukau ki hoʻo aʻusia ʻi hoʻo ako he ʻaho ní ʻi hono fakatefito hoʻo fekumí he ngaahi meʻa te ne tokoniʻi koe ke ke haʻu kia Sīsū Kalaisí pea mo fakahōifua ki he ʻOtuá.

• ʻE fakalakalaka fēfē hoʻo ako folofolá kapau te ke fakahoko maʻu pē hoʻo akó ʻi he founga ko ʻení?

Fakakaukau ke fakaʻosi ʻaki hoʻo fakamoʻoni fakatāutahá pe fakaʻatā e kau akó ke vahevahe e meʻa kuo nau ako pe ongoʻi mei heʻenau akó.

Fakamatala Fakamahinó mo e Puipuituʻá

Ko e hā ha ngaahi tāpuaki ʻe lava ke maʻu mei hono ako fakamātoato e Tohi ʻa Molomoná mo hono lekooti e ngaahi moʻoni ʻoku ʻi aí?

Fakakaukau ke mamata ʻi he vitiō ko ʻeni ʻoku kau ai ʻa e toʻutupu mei he fakahahake ʻo ʻIulopé ʻo fakamatalaʻi ʻenau ngaahi aʻusia ʻi hono lau ʻo e Tohi ʻa Molomoná mo lekooti e meʻa ne nau akó.

Ko e hā e ʻuhinga ʻoku fuʻu mahuʻinga ai e fāmilí ki he ʻEikí? Ko e hā ha meʻa makehe te u lava ʻo fai ʻi hoku fāmili ʻoʻokú he taimí ni?

ʻOku fakamatala e folofolá ki he fiemaʻu ke mali e ngaahi foha ʻo Līhaí kae lava ke nau maʻu ha fānau ʻi he fonua ʻo e talaʻofá, pea ʻoku tau ako mei he kau palōfita ʻo onopōní ko e fāmilí ko e uho ia ʻo e palani ʻa e ʻEikí ke fakahoko hotau ikuʻanga taʻengatá. ʻE ala tokoni atu e ngaahi maʻuʻanga tokoni ko ʻení ke mahino lelei ange kiate koe ʻa e mahuʻinga ʻo e fāmilí mo e ivi tākiekina ʻe lava ke maʻu ʻe he fāmilí.

• “Ko e Fāmilí: Ko ha Fanongonongo ki Māmani,” ChurchofJesusChrist.org

• Julie B. Beck, “Akoʻi ʻa e Tokāteline ʻo e Fāmilí,” Liahona, Māʻasi 2011, 32–37

• Ngaahi Tefito ʻo e Ongoongoleleí, “Fāmilí,” topics.ChurchofJesusChrist.org

ʻE founga fēfē haʻaku fakamolemoleʻi e niʻihi kehé?

Naʻe akoʻi ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni:

Naʻe akoʻi ʻe Kalaisi ʻi he kuonga ʻo e Fuakava Foʻoú “Mou fakamolemole, pea ʻe fakamolemolea ʻakimoutolu” [Luke 6:37]. Pea ʻi hotau kuongá: “Ko au, ko e ʻEikí, te u fakamolemoleʻi ʻa ia ʻoku ou loto ke fakamolemoleʻí, ka ʻoku ʻekeʻi meiate kimoutolu ʻa hoʻomou fakamolemoleʻi ʻa e kakai kotoa pē” [Tokāteline mo e Ngaahi Fuakava 64:10]. Ka neongo ia, ʻoku mahuʻinga ke fakatokangaʻi ʻe hamou niʻihi ʻoku fuʻu moʻui loto mamahí ʻa e meʻa naʻe ʻikai ke Ne folofola ʻakí. Naʻe ʻikai ke Ne pehē, “Oku ʻikai ngofua ke mou ongoʻi ʻa e mamahi moʻoní pe loto mamahi moʻoní, ʻi he ngaahi aʻusia fakamamahi mei he nima ʻo ha taha.” Pe naʻá Ne pehē, “Koeʻuhí ke lava ʻo fakamolemoleʻi kakato kimoutolú, kuo pau ke mou toe foki ki ha ngaahi tūkunga ʻoku ʻikai lelei pe tuʻunga ngaohikovia, pe maumau.” Kae naʻa mo e ngaahi maumau-fono kovi taha ʻe ala hokó, te tau toki lava pē ʻo hao hake mei heʻetau mamahí ʻi ha taimi te tau fokotuʻu ai hotau vaʻé ʻi he hala ki he fakamoʻui moʻoní. Ko e halá ko e fakamolemole ʻa ia naʻe foua ʻe Sīsū ʻo Nāsaletí, ʻa ia ʻokú Ne ui mai kiate kitautolu takitaha, “Haʻu, ʻo muimui ʻiate au” [Luke 18:22]. (Jeffrey R. Holland, “Ko e Ngāue ʻo e Fakaleleí,” Liahona, Nōvema 2018, 78–79)

Lolotonga e hoko ʻa ʻEletā Leli J. ʻIko Hoki ko ha mēmipa ʻo e Kau Fitungofulú, naʻá ne vahevahe ʻo pehē:

Kāinga, ʻoku ʻi ai ʻapē ha kakai ʻi heʻetau moʻuí kuo nau fakamamahiʻi kitautolu? ʻOku tau kukuta nai e meʻa ʻoku hangē ʻoku fakatonuhiaʻi kakato ai kitautolu ke tāufehiʻa mo e ʻitá? ʻOku tau tuku ʻapē ʻa e hīkisiá ke ne taʻofi kitautolu mei hono fakamolemoleʻi pea tukuangé? ʻOku ou fakaafeʻi kotoa kitautolu ke tau fakamolemoleʻi kakato pea tuku ke fai mei loto ʻa e fakamoʻuí. Pea tatau ai pē kapau ʻoku ʻikai hoko ʻa e fakamolemolé he ʻahó ni, ʻiloʻi ko e taimi ʻoku tau fakaʻamua ai ia mo ngāueʻí, ʻe hoko—ʻo hangē pē ko ʻene faifai pea hoko kiate aú. (Larry J. Echo Hawk, “Hange ko e Fakamolemole ʻe Kalaisi ʻa Kimoutolú, Ke Pehē pē ʻa Kimoutolu,” Liahona, Mē 2018, 16)

Ngaahi ʻEkitivitī Fakalahi ki he Akó

Ko ha kamata ʻoku kiʻi kehe

ʻE lava ke aleaʻi ʻe he kau akó ha ngaahi ʻekitivitī ʻoku ʻikai faʻa fakatokangaʻi hono tefitoʻi taumuʻá. Hangē ko ʻení, ʻe lava ke fekauʻaki ʻa e ʻalu ki he akó mo hono fakakakato ʻo e ngaahi ngāué kae ʻikai ko e maʻu ha akó. Kole ki he kau akó ke nau fakalaulauloto ki he ngaahi nunuʻa ʻo e ʻikai ke fakatokangaʻi ʻa e ngaahi taumuʻa lalahi ange ʻo ha meʻa. Tokoni ke mahino kiate kinautolu naʻe maʻu hala ʻe he kakai tokolahi ʻa e taumuʻa ʻo e Tohi ʻa Molomoná pea ʻe fakamatalaʻi ʻe he lēsoni ko ʻení ʻa e taumuʻa ko iá.

Ko hono ʻiloʻi e ngaahi tefitoʻi moʻoni ʻo e ongoongoleleí

ʻE lava ke kumi ʻe he kau akó ha ngaahi tefitoʻi moʻoni ʻo e ongoongoleleí ʻi heʻenau lau e konga ʻe tolu ʻo e 1 Nīfai 7. Hili ʻenau laú, ʻe lava ke nau fefakahokoʻaki ha ngaahi fehuʻi hangē ko e “Ko e hā ha taha ʻo e ngaahi tefitoʻi lēsoni ne u ako mei he ngaahi veesi ko ʻení?”

Kapau ʻoku fiemaʻu ʻe he kau akó ha tokoni ke mahino kiate kinautolu mo nau ʻiloʻi e ngaahi tefitoʻi moʻoní, fakakaukau ki he founga ʻe ala tokoni ai e ngaahi maʻuʻanga tokoni ko ʻení:

•  

• David A. Bednar, “Ko e Ngaahi Tefitoʻi Moʻoni ʻo ʻEku Ongoongoleleí,” Liahona, Mē 2021, 123–26

•  

Ko Hono Fakamamafaʻi e tokāteline ʻo e fāmilí

Ke tokoni ke mahino ki he kau akó ʻa e ongo ʻoku maʻu ʻe he ʻEikí fekauʻaki mo e mahuʻinga ʻo e nofomalí mo e fāmilí, fakakaukau ke fakaafeʻi kinautolu ke nau fakalaulauloto ki he founga te nau tali ʻaki e fehuʻi ko ʻení: “Ko e hā ʻoku tokanga lahi atu ai e Kau Palesitenisī ʻUluakí kiate koe mo ʻoatu ha ngaahi maʻuʻanga tokoni lahi pehē maʻaú?” (Julie B. Beck, “Akoʻi ʻa e Tokāteline ʻo e Fāmilí,” Liahona, Māʻasi 2011, 32). ʻI hono ako ʻe he kau akó ʻa e 1 Nīfai 7:1–5, fakakaukau ke vahevahe ha toe ngaahi konga ʻo e lea ʻa Sisitā Pekí pe “Ko e Fāmilí: Ko ha Fanongonongo ki Māmani” (ChurchofJesusChrist.org).