“1 Nīfai 16–18: Ko e Liahoná: Ko ha Fakahinohino ʻi he Feituʻu Maomaonganoá,” Tohi ʻa Molomoná – Tohi Lēsoni ʻa e Faiakó (2024)
“1 Nīfai 16–18: Ko e Liahoná: Ko ha Fakahinohino ʻi he Feituʻu Maomaonganoá,” Tohi ʻa Molomoná – Tohi Lēsoni ʻa e Faiakó
1 Nīfai 16–18
Ko e Liahoná: Ko ha Fakahinohino ʻi he Feituʻu Maomaonganoá
Kuó ke ongoʻi hē nai mo puputuʻu ʻi he meʻa ʻoku totonu ke ke faí pe tokanga taha ki ai ʻi he moʻuí? Naʻe mei kehe fēfē nai hoʻo moʻuí kapau naʻá ke lava lelei ange ʻo fakatokangaʻi e fakahinohino naʻe feinga e ʻEikí ke ʻoatu kiate koé? Naʻe ʻikai fuoloa mei he mavahe ʻa e fāmili ʻo Līhaí mei Selusalemá, kuo ʻomi ʻe he ʻEikí kiate kinautolu ha fakahinohino lahi ange ʻo fakafou ʻi he Liahoná. ʻE lava ke tokoniʻi koe ʻe he lēsoni ko ʻení ke ke ʻiloʻi mo muimui ki he fakahinohino ʻa e ʻEikí ʻi hoʻo moʻuí.
Ko hono tataki e kau akó ke nau fekumi ki he fakahā fakatāutahá. Tokoniʻi e kau akó ke nau tui ʻe lava ke akoʻi mo fakamāmaʻi kinautolu ʻe he Laumālie Māʻoniʻoní. Poupouʻi kinautolu ke nau lotu ki he Tamai Hēvaní ke fakaafeʻi ʻa e Laumālié ke akoʻi kinautolu.
Teuteu ʻa e tokotaha akó: Fakaafeʻi e kau akó ke nau fakatokangaʻi e ngaahi founga ʻoku ʻoange ai ʻe he ʻEikí kiate kinautolu ha tataki mo ha fakahinohino ʻi honau ʻahó.
Ngaahi ʻEkitivitī Ako ʻOku Ala Fakahokó
Ko ha fakahinohino ʻi he feituʻu maomaonganoá
ʻOku fakataumuʻa e ʻekitivitī ko ʻení ke tokoni ki he kau akó ke nau fakafekauʻaki mo e aʻusia ʻa Līhai ʻi hono foaki kiate ia ʻa e Liahoná. Ko ha founga ʻe taha ko hono tā ʻe he kau akó ʻenau fakatātaá ʻo makatuʻunga ʻi he meʻa kuo nau ʻosi ʻilo fekauʻaki mo e Liahoná pea fakaʻaongaʻi leva ʻa e fakamatalá ʻo ka fiemaʻu ke fakalahi e mahino ʻoku nau maʻú.
Vakaiʻi ha niʻihi ʻo e ngaahi fakatātā ʻo e meʻangāue fakaofo naʻe foaki kia Līhai hili ha taimi nounou mei heʻene tataki hono fāmilí mei Selusalemá.
-
Ko e hā ʻokú ke ʻilo fekauʻaki mo e meʻa ʻoku hā ʻi he ngaahi ʻīmisi ko ʻení? (vakai 1 Nīfai 16:10).
-
Ko e hā hono taumuʻá?
Fakaʻaongaʻi ʻeni ʻo ka fiemaʻu ke tokoni ke mahino ki he kau akó ʻa e Liahoná. ʻE ala tokoni foki ke mamataʻi ʻa e “Ko e Foaki ʻe he ʻEikí ʻa e Liahoná” (3:02), ʻoku maʻu ʻi he ChurchofJesusChrist.org.
Hili e fakahinohino ʻa e ʻEikí kia Līhai ke fononga mamaʻo atu ki he feituʻu maomaonganoá, naʻá ne ʻā hake ʻo maʻu ha meʻangāue fakaofo naʻe ʻomi ʻe he ʻEikí. Ko e Liahoná ko ha “meʻa fuopotopoto palasa … mo hano meʻa tuhu ʻe ua ʻa ia ʻokú ne ʻomi ha ngaahi fakahinohinó—ʻo hangē ha kāpasá—kae ʻumaʻā foki ha ngaahi fakahinohino fakalaumālie kia Līhai mo kinautolu naʻa nau muimui kiate iá, ʻi he taimi naʻa nau māʻoniʻoni aí” (Fakahinohino ki he Ngaahi Folofolá, “Liahoná,” scriptures.ChurchofJesusChrist.org).
Fakakaukauloto pe ʻe fēfē haʻo ʻā hake ʻi ha pongipongi ʻe taha ʻo maʻu ʻi ho matapaá ha meʻangāue hangē ko e Liahoná te ke lava ʻo fakaʻaongaʻi ke tataki koe ʻi ho ʻahó.
Fakakaukau ke fakahoko e ngaahi fehuʻi ko ʻení, pea fakaʻilongaʻi e tali ʻa e kau akó ke toe vakai ki ai hili hono ako ʻe he kau akó e founga ʻoku tatau ai ʻa e Liahoná mo e Laumālie Māʻoniʻoní.
-
Ko e hā naʻe mei kehe ʻi hoʻo moʻuí kapau naʻá ke maʻu ha meʻa hangē ko e Liahoná ke tataki koe?
-
Ko e hā ha ngaahi tūkunga ʻokú ke lolotonga fehangahangai mo ia te ke ala fiemaʻu ai ha fakahinohino mo ha tataki lahi ange?
Naʻe fakamatalaʻi ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ha ʻuhinga ʻe taha ʻoku totonu ke tau feinga ai ke mahino lelei ange ʻa e founga ngāue ʻa e Liahoná. Fakatokangaʻi ange ʻoku ʻuhinga ʻa e kupuʻi lea “fakataipe mo ha ʻata” ki ha ngaahi meʻa, ngaahi meʻa naʻe hoko, ngaahi talanoa, pe kakai ʻoku nau fakafofongaʻi ha meʻa kehe.
Ko e fakamatala ʻi he Tohi ʻa Molomoná ʻo e Liahoná, ko e fakahinohino pe kāpasa naʻe fakaʻaongaʻi ʻe Līhai mo hono fāmilí ʻi heʻenau fononga ʻi he feituʻu maomaonganoá, naʻe fakatautautefito hono fakakau ia ʻi he lekōtí ko ha fakataipe mo ha ʻata ki hotau kuongá pea ko ha lēsoni mahuʻinga fekauʻaki mo e meʻa ʻoku totonu ke tau fai ke fiefia ai ʻi he ngaahi tāpuaki ʻo e Laumālie Māʻoniʻoní. (David A. Bednar, “That We May Always Have His Spirit to Be with Us,” Liahona, May 2006, 30)
Ngaahi faitatau ʻi he Liahoná mo e Laumālie Māʻoniʻoní
Tā ʻi hoʻo tohinoa akó ha saati hangē ko ʻení. Fakakaukau ke lisi ha niʻihi ʻo e ngaahi meʻa ʻoku faitatau ai ʻa e Liahoná mo e Laumālie Māʻoniʻoní ʻa ia kuó ke ʻosi ʻiloʻí. ʻI hoʻo akó, fakakaukau ki he meʻa ʻokú ke ako ʻoku tokoni ke mahino lelei ange kiate koe ʻa e Laumālie Māʻoniʻoní mo e founga te ke lava ʻo fakaʻaongaʻi lelei ange ai ʻa e meʻafoaki ko ʻení ʻi hoʻo moʻuí.
|
Ngaahi ʻulungaanga ʻo e Liahoná |
Ngaahi faitatau mo e Laumālie Māʻoniʻoní |
|---|---|
Ngaahi ʻulungaanga ʻo e Liahoná
| Ngaahi faitatau mo e Laumālie Māʻoniʻoní
|
Fakakaukau ke fakaʻaliʻali ha saati tatau pea fakaafeʻi e kau akó ke lekooti e meʻa ʻoku nau akó ke teuteuʻi kinautolu ke aleaʻi e ngaahi meʻa ne nau maʻú.
Lau e ngaahi fakamoʻoni fakafolofola ko ʻení, pea lekooti e ngaahi fakaikiiki fekauʻaki mo e Liahoná ʻi he kōlomu toʻohema ʻo hoʻo sātí. ʻE lava ke kau heni ʻa e founga ngāue ʻa e Liahoná, ʻuhinga naʻe ʻoatu aí, mo e meʻa naʻe hoko ke taʻofi ai ʻene ngāué. Hili iá peá ke fakakaukauʻi ʻi he faʻa lotu ʻa e founga ʻoku fekauʻaki pe fakataipe ai ʻe he ngaahi fakaikiiki ko ʻeni kau ki he Liahoná ʻa e ngaahi ngāue ʻa e Laumālie Māʻoniʻoní. Lekooti e ngaahi faitataú ʻi he kōlomu toʻomataʻu ʻi hoʻo sātí. Hangē ko ʻení, ʻoku tau ako ʻi he 1 Nīfai 16:10, naʻe fakahinohino ʻe he Liahoná ʻa e hala ʻoku totonu ke fononga ai ʻa Līhai mo hono fāmilí ʻi he feituʻu maomaonganoá. Ko e meʻa tatau pē, ʻe lava ke fakahinohino mai ʻe he Laumālie Māʻoniʻoní ʻa e fakahinohino ʻoku fiemaʻu ke tau fou ai ʻi he moʻuí.
Fakapapauʻi pe ʻe ʻaonga ange ke lau ʻe he kau akó e ngaahi potufolofolá fakafoʻituitui, tauhoa, pe fakakulupu iiki. Ki ha ngaahi meʻa kehekehe, te ke lava ʻo fakapipiki takai ha fakatātā ʻe fitu ʻo e Liahoná ʻi he lokí pea fakapipiki ki ai mo ha taha ʻo e ngaahi fakamoʻoni fakafolofola ko ʻení. ʻE lava ke lue takai e kau akó ʻi he lokí ʻo vakaiʻi e ngaahi fakatātā kehekehé mo lekooti e ngaahi akonaki fekauʻaki mo e Liahoná ʻi heʻenau sātí. ʻE lava leva ke foki e kau akó ki honau nofoʻangá ke fakalaulauloto ki he ngaahi meʻa ʻoku faitatau ai ʻa e Liahoná mo e Laumālie Māʻoniʻoní ʻiate kinautolu pē.
Fakaafeʻi e kau akó ke vahevahe e ngaahi moʻoni ne nau ako fekauʻaki mo e Laumālie Māʻoniʻoní mei heʻenau akó. ʻOku kau ʻi he ngaahi sīpinga ʻo e ngaahi moʻoni ne nau ʻiló ʻa e ngaahi meʻá ni: ʻi heʻetau fakafanongo ki he ngaahi ueʻi ʻa e Laumālie Māʻoniʻoní, ʻe lava ke tataki kitautolu ʻe he ʻEikí ʻi heʻetau fononga ʻi he moʻuí; ʻoku ngāue ʻa e Laumālie Māʻoniʻoní ʻi heʻetau moʻuí ʻo fakatatau mo e tui, faivelenga, mo e tokanga ʻoku tau maʻú; pea ʻoku foaki mai ʻe he Laumālie Māʻoniʻoní ha mahino ʻo kau ki he ngaahi founga ʻa e ʻEikí.
Kapau naʻe fakaʻaliʻali e sātí ki he kalasí, fakakaukau ke fakaafeʻi e kau akó ke nau fakafonu e meʻa ne nau ako fekauʻaki mo e Liahoná. Hili iá, te mou lava ʻo aleaʻi fakataha ʻa e founga ʻoku fekauʻaki ai e ngaahi moʻoni ko ʻení mo e mahinó pea mo hono fakaʻaongaʻi ʻo e meʻafoaki ʻo e Laumālie Māʻoniʻoní.
-
Ko e fē ha taimi kuó ke aʻusia ai pe ko ha niʻihi kehe ha taha ʻo e ngaahi moʻoni ko ʻení pe ha ngaahi moʻoni lahi ange fekauʻaki mo e Laumālie Māʻoniʻoní?
-
ʻE tākiekina fēfē ho vā fetuʻutaki mo e Tamai Hēvaní mo Sīsū Kalaisí ʻi hoʻo fekumi ke ʻiloʻi mo muimui ki he fakahinohino mei he Laumālie Māʻoniʻoní?
Tuku ha kiʻi taimi ke ke fakakaukau ai ki hoʻo malava ke maʻu ha fakahinohino mei he Laumālie Māʻoniʻoní mo e ivi tākiekina ʻo e meʻá ni ʻi he ngaahi fili ʻokú ke fakahokó. Fakakaukau ke lekooti ha faʻahinga fakakaukau pe ongo ʻokú ke maʻu.
Kapau ʻe fiemaʻu ʻe he kau akó ha tokoni makehe ʻi hono ʻiloʻi mo muimui ki he fakahinohino ʻa e Laumālie Māʻoniʻoní, vahevahe ha ngaahi fakamatala mei he konga “Fakamatala Fakamahinó mo e Puipuituʻá” ʻi he fakaʻosinga ʻo e lēsoni ko ʻení. ʻIkai ngata aí, kapau ʻe ʻi ai ha taimi pea ʻe ʻaonga ki he kau akó, fakakaukau ke fakaʻaongaʻi e konga “Ngaahi ʻEkitivitī Fakalahi Ki he Akó.”
Fakahoko hoʻo fakamoʻoni ki he mahuʻinga ʻo hono tuku ke tataki ʻe he Laumālie Māʻoniʻoní ʻetau moʻuí. ʻE lava foki ke vahevahe ʻe he kau akó ʻenau fakamoʻoní mo e ngaahi aʻusiá.