1 Nīfai 19–22

“Te Nau Faʻa Fakangaloʻi, ka ʻE ʻIkai Te u Fakangaloʻi Koe”

ʻOkú ke ongoʻi fefe ʻi he taimi ʻoku manatua ai koe ʻe ha taha ʻoku mahuʻinga kiate koé? Lolotonga hono akoʻi ʻe Nīfai ʻa e fakamoveteveteʻi mo tānaki fakataha ʻo ʻIsilelí, naʻá ne fakaʻaongaʻi e ngaahi kikite ʻa ʻĪsaiá ke fakahaaʻi he ʻikai ngalo ʻi he ʻEikí ʻa e fale ʻo ʻIsileli kuo fakamoveteveteʻí. ʻOku fakataumuʻa ʻa e lēsoni ko ʻení ke tokoniʻi koe ke ke ongoʻi e ʻofa ʻa e ʻEikí kiate koe mo e kakai kotoa pē pea mo ʻEne finangalo ke tānaki fakataha kimoutolu kiate Iá.

Ko hono fakaafeʻi e kau akó ke nau vahevahé. Kumi ha ngaahi mōmeniti ʻi he lēsoní te ke lava ai ʻo ueʻi e kau akó ke fakalaulauloto ki he ngaahi ongo ʻoku nau maʻu fekauʻaki mo ha meʻa, pea kole ange ke nau vahevahe ʻa e meʻa ʻoku nau ongoʻí pe tohi ʻenau ngaahi ongó pea vahevahe leva. ʻE lava ke tokoni hono ʻoange ki he kau akó ha faingamālie ke fakamatalaʻi ʻenau ngaahi fakakaukaú mo e ngaahi ongó ke nau ongoʻi loto falala ange ai ʻi hono fakahaaʻi ʻenau fakamoʻoní.

Teuteu ʻa e tokotaha akó: Fakakaukau ke kole ki he kau akó ke nau omi mateuteu ke vahevahe ha foʻi lea ʻe ua pe tolu te nau fakaʻaongaʻi ke fakamatalaʻi ʻaki e ongo ʻoku maʻu ʻe Sīsū Kalaisi kiate kinautolú.

Ngaahi ʻEkitivitī Ako ʻOku Ala Fakahokó

Ko e ʻofa ʻa e Fakamoʻuí kiate kitautolú

Fakakaukau ke kamata e kalasí ʻaki hano hivaʻi ha foʻi hiva ʻoku fekauʻaki mo e ʻofa ʻa Sīsū Kalaisi kiate kitautolú, hangē ko e “ʻOku ou ʻIlo ʻOku ʻOfa Hoku Fakamoʻuí ʻIate Au” (music.ChurchofJesusChrist.org). ʻE lava ke fakaafeʻi e kau akó ke nau vahevahe ha ngaahi foʻi lea pe kupuʻi lea mei he hivá ʻoku nau mahuʻingaʻia ai.

ʻOku ʻi ai ha ngaahi taimi ʻe lava ke tau ʻiloʻi mo ongoʻi ai e ʻofa ʻa e ʻOtuá ʻi heʻetau moʻuí, ka ʻi he taimi ʻe niʻihi mahalo he ʻikai ke tau fakatokangaʻi ia ʻe kitautolu. Fakakaukauloto naʻá ke talanoa mo haʻo kaungāmeʻa naʻá ne talaatu ʻoku ʻikai ke ne fakapapauʻi pe ʻoku ʻofa ʻa e ʻOtuá ʻiate ia.

• Ko e hā te ke lava ʻo vahevahe mei he folofolá ʻe ala tokoni ki ho kaungāmeʻá?

• Ko e hā ha ngaahi aʻusia te ke lava ʻo vahevahe mo ho kaungāmeʻá fekauʻaki mo e founga kuó ke ʻiloʻi mo ongoʻi ai e ʻofa ʻa e Tamai Hēvaní mo Sīsū Kalaisí?

ʻOange ki he kau akó ha taimi ʻi he kalasí ke nau fakahoko ai ʻeni. Fakaafeʻi e kau akó ke hiki ha niʻihi ʻo ʻenau ngaahi fakakaukaú pe ngaahi fehuʻí ʻi ha tohinoa ako pea kumi e ngaahi talí lolotonga e lēsoní.

Fakalaulauloto ki hoʻo ngaahi ongo fekauʻaki mo e ʻofa ʻa e ʻOtuá kiate koé, kau ai ha ngaahi fehuʻi pe meʻa ʻokú ke hohaʻa ki ai. ʻI hoʻo akó, kumi ha ngaahi moʻoni ʻe lava ʻo tokoni atu ke mahino lelei ange kiate koe mo ke ongoʻi ʻa e ʻofa ʻoku maʻu ʻe he Tamai Hēvaní mo Sīsū Kalaisi kiate koé.

Ko e akoʻi ʻe Nīfai e ʻofa ʻa e Fakamoʻuí ʻiate kitautolú

ʻI he 1 Nīfai 19, naʻe kikiteʻi ai ʻe Nīfai ʻa e moʻui mo e misiona ʻa Sīsū Kalaisi ʻi he kahaʻú. Lau ʻa e 1 Nīfai 19:7–10, ʻo kumi e meʻa naʻe akoʻi ʻe Nīfai kau ki he founga ngaohi ʻa Sīsū Kalaisi lolotonga Hono taimi ʻi he māmaní pea mo e ʻuhinga te Ne loto fiemālie ai ke ngaohi peheʻi ai Iá.

• Ko e hā ha ngaahi foʻi lea pe ngaahi kupuʻi lea ʻoku hā makehe kiate koe mei he ngaahi veesi ko ʻení? Ko e hā hono ʻuhingá?

• ʻE liliu fēfē ʻe he mahino ʻokú ke maʻu ki he ngaahi akonaki ʻi he ngaahi veesi ko ʻení ʻa hoʻo ngaahi ongo ki he Tamai Hēvaní mo Sīsū Kalaisí?

Fakanounouʻi e palakalafi ko ʻení pe fakaafeʻi ha tokotaha ako ke ne vahevahe ia ki he kalasí.

Hili hono lekooti ʻe Nīfai ʻene ngaahi kikite kau kia Sīsū Kalaisí, naʻá Ne vahevahe ha ngaahi kikite mei he palōfita ko ʻĪsaiá ʻi he Fuakava Motuʻá fekauʻaki mo e fakamoveteveteʻi mo hono fakatahatahaʻi ʻo ʻIsilelí. Naʻe mahuʻinga e ngaahi kikite ko ʻení kia Nīfai mo hono fāmilí, ʻa ia naʻe fakamoveteveteʻi kinautolu mei honau fonua tupuʻanga ko Selusalemá koeʻuhí ko e faiangahala ʻa e kakai naʻe nofo ʻi he feituʻú ko ia. Naʻe fakahaaʻi ʻe he ngaahi kikite ʻa ʻĪsaiá ʻe ongoʻi ʻe he konga lahi ʻo e kau ʻIsilelí kuo fakangaloʻi kinautolu ʻe he ʻEikí ʻi honau tuʻunga fakamoveteveteʻí.

Lau ʻa e 1 Nīfai 21:14–16 pea kumi ki he ngaahi folofola ʻa e ʻEikí kiate kinautolu ʻe ongoʻi liʻekiná.

Kapau ʻoku fiemaʻu tokoni e kau akó ʻi he kupuʻi lea “ʻoku ou manatu maʻu ai pē ki ho ngaahi ʻaá” (1 Nīfai 21:16), te ke lava ʻo fakamatalaʻi ʻoku fakahaaʻi ʻe he kupuʻi lea ko ʻení ʻoku tokangaʻi mo maluʻi maʻu pē ʻe he ʻEikí ʻa Hono kakaí.

• ʻOkú ke vakai fēfē ki hono fakahaaʻi e ʻofa ʻa e Fakamoʻuí ʻi he ngaahi veesi ko ʻení?

• Ko e hā ha foʻi moʻoni te ke lava ʻo fakamatalaʻi fekauʻaki mo Sīsū Kalaisi ʻo makatuʻunga ʻi he meʻa kuó ke ako he ʻaho ní?

  Ko e foʻi moʻoni ʻe taha ʻe lava ke fakaʻilongaʻi ʻe he kau akó ko e ʻoku ʻofa ʻa e ʻEikí ʻiate kitautolu pea he ʻikai te Ne teitei fakangaloki kitautolu. Fakakaukau ke hiki ʻa e meʻa ko ení ʻi he palakipoé.

• 1 Nīfai 22:9–12

• 1 Nīfai 22:24–25

• 3 Nīfai 22:7–8

• Ko e hā ha ngaahi tūkunga ʻe lava ke faingataʻa ai ki ha kakai ʻe niʻihi ke nau tui ki he moʻoni ko ʻení?

• Ko e hā ʻe lava ʻo tokoni ke tau ʻiloʻi lelei ange ai mo ongoʻi e ʻofa ʻa Sīsū Kalaisi maʻatautolú?

ʻOku fakahaaʻi e ʻofa ʻa e Fakamoʻuí ʻi Heʻene finangalo ke tānaki fakataha e kakaí kiate Iá

Naʻe fakamoveteveteʻi e kakai ʻo ʻIsileli ʻi he kuonga muʻá ʻi he taimi kotoa pē naʻe tuku ai ʻenau moihū ki he [ʻEikí] mo maumauʻi ʻenau ngaahi fuakavá mo e ngaahi fekau ʻa e ʻOtuá (vakai, 2 Nīfai 6:10–11; 10:3–6). ʻOku tānaki fakataha e kakai ʻIsilelí ʻi he taimi ʻoku nau haʻu ai kia Kalaisí, tali ʻEne ongoongoleleí ʻo fakafou ʻi he papitaisó, mo tauhi ʻEne ngaahi fekaú. Naʻe talaʻofa ʻe he Fakamoʻuí ki ʻIsileli naʻe fakamoveteveteʻí he ʻikai ke Ne fakangaloʻi kinautolu pea te Ne tānaki kinautolu kiate Ia ʻi he ngaahi ʻaho fakaʻosí (vakai, 1 Nīfai 15:13–14; 2 Nīfai 6:11; 9:1–2; 10:7–8).

Ako e ʻuluʻi vahe ʻo e 1 Nīfai 21 mo e 22 ke mahino lelei ange ʻa e meʻa ʻoku kikiteʻi ʻe ʻĪsaia mo ne akonaki ʻaki ʻi he ngaahi vahe ko ʻení.

Ako e ngaahi potufolofola ko ʻeni fekauʻaki mo hono tānaki fakataha ʻo ʻIsileli ʻi he ngaahi ʻaho kimui ní. Tokanga ki he ngaahi foʻi lea pe kupuʻi lea ʻoku nau fakahaaʻi ʻa e ʻofa ʻa e ʻEikí ki Hono kakaí.

Fakakaukau ki ha ngaahi founga ke fakakau ai e kau akó ʻi he ʻekitivitī ako ko ʻení. Ko e founga ʻe taha ko hono hiki ʻa e potufolofola takitaha ʻi ha kiʻi kaati pe laʻipepa mavahe koeʻuhí ke tofu ʻa e tokotaha ako takitaha ʻi he kalasí ʻi he laʻipepa. Fakaafeʻi e kau akó ke nau ako e veesi ʻi heʻenau laʻipepá, feinga ke ʻiloʻi ʻa e meʻa ʻe fai ʻe he ʻEikí ke tānaki fakataha ʻaki ʻa ʻIsilelí, pea fakafetongi leva ʻenau laʻipepá mo ha kaungā ako. ʻE lava ke toutou fakafetongi ʻe he kau akó ʻenau ʻū laʻipepá.

• 1 Nīfai 22:9–12

• 1 Nīfai 22:24–25

• 3 Nīfai 22:7–8

• Ko e hā e ngaahi talaʻofa naʻe fakahoko ʻe he ʻEikí ʻi he ngaahi veesi ko ʻení? ʻOku fakahaaʻi fēfē ʻe he ngaahi talaʻofa ko ʻení ʻa ʻEne ʻofa ki he kakai kotoa pē?

• Ko e hā ha ngaahi sīpinga te ke lava ʻo fakakaukau ki ai ʻi hoʻo moʻuí pe moʻui ʻa e niʻihi kehé ʻa ia kuo tānaki ai ʻe he ʻEikí ʻa e kakaí kiate Iá?

   

Fakaafeʻi e kau akó ke vahevahe ʻenau ngaahi ongó, aʻusiá mo e ngaahi fakamoʻoní. Fakamoʻoni ki he kau akó fekauʻaki mo e ʻofa ʻoku maʻu ʻe Sīsū Kalaisi maʻanautolu fakafoʻituitui pea mo e tokotaha kotoa pē ʻi he māmaní.

Fakamatala Fakamahinó mo e Puipuituʻá

ʻI he taimi ʻoku ou faiangahala aí, ʻoku ou taʻefeʻunga nai mo e ʻofa ʻa e ʻOtuá?

Naʻe akoʻi ʻe Brother Peletilī R. Uilikoki ʻo e Kau Palesitenisī Lahi ʻo e Kau Talavoú ʻo pehē:

Manatuʻi ʻoku malava ʻa e liliú, ko e fakatomalá ko ha ngāue ia, pea ʻoku ʻikai haohaoa ʻa e moʻui tāú. Kae mahuʻinga tahá, manatuʻi ʻoku loto-fiemālie ʻa e ʻOtuá mo Kalaisi ke tokoniʻi kitautolu ʻi heni he taimí ni. …

Kuo mamahi ha tokolahi ʻi ha ngaahi vā fetuʻutaki kuo maumau mo motuhia ʻo faingataʻa ai ke nau tui ki he manavaʻofa mo e faingataʻaʻia fuoloa ʻa e ʻOtuá. ʻOku faingataʻa ke nau vakai ki he ʻOtuá ʻi Hono tuʻungá—ko ha Tamai ʻofa ʻoku tokoni ʻi heʻetau faingataʻaʻiá mo afioʻi e founga ke “foaki … ʻa e ngaahi meʻa leleí kiate kinautolu ʻoku kole kiate iá” [3 Nīfai 14:11]. Ko ʻEne ʻaloʻofá ʻoku ʻikai ko ha pale pē ia maʻanautolu ʻoku moʻui tāú. Ko e “tokoni fakalangi” ia ʻokú Ne fakahoko ʻa ia ʻoku tokoniʻi ai kitautolu ke tau moʻui tāú. ʻOku ʻikai ko ha pale pē ia maʻá e angamāʻoniʻoní. Ko e “fakakoloa [ia] ʻo e ivi” ʻokú Ne foaki ʻa ia ʻoku tokoniʻi ai kitautolu ke tau angamāʻoniʻoní [Dieter F. Uchtdorf, “Ko e Meʻaʻofa ʻo e ʻAloʻofá,” Liahona, Mē 2015, 107]. ʻOku ʻikai ke tau ʻunuʻunu pē ki he ʻOtuá mo Kalaisi. ʻOku tau ʻaʻeva mo Kinaua. (Bradley R. Wilcox, “ʻOku ʻIkai Haohaoa ʻa e Moʻui Tāú,” Liahona, Nōvema 2021, 62, 67)

Ko e hā ka fakafehoanaki ai ʻe Kalaisi Ia ki ha faʻē?

Naʻe akoʻi ʻe ʻEletā Teili G. Lenilani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Naʻe fehuʻi ʻe he [ʻEikí], “ʻE faʻa fakangalongaloʻi ʻe ha fefine ʻene tama ʻoku huhú, ke ne taʻe ʻofa ai ki he tama ʻa hono manavá?” ʻOku tatau pē ʻa e taʻe malava ke fakangaloki ʻe ha faʻē ʻofa ʻa ʻene tama kei valevalé, mo e folofola ʻa Sihova ʻoku toe taʻeueʻia ange ʻa ʻEne līʻoá. Naʻá Ne fakapapau: “ʻIo, te nau faʻa fakangaloʻi nai, ka ʻe ʻikai te u fakangaloʻi koe. … Vakai, kuó u tohi tongi koe ʻi hoku ongo ʻaofi nimá; ʻoku ʻi hoku ʻaó maʻu ai pē ʻa hoʻo ngaahi ʻaá” [1 Nīfai 21:15–16]. Koeʻuhí naʻe kātekina ʻe Sīsū Kalaisi ʻa e feilaulau fakalelei taʻe-fakangatangatá, ʻokú Ne ʻafioʻi lelei ai ʻetau ngaahi ongó [vakai, ʻAlamā 7:11–13]. ʻOkú Ne ʻafioʻi maʻu pē kitautolu pea mo hotau ngaahi tūkungá. (Dale G. Renlund, “Taʻetotonu Fakatupu Loto-Lili,” Liahona, Mē 2021, 43)

Te tau ʻiloʻi fēfē ʻa e ʻofa ʻa e ʻOtuá kiate kitautolú?

Naʻe akoʻi ʻe Sisitā Sūsana H. Pota ʻo e Kau Palesitenisī Lahi ʻo e Palaimelí ʻo pehe:

ʻOku ʻikai ke maʻu e ʻofa ʻa e ʻOtuá ʻi he ngaahi tūkunga ʻo ʻetau moʻuí, ka ʻi Hono takaua ʻi heʻetau moʻuí. ʻOku tau ʻilo ʻEne ʻofá ʻi he taimi ʻoku tau maʻu ai ha mālohi ʻoku ope atu ʻi hotau mālohí pea ʻi hono ʻomi ʻe he Laumalié ha nonga, fiemālie mo ha fakahinohino. ʻE ngali faingataʻa ha ngaahi taimi ke ongoʻi ʻEne ʻofá. Te tau lava ʻo lotu ke fakaʻā hotau matá ke vakai ki Hono toʻukupú ʻi heʻetau moʻuí pea ke ʻiloʻi ʻEne ʻofá ʻi he masani ʻo ʻEne ngaahi fakatupú. (Susan H. Porter, “ʻOfa ʻa e ʻOtua: Ko e Fakafiefia Taha Ia ki he Laumalié,” Liahona, Nōvema 2021, 35)

Ngaahi ʻEkitivitī Fakalahi ki he Akó

1 Nīfai 19:18–19. Ko ha taumuʻa mahuʻinga ʻo e Tohi ʻa Molomoná

ʻI he 1 Nīfai 19:18–19, naʻe fakamatalaʻi ai ʻe Nīfai ʻa ʻene tefitoʻi taumuʻa ki hono faʻu ʻene lekōtí. Fakakaukau ke fakaafeʻi e kau akó ke lau e ngaahi veesi ko ʻení pea kumi ki he meʻa naʻe akoʻi ʻe Nīfai fekauʻaki mo e ʻuhinga naʻá ne faʻu ai ʻene lekōtí.

Fakakaukau ke fakaʻaongaʻi e ngaahi veesi ko ʻení ke tokoni ke mahino ki he kau akó ko e lau e folofolá ko ha founga mālohi ia ke manatu fakaʻaho ai ki he Fakamoʻui ko Sīsū Kalaisí. Fakakaukau ke fehuʻi ange ha taha pe lahi ange ʻo e ngaahi fehuʻí ni ko ha konga ʻo e fealēleaʻaki ko ʻení:

• ʻOku tokoniʻi fēfē kitautolu ʻe he Tohi ʻa Molomoná ke tau manatuʻi ʻa Sīsū Kalaisí?

• Fakakaukau ki ha taimi naʻá ke ongoʻi ofi ange ai ki he Fakamoʻuí koeʻuhí ko hoʻo ako folofolá. Ko e hā ha faikehekehe naʻe hoko ai ki ho ʻahó pe ko hoʻo fakamoʻoní?

• Ko e hā ha ngaahi liliu ʻokú ke ongoʻi ʻoku fiemaʻu keke fakahoko ʻi hoʻo ako fakatāutahá kae lava ke ke manatuʻi lelei ange ʻa e Fakamoʻui ko Sīsū Kalaisí?

ʻEkitivitī akoako fakahokó

ʻI he fakaʻosinga ʻo e lēsoní, fakakaukau ke vahevahe e lea ko ʻeni ʻa ʻEletā Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku fakaafeʻi kitautolu ʻe hotau Fakamoʻuí ke tau manatu maʻu ai pē kiate Ia ʻo hangē ko ʻEne manatu maʻu ai pē kiate kitautolú” (“Manatu Maʻu Ai Pē Kiate Ia,” Liahona, Mē 2016, 110).

Fakaafeʻi e kau akó ke fakakaukau ki he ngaahi fili te nau lava ʻo fai ke nau manatuʻi lahi ange ai e Tamai Hēvaní mo Sīsū Kalaisi lolotonga honau ʻahó pe uiké.

1 Nīfai 22:15–28. ʻOku ʻikai ʻaonga ke manavahē ʻa e kau māʻoniʻoní.

Mahalo ʻe ʻaonga ki he kau akó hano aleaʻi e ngaahi akonaki ʻa Nīfai ʻi he konga vaeaua hono ua ʻo e 1 Nīfai 22. Fakakaukau ke kole ki he kau akó ke nau aleaʻi e ngaahi ʻuhinga ʻoku ongoʻi manavahē ai ha kakai ʻe niʻihi ʻi he ngaahi meʻa ʻe hoko ʻi he ngaahi ʻaho fakaʻosí. Fakamatalaʻi ange naʻe fakaʻosi ʻe Nīfai ʻene ʻuluaki tohí ʻaki hono vahevahe e ngaahi akonaki ʻe lava ke ne ʻomi ha ʻamanaki lelei ki he kau angatonu ʻoku nau moʻui ʻi he ngaahi ʻaho fakaʻosí.

Fakaafeʻi e kau akó ke nau lau ʻa e 1 Nīfai 22:15–28, pea fekumi ki he ngaahi akonaki ʻe lava ʻo tokoni ke tau ongoʻi ai ʻa e ʻamanaki leleí mo ikunaʻi e ngaahi manavasiʻi fekauʻaki mo e moʻui ʻi he ngaahi ʻaho fakaʻosí. Fakaafeʻi e kau akó ke vahevahe ʻenau ngaahi fakakaukaú mo e ngaahi ongó.