1 Nīfai 16–22

Vakai Fakalūkufuá

Naʻe ʻikai fuoloa mei he mavahe ʻa e fāmili ʻo Līhaí mei Selusalemá, kuo ʻomi ʻe he ʻEikí kiate kinautolu ha fakahinohino lahi ange ʻo fakafou ʻi he Liahoná. Naʻa nau fehangahangai mo ha ngaahi faingataʻa kehekehe ʻi he feituʻu maomaonganoá, pea ʻoku ʻomi ʻe he founga naʻe tali ʻaki ʻe Nīfai e ngaahi faingataʻa ko ʻení ha sīpinga ʻo e founga ke tau tali ʻaki hotau ngaahi sivi ʻi he moʻuí. Lolotonga hono akoʻi ʻe Nīfai ʻa e fakamoveteveteʻi mo tānaki fakataha ʻo ʻIsilelí, naʻá ne fakaʻaongaʻi e ngaahi kikite ʻa ʻĪsaiá ke fakahaaʻi he ʻikai ngalo ʻi he ʻEikí ʻa e fale ʻo ʻIsileli kuo fakamoveteveteʻí. Naʻá ne akoʻi foki neongo pe ko e hā e tupuʻanga ʻo ʻetau faingataʻaʻiá, ka ʻoku ʻomi ʻe Sīsū Kalaisi ha mālohi mo ha fakamoʻui kiate kinautolu ʻoku fekumi kiate Iá.

Teuteu ke Akoʻí

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

1 Nīfai 16–18

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau ʻiloʻi mo muimui ki he fakahinohino ʻa e ʻEikí ʻi heʻenau moʻuí.

• Teuteu ʻa e tokotaha akó: Fakaafeʻi e kau akó ke nau fakatokangaʻi e ngaahi founga ʻoku ʻoange ai ʻe he ʻEikí kiate kinautolu ha tataki mo ha fakahinohino ʻi honau ʻahó.

• Ngaahi ʻAtá: ʻĪmisi ʻe taha pe lahi ange ʻo e Liahoná

• Fokotuʻu ki he akoʻi he konifelenisi fakavitioó: Hili hono faʻu ʻe he kau akó ʻa e sātí ʻo hangē ko e fakahinohino ʻi he lēsoní, fakakaukau ke fakaafeʻi kinautolu ke nau ngāue ʻaki ʻa e polokalama fetalanoaʻakí pe whiteboard ke vahevahe ʻa e meʻa ne nau ako fekauʻaki mo e Liahoná. Te nau lava leva ʻo aleaʻi fakataha ʻa e founga ʻoku fekauʻaki ai e ngaahi moʻoni ko ʻení mo e mahino pea mo hono fakaʻaongaʻi ʻo e meʻafoaki ʻo e Laumālie Māʻoniʻoní.

1 Nīfai 16–17

Taumuʻa ʻo e lēsoní: ʻE lava ke tokoni e lēsoni ko ʻení ke ako ʻe he kau akó e founga ke fakatatau ai e folofolá pea fehangahangai mo e ngaahi faingataʻá ʻi he tuí.

• Teuteu ʻa e tokotaha akó: Fakaafeʻi e kau akó ke nau lau ʻa e 1 Nīfai 19:23 pea fakakaukau ki hono ʻuhinga ʻo e fakatatau ʻa e folofolá kiate kitautolú.

• Ngaahi Vitioó: “Ko e Tataki ʻe he ʻEikí ʻa e Fononga ʻa Līhaí” (16:18; mamata mei he taimi 5:33 ki he 16:18); “Ko e Fekauʻi ʻe he ʻEikí kia Nīfai ke Foʻu ha Vaka” (15:12; mamata mei he taimi 0:00 ki he 12:07)

• Fokotuʻu ki he akoʻi he konifelenisi fakavitioó: ʻE lava ke hoko e tūkunga ʻi he kamataʻanga ʻo e lēsoní ko ha faingamālie lelei ke toe vakaiʻi ai e tuʻunga ʻoku ʻi ai e ako folofola fakataautaha ʻa e kau akó. Ke fetongi ʻaki e tūkungá, fakakaukau ke fakaʻaliʻali ʻi he screen ha fehuʻi hangē ko e “Ko e hā ha ngaahi meʻa ʻoku faʻa hohaʻa ki ai e toʻutupú ʻi hono lau e folofolá?” pea fakaʻatā e kau akó ke nau tali ʻo fakaʻaongaʻi ha founga fili fakapulipuli pe tali fehuʻi.

1 Nīfai 17–18

Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó ʻa e ʻofa mo ʻenau houngaʻia ʻi he ʻEikí, neongo pe ko e hā e ngaahi tūkunga ʻoku nau fehangahangai mo iá.

• Teuteu ʻa e tokotaha akó: Fakaafeʻi e kau akó ke nau teuteu ke vahevahe ha ngaahi aʻusia kuo nau maʻu naʻe tokoni ke nau ongoʻi ai ha ʻofa mo ha houngaʻia lahi ange ki he ʻOtuá.

• Ngaahi Vitioó: “Ko e Tukufolau ʻa e Fāmili ʻo Līhaí ki he Fonua ʻo e Talaʻofá” (12:53; mamata mei he taimi 3:13 ki he 11:31); “Ke u Tohoakiʻi ʻa e Kakai Fulipē Kiate Au” (13:42; mamata mei he taimi 3:52 ki he 4:40)

• Fokotuʻu ki he akoʻi he konifelenisi fakavitioó: Ki he ʻekitivitī ʻoku fakafehoanaki ai e ngaahi ngāue mo e tōʻonga ʻa Nīfaí mo ia ʻo Leimana mo Lēmiuelá, fakakaukau ke fakaafeʻi e kau akó ke nau fili ʻa e “Fononga ʻi he feituʻu maomaonganoá” pe “Foʻu ha vaká.” Hili iá pea ʻai ke nau lau e ngaahi potufolofola ʻoku fekauʻaki mo ʻenau filí pea teuteu ke vahevahe ʻa e meʻa ne nau akó mo e toenga ʻo e kalasí.

1 Nīfai 19–22

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke nau ongoʻi e ʻofa ʻa e ʻEikí kiate kinautolú mo e kakai kotoa pē pea mo ʻEne finangalo ke tānaki kinautolu kiate Iá.

• Teuteu ʻa e tokotaha akó: Fakakaukau ke kole ki he kau akó ke nau omi mateuteu ke vahevahe ha foʻi lea ʻe ua pe tolu te nau fakaʻaongaʻi ke fakamatalaʻi ʻaki e ongo ʻoku maʻu ʻe Sīsū Kalaisi kiate kinautolú.

•  

Toe Vakaiʻi Hono 2 ʻo e Fakataukei Fakatokāteliné

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ha ngaahi fakamoʻoni fakafolofola mo ha ngaahi kupuʻi lea fakafolofola mahuʻinga ki ha niʻihi ʻo e ngaahi potufolofola fakataukei fakatokāteline ʻo e Tohi ʻa Molomoná.

Fakatokangaʻi ange: Mahalo ʻe fiemaʻu ke akoʻi ha lēsoni potufolofola fakataukei fakatokāteline ke fetongi ʻaki e lēsoni fakamanatu ko ʻení. Vakai ki he taimi tēpile ʻo e lēsoní ʻa ia ʻoku ʻomi ʻe he talēkita fakaʻēliá pe fakavahefonuá pe kouʻōtineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e lele ʻa e seminelí.

• Teuteu ʻa e tokotaha akó: Fakaafeʻi e kau akó ke nau fakakaukau pea mateuteu ke aleaʻi ha faʻahinga potufolofola pē kuó ne tokoniʻi kinautolu ʻi heʻenau moʻuí.

• Ngaahi Naunaú: Laʻipepa ʻe ua ke faʻu ʻaki ʻe he tokotaha ako takitaha ʻenau kaati manatú; ngaahi naunau ʻaati hangē ko e kala pe peni fakaʻilonga

• Fokotuʻu ki he akoʻi he konifelenisi fakavitioó: Hili hono fakakakato ʻe he kau akó ʻenau kaati manatú, tuku e kau akó ʻi he ngaahi loki fetalanoaʻakí (tautau toko ua pe fakakulupu iiki) ke ako maʻuloto ha niʻihi ʻo e ngaahi potufolofola fakataukei fakatokāteline ʻi heʻenau kātí. ʻE lava ke tuku ʻe ha tokotaha ako ʻe taha ha tafaʻaki ʻe taha ʻo ʻene kātí ki he meʻafaitaá, pea ʻe lava ke akoako ʻe he tokotaha ako ʻe tahá pe ko e kau ako kehe ʻi he loki fetalanoaʻakí ʻa e meʻa ʻoku ʻi he tafaʻaki ʻe taha ʻo e kātí.