2 Nīfai 26–30

Vakai Fakalūkufuá

Naʻe talaʻofa ʻe Sīsū Kalaisi ke fakahoko e ngāue fakaofo ʻo hono fakafoki mai ʻo ʻEne ongoongoleleí, kau ai e Tohi ʻa Molomoná, ki he māmaní ʻi he ngaahi ʻaho kimui ní. Naʻe ʻiloʻi ʻe Nīfai ha niʻihi ʻo e ngaahi fakakaukau mo e ngaahi founga hala ʻe fakaʻaongaʻi ʻe Sētane ke feinga ke fakatafoki ʻaki e kakaí meia Sīsū Kalaisí. Naʻá ne fakamatalaʻi ko e ʻilo mei he Tamai Hēvaní ʻoku faʻa maʻu māmālie ia ʻi heʻetau loto fiemālie ke hokohoko atu ke tali e meʻa ʻokú Ne akoʻi maí. Naʻe toe kikite foki ʻa Nīfai ʻe ʻikai tali ʻe ha kakai tokolahi e Tohi ʻa Molomoná ʻi he ngaahi ʻaho fakaʻosí koeʻuhí kuo nau maʻu ʻa e Tohi Tapú.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ki he lēsoni takitaha.

2 Nīfai 27

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ongoʻi ʻe he kau akó ha loto houngaʻia lahi ange ki he ʻEikí ʻi hono fakafoki mai ʻo e Tohi ʻa Molomoná ki he māmaní.

• Teuteu ʻa e tokotaha akó: Fakaafeʻi e kau akó ke omi mateuteu ke vahevahe fekauʻaki mo ha taha kuó ne fai ha meʻa fakaofo maʻanautolu pe ko ha taha ʻoku nau ʻilo. Hangē ko ʻení, mahalo naʻe fakahaofi kinautolu ʻe ha taha mei ha tuʻunga fakatuʻutāmaki pe foaki ange ha meʻaʻofa lahi maʻanautolu.

• Vitiō: “Ko e Tohi ʻa Molomoná: Naʻe Mei Fēfē Nai Hoʻo Moʻuí Ka Ne ʻIkai Ia?” (15:01; mamata mei he taimi 5:38 ki he 11:26)

• Fokotuʻu ki hono akoʻi ʻi he konifelenisi vitioó: Fakakaukau ke vahevahe e kau akó ki ha ngaahi loki alēlea pea ʻai ke nau fakafonu e saati ʻi he lēsoní mo ʻenau ngaahi kulupú.

2 Nīfai 28:1–26

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke ʻiloʻi ʻa e ngaahi founga olopoto ʻa Sētané pea fekumi ki he tokoni ʻa e Fakamoʻuí ke ikunaʻi kinautolú.

• Teuteu ʻa e tokotaha akó: Fakakaukau ke fakaafeʻi e kau akó ke nau mamata ʻi he “Tokanga ke Lotu Maʻu Ai Pē” (15:59) mei he taimi 1:27 ki he 5:00, ʻo kumi e founga ʻe lava ke akoʻi ai ʻe he mahino kau ki he fanga monumanu fekaí ha ngaahi moʻoni mahuʻinga fekauʻaki mo e ngaahi founga ʻa Sētané. ʻOku maʻu e foʻi vitioó ʻi he ChurchofJesusChrist.org.

• Fokotuʻu ki hono akoʻi ʻi he konifelenisi vitioó: Lolotonga e konga ʻo e lēsoní ʻoku kumi ai ʻe he kau akó ha ngaahi potufolofola pe akonaki mei he kau taki ʻo e Siasí ʻa ia ʻe lava ʻo tokoni ke nau ikunaʻi ʻa Sētané, fakakaukau ke fakaafeʻi kinautolu ke ngāue ʻaki e polokalama fetalanoaʻakí ke ʻohake ai e meʻa ʻoku nau maʻú. Fili ha ngaahi potufolofola pe fakamatala ke lau fakataha ko ha kalasi.

2 Nīfai 28:27–32

Taumuʻa ‘o e lēsoní: ʻE lava ke tokoni e lēsoni ko ʻení ke fakaloloto ʻenau mahino ki he founga ʻoku fakahā mai ai ʻe he Tamai Hēvaní Hono finangaló kiate kitautolú.

• Teuteu ʻa e tokotaha akó: Fakaafeʻi e kau akó ke lau māmālie ʻa e 2 Nīfai 28:30 pea omi mateuteu ki he kalasí ke vahevahe ha sīpinga ʻo e founga ʻoku akoʻi māmālie ai kitautolu ʻe he ʻOtuá ʻa ʻEne ongoongoleleí.

• Meʻa: Ko ha meʻakai lahi ke vahevahe mo ha tokotaha ako

•  

Fakataukei Fakatokāteliné: 2 Nīfai 28:30

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea folofola mahuʻinga ʻo e 2 Nifai 28:30, fakamatalaʻi ʻa e tokāteline ʻoku akoʻi ʻi he potufolofolá ni, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

• Teuteu ʻa e tokotaha akó: Fakakaukau ke fakaafeʻi e kau akó ke ako maʻuloto ʻa e potufolofola mo e kupuʻi lea folofola mahuʻinga ko e “2 Nīfai 28:30: ʻE foaki ʻe he ʻOtuá ʻki he fānau ʻa e tangatá ʻa e ʻotu lea ki he ʻotu lea, ʻa e akonaki ki he akonaki.’”

• Meʻa ke fakaʻaliʻalí: Ko e ngaahi tūkunga mo e ngaahi fehuʻi fealēleaʻaki ʻi he konga “Akoako Fakahokó”

• Fokotuʻu ki hono akoʻi ʻi he konifelenisi vitioó: Hili hono kole ki he kau akó ke fakamatalaʻi e ʻuhinga ʻo e “ʻotu lea ki he ʻotu leá”, fakakaukau ke poupouʻi kinautolu ke fakaʻaongaʻi ʻenau meʻafaitaá ke fakatātaaʻi ha meʻa naʻe pau ke nau ako ke fakahoko ʻi he ʻotu lea ki he ʻotu lea, pe ako māmālie.

2 Nīfai 29

Taumuʻa ʻo e lēsoní: ʻOku fakataumuʻa ʻa e lēsoni ko ʻení ke tokoniʻi e kau akó ke loto fiemālie ange ke tali e folofola ʻa e ʻEikí ʻi heʻenau moʻuí.

• Teuteu ʻa e tokotaha akó: Fakaafeʻi e kau akó ke fakakaukau ki he meʻa ʻoku nau fai ke ongoʻingofua ai e takiekina mei he ʻOtuá.

• Laʻipepa Tufa: Ko e ngaahi fehuʻi ke tufa ki he kau akó pe fakaʻaliʻali koeʻuhí ke lava ʻo fakakakato ia ʻi heʻenau tohinoa akó

• Meʻa: Ko ha ipu ne maha

•  

• Fokotuʻu ki hono akoʻi ʻi he konifelenisi vitioó: Hili hono fehuʻi ange “Ko e hā ʻa e ʻilo mo e ngaahi tāpuaki ʻokú ke pehē ʻoku finangalo e ʻOtuá ke tau maʻu ʻo fakafou ʻi he Tohi ʻa Molomoná?” te ke lava ʻo tataki e kau akó ki he pōpoaki konifelenisi lahi ʻo ʻOkatopa 2017 ʻa Palesiteni Lāsolo M. Nalesoni, “Ko e Tohi ʻa Molomoná: Ne Mei Fēfē Nai Hoʻo Moʻuí Ka Ne ʻIkai Ia?” Ensign pe Liahona, Nōvema 2017, 60–63). Fakakaukau ke huluʻi e vitiō ʻo ʻene pōpoakí mei he taimi 5:35 ki he 8:44 ke fanongo ki he ngaahi sīpinga ʻo e tali ʻa e kakaí ki he fehuʻi ko ʻení.