2 Nīfai 28:27–32

“Ko Ia ʻOkú Ne Tali [ʻa e ʻOtuá], Te [Ne] Foaki ʻo Lahi Ange Kiate Ia”

ʻOku ʻi ai haʻo ngaahi fehuʻi fakalaumālie ʻoku teʻeki ke tali, pe ʻokú ke fakaʻamu nai ha taimi ʻe niʻihi naʻe vave ange e tupulaki hoʻo fakamoʻoní? Naʻe fakamatalaʻi ʻe Nīfai ko e ʻilo mei he Tamai Hēvaní ʻoku faʻa haʻu māmālie ia ʻi heʻetau loto-fiemālie ke hokohoko atu ʻetau maʻu e meʻa ʻokú Ne akoʻi mai kiate kitautolú. ʻE lava ke tokoni e lēsoni ko ʻení ke fakaloloto hoʻo mahino ki he founga ʻoku fakahā mai ai ʻe he Tamai Hēvaní ʻa e moʻoní kiate kitautolú.

Ko hono akoʻi e kau akó ke fakatatau e folofolá. Ko hono fakatatau ʻo e folofolá, ko hono fakahoa ia ʻo e folofolá ki he moʻui ʻa ha tokotaha. Poupouʻi e kau akó ke ʻeke ha ngaahi fehuʻi ʻo hangē ko e, “Ko e hā ha ngaahi tūkunga mo e ngaahi meʻa ʻi heʻeku moʻuí ʻoku tatau mo e ngaahi tūkunga mo e ngaahi meʻa ʻi he potufolofola ko ʻení?” pe “ʻOku ou faitatau fēfē nai mo e kakai ʻoku tau ako ki ai ʻi he folofolá?”

Teuteu ʻa e tokotaha akó: Fakaafeʻi e kau akó ke lau ʻa e 2 Nīfai 28:30 pea omi mateuteu ki he kalasí ke vahevahe ha sīpinga ʻo e founga ʻoku akoʻi māmālie mai ai ʻe he ʻOtuá ʻEne ongoongoleleí kiate kitautolú.

Ngaahi ʻEkitivitī Ako ʻOku Ala Fakahokó

ʻOku akoʻi kitautolu ʻe he ʻOtuá ʻi he foʻi laka ki he foʻi laka

Te ke lava ʻo kamata e kalasí ʻaki haʻo ʻoange ki ha tokotaha ako ha meʻakai ifo ʻa ia ʻoku fuʻu lahi ke kai ʻi ha foʻi maʻanga pē ʻe taha, kae ʻoua ʻe fakaʻaongaʻi ʻa e talanoa fakatātā ko ʻeni fekauʻaki mo ha sitepú. ʻI he kamata ʻa e tokotaha akó ke uʻú, fehuʻi ange pe ko e hā naʻá ne kamata ai ʻaki ha foʻi uʻu pē ʻe taha kae ʻikai kai fakaʻangataha peé. Fakaafeʻi leva e kau akó ke lau e 2 Nīfai 28:26–30, ʻo fekumi ki he founga ʻe lava ke tokoniʻi ai kitautolu ʻe he lēsoni fakatātā ko ʻení ke mahino lelei ange e founga hono fakatupulaki ʻetau ʻilo fakalaumālié.

Fakakaukauloto angé ʻokú ke sio hake ʻi ha sitepu lōloa ʻokú ne fakafofongaʻi hoʻo ʻilo mo e mahino fakalaumālié.

• Kapau ʻoku fakafofongaʻi ʻe he konga ki ʻolunga ʻo e sitepú ʻa e ʻilo ʻa e ʻOtuá, ʻokú ke pehē ʻoku ʻi fē ʻa e tuʻunga lolotonga hoʻo ʻiló?

• Ko e hā ha ngaahi founga ʻoku tokoniʻi ai kitautolu ʻe he ʻOtuá ke fakatupulaki ʻetau ʻilo mo e mahino fakalaumālié ʻi he fakalau ʻa e taimí?

• Ko e hā ka hoko ki ha taha ʻoku ʻikai manga ki he sitepu hokó koeʻuhí ʻokú ne ongoʻi fiemālie pē ʻi he ʻilo kuó ne ʻosi maʻú?

ʻI he 2 Nīfai 28, naʻe hoko atu ai e kikite ʻa Nīfai kau ki he ngaahi ʻaho fakaʻosí. Naʻá ne fakamatalaʻi ha niʻihi ʻo e ngaahi tōʻonga fakakaukau ʻe mafola ʻi hotau kuongá ni pea vahevahe ha sīpinga ʻoku fakaʻaongaʻi ʻe he ʻEikí ke tokoniʻi kitautolu ke tau maʻu pea mahino ʻa e moʻoní.

Lau ʻa e 2 Nīfai 28:26–30, pea fakalaulauloto ki he founga ʻoku tokoniʻi ai koe ʻe he talanoa fakatātā ʻo e sitepú ke mahino ʻa e ngaahi moʻoni naʻe akoʻi ʻe Nīfai fekauʻaki mo e ʻEikí. Mahalo ʻe tokoni ke ʻiloʻi ko e ngaahi akonakí ko ha ngaahi fekau pe ngaahi tefitoʻi moʻoni ia ʻokú ne akoʻi kiate kitautolu ʻa e founga ke tau ngāue aí.

Ko e 2 Nīfai 28:30 ko ha potufolofola fakataukei tokāteline ia. Fakakaukau ke fakaʻilongaʻi e ngaahi potufolofola fakataukei fakatokāteliné ʻi ha founga makehe koeʻuhí ke faingofua ange hoʻo maʻu kinautolú. Te ke maʻu ha faingamālie ʻi he lēsoni hokó ke akoako fakaʻaongaʻi e tokāteline ʻoku akoʻi ʻi he potufolofola ko ʻení ki ha fehuʻi pe tūkunga.

• Ko e hā ʻoku tokoni atu e kupuʻi lea ko ʻení ke mahino kiate koe fekauʻaki mo e ʻEikí? ʻE tāpuekina fēfē ʻe he mahino ko ʻení hoʻo moʻuí?

• ʻOkú ke pehē ko e hā ʻoku fakasītuʻaʻi ai ʻe ha kakai ʻe niʻihi ʻa e faingamālie ke nau ako lahi ange ai ʻa e folofola ʻa e ʻOtuá ʻi he meʻa kuo nau ʻosi akó?

Toe lau ʻa e veesi 30 pea fakakaukau ki he founga te ke fakamatalaʻi fakanounou ai ʻi he lea pē ʻaʻau ʻa e meʻa ʻokú ne akoʻí. Mahalo te ke fie lekooti hoʻo kiʻi fakamatala nounoú ʻi hoʻo folofolá ‘i he tafaʻaki ‘o e veesi ko ʻení.

Fakaafeʻi e kau akó ke vahevahe ʻenau ngaahi fakamatala nounoú.

Ko ha sīpinga ki heʻetau fakalakalaka fakalaumālié

Ko e taha ʻo e ngaahi moʻoni ʻoku maʻu ʻi he potufolofola ko ʻení ko hono fakahā ʻe he ʻOtuá ʻa e moʻoní ʻi he ʻotu lea ki he ʻotu lea kiate kinautolu te nau maʻu iá.

• ʻOku hoko fēfē nai ʻa hono akoʻi māmālie kitautolu ʻe he ʻOtuá kae ʻikai fakaʻangatahá, ko ha tāpuakí?

• ʻE tokoniʻi fēfē kitautolu ʻe he founga ako māmālié ke tau hoko ʻo hangē ko e Tamai Hēvaní mo Sīsū Kalaisi? Ko e hā ha ngaahi ʻulungaanga faka-Kalaisi ʻe lava ke tokoniʻi kitautolu ʻe he sīpinga ko ʻení ke tau fakatupulakí?

Ngaahi sīpinga ʻo e māmá

Mahalo te ke fie mamata ʻi he foʻi vitiō “Ngaahi Sīpinga ʻo e Māmá: Laumālie ʻo e Fakahaá” (3:04), ʻoku maʻu ʻi he ChurchofJesusChrist.org. Kumi ha ngaahi sīpinga ʻoku fakaʻaongaʻi ʻe he ʻOtuá ke fakahā ʻaki Hono finangaló ki Heʻene fānaú.

• Ko e hā ha meʻa naʻá ke ako meia ʻEletā Petinā ʻe ala ʻaonga ki hoʻo moʻuí?

• ʻOkú ke pehē ko e sīpinga fē naʻe fakamatalaʻi ʻe ʻEletā Petinā ʻoku fenāpasi lelei taha mo e meʻa ne akoʻi ʻe Nīfai ʻi he veesi 30?

Fakakaukau ke fakaʻaongaʻi ʻa e ʻekitivitī ako folofola ʻoku maʻu ʻi he konga “Ngaahi ʻEkitivitī Fakalahi ki he Akó” kae ʻikai ko e fokotuʻu ako ko ʻení.

Lau ha potufolofola ʻe ua pe lahi ange mei heni, ʻo kumi e meʻa ʻoku nau tānaki atu ki hoʻo mahino ki he 2 Nīfai 28:30. Fakakaukau ke fakafehokotaki pe fakafekauʻaki e ngaahi veesi ko ʻení ki he 2 Nīfai 28:30 ʻi hoʻo folofolá.

• ‘Alamā 12:9–11

• Tokāteline mo e Ngaahi Fuakava 42:61

• Tokāteline mo e Ngaahi Fuakava 50:24

• Tokāteline mo e Ngaahi Fuakava 98:11–12

• Ko e hā naʻá ke ako mei he ngaahi potufolofola ko ʻení ʻoku tokoni ke mahino lelei ange kiate koe ʻa e 2 Nīfai 28:30?

• Ko e hā ha ngaahi sīpinga ʻo e founga ʻe lava ke tokoni ai e ngaahi moʻoni ʻoku akoʻi ʻi he 2 Nīfai 28:30 ki ha tahá?

• Ko e fē ha taimi kuó ke mamata ai ki hano akoʻi māmālie ʻe he ʻOtuá hoʻo moʻuí pe ko e moʻui ʻa kinautolu ʻoku mou feohí?

Fakalaulauloto ki he founga kuo tupulaki māmālie ai hoʻo mahino mo e fakamoʻoni ki he ongoongoleleí. Hiki ʻi hoʻo tohinoa akó ʻa e meʻa ʻokú ke ongoʻi ʻoku finangalo ʻa e Tamai Hēvaní ke ke manatuʻi mo fakahoko koeʻuhí ko e meʻa naʻá ke ako he ʻaho ní.

Fakakaukau ke fakaafeʻi ha kau ako ʻe niʻihi ʻe loto -fiemālie ke vahevahe ha konga ʻo e meʻa ne nau hikí.

Fakamatala Fakamahinó mo e Puipuituʻá

ʻOku fakaʻaongaʻi fēfē ʻa e tefitoʻi moʻoni ʻo e “ʻotu lea ki he ʻotu leá” ʻi heʻetau fakalakalaka fakalaumālié?

Naʻe fakamatala ʻa Palesiteni Tieta F. ʻUkitofa, naʻe hoko kimuʻa ko ha mēmipa ʻo e Kau Palesitenisī ʻUluakí, ʻo pehē:

ʻOku ʻikai hoko mai maʻu pē ʻa e fakahaá mo e fakamoʻoní ʻi ha mālohi fakatupu lōmekina. Ki ha tokolahi, ʻoku hoko māmālie mai e fakamoʻoní—ʻo fakakongokonga. Taimi ʻe niʻihi ʻoku hoko māmālie fau ia ʻo faingataʻa ke tau manatuʻi e momeniti tonu ne tau ʻiloʻi ai ʻa hono moʻoni ʻo e ongoongoleleí. ʻOku ʻomi ʻe he ʻEikí ʻa e “ʻotu lea ki he ʻotu lea, ʻa e akonaki ki he akonaki, ko e siʻi ʻi heni pea siʻi ʻi hena” [2 Nīfai 28:30]. (Dieter F. Uchtdorf, “Ho Lelei Tahá, Ho Faingamālié,” Liahona, Mē 2011, 60).

ʻE lava fēfē ke hoko ʻa hono ʻikai maʻu fakaʻangataha e ngaahi talí ko ha tāpuakí?

Naʻe akonaki ʻa ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻI hoʻo ngāue ʻo fakatatau ki he lelei taha e mahino ʻokú ke maʻú pea ʻikai fakapapauʻi e meʻa ke faí pea kapau te ke tui, ʻe tataki koe ke ke maʻu e talí ʻa ia he ʻikai maʻu ʻi ha toe founga kehe. Naʻa mo e taimi ʻoku mālohi taha ai hoʻo tuí, he ʻikai fakapaleʻi maʻu pē koe ʻe he ʻOtuá he taimi pē ko iá ʻo hangē ko ho lotó. Ka ʻe tali mai ʻe he ʻOtuá ʻi he meʻa ʻoku lelei taha kiate koé ʻo fakatatau ki Heʻene palani taʻengatá, ke maʻu ai e lelei taupotu tahá. Fakamālō he taimi ʻoku tuku ai ʻe he ʻOtuá ke ke feinga ʻi ha taimi lahi pea toki maʻu e talí. ʻE lahi ai hoʻo tuí pea tupulaki mo ho ʻulungāngá. (Richard G. Scott, “Ko e Mālohi Liliu ʻo e Tuí mo e ʻUlungaanga Leleí,” Liahona, Nōvema 2010, 44)

Naʻe vahevahe ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e meʻá ni fekauʻaki mo e taimi naʻe ʻikai hoko vave mai ai ha tali ki ha palopalema mahuʻinga neongo ʻene ngaahi lotu fakamātoató:

Neongo naʻá ku faingataʻaʻia he taimi ko iá, ka ʻoku hounga kiate au he taimí ni ʻa e ʻikai vave hono maʻu e tali ki heʻeku faingataʻaʻiá. Naʻe hanga ʻe he foʻi moʻoni ko ia [naʻá ne] fakamālohiʻi au ke u fekumi fakaʻaho ki he tokoni ʻa e ʻOtuá ʻo akoʻi au ke u ʻilo ʻa e founga totonu ʻo e lotú mo hono maʻu e ngaahi tali ki heʻeku lotú pea akoʻi au ʻi ha founga moʻoni ke tui ki he ʻOtuá. Ne u lava ke u ʻiloʻi hoku Fakamoʻuí mo ʻeku Tamai Hēvaní ʻi ha founga pea ʻi ha tuʻunga naʻe ʻikai mei lava ia ke hoko pe toki hoko mai ia ʻi ha fuʻu taimi lōloa ange. … Naʻá ku ako ke falala ki he ʻEikí ʻaki hoku lotó kotoa. Ne u ako ke ʻaʻeva mo Ia he ʻaho kotoa pē. (D. Todd Christofferson, “Fakatokangaʻi e Toʻukupu ʻo e ʻOtuá ʻi Hotau Ngaahi Tāpuaki Fakaʻahó,” Liahona, Sānuali 2012, 19)

Ngaahi ʻEkitivitī Fakalahi ki he Akó

ʻEkitivitī ako folofolá

ʻOku fakataumuʻa ʻa e ʻekitivitī ko ʻení ke tokoniʻi e kau akó ke ʻilo ʻoku faʻa fiemaʻu ke tau talangofua ki he meʻa kuo tau ʻosi maʻú kimuʻa pea tau maʻu ha toe ngaahi fakahinohinó.

Talaange ki he kau akó ke fakakakato ʻa e ʻekitivitií, ʻe lau mo lipooti atu ʻe heʻenau kulupú ʻa e founga ʻoku fakalahi ai ʻe he potufolofola ʻe faá ʻenau mahino ki he 2 Nīfai 28:30.

Talaange ki he ngaahi kulupú ko e ʻuluaki potufolofola te nau akó ko e Tokāteline mo e Ngaahi Fuakava 42:61. ʻI hono lipooti atu ʻe he kulupu takitaha ʻa e founga ʻoku fakalahi ai ʻe he potufolofola ko iá ʻenau mahino ki he 2 Nīfai 28:30, ʻoange fakalongolongo ki he kulupú ʻa e potufolofola hoko ke nau akó. ʻE hokohoko atu ʻa e founga ko ʻení kae ʻoua kuo lipooti atu ʻe he kulupu takitaha ʻa e meʻa ne nau ako mei he ngaahi potufolofola kotoa ʻe fā ko ʻení.

• Tokāteline mo e Ngaahi Fuakava 42:61

• Tokāteline mo e Ngaahi Fuakava 50:24

• Tokāteline mo e Ngaahi Fuakava 98:11–12

• ‘Alamā 12:9–11

ʻOtu lea ki he ʻotu lea ʻi he hisitōlia ʻo e Siasí

ʻE ala ʻaonga ke aleaʻi ha ngaahi sīpinga mei he hisitōlia ʻo e Siasí ʻokú ne fakahaaʻi ʻa hono fakahā ʻe he ʻEikí ʻa ʻEne moʻoní ʻi he “ʻotu lea ki he ʻotu lea, ʻa e akonaki ki he akonaki, ko e siʻi ʻi heni pea siʻi ʻi hená” (2 Nīfai 28:30). ʻE lava ke ke fakaʻaongaʻi ʻa e fakamatala ko ʻeni ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ke kamata ʻaki ʻa e fealēleaʻaki ko ʻení:

ʻOku fonu e hisitōlia ʻo e Siasí mo ʻetau ngaahi moʻui fakatāutahá he ngaahi fakatātā ʻo e sīpinga ʻa e ʻEikí ki hono maʻu ʻo e fakahaá ʻi he “ʻotu lea ki he ʻotu lea, ʻa e akonaki ki he akonaki.” Hangē ko ʻení, naʻe ʻikai ke ʻomi fakaʻangataha pē ki he Palōfita ko Siosefa Sāmitá ʻi he Vaoʻakau Tapú ʻa e ngaahi moʻoni tefito ʻo e ongoongolelei kuo fakafoki maí. Naʻe fakahā mai ʻa e koloa mahuʻinga taʻe hano tatau ko ʻení ʻi hono taimi totonu ʻo taau mo e ngaahi tūkunga naʻe fiemaʻu ki aí (David A. Bednar, “Ko e Laumālie ʻo e Fakahaá,” Liahona, Mē 2011, 87–88).

Naʻe tupulaki ʻa Sīsū mei he ʻaloʻofa ki he ʻaloʻofa

Fakaafeʻi e kau akó ke lau ʻa e Tokāteline mo e Ngaahi Fuakava 93:11–20, ʻo kumi e founga ʻoku fakahaaʻi ai ʻe he tupulaki ʻa e Fakamoʻuí ʻa e meʻa ʻoku akoʻi ʻi he 2 Nīfai 28:30. Tokoni ke mahino ki he kau akó ko e taha ʻo e ngaahi ʻulungaanga ʻo e Fakamoʻuí ko e faʻa kātakí pea ʻoku tau hangē ko Iá ʻi heʻetau ako ʻa e ʻotu lea ki he ʻotu lea ʻi he faʻa kātakí.

Fakaafeʻi kinautolu ke lau foki e Luke 2:40, ʻo kumi e tafaʻaki ʻe fā ʻo e tupulaki ʻa e Fakamoʻuí ʻoku fakamatala ki ai e veesi ko ʻení. Fakamanatu ki he kau akó ʻa e polokalama Fānaú mo e Toʻu Tupú, pea poupouʻi ke nau fokotuʻu mo ngāueʻi ha ngaahi taumuʻa ʻe tokoni ke nau fakalakalaka ʻi he ʻotu lea ki he ʻotu lea ʻi he ngaahi tafaʻaki takitaha ʻe fā ko iá.