Sēkope 1–4

Vakai Fakalūkufuá

Kimuʻa pea pekia ʻa Nīfaí, naʻá ne ʻoange ki hono tehina ko Sēkopé ʻa e fatongia ke tauhi ʻa e ʻū lauʻi peletí pea lekooti ai ʻa e meʻa naʻe “mahuʻinga tahá” (Sēkope 1:2). Naʻe tataki ʻe he pōpoaki ʻa Sēkopé ʻa e niʻihi kehé kia Sīsū Kalaisi, ʻo tokoniʻi kinautolu ke nau fakaʻehiʻehi mei he ngaahi nunuʻa ʻo e taʻetuí mo e angahalá. Naʻá ne ʻilo ʻi he fakahā mei he ʻOtuá naʻe fefaʻuhi e kakai Nīfaí mo ha ngaahi angahala lahi. Naʻá ne fai ha malanga ʻa ia naʻá ne lea ai ki he angahala ʻo e hīkisiá mo akoʻi fekauʻaki mo e fono ʻo e angamaʻá. ʻE lava ke tokoniʻi kitautolu ʻe Heʻene ngaahi akonakí ke tau ikunaʻi ʻa e angahalá ʻi heʻetau moʻuí pea haʻu ki he Fakamoʻuí.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha.

Fakataukei Fakatokāteliné: 2 Nīfai 32:8–9

Taumuʻa ʻo e lēsoní: ʻE tokoni ʻa e lēsoni ko ʻení ke ako maʻuloto ʻe he kau akó ʻa e potufolofola fakataukei fakatokāteliné mo e kupuʻi lea folofola mahuʻinga ʻo e 2 Nīfai 32:8–9, fakamatalaʻi ʻa e tokāteliné, pea fakaʻaongaʻi e ngaahi tefitoʻi moʻoni ki hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.

• Teuteu ʻa e tokotaha akó: Fakakaukau ke fakaafeʻi e kau akó ke nau feinga ke ʻiloʻi ha taimi ʻi heʻenau moʻuí pe moʻui ʻa ha taha ʻoku nau ʻiloʻi naʻe tokoniʻi ai kinautolu ʻe he lotu fakamātoató ke nau ofi ange ki he Tamai Hēvaní mo Sīsū Kalaisi.

• Fokotuʻu ki hono akoʻi he konifelenisi vitioó: Fakakaukau ke fakaafeʻi e kau akó ke tali e ngaahi fehuʻí ʻo fakaʻaongaʻi ʻa e polokalama fetalanoaʻakí. ʻE lava heni ke teuteuʻi ʻe he kau akó ʻenau ngaahi talí kimuʻa pea toki fakahū kinautolú, pea te ne fakaʻaiʻai foki mo e kau ako ʻoku ʻikai ke nau faʻa fai ha ngaahi talí ke ʻomi ʻenau fakakaukaú.

Sēkope 1

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau ʻiloʻi e ngaahi founga ke tokoniʻi ai e niʻihi kehé ke haʻu kia Sīsū Kalaisí.

• Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi taimi te nau lava ai ʻo talanoa ki ha niʻihi kehe fekauʻaki mo Sīsū Kalaisi. Poupouʻi kinautolu ke lotua ha faingamālie pea ke nau maʻu ʻa e loto-toʻa ke ngāue ʻi he taimi pē ko iá.

• Ngaahi Vitioó: “Ko Hono Fakaafeʻi ʻo e Taha Kotoa ke Haʻu kia Kalaisí: Ko Hono Vahevahe ʻo e Ongoongoleleí” (4:30); “Fakamafola Fakaemāmani Lahi ki hono Vahevahe ʻo e Ongoongoeleí” (54:06; mamata mei he taimi 0:00 ki he 1:35); “Ngaahi Talanoa ʻa e Kāingalotú: Toʻu Tupú mo e Kakai Lalahi Kei Talavoú” (5:08)

• Fokotuʻu ki hono akoʻi he konifelenisi vitioó: Fakakaukau ke vahevahe ʻa e kau akó ki ha ngaahi loki fetalanoaʻaki ke aleaʻi e ngaahi founga ke tokoniʻi ai e niʻihi kehé ke nau haʻu kia Kalaisi ʻi ha ngaahi tūkunga kehekehe.

Sēkope 2:1–21

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau hoko ʻo hangē ange ko Sīsū Kalaisí ʻaki hono ʻiloʻi mo fakaʻehiʻehi mei he angahala ʻo e hīkisiá.

• Teuteu ʻa e tokotaha akó: Fakaafeʻi e kau akó ke omi mateuteu ke vahevahe ha ngaahi sīpinga ʻo e anga ʻo ʻenau vakai ki he hāsino ʻa e hīkisiá ʻi he māmaní he ʻaho ní.

• Meʻa ke fakaʻaliʻalí: Ko e ngaahi tūkunga ʻi he kamataʻanga ʻo e lēsoní, ngaahi lea meia Palesiteni ʻEselā Tafu Penisoni mo ʻEletā Tieta F. ʻUkitofa pea mo e fakaafe aofangatukú.

• Fokotuʻu ki hono akoʻi he konifelenisi vitioó: Te ke lava ʻo vahevahe e kau akó ki ha ngaahi loki fetalanoaʻaki ke nau ako ʻa e Sēkope 2:17–21 pea aleaʻi e ngaahi fehuʻi ʻoku fekauʻaki mo iá. Fakakaukau ke ʻave ha ngaahi pōpoakí ki he kotoa ʻo e ngaahi loki fetalanoaʻakí ke fakamanatu kiate kinautolu ʻa e ngaahi fehuʻí.

Sēkope 2:22–35

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke nau fiefia ʻi he angamaʻá ʻo hangē ko e ʻEikí.

• Teuteu ʻa e tokotaha akó: Te ke lava ʻo fakaafeʻi e kau akó ke fehuʻi ki heʻenau mātuʻá pe ko ha taki ʻo e Siasí fekauʻaki mo e ngaahi tāpuaki ʻoku maʻu mei he talangofua ki he fono ʻo e angamaʻá. ʻE lava foki ke ke fetuʻutaki ki he mātuʻá ke fakapā kiate kinautolu ʻe ako e kau akó fekauʻaki mo e fono ʻo e angamaʻá kae lava ke hokohoko atu e fealēleaʻakí ʻe he mātuʻá ʻi ʻapí kapau te nau loto ki ai.

• Meʻa ke fakaʻaliʻalí: Fakatātā ʻoku fakafehoanaki ai e ngaahi tuʻunga moʻui ʻa e ʻEikí mo ia ʻo e māmaní

• Ngaahi Vitioó: “Tuʻu Maʻu ʻi he Ngaahi Potu Toputapú” (16:07; sio mei he taimi 3:22 ki he 4:50); “ʻOku ou Fili Ke u Maʻa” (4:19)

• Naunau maʻá e kau akó: Ko ha tatau ʻo e Ki Hono Fakamālohia ʻo e Toʻu Tupú (tohitufa, 2011) maʻá e tokotaha ako takitaha

Sēkope 4

Taumuʻa ʻo e lēsoní: ʻE lava ke tokoni e lēsoni ko ʻení ki he kau akó ke fakamālohia ʻenau tui kia Sīsū Kalaisí ʻaki hono ʻiloʻi, lekooti, mo fakalaulauloto ki he ngaahi tefitoʻi moʻoni mo e ngaahi moʻoni naʻe akoʻi ʻe Sēkopé.

• Teuteu ʻa e tokotaha akó: Fakakaukau ke fakaafeʻi e kau akó ke lau ʻa e Sēkope 4:7–14 pea teuteu ke vahevahe ha tefitoʻi moʻoni pe moʻoni ʻoku nau ʻilo ʻoku nau ongoʻi ʻoku matuʻaki fiemaʻu ʻi he māmaní he ʻahó ni.

• Naunau maʻá e kau akó: Ko ha meʻa kehe mei ha peni pe penivahevahe ʻe lava ke fakaʻaongaʻi ʻe he kau akó ke tā pe fakaʻilongaʻi ʻaki ha palakalafi ki ha konga foila ʻaluminiume pe pepa

• Meʻa ke fakaʻaliʻalí: Ko e ngaahi poini fakaʻilongaʻi hokohoko (bullet points) ʻi he fakaʻosinga ʻo e lēsoní ʻoku tokoni ki he kau akó ke nau fakalaulauloto ki he moʻoni naʻa nau ʻiló

• Fokotuʻu ki hono akoʻi he konifelenisi vitioó: Fakakaukau ke fakaafeʻi ha niʻihi ʻo e kau akó ke fakaʻaongaʻi e polokalama fetalanoaʻakí ke vahevahe ʻa e tefitoʻi moʻoni pe moʻoni ne nau maʻu ʻi he Sēkope 4:7–14. ʻE lava leva ke vahevahe ʻe he kau ako kehé ha ngaahi fehuʻi ki he kalasí ke nau fakalaulauloto ki he tefitoʻi moʻoní pe moʻoní.