Jacob 2:1–21

“Ayaw Himoa Kini nga ang Garbo … Molaglag sa Inyong mga Kalag”

Ang propeta nga si Jacob nasayod pinaagi sa pagpadayag gikan sa Dios nga ang Nephite nga mga katawhan nanlimbasog sa daghang mga sala. Misangyaw siya og sermon sa templo aron tumngon kini nga mga sala, lakip ang sala sa garbo. Kitang tanan nakigbisog usahay sa garbo. Kini nga leksiyon makatabang kanimo nga mahimong mas mahisama ni Jesukristo pinaagi sa pag-ila ug pagbatok sa sala sa garbo.

Pangutana og mga pangutana nga nagdapit sa pagdiskobre. Pangutana og mga pangutana nga makatabang sa mga estudyante sa pagdiskobre sa mga kamatuoran sa ebanghelyo sa ilang kaugalingon. Ang mga pangutana makapadani sa mga estudyante sa proseso sa pagsabot sa mga kasulatan ug makatabang nila sa pag-ila ug pagsabot sa importante nga mga kamatuoran sa ebanghelyo.

Pagpangandam sa estudyante: Dapita ang mga estudyante nga motambong nga andam sa pagpaambit og mga ehemplo kon sa unsang paagi nila nakita nga ang garbo gipakita sa kalibotan karon.

Mga Posibleng Kalihokan sa Pagkat-on

Garbo

Ipakita ang mosunod nga mga senaryo ug dapita ang mga estudyante sa pagpangita og ebidensiya sa garbo.

• Naglaum si Koji nga ang usa ka kauban sa team masayop sa usa ka dula aron makakuha siya og mas daghang oras sa pagdula.

• Gipalab-anan pagsulti ni Silvia ang iyang mga kalamposan aron tan-awon nga mas maayo o mas importante sa uban.

• Si Jens nagdumili sa pagpasalamat ug wala moila sa maayong binuhatan sa uban.

• Si Amy nagbiaybiay sa uban ug nagbugal-bugal kanila kon wala sila.

• Unsa nga ebidensiya sa garbo ang imong nakit-an?

Si Presidente Ezra Taft Benson (1899–1994) mitudlo:

Ang garbo usa ka sala nga daling makita diha sa uban apan kita dili dali nga moangkon. (Mga Pagtulun-an sa mga Presidente sa Simbahan: Ezra Taft Benson [2014], 283)

Karon hunahunaa ang Manluluwas. Bisan pa sa Iyang daghang mga kalamposan ug abilidad, Siya kanunay nga maaghop ug mapaubsanon (tan-awa sa Mateo 11:29). Samtang nagtuon ka, paghunahuna og mga paagi nga ang garbo mahimong makita sa imong kinabuhi. Kini nga leksiyon makatabang kanimo nga mahimong mas mahisama ni Jesukristo pinaagi sa pagbatok sa sala sa garbo.

“Ayaw himoa kini nga ang garbo … molaglag sa inyong mga kalag”

Ang Ginoo mitabang ni propeta Jacob nga mahibalo sa mga hunahuna sa mga tawo ug misugo kaniya sa pag-adto sa templo ug sa pagpamatuod batok sa ilang mga sala, lakip ang sala sa garbo (tan-awa sa Jacob 2:1–13).

Ikonsiderar ang pagkompleto sa mosunod nga kalihokan isip usa ka klase diha sa pisara ingon man usab sa pagdapit sa mga estudyante sa pagkompleto niini diha sa ilang mga journal sa pagtuon.

Sa imong journal sa pagtuon, pagdrowing og linya sa tunga-tunga paingon sa ubos sa pahina. Sa ibabaw sa wala nga bahin sa pahina, isulat ang “Mga pagpakita sa garbo.” Sa ibabaw sa tuo nga bahin, isulat ang “Mga paagi nga kita mahimong mahisama sa Manluluwas ug magabatok sa garbo.”

Dapita ang mga estudyante sa pagduol ug paglista sa mga pagpakita sa garbo nga ilang nakit-an sa mosunod nga mga bersikulo diha sa wala nga bahin sa pisara.

Basaha ang Jacob 2:12–16, nga mangita sa mga pagpakita sa garbo. Idugang kini sa wala nga bahin sa imong entry sa journal. Mahimo usab nimong tan-awon ang “Si Jacob Nagtudlo mahitungod sa Garbo,” anaa sa ChurchofJesusChrist.org ChurchofJesusChrist.org, gikan sa time code 0:23 hangtod sa 4:39.

Mahimo nimong isulat sa pisara ang mosunod nga gipabaga nga kamatuoran ug gamiton ang mosunod nga mga pangutana aron matabangan ang mga estudyante nga makasulti kon unsaon sa garbo nga makaimpluwensiya kanato karon.

Usa ka kamatuoran nga atong makat-onan gikan niini nga tudling mao nga ang garbo molaglag sa atong mga kalag (Jacob 2:16).

• Sa imong hunahuna sa unsang paagi ang garbo makalaglag sa atong mga kalag?

• Sa imong hunahuna sa unsang paagi ang pasidaan ni Jacob mahinungdanon gihapon karon?

Si Elder Dieter F. Uchtdorf, nga kanhi sa Unang Kapangulohan, ug si Presidente Ezra Taft Benson (1899–1994) mipaambit og dugang nga mga paagi nga ang garbo mahimong makita sa atong kinabuhi. Pagdugang og mga panabot gikan sa ilang mga pulong sa wala nga bahin sa imong entry sa journal.

Ipakita ang mosunod nga mga pamahayag ug dapita ang mga estudyante sa pagpaambit og mga ideya gikan sa mga pamahayag ug idugang kini sa wala nga bahin sa pisara.

Ang gamhanan nga kaaway sa gugma nga putli mao ang garbo. Ang garbo mao ang usa sa pinakadakong rason nga ang kaminyoon ug mga pamilya magkaproblema. Ang garbo usa ka mubo og buot, dili mabination ug masinahon. Ang garbo magpahambog sa kaugalingong kusog ug mobaliwala sa mga hiyas sa uban. Ang garbo usa ka hakog ug dali nga masuko. Ang garbo maghunahuna og dautan bisan og wala ug motago sa kaugalingon niining kahuyang luyo sa sayop nga pagpakaaron-ingnon. Ang garbo usa ka matahapon, grabe kanegatibo, masuko, ug dili mapailubon. Sa pagkatinuod, kon ang gugma nga putli mao ang tiunay nga gugma ni Kristo, nan ang garbo mao ang kinaiya ni Satanas. (Dieter F. Uchtdorf, “Agig Pagdayeg Niadtong Miluwas,” Liahona, Mayo 2016, 80)

Kadaghanan nato nagkonsiderar sa garbo nga sala niadtong anaa sa ibabaw, sama sa adunahan ug makinaadmanon, nga mipakaubos natong tanan. (Tan-awa sa 2 Ne. 9:42.) Hinoon, dunay mas grabing sakit nga nia kanato—ug kana mao ang garbo nga bisan ang tawo kabos pero mapahitas-on. Kini makita sa daghang paagi, sama sa pagpangita og sayop, pagpanglibak, pagreklamo, pagpakabuhi sobra sa atong kapanguhaan, kasina, kaibog, pugngan ang pagpasalamat ug pagdayeg nga makabayaw sa uban, ug dili mapasayloon ug kamasinahon. (Mga Pagtulun-an sa mga Presidente sa Simbahan: Ezra Taft Benson [2014], 283)

Dapita ang mga estudyante sa pagpamalandong sa ilang pagpangandam alang sa klase samtang maghisgot sila sa mosunod nga mga pangutana.

• Unsa ang dugang nga mga paagi nga imong nakita ang garbo nga gipakita sa atong kalibotan karon?

• Sa unsang paagi nga ang garbo sukwahi sa kinaiya ni Jesukristo?

Ipakita ang mosunod nga pag-aghat ug dapita ang mga estudyante sa matinud-anong pagkonsiderar sa mga paagi nga ang garbo mahimong makita sa ilang mga kinabuhi.

Hunong ug pagpamalandong sa imong kaugalingong mga hunahuna ug mga binuhatan. Sa unsa nga mga paagi nga ikaw usahay nanlimbasog sa sala sa garbo? Sa unsang paagi kini nga mga pagpakita sa garbo nakaapekto sa imong mga relasyon ug kalipay? Unsa kaha ang gusto nimong usbon? Ngano man?

Pagbuntog sa garbo

Si Jacob mitudlo kon sa unsang paagi kita makabaton og paglaom diha ni Kristo ug magabatok sa sala sa garbo.

Samtang magtuon ang mga estudyante sa mosunod, dapita sila sa pagduol ug pagsulat unsay ilang nakit-an diha sa tuo nga bahin sa pisara.

Basaha ang Jacob 2:17–21, mangita og mga paagi nga makalikay ka sa sala sa garbo. Idugang kini sa tuo nga bahin sa imong entry sa journal. Mahimo usab nimong tan-awon ang “Si Jacob Nagtudlo mahitungod sa Garbo,” anaa sa ChurchofJesusChrist.org ChurchofJesusChrist.org, gikan sa time code 4:40 hangtod sa 5:44.

Ikonsiderar ang pagdapit sa mga estudyante sa paghisgot sa mosunod nga mga pangutana nga magpares o sa gagmay nga mga grupo.

• Sa unsang paagi nga ang pagsunod sa tambag ni Jacob makatabang kanato sa pagbatok sa garbo ug pagbaton og usa ka paglaom diha ni Kristo?

• Kinsa ang imong nailhan nga maayong ehemplo sa pagbatok sa garbo sa mga paagi nga gihulagway niini nga mga bersikulo? Unsay ilang gibuhat?

• Unsa nga Kristohanong mga hiyas ang atong matutokan ug mapalambo nga makatabang nato sa paglikay sa garbo? Ngano o sa unsang paagi kini nga mga hiyas makatabang?

Ipakita ang mosunod nga pagdapit.

Pamalandongi ang imong kaugalingon nga panginahanglan sa pag-ila ug pagbatok sa sala sa garbo sa imong kinabuhi. Paghunahuna og piho nga mga sitwasyon o mga relasyon diin nagpakita ka og garbo. Sulayi sa pag-ila kon sa unsang paagi ang garbo mahimong makaapekto sa imong mga relasyon. Tinguhaa ang tabang sa Langitnong Amahan pinaagi sa Espiritu Santo nga mahimong mas mahisama sa Manluluwas pinaagi sa pagbatok sa garbo samtang imong buhaton ang mosunod:

1. Pagpili og usa ka pagpakita sa garbo gikan sa wala nga bahin sa imong entry sa journal nga imong gibati nga nadasig ka nga pagatutokan sa pagbuntog niini nga panahon.

2. Gikan sa tuo nga bahin sa imong entry sa journal, pagpili og usa ka paagi nga mahimong makabatok ka niana nga pagpakita sa garbo. Paghunahuna og Kristohanong mga hiyas ug isulat ang piho nga mga aksiyon nga imong mabuhat.

Ikonsiderar ang pagpaambit og pagpamatuod sa abilidad sa Manluluwas sa pagtabang kanato sa pagbuntog sa garbo ug mahimong mas mahisama Kaniya.

Komentaryo ug Background nga Impormasyon

Unsa ang pipila ka mga paagi nga mapakita ang garbo?

Si Elder Quentin L. Cook sa Korum sa Napulog Duha ka Apostoles mihatag sa mosunod nga mga ehemplo:

Si Presidente Ezra Taft Benson (1899–1994) mitudlo:

Sa mga pulong ni C. S. Lewis: “Ang garbo dili malipay nga makaangkon og usa ka butang, apan mas makabintaha lang sa uban. … Ang pagkompara maoy nakapahimo ninyong mapahitas-on: ang kahimuot nga nakalabaw sa uban. Kon ang elemento sa pakigkompetinsiya mawala, ang garbo mawala.” (Mere Christianity, New York: Macmillan, 1952, pp. 109–10.) …

Ang mga mapahitas-on mas mahadlok sa hukom sa mga tawo kaysa hukom sa Dios. (Tan-awa sa Doktrina & mga Pakigsaad 3:6–7; Doktrina & mga Pakigsaad 30:1–2; Doktrina ug mga Pakigsaad 60:2.) Ang “Unsay hunahunaon sa mga tawo kanako?” mas bug-at kay sa “Unsay hunahuna sa Dios kabahin nako?” (Mga Pagtulun-an sa mga Presidente sa Simbahan: Ezra Taft Benson [2014], 281-282)

Tan-awa ang “Garbo ug ang Priesthood,” anaa sa https://www.churchofjesuschrist.org/study/general-conference/2010/10/pride-and-the-priesthood?lang=ceb ChurchofJesusChrist.org, gikan sa time code 2:52 hangtod sa 4:27 aron makita ang pagpasabot ni Elder Dieter F. Uchtdorf, kanhi sa Unang Kapangulohan, kon unsa ang dili garbo.

Si Elder Dieter F. Uchtdorf, kanhi sa Unang Kapangulohan, mipasabot:

Ang garbo usa ka makamatay nga kanser. Usa kini ka sala nga ganghaan padulong sa laing hut-ong sa tawhanong mga kahuyang. Sa pagkatinuod, masulti nga ang matag sala, sa pagsabot, usa ka pagpakita sa garbo. (Dieter F. Uchtdorf, “Garbo ug ang Priesthood,” Liahona, Nob. 2010, 56)

Unsaon nako pagbatok ang sala sa garbo?

Si Elder Gary E. Stevenson sa Korum sa Napulog Duha ka Apostoles mipasabot:

Ang garbo mao ang kaatbang sa pagkamapainubsanon, nga mao ang “pagkaandam sa pagsunod ngadto sa kabubut-on sa Ginoo.” [tan-awa sa Isangyaw ang Akong Ebanghelyo: Usa ka Giya sa Misyonaryo nga Pangalagad (2004), 146]. … Ang garbo, hinoon, mahimo usab nga tunlon sa Kristohanong hiyas sa pagkamapainubsanon. (Gary E. Stevenson, “Espiritwal nga Eklipse,” Liahona, Nob. 2017, 47)

Si Elder Dieter F. Uchtdorf, kanhi sa Unang Kapangulohan, mihatag sa mosunod nga tambag. Tan-awa ang “Garbo ug ang Priesthood,” anaa sa https://www.churchofjesuschrist.org/study/general-conference/2010/10/pride-and-the-priesthood?lang=ceb ChurchofJesusChrist.org, gikan sa time code 13:26 hangtod sa 15:05.

Mahimo usab nimong tan-awon ang “Elder ug Sister Bednar—Garbo” (3:10), nga makita sa ChurchofJesusChrist.org, aron makita si Elder David A. Bednar sa Korum sa Napulog Duha ka Apostoles ug Sister Bednar nga naghulagway og mga paagi sa pagbuntog sa garbo.

Dugang nga mga Kalihokan sa Pagkat-on

Jacob 2:17–19. Ang katuyoan sa mga katigayonan

Dapita ang mga estudyante sa paghisgot kon sa unsang paagi gilantaw sa kalibotan ang katuyoan sa mga katigayonan. Basaha ang Jacob 2:17–19, 1 Timoteo 6:6–11, ug ang Doktrina ug mga Pakigsaad 38:39. Hisgoti ang mga katuyoan sa Ginoo alang sa mga katigayonan ug unsaon nato pagbuntog ang sayop nga mga ideya sa kalibotan. Mahimo usab nimong hisgotan ang mga ehemplo sa mga tawo nga nagtan-aw sa mga katigayonan sama sa pagtan-aw sa Ginoo ug sa unsang paagi ang pagsunod niini nga mga pagtulun-an makatabang kanato nga mahimong mas mahisama sa Manluluwas.

Jacob 2:21. “Ang usa ka binuhat sama ka bililhon sa iyang panan-aw ingon sa uban”

Ikonsiderar ang paghisgot kon sa unsang paagi ang pagpaningkamot sa pagtan-aw sa uban sama sa pagtan-aw sa Dios makatabang nato sa pagbuntog sa garbo. Hisgoti kon unsa kaha ang kalahian sa mga pamilya, komunidad, eskwelahan, ug uban pa sa mga estudyante kon ang tanan motan-aw sa uban niining paagiha.

Dili kaayo paghunahuna sa imong kaugalingon

Human magtuon ang mga estudyante sa Jacob 2:11–21, dapita sila sa pagkonsiderar sa kamahinungdanon sa Kristohanong hiyas sa pagkamapainubsanon ug sa dili kaayo maghunahuna sa ilang kaugalingon. Ikonsiderar ang pagpaambit sa mosunod nga pamahayag gikan ni Elder Dieter F. Uchtdorf, kanhi sa Unang Kapangulohan:

“Ang uban nagtuo nga ang pagpaubos usa ka pagpaantos sa kaugalingon. Ang pagpaubos wala magpasabot sa pagkombinsir sa atong kaugalingon nga kita walay pulos, walay kahulugan, o gamay ra og bili. Wala kini magpasabot sa paglimod o sa pagpugong sa mga talento nga gihatag sa Dios kanato. Dili nato madiskobrihan ang pagpaubos pinaagi sa dili kaayo paghunahuna sa atong kaugalingon; atong madiskobrihan ang pagpaubos pinaagi sa dili kaayo paghunahuna kabahin sa atong kaugalingon. Moabot kini samtang magbuhat kita sa atong buluhaton uban sa kinaiya sa pagserbisyo sa Dios ug sa atong isigkatawo” (“Garbo ug ang Priesthood,” Liahona, Nob. 2010, 58).

Dayon dapita ang mga estudyante sa pagpaambit og mga ehemplo gikan sa kinabuhi sa Manluluwas nga nakapahinumdom kanila sa mga panahon nga Iyang gipakita nga Siya naghunahuna sa uban labaw pa sa Iyang kaugalingon. Hangyoa ang mga estudyante sa paghimo og plano kon unsaon nila pagsunod ang ehemplo sa Manluluwas niining paagiha kada adlaw.