Sēkope 5:54–77; 6:1–13

“ʻOku Monūʻia ʻAupito ʻa Kinautolu ʻa ia Kuo Ngāue Faivelenga ʻi Heʻene Ngoue Vainé”

ʻOku felāveʻi fēfē nai mo koe ʻa e talanoa fakatātā ʻo e ʻakau ʻōlivé ʻa ia ʻoku lekooti ʻi he Sēkope 5? ʻOku fakataipe ʻe he konga fakaʻosi ʻo e talanoa fakatātā ko ʻení e ngāue ʻa e ʻEikí ʻi he ngaahi ʻaho fakaʻosí, kau ai e ngaahi ngāue ʻokú Ne fai mo ʻEne kau tamaioʻeikí ke tānaki e ngaahi laumālié kiate Ia ko hono fakaʻosí. ʻOku fakataumuʻa e lēsoni ko ʻení ke tokoniʻi koe ke ke ongoʻi ha holi lahi ange ke ngāue mo e ʻEikí ʻi hono tokoniʻi e fānau ʻa e Tamai Hēvaní ke haʻu kiate Iá.

Tokoniʻi e tokotaha ako takitaha ke fakahoko haʻane tānaki ki he aʻusia fakaakó. ʻOku fiemaʻu e tokotaha ako takitaha pea ʻoku ʻi ai ha tānaki ke ne fai. Mahalo ʻe ongoʻi mālohi ange ha kau ako ʻe niʻihi ke nau kau mai ʻi he kau ako kehé. Feinga ke tokoniʻi e tokotaha ako takitaha ke ne fakahoko ha tānaki ʻi ha ngaahi founga ʻoku ʻuhingamālie mo fakafiemālie kiate kinautolú.

Teuteu ʻa e tokotaha akó: Fakakaukau ke fakaafeʻi e kau akó ke fakahoko e ʻekitivitī ako ʻi he ʻuluʻi tohi “Sēkope 5:61–75: ʻOku fakaafeʻi au ʻe he ʻEikí ke u ngāue mo Ia ʻi Heʻene ngoue vainé” ʻi he fokotuʻutuʻu ako ʻo e “8–14 ʻEpelelí. Sēkope 5–7: ‘‘Oku Ngāue ʻa e ʻEikí mo Kitautolu’” ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí: Tohi ʻa Molomoná 2024.

Ngaahi ʻEkitivitī Ako ʻOku Ala Fakahokó

Ko ha ngāue lahi

Vahevahe e tūkunga ko ʻení mo e kalasí:

Naʻe toki kole ange ʻe he pīsopé kia ʻAnika ke ne fakakaukauʻi ʻi he faʻa lotu ha ngaahi founga te ne ala tokoniʻi ai ha taha ʻo e kau finemui ʻi hono uōtí ʻa ia kuo fuoloa ʻene liʻaki lotú. ʻOku kiʻi ongoʻi manavasiʻi mo fifili ʻa ʻAnika, “Ko e hā ʻoku kole mai ai ʻe he pīsopé ke u fai ʻení? Mahalo ʻe lelei ange haʻane tokoniʻi ia ʻiate au.”

• Ko e hā nai ha niʻihi ʻo e ngaahi ʻuhinga naʻe fakaafeʻi ai ʻe he pīsopé ʻa ʻAnika ke tokoni ki he finemuí kae ʻikai ke ne fakahoko pē ʻe ia e tokoní?

Kimuʻa pea vahevahe e talateu ko ʻení, ʻe ala tokoni ke fakaafeʻi ha kau ako ʻe niʻihi te nau loto-lelei ke nau fakamatalaʻi fakanounou ʻa e meʻa ʻoku nau manatuʻi fekauʻaki mo e ngaahi konga ʻo e talanoa fakatātā ʻi he Sēkope 5 naʻa nau ako ʻi he lēsoni kuo ʻosí.

Te ke ako he ʻahó ni ʻa e konga fakaʻosi ʻo e talanoa fakatātā ʻo e ʻakau ʻōlivé ʻoku lekooti ʻi he Sēkope 5. ʻOku fakafofongaʻi ʻe he konga ko ʻeni ʻo e talanoa fakatātaá ʻa e ngaahi ʻaho fakaʻosí. Ko e foʻi moʻoni ʻe taha te tau lava ʻo ako mei he konga ko ʻeni ʻo e talanoa fakatātaá, ʻoku fakaafeʻi ʻe he ʻEikí ʻEne kau tamaioʻeiki ʻi he ngaahi ʻaho kimui ní ke ngāue ʻi Heʻene ngoue vainé ʻaki ʻenau kau ʻi hono tānaki ʻo ʻIsilelí.

Kimuʻa peá ke kamata akó, fakakaukau ki hoʻo ngaahi ongo fekauʻaki mo hono fakaafeʻi koe ʻe he ʻEikí ke tokoni ki hono tānaki ʻo e kakaí kiate Iá. Kuó ke fifili nai ki he ʻuhinga ʻokú Ne fakaafeʻi ai koe ke ke tokoni kiate Ia ʻi Heʻene ngāue ke fakahaofi e ngaahi laumālié? ʻI hoʻo akó, kumi ha ngaahi akonaki ʻe lava ʻo tokoni atu ke mahino lelei ange kiate koe e ngaahi taumuʻa ʻa e ʻEikí ki hono fakaafeʻi kitautolu ke tau kau fakataha mo Ia ʻi hono tānaki ʻo ʻIsilelí.

ʻOku fakaafeʻi ʻe he pule ʻo e ngoue vainé ha kau tamaioʻeiki ke ngāue mo ia

ʻOku kamata ʻaki e konga fakaʻosi ʻo e talanoa fakatātaá ha fepōtalanoaʻaki ʻi he vahaʻa ʻo e pule ʻo e ngoue vainé, ʻa ia ʻokú ne fakafofongaʻi ʻa Sīsū Kalaisi, mo ʻene tamaioʻeikí, ʻa ia ʻokú ne fakafofongaʻi e kau palōfita ʻa e ʻEikí.

Fakaafeʻi e kau akó ke lau fakalongolongo e Sēkope 5:61–62, 70, ʻo kumi e meʻa naʻe fakahinohino ʻe he pule ʻo e ngoue vainé ke fai ʻe heʻene kau tamaioʻeikí pea mo e ʻuhinga naʻá ne kole ai ke nau fai iá.

• Ko hai ʻi he ngaahi veesi ko ʻení te ne lava ʻo fakafofongaʻi koe mo ha kāingalotu kehe ʻo e Siasí?

Naʻe fakamatalaʻi ʻe Palesiteni Lāsolo M. Nalesoni ʻa e ngāue ʻoku fakahoko ʻe he ʻEikí mo ʻEne kau tamaioʻeikí ʻi he ngaahi ʻaho fakaʻosí:

Fakataha Lotu Fakaemāmani Lahi maʻá e Toʻu tupú ki he 2018

Ko e lea ʻa Palesiteni Russell M. Nelson mo Sisitā Wendy Nelson ʻi he Fakataha Lotu Fakaemāmani Lahi maʻá e Toʻu tupú ʻi he ʻaho 3 ʻo Sune, 2018

Naʻe fakahā ʻe he ʻEikí ki he Palōfita ko Siosefa Sāmitá ko e taimi ní, ʻo ʻuhinga ki hotau kuongá, ko e hongofulu mā taha ia ʻo e houá pea koe taimi fakaʻosi ʻeni ʻEne ui e kau ngāue ki Heʻene ngoue vainé ke fakahaaʻi e taumuʻa hono tānaki ʻo e kakai kuo filí mei he ngaahi tuliki ʻe fā ʻo e māmaní [vakai, Tokāteline mo e Ngaahi Fuakava 33:3, 6. …

ʻOkú ke loto ke ke tokoni hono tānaki fakataha ʻo ʻIsileli ʻi he ngaahi ʻaho fakaofo kimui ní? …

… Fakakaukau ki ai! Ko e kotoa ʻo e kakai kuo nau moʻui ʻi he funga ʻo e māmaní, ko kitautolu ʻa e niʻihi ʻe kau ʻi he tānaki kāfakafa fakaʻosi ko ʻení. Hono ʻikai ke fakafiefia moʻoni ia!

Kuo fakatatali ʻe heʻetau Tamai Hēvaní ʻa ʻEne ngaahi laumālie fakaʻeiʻeiki tahá—pea mahalo te u pehē ko ʻEne timi lelei tahá—ki he kuonga fakaʻosi ko ení. Ko e ngaahi laumālie fakaʻeiʻeiki ko iá—kau ngāue lelei taha ko iá, kau helo ko iá— ʻa kimoutolu! (Russell M. Nelson mo Wendy W. Nelson, “ʻAmanakiʻanga ʻo ʻIsilelí” [fakataha lotu fakaemāmanilahi ʻa e toʻu tupú, 3 Sune, 2018], fakalahi ki he New Era mo e Ensign, 8, ChurchofJesusChrist.org)

• Ko e hā naʻe tokoni e fakamatala ʻa Palesiteni Nalesoní ke ke ako pe ongoʻi fekauʻaki mo e ʻOtuá?

• Ko e hā naʻá ne akoʻi atu fekauʻaki mo koe pea mo e fatongia ke ke fakahoko ʻi hono tānaki fakataha ʻo ʻIsilelí?

• ʻOkú ke pehē ko e hā ha niʻihi ʻo e ngaahi ʻuhinga ʻoku fakaafeʻi ai kitautolu ʻe he ʻEikí ke tokoni ki hono tānaki fakataha ʻo e kakaí kiate Iá?

Ko homou konga ʻo e ngoue vaine ʻa e ʻEikí

Fakakaukau ke fakakakato e ʻekitivitī ko ʻení ʻiate koe pē kimuʻa pea kamata e kalasí pea fakaʻaliʻali ki he kau akó ho fakatātaá ko ha sīpinga.

Tā ʻi hoʻo tohinoa akó pe ʻi ha laʻipepa kehe ha fakatātā ʻo ha ngoue vaine pe ko ha ngoue ʻokú ne fakafofongaʻi e ngoue vaine ʻa e ʻEikí. Hili iá pea tā pe hiki ha ngaahi meʻa ʻe niʻihi ʻoku nau fakafofongaʻi e ngaahi meʻá ni:

1. Ngaahi faingamālie ʻokú ke maʻu ke ngāue ai ʻi he ngoue vaine ʻa e ʻEikí mo tokoni ki hono tānaki ʻo ʻIsilelí. ʻE lava ke kau ʻi he ngaahi sīpingá ha ʻū fakatātā pe ngaahi lea ʻokú ne fakafofongaʻi ha kakai te ke lava ʻo tokoniʻi ke nau ʻunu ke ofi ange ki he Fakamoʻuí, ngaahi ngāue te ke lava ʻo fai ke vahevahe fakahangatonu ai e ongoongoleleí pe ʻi he ʻinitanetí, pe ngaahi ngāue ke tāpuekina e kakai ʻi he tafaʻaki ʻe taha ʻo e veilí ʻo fakafou ʻi he ngāue fakatemipalé mo e hisitōlia fakafāmilí.

2. Ngaahi fakafeʻātungia ʻokú ke fehangahangai mo ia ʻi hoʻo feinga ke ngāue ʻi he ngoue vaine ʻa e ʻEikí. ʻE lava ke kau ʻi he ngaahi sīpingá ha ʻū fakatātā pe foʻi lea ʻokú ne fakafofongaʻi ha ngaahi faingataʻa hangē ko e ilifiá, taʻepauʻia ʻi he meʻa ke faí, pe ongoʻi femoʻuekina ʻi he ngaahi meʻa kehé.

Ako e ngaahi veesi ko ʻení, ʻo kumi e ngaahi akonaki ʻe lava ʻo tokoni atu ke ke ikunaʻi e ngaahi faingataʻa naʻá ke ʻiló. Fakakaukau ke tānaki atu ha ʻū fakatātā pe ngaahi lea ki hoʻo fakatātā ʻo e ngoue vainé ʻo fakatatau mo e meʻa ʻokú ke akó.

• Sēkope 5:71–72, 75

• Sēkope 6:2–8 (ngaahi akonaki naʻe vahevahe ʻe Sēkope hili ʻene fakahoko e talanoa fakatātaá)

• Tokāteline mo e Ngaahi Fuakava 18:10–16

• Ko e hā naʻá ke ako fekauʻaki mo e ʻEikí mei he ngaahi veesi ko ʻení?

• Ko e hā ha ngaahi foʻi lea pe kupuʻi lea mei he ngaahi veesi ko ʻení ʻe lava ʻo tokoni ki ha taha ʻoku momou ke kau ʻi hono tānaki fakataha ʻo ʻIsilelí?

Fakakaukau ke vahevahe ha sīpinga fakataautaha ko ha konga ʻo e fealēleaʻaki ki he fehuʻi hokó.

• Ko e hā ha ngaahi tāpuaki kuó ke mamata pe aʻusia ʻi he kau mo e ʻEikí ʻi he ngāue ke ʻomi e ngaahi laumālié kiate Iá?

Fakaʻaongaʻi ha kiʻi taimi ke ke fakakaukau ai ki hoʻo ngaahi sitepu hoko ki he kau mo e ʻEikí ʻi hono tānaki ʻo ʻIsilelí. Lekooti ha taumuʻa ʻoku fekauʻaki mo ʻeni ʻi hoʻo tohinoa akó pe fakatupulaki ha taumuʻa kuó ke ʻosi fokotuʻu maʻau. ʻE lava foki ke ke fakakau ai ha ngaahi foʻi lea pe fakatātā ʻokú ne fakafofongaʻi hoʻo taumuʻa ʻi hoʻo tā fakatātā ʻo e ngoue vainé.   ChurchofJesusChrist.org 

2021 Youth Theme Song: “A Great Work”

This is the lyric video of the 2021 Youth Theme, “A Great Work,” sung by Nik Day. The inspirational video details the work and the promises of the Lord in the latter days.

Fakakaukau ke fakaafeʻi ha niʻihi ʻe loto-fiemālie ke vahevahe mo e kalasí ʻenau ngaahi fakatātā kuo kakató, fakataha mo ʻenau ngaahi taumuʻá. Fakamoʻoni ki he ngaahi moʻoni naʻe aleaʻi he ʻaho ní pea fakaafeʻi e kau akó ke ngāueʻi e ngaahi taumuʻa kuo nau fokotuʻu maʻanautolú. ʻE maʻu ʻe he kau akó ha faingamālie ke toe vakaiʻi e taumuʻa ko ʻení ʻi ha lēsoni Siviʻi Hoʻo Akó ʻi he kahaʻú.

Fakamatala Fakamahinó mo e Puipuituʻá

Ko e hā e kaunga ʻo e talanoa fakatātā ʻo e ʻakau ʻōlivé kiate aú?

Naʻe akoʻi ʻe ʻEletā Peleni H. Nilasoni ʻo e Kau Fitungofulú ʻo pehē:

A Call to the Rising Generation

There is no greater call than teaching “all nations, baptizing them in the name of the Father, and of the Son, and of the Holy Ghost.”

Ko e ui ʻeni ʻa e Fakamoʻuí kiate kimoutolu ʻa e toʻu tangata kei tupu haké. ʻOkú Ne kole mai ki ha tau talavou mo ha kau finemui moʻui taau, mateuteu mo faivelenga te nau tokanga ki he leʻo ʻo e palōfitá, pea nau tuʻu hake ʻo lea ʻo hangē ko ia ne fai ʻe he Fakamoʻuí tonu, “Ko au ʻeni, fekauʻi au” (ʻĒpalahame 3:27). Kuo teʻeki ha taimi ʻe lahi ange ai ʻa e fie maʻú. Kuo teʻeki hina pehē ʻa e ngoué. Kuo uiuiʻi kimoutolu ke mou ʻalu atu “ko hono fakaʻosí” (Sēkope 5:62). ʻOku ʻikai ha ngāue; ʻoku ʻikai ha uiuiʻi ʻe [toe] maʻongoʻonga ange. (Brent H. Nielson, “Ko ha Ui ki he Toʻu Tangata Kei Tupu Haké,” Liahona, Nōvema 2009, 97)

Ko hai ʻokú ne tataki e ngāue ʻoku fakahoko ʻi he ngoue vaine ʻa e ʻEikí?

Naʻe akonaki ʻa ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

Ko e Teuteu ki he Toe Hāʻele Mai ʻa e ʻEikí.

ʻOku fakamatalaʻi ʻe ʻEletā Kulisitofasoni ʻa e founga hono teuteuʻi ʻe he Kau Māʻoniʻoni ʻi he Ngaahi ʻAho Kimui Ní ʻa e māmaní ki he Hāʻele ʻAngaua Mai ʻa Sīsū Kalaisí.

Lolotonga ʻetau feinga ke faivelenga ʻi hono langa hake ʻo Saioné, kau ai ʻetau konga ʻi hono tānaki ʻo e kakai fili ʻa e ʻEikí pea mo e huhuʻi ʻo e kau pekiá, ʻoku totonu ke tau mālōlō ʻo fakamanatuʻi ko e ngāue ia ʻa e ʻEikí pea ʻokú Ne fakahoko ia. Ko Ia ʻa e ʻEiki ʻo e ngoue vainé, pea ko ʻEne kau tamaioʻeiki kitautolu. ʻOkú Ne kole mai ke tau ngāue “fakaʻosi” ʻi Heʻene ngoue vainé ʻaki hotau tūkuingatá, pea ʻokú Ne ngāue fakataha mo kitautolu (vakai, Sēkope 5:71–72). Mahalo ʻe tonu ange ke tau pehē ʻokú Ne fakangofua kitautolu ke ngāue mo Ia. … Ko Ia ʻokú Ne fakavaveʻi ʻEne ngāué ʻi hono taimí. ʻI hono fakaʻaongaʻi ʻetau ngaahi ngāue taʻe-haohaoá—ʻi heʻetau “ngaahi founga īkí”—ʻoku fakahoko ai ʻe he ʻEikí ha ngaahi fuʻu meʻa lalahi (vakai 1 Nīfai 16:29). (D. Todd Christofferson, “Teuteu ki he Toe Hāʻele Mai ʻa e ʻEikí,” Liahona, Mē 2019, 83–84)

Ko e hā ha ngaahi founga ʻe niʻihi ʻe lava ai ke u ngāue ʻi he ngoue vaine ʻa e ʻEikí?

 

Sharing the Gospel

What we call “member missionary work” is not a program but an attitude of love and outreach to help those around us.

 

Because I Have Been Given Much

With the help of a friend, a young woman in a difficult situation finds hope in the gospel of Jesus Christ.

 

Ngaahi ʻEkitivitī Fakalahi ki he Akó

Ko e mālohi ʻoku maʻu ʻi he tokolahí

Ke tokoni ke fakatātaaʻi ʻa e tupulaki ʻo e ola ʻe lava ke hoko ʻi he taimi ʻoku ngāue fakataha ai ha kakai tokolahi mo e ʻEikí ke tānaki fakataha ʻa ʻIsilelí, te ke lava ʻo fakamoveteveteʻi ha ngaahi laʻipepa ʻe 30–40 ʻi he lokí mo ha ngaahi hingoa pe fakatātā ʻo ha kakai ʻi he ʻū laʻipepá. Tuku ki ha tokotaha ʻe loto-fiemālie ke ne tānaki ki he lahi tahá ʻa e “kakaí” (ʻū fakatātaá pe hingoá) ʻi ha sekoni ʻe 10. Hokó, toe fakamoveteveteʻi e ʻū laʻipepá pea kole ki ha tokotaha ʻe taha ʻe loto-fiemālie ke kau fakataha mo e tokotaha ako fika ʻuluakí ʻi he tānakí ʻi ha sekoni ʻe 10. Fakafehoanaki pe ko e laʻipepa ʻe fiha naʻe tānaki ʻi he taimi ko ʻení mo e lahi naʻe tānaki ʻe he tokotaha akó ʻiate ia peé. Kapau ʻe fiemaʻu, ʻe lava pē ke toe fakahoko ʻeni mo ha kau ako tokolahi ange.

Ngaahi potufolofola kehe fekauʻaki mo e ngāue ʻi he ngoue vaine ʻa e ʻeikí.

ʻOku lahi ha potufolofola ʻi he folofolá fekauʻaki mo e ngoue vaine ʻa e ʻEikí. Fakakaukau ke fakaafeʻi e kau akó ke nau ako ha niʻihi ʻo e ngaahi veesi ko ʻení, ʻo kumi ha ngaahi fakakaukau lahi ange ʻoku nau maʻu fekauʻaki mo e ngāue ʻi he ngoue vaine ʻa e ʻEikí.

• Tokāteline mo e Ngaahi Fuakava 4:1–7

• Tokāteline mo e Ngaahi Fuakava 33:3–11

• Tokāteline mo e Ngaahi Fuakava 39:13, 17–20

Ko ha sīpinga ʻo e kakai ʻoku ngāue mo e ʻEikí ʻi Heʻene ngoue vainé

  ChurchofJesusChrist.org  ʻE lava ke kole ki he kau akó ke nau kumi e founga naʻe tāpuekina ai ha kau talavou ʻi he ngāue ʻa ha niʻihi kehe ke ngāue mo e ʻEikí ʻi Heʻene ngoue vainé.

How One Conversion Grew into a Band of Brothers

Elder Carl B. Cook tells how the conversion of one young man in Africa led to the conversion of 11 others and how they matured together, served missions, and then attended a temple dedication.

“ʻOiauē mou fakapotopoto; ko e hā ha meʻa ke u toe lea ʻaki atu kiate kimoutolú?” (Sēkope 6:12)

Fakakaukau ke fakaafeʻi e kau akó ke lau e akonaki fakaʻosi ʻa Sēkope ʻi he Sēkope 6:11–12. ʻE lava ke fakaafeʻi e kau akó ke nau fakakaukau ki he ʻuhinga ʻe fakapotopoto ai ke muimui ʻi he faleʻi ʻa Sēkope ke fakatomalá ʻo fakatatau mo e meʻa ne nau ako mei he Sēkope 5–6.